《生活e5台语，台语e5生活》

 | | | 转寄

序：基督新教之光――王世勋ê文化见识kap政治智慧

作者 宋泽莱 2007.09.09

《台湾海峡国际角色变迁之历史研究》chit本册就beh出版loh。作者是台湾乡土文学作家、现任ê立法委员王世勋。

这是近年以来，王世勋所写有关文化论述ê第二本册，是接近十万字ê长篇硕士学位论文。另外一本是印刻出版社tī 2003年所印行ê《六十七个笑声》文化短评集。

尽管表面上jōa-ni̍h-á无仝，但是chit两本册之间却隐藏有极深ê关系。

四年前出版ê《六十七个笑声》共收集了伊ê六十七篇文化短评。品评ê文化种类除了文学作品以外，iáu涵盖电影、历史kap宗教；批评ê范围除了台湾本土作家ê作品之外，iáu涵盖中国、日本、南亚、捷克、爱尔兰、美国kap到m̄知名ê国度ê作家作品；被评ê人物包括基督、马丁•路德、杨逵、东方白、余光中、白先勇、陈履安、张艺谋、叶慈、瓦勒拉、卡夫卡、伊力•卡山、奈波尔、林献堂、德川家康、西乡隆盛、福泽谕吉......。Tùi chiah-ê名目来看，四年前，王世勋ê文化见识kap宗教认知早就已经达到非常深入广博ê境界，当teh等待一个机会，将chiah-ê见识统合起来，构成一个彻底ê属tī伊自已ê文化见识kap政治智慧。终其尾tī 2007年ê现在，伊chit本硕士学位ê论文集写出来lah，完善了伊ê文化观kap政治观。

一前一后ê chit两本册ê lóng真精采，写作ê立场koh kap chit几年伊ê信仰脱bōe离关系。

简单来讲，chit两本册透出基督新教ê真光，特别是chit本《台湾海峡国际角色变迁之历史研究》如果无用基督新教ê眼光来照看，就无法度了解中间ê奥义。

Án怎讲竟然会án-ne neh？讲来并m̄是一个真容易就ē-tàng讲清楚ê问题。

Bē记得tùi什么时chūn开始［我应该比王世勋小khóa早几年］，阮两人lóng被圣经吸引lah。

Tú开始，阮只是单纯被圣经里耶稣博爱ê行止kap智慧ê言谈所感动，感觉这是一本不得了ê好册。跟tòe阅读kap祈祷，真chē神迹、启示、异象、异梦不断tī阮ê日常生活中出现了，将阮带入圣经所记载非常特殊ê神秘境界ê中间，hō͘阮koh-khah了解以色列人ê神――耶和华；基督教会ê首脑――耶稣；以及参与创世奇迹无所不在ê万民保惠师――圣灵，这圣三位一体ê极深奥秘。阮终其尾受洗lah，成做马丁路德教派中ê一个教会ê信徒。

既然身为一位基督徒，阮就必须不断ê聚会。阮聚会ê家庭小组大约有五、六人左右，本来聚会ê地点lóng tī鹿港ê我ê厝，每两、三个礼拜就聚会一pái；后来为tio̍h替诗人吴晟ê疾病祈祷，阮转移聚会ê地点到溪州吴晟ê厝里。Tī聚会ê时，阮bē-tàng避免来谈论起目前ê文学kap文化［王世勋、吴晟、我kap真chē好朋友bat联手办过《台湾新文化》《台湾新文学》chit两大刊物］，因此常常互相绍介一kóa书籍。我会记得阮讨论过韦伯ê《基督新教伦理kap资本主义精神》、杭亭顿ê《文明冲突kap世界秩序ê重建》、福山ê《信任》、兰迪斯ê《新国富论》、杭亭顿主编ê《为什么文化真重要》、甚至是彼得•杜拉克所写ê一系列ê有关各国企业ê重要书籍。本来阮并无发现中间有什么奇怪ê现象，后来chiah发现chiah-ê册lóng是kap基督新教精神有关ê书籍，尽管写册ê人无一定是基督新教徒，但是in一致推崇基督新教徒hit种虔诚信仰、克勤克俭、奋发向上、自由平等独立ê真精神。当时，我kap王世勋tú被带向基督新教ê精神境界中。

