我 bat án-ni 相信,当我祈祷 soah,我 ài 努力去 chhē 求解决,这是我 ê 责任。总是上帝教我有 khah 好 ê 方法,hō͘ 我知家己 ê 努力常常会阻挡 tio̍h 伊 ê 作为。伊启示我,当我祈祷了,ài 对伊有信心,将事交托伊,用 o-ló ê 心 thèng 候,只要做伊指示我所 tio̍h 做 ê 事。静静 thèng 候,甚么事也无做,完全信靠主。这 hō͘ 咱会感觉 tio̍h 无把握 ê 款式,这是真大 ê 诱惑,lóng 会 hō͘ 咱想 beh 家己去 tàu 相仝。
咱知,当一个人 tī 水里 beh 淹死 ê 时,伊 lóng 会想 beh 帮赞去救伊 ê 人,总是,这 lóng 是增加去救 ê 人 ê 困难。主替咱去争战,咱却 ài 本身拚命想 beh 家己去战,是增加主 ê 困难。这 m̄ 是上帝 m̄ 肯,是伊无办法进行,因为咱 ê 干涉妨碍 tio̍h 伊 ê 工作。――C. H. P.
当咱靠世间上力量 ê 时,精神 ê 力量就发挥 bōe 出来。
咱常常无 hō͘ 上帝工作 ê 机会,咱无明白伊回答咱 ê 请求是需要时间。上帝 hō͘ 玫瑰花色致,á 是种一丛松树,lóng 需要时间。伊也需要时间 hō͘ 稻田来出米 hō͘ 人食,先 ài 准备土,将土 chhòng hō͘ 伊松,需要雨水来润泽,伊赐性命 ê 活气、热气来 puh 芽,成长,到结实有真 chōe 粟 á,最后 chiah 有米 thang hō͘ iau 饿 ê 人食。 所有 ê 事 lóng 需要时间,所以咱种田、犁田、播田,然后 ài thèng 候 koh 相信,直到伊 ê 旨意实现。咱 tùi 种田明白 chit-ê 原则,咱 ê 祈祷生活也需要学 siāng 款 ê 教示。上帝需要时间回答咱 ê 祈祷。――J. H. M.