Tī 现世,咱看上帝 ê 作为,只有片面,无完全,所见 tio̍h ê 只是一部分,á 是 iáu 无全然展出 ê 现象。总是当咱 khiā tī 荣华永远 ê 圣殿前,咱就会看 tio̍h 全景,看 tio̍h 每一项事 án-chóaⁿ 奇妙结合做一体。
咱 thang 想像 tī 以色列王所罗门 ê 时,黎巴嫩 ê 众山,你 thang 看 tio̍h 一片大丛高高 ê 香柏树。In thang 真骄傲,因为 bat 经历过真 chōe pái 寒冷北风 ê 扫,热天太阳 ê 曝,暗暝露水 ê 湿。有鸟 á 造 siū tī in ê 枝桠,有厌倦 ê 旅客 kap 迁徙 ê 顾羊人歇 tī in ê 荫影下,来闪 bih 炎热 ê 日头,强烈 ê 暴风雨。Siáng 知,忽然间 chiah-ê 大丛 ê 柏香树 tī chhò 材人 ê 斧头下,lóng 倒落去!
咱看斧头 tùi 柏香树 phut 头下所产生 ê 伤痕,koh 将所有枝桠 lóng 总削去,到 kui 丛树大声哀一下倒落去 tī 土脚。咱 beh 抗议 chiah-ê 树受 chhò,受剿灭,大自然受破坏表示愤慨。咱 beh 亲像先知撒迦利亚 án-ni 讲:「松树 ah,lín tio̍h 哮,因为柏香树已经倒!」 (撒迦利亚 11:2)咱 ná 亲像 ài 请 khah 细丛 ê 树表示同情,请无活命 ê 物也表示怨恨 chit 种行为。
咱无应该 chiah 紧就出怨言,是应该 tī「Chhui-lô 往 Hō͘-lân」ê 工人将树运落山,kap chiah-ê 树去看 māi。经过地中海船 ê 运送,最后 tī 上帝 ê 圣殿中成做光光滑滑光辉 ê 大梁。当你想 tio̍h chit 丛树 ê 最后 ê 去处,看 tio̍h 伊成做至圣所全能君王王帽 ê 一粒宝石,你 iáu 会 tùi 心中讲 chit-ê「黎巴嫩王帽 ê 宝石」树 hông chhò 落来,运搬,khǹg tī 尊贵 ê 所在来出怨言mah?Chit-ê 柏香树 bat 庄严 khiā tī 大自然 ê 殿堂里,总是「Chit 间殿后来 ê 荣光,beh 赢过前 ê 荣光。」(哈该 2:9)
有真 chōe 人亲像老 ê 柏香树,上帝试炼 ê 斧头 kā in 削到光光光,咱 bōe-thang 明白为何需要受 chiah 大 chiah 困苦 ê 情境,但是上帝心中有高尚 ê 目标 kap 目的,就是 beh hō͘ in khiā tī 天里 ê 锡安山做永远 ê 大柱 kap 大 kông。伊对 in 讲:「你 beh tī 耶和华 ê 手中做 súi ê 王帽,tī 你 ê 上帝 ê 手掌做冕旒。」(以赛亚 62:3) ――J. R. Macduff