「我 tī 暗中 kā ín 讲 ê,lín tio̍h tī 光明 ê 所在讲出;Àⁿ tī 耳孔 kā lín 讲 ê,tio̍h tī 厝顶传伊。」(马太10:27)
咱 ê 主常常 tī 暗中 kā 咱讲话,可能是当失去亲人单独 tī 暗暗 ê 厝内,也可能是 tī 孤独、凄惨 ê 时,也有时 tī 破病 bōe-thang 起来,无 kap 人接触 ê 时,也有时是 tī 悲伤失望 ê 乌暗暝。
Tī hia,伊将伊 ê 伟大、奇妙、永活 ê 奥秘 kā 咱讲。咱 hō͘ 世间 ê 事务迷 kah bū-bū ê 目睭,伊 hō͘ 咱看 ǹg 天 ê 灿烂。咱 ê 耳孔也 beh 听 tio̍h,常常 hō͘ 世间吵闹所盖伊 ê 声音,可能是 tī 耳孔边细细 ê 话。不过,chiah-ê 启示也带来责任:「我 tī 暗中 kā lín 讲 ê,lín tio̍h tī 光明 ê 所在讲出;....,tio̍h tī 厝顶传伊。」咱 m̄ 是永远停 tī 暗室,留 tī 暗中,无久,咱 beh 受呼召到人生 ê 喧哗 kap 暴风雨中 ê 所在。Hit 时咱 tio̍h 将咱所学 tio̍h ê 讲出来,宣扬出来。
Án-ni 受苦有新 ê 意义。受苦 siōng 悲哀 ê 部分定定是引起无路用 ê 感觉。咱 bōe 免会想 tio̍h「我 chiah-nih 无路用,我所做 ê 有甚么路用?我灵魂 ê 贵重 ê 香油(参考约翰12:3)为什么浪费掉?」Chiah-ê lóng 是受苦者 ê 呼叫,但是父上帝 tī 这一切 lóng 有伊 ê 旨意。伊 beh 将伊 ê 子民带到 kap 伊 khah 高交往 ê 层次,hō͘ in 能听 tio̍h 伊 ê 讲话,「面对面讲话,亲像人 kap 朋友讲话一般样。」(出埃及记33:11)然后落山对人宣扬伊 ê 信息。摩西 tī 山顶四十日 kiám 是浪费掉 mah?以利亚 tī 何烈山所过 ê 日子,á 是保罗 tī 阿拉伯沙漠所过 ê 年日,也 kiám 是浪费 ê mah?
过信心 ê 生活是无 khah 短 ê 路 thang 行,信心 ê 生活是圣洁、胜利 ê 一生所绝对需要 ê。咱必须有一段单独 kap 上帝 tī-teh ê 深思时间。咱 ê 灵魂需要 kap 伊作伙 tī 山顶 á 是大石头 ê 音影中感受 tio̍h 安宁 ê 时 chūn。咱需要 tī 乌暗遮盖大地一切,万物 lóng 静静,星光 teh 照过暝。这 hō͘ 咱 ê 眼光看 khah 阔,显出无限 kap 永远。Chiah-ê 种种事 lóng 是亲像食物对咱 ê 身体所 bōe-thang 欠缺。
咱若有 chit 款 kap 上帝同在 ê 感受,咱 ê 灵魂就永远 bōe 动摇,咱 beh 亲像诗篇所讲 ê「耶和华 ah!你是近近。」(诗篇119:151) ――F. B. Meyer