我想，王世勋对chiah-ê册ê阅读比我koh-khah详细、全面。因为两年前，伊考入去中兴大学ê「国际政治研究所」，开始对「地缘政治学」中ê文化问题做专门ê研究，阮所讨论过ê书籍tú好lóng牵涉tio̍h广阔ê目前世界文化•政治•经济现况，ē-tàng提供真chē ê资料hō͘伊进行研究。但是，我万万无想tio̍h，chiah-ê书籍kah-ná非常猛烈刺激tio̍h伊，替伊型塑一种优美ê、坚定ê、正确ê文化•政治观，一下á就hō͘伊掌握世界文明•政治ê大趋向，这正是目前台湾ê文化•政治界ê学者所缺乏ê真少有ê实用观点……chit-ê结果，有点á hō͘我tio̍h惊。

大部分看起来，东方ê学者tī研究世界文化•政治ê时因为siuⁿ过了解家己ê东方文化，就高估儒家文化、印度文化，真容易陷入东方本位主义ê陷阱，对西方文化采用了过度ê抵挡、拒绝排斥ê态度。准讲有kóa学者去过西方研究机构从事文化研究，却因为缺乏对基督新教ê真实体验，对tī基督新教ê精神下脚发展起来ê目前西方文化无法度了解，甚至真chē所在误解，终其尾hō͘ in ê研究无法度客观，埋落来夜郎自大ê东方本位主义ê pháiⁿ判断，对tī文明ê未来路向就采行倒退论或虚无论，致使kui-ê结论lóng m̄-tio̍h去，对他者ê西方kap家己ê东方终其尾无一点点ê好处。

对tī东方学者ê chit-ê普遍缺点，以前我kap王世勋lóng bat有过。

原来，我kap王世勋lóng bat花费无数ê精神kap体力，身躯力行，对东方ê儒学、佛学甚至是道术做了[撒身悬崖]ê追求。但是因为m̄是西方人，尽管真用功阅读世界文明ê书籍，可惜总是感觉对西方ê了解隔了一层，无法度彻底了解其深义，西方文明hit-ê区块变成一个无法度塡补ê乌洞，论起世界ê文化文明就感觉真心虚。Ē-sái讲是，当阮有基督新教ê信仰了后，对西方ê文明就变kah真ē-tàng掌握，阮变kah忽然ē-tàng知影今á日ê西方为什么会变成án-ne ê深层原因，对韦伯、杭亭顿、福山、兰迪斯chiah-ê当代学者ê言论有高度ê理解。Hit-ê乌洞被填补起来，对西方文化文明无koh生份，soah变kah真亲切起来。

另外，以前因为无法度理解西方文化，到最后患tio̍h一种不断退回东方文化自我中心主义ê病症，头尾无法度真正来做一个自我整顿ê工作。后来因为对基督新教ê精神有所体会，就提供hō͘阮一个极高ê文明参考座标。阮ē-tàng通过基督新教ê眼光来了解、品评其他文明。以前虽然mā知影家己ê东方文明出了问题、缺陷一定真chē，若无bē演变到chiah-ni̍h衰弱ê地步，可惜lóng是指bē出来，chit-má就真清楚，阮开始掌khiā-tī一个世界文化ê制高点，ē-tàng照看一切，阮无koh盲目，拥有chit种自我khàng粒á疕ê chiah ē-tàng hō͘家己因此感觉无比清醒，是真愉快ê经验。

