这是咱需要为家己 kap 别人互相祈祷 ê 祈祷词:主 ah,求你开阮 ê 目睭,hō͘ 阮能看见,hō͘ 阮亲像先知以利沙 hō͘「遍山火尾火车围,」(列王纪下6:17)等待载阮去荣光胜利 ê 所在。
一旦开咱 ê 目睭,咱便能将一生大大细细,悲哀 á 是喜乐 ê 事,看做是来保护咱灵魂 ê「战车」。咱若会 án-ni 看,咱所 tú-tio̍h ê 一切 lóng 是 beh 载咱 ê 战车。反面来讲,细细 ê 试探,咱若无 chha̍p 伊,伊也会大到能 teh 碎咱头前 ê 一切 ê 物,hō͘ 咱痛苦 kap 绝望。
差别是在 tī 咱如何选择,m̄ 是在 tī 事 ê 本身,是在 tī 咱 tùi 事 ê 看法。若是咱 beh 倒 teh,hō͘ 一切 ê 物来 teh,来研 tī 咱 ê 身上,咱会 hông 研到碎 kô͘-kô͘,án-ni hit-ê 物就是控制 bōe-tiâu ê 毁灭车;但是咱 peh tī 车顶,驶 hit-ê 物,伊就变做胜利车。In 就是上帝 ê「火车」,凯旋将咱带向前,带上天。――Hannah Whitall Smith
一个受 teh 碎 ê 灵,连主也无办法。这是为什么 hit-ê 反对咱 ê 撒旦,lóng beh hō͘ 上帝 ê 子民对 in ê 环境,感觉绝望,无人 thang 帮赞。有人讲,军队 ê 士气若低低,散慢无精神,去战场一定会输,会失败。我听 tio̍h 一位传教师,讲伊回复就破病,心情真 bái,因为伊精神上已经失去勇气,就引起身体无好势,soah 破病。
咱 tio̍h ài 认识撒旦如何打击咱 ê 心灵 kap 如何来抵抗 ê 方法,若是伊会摇动咱 ê 立场,伊就 beh 用长期围困 ê 方法。「In beh 抢夺王 ê 权,毁坏伊,灭无伊到彻底。」(但以理7:25)直到咱软弱 soah 放弃一切胜利 ê 希望。