以利亚一礼拜过一礼拜,有 bōe 摇动坚定 ê 信念,看溪水 ná 来 ná 少,到 lóng 干去。伊可能 beh 怀疑,beh 动摇,总是无 hō͘ 环境挡 tī 伊 kap 上帝 ê 中间。无信 ê 心是通过环境去看上帝,亲像咱看日头 hō͘ 云雾所遮盖,soah 看 bōe-tio̍h 日头。总是有信 ê 心将上帝 hē tī 环境 kap 伊 ê 中间,通过上帝去看环境。
以利亚 ê 细细 ê 溪,渐渐干,chhun 一条细细 ê 山水 teh 流,续落去 chhun 水窟,水窟也干去,飞鸟飞走无 koh 来,田野、树林 ê 走兽也无 koh 来 lim。小溪完全干去,tī chit 时上帝 chiah 对忠诚 ê 以利亚讲:「你起来去到 Se-tùn ê Sat-le̍k-hoat。」(列王记上 17:9)
Tī 上帝 iáu-bōe 开嘴以前,咱早早就烦恼、忧虑 teh 想办法 lah。溪水流 ê 声无去,咱 beh 停止唱歌。将竖琴挂 tī 柳树顶,tī 枯焦 ê 草埔行来行去,为 tio̍h 咱 ê 困境 teh 忧愁。可能 tī 溪水 iáu 未干去以前,已经有另外 ê 计画,ǹg 望上帝帮赞,thang 到别所在 lah。
上帝常常 kā 咱 tùi 困境中救出来,因为「伊 ê 慈爱永远 tī-teh」。(历代志录上卷 16:34)若是咱肯耐心 thèng 候,就会看 tio̍h 伊 ê 计画一步一步展开,bōe 致到围困 tī 看无出路,bōe-thang 脱身 ê 迷宫内。也 m̄ 免常常行回头,行 chōe-chōe 冤枉错误 ê 路,流真 chōe 见笑 ê 目屎。
「Tio̍h thèng 候耶和华。」(诗篇 27:14)耐心 thèng 候!――F. B. Meyer