王世勋chit本《台湾海峡国际角色变迁之历史研究》ê论着，就是tī chit种精神状态中写成ê，绝对m̄是东方本位主义者ê书籍thang比ê。这是阅读chit本册第一重要ê一个认知。

其次，虽然chit本册看起来是kā杭亭顿「文明冲突理论」运用到台湾海峡ê历史现实做分析，指出世界各大文明如何tī台湾海峡夺取霸权ê经过kap影响，但是王世勋mā采用杭亭顿ê论敌福山ê一kóa主张，认为将来民主自由会tī台湾海峡两岸实现开来［尽管目前iáu无充分ê条件］。可见chit本论着m̄是完全kā重点khǹg-tī「区域冲突论」顶面ê论着，却是兼具「全球化」观点ê一本论文。

Koh再其次，tī chit本册内底，伊对台湾海峡ê历史考察非常深刻，已经超出我chit-ê学历史ê人ê学养范围，假使m̄是对台湾ê有深切ê关怀，无人愿意花费chiah-ni̍h-chē时间来进行chit种ê考察。

Tùi顶面chit两点看起来就知影，王世勋一向所关怀ê「普世ê自由民主价值」kap「本土价值」tī chit本册占有极特殊ê地位。

Tńg来到头前来谈，我讲chit本册是khiā-tī基督新教精神ê立场来写作ê，因为对基督新教有一定ê热诚，就koh有全球化ê观点，致使伊对后殖民主义ê理论家萨伊德有做深刻ê批评。伊指出，萨伊德批评奈波尔［生长tī千里达ê印度人，2001年ê诺贝尔文学奖ê得主，揭露回教文化弊病ê作家］是自暴其短ê行为，因为萨伊德只ē-tàng写出《被遮蔽ê伊斯兰》chit种册，认为阿拉伯人ê形象被西方国家百般扭曲，但是对tī「无被遮蔽ê伊斯兰」却无法度写出半句话语，伊非常受气来批判ē-tàng写出阿拉伯文化真相ê奈波尔是一件非常可笑ê tāi-chì。王世勋特别引述路易斯(Bernard Lewis)所讲ê：当hiah-ê人发觉tāi-chì出了差错ê时，可能会问两个问题，一个是：「我做错了什么？」另外一个是：「谁害阮ê？」前者是近代日本明治维新ê思考，后者是近代拉丁美洲ê思考。王世勋暗示萨伊德ê思考是拉丁美洲ê思考，只是一种kā家己ê失败一直往别人身上推ê pháiⁿ思考，无值得来重视。王世勋ê看法真值得台湾文化•文学界ê学者注意，因为后殖民理论tī台湾已经流行十年以上，已经变成所有文化•文学ê研究生必修ê课程，有人早to̍h将萨伊德奉为神明，从来无思考伊ê理论tī现实上究竟起了什么作用［mā可能一点作用都无！］，将来可能iáu会继续推崇chit-ê主义。根据我个人ê看法，萨伊德ê后殖民理论如果用来批判国民党对台湾ê殖民，the̍h来引chhōa台湾人「脱国民党ê中国化」，我认为是适当ê，因为国民党所带来ê文化是一个封建性•藩镇性极强ê pháiⁿ文化，反科学、反民主、好贪污、自私自利ê文化，tú好应该将伊扫地出门。如果是用来「脱欧美化」，我看免lah！台湾目前ê文化非常无竞争性，科学、民主ê根基薄弱，当teh需要koh再全盘西化ê时chūn，「脱亚入欧美论」chiah是正论，无算是boeh 对欧美日chiah-ê国家去殖民化。

总讲一句，tī批评萨伊德ê时，koh-khah显出王世勋是一个全球化理论者，伊是一个竭力主张台湾改变家己，全力介入全球竞争ê论者。伊批评萨伊德，chit点ē-sái讲是目前盲目ê台湾学文化•文学界ê一件大事！

Án-ne为序！ ――2007、09、01 tī鹿港寓所