《生活e5台语，台语e5生活》

 | | | 转寄

安全帽ê奋斗记事

作者 陈小小 2007.07.15


骑机车载gín-á出门，但姊弟两人lóng无欢喜戴安全帽，因为真烧热koh真重。特别是姊姊，常ài我kā伊绑两条辫子，hit种翘得高高ê可爱造型，m̄是古早时代发辫贴tiâu耳孔边后面下垂ê闺秀型。梳chit种头ê时chūn，伊koh-khah boài戴安全帽，因为会kā伊美丽ê发型破坏掉。

Tú开始，我lóng是采用恐吓法，「无戴，会hō͘警察掠去oh！」不过我心里是真讨厌chit种讲法。而且in发现chia警察真少，甚至有时警察看tio̍h in无戴安全帽mā无掠in。

后来我想了另外一种讲词，kā-in讲：「妈妈细汉ê时chūn，安全帽ē-sái讲是奢侈品，有钱人chiah ē-tàng戴。（当时连o-to-bái lóng真少看tio̍h，多数人是行路或骑脚踏车，mā无容易买tio̍h安全帽。）

外公是工程师，常常tio̍h骑o-to-bái到真远ê工地监工。伊无安全帽thang戴，只ē-tàng戴hit种防止落石击头ê工程帽，但有帽á戴已经是真了不起loh。妈妈kap a舅细汉ê时chūn lóng看卡通《科学小飞侠》，安全帽ná亲像科学小飞侠ê头盔。有时sńg游戏，会偷the̍h外公ê帽á来戴。Lín戴安全帽，就会kap科学小飞侠仝款帅oh！」

不过，án-ne讲mā无用，现在ê gín-á真聪明，in bē感觉戴了安全帽会变成科学小飞侠。特别是in现在无流行科学小飞侠。姊弟两人iáu是无欢喜戴安全帽。革命iáu未成功，我这做妈ê iáu tio̍h继续努力。

有一工我想tio̍h家己ê车祸经验，kā in讲：「Lín tio̍h感谢安全帽oh，有一pái安全帽保护妈妈。若无安全帽，lín今á日就无一个súi ê妈咪，只ē-tàng有一个面bái ê妈妈。」chiah-ni̍h惊人ê话题，姊弟两人就有兴趣loh，竖(khiā)直耳孔专心teh听。

「妈妈大学毕业工作，thàn了钱买一台o-to-bái，koh开了一千gōa kho͘买一顶全罩式安全帽。Hit时别人lóng羡慕我有o-to-bái，但lóng感觉我真戆、koh浪费，根本无需要买全罩式安全帽。但事后证明我chiah是聪明ê。

因为，有一pái我kap爸爸骑o-to-bái去郊游，突然hō͘汽车撞tio̍h后pêng边a。爸爸因为手掠tiâu车头，所以跟tòe一歪，连人带车摔到路边田里；妈妈坐tī后座，kui-ê人像超人án-ne纵身向前飞出去，头、胸坎先落地，并滑行一小段距离。

妈妈当时胸坎á痛kah仆tī地上bē振动，爸爸行过来，认为我死去ah，竟然kā我翻身过来，抱tio̍h hoah我ê名，我痛kah大叫「mài动我lah。」hit台汽车就趁chit-ê làng缝溜soan去。

后来，我kap爸爸身躯lóng是轻伤，但车毁了，安全帽磨损严重。两人不约而同lóng感觉好佳哉有戴全罩式安全帽，若无下颏骨头一定碎裂，嘴齿m̄知boeh落几齿。」 （注：根据统计，骑士ê下颏区域有高达35% ê机率会遭遇tio̍h冲撞）

姊弟两人听了kah-ná有晓悟，每pái骑o-to-bái出门就自动乖乖á戴安全帽，lóng m̄免我提醒。但是人类侥幸、省事态度kap唯美心理，实在远超过人身安全意识。若是骑真短距离，in有时mā会懒得戴安全帽。想讲横直chiah一下á，bē发生什么意外pah？tú应验圣经所讲ê无m̄-tio̍h，每一个人内底有严重ê自我毁灭趋势。

我最后只好kā好朋友王医师搬出来。我对姊弟两人讲：「Lín知m̄知影，是谁推动『骑机车tio̍h戴安全帽』ê法律？lín mā认识伊oh！」姊弟两人lóng真好奇，「是谁ah？」我回答讲：「就是王医师in发现：当发生o-to-bái交通事故ê时，因为速度惯性，头部往往首当其冲或tāi先坠地。」

并讲kah有声有影，「lín去过病院急诊室loh！m̄是有真chē少年人全身鲜血被送入来？hiah-ê真chē是车祸肇事。王医师in做医生ê，tī急诊室里看siuⁿ-chē了chiah-ê悲剧lah。所以in努力推动『骑机车tio̍h戴安全帽』ê法律通过。」

续落来对姊弟两人讲：「Ē-sái讲是大家lóng像lín仝款，感觉王医师in真无聊，国家chhòng啥boeh立chit种法？安全帽戴起来真烧热koh真重。警察koh-khah是讨厌，四界掠无戴安全帽ê人。被掠tio̍h iáu-beh罚钱。

Ē-sái讲是lín知影mah？因为chit条法律通过，所以全国车祸死亡率大幅降低。真chē家庭ê爸爸因为有戴安全帽无死，所以iáu ē-tàng继续thàn钱饲一家人；真chē家庭ê妈妈因为有戴安全帽无死，所以iáu ē-tàng继续做家事。根据统计，一个人死去，平均会有六个人难过伤心。Lín想看，若爸爸妈妈无戴安全帽车祸死去，kám bē真伤心neh？

王医师in虽然hō͘真chē人骂，但实际上却拯救了真chē家庭bē致使破碎neh！却无人知影，beh向in道谢。Lín戴安全帽ê时，也tio̍h纪念王医师in ê努力oh。」

讲到chia，禁bē-tiâu想tio̍h上帝ê律法，mā是án-ne。咱lóng是感觉真麻烦，真无方便。Ná亲像十诫里ê「bē-tàng作假见证」，就是bē-tàng讲白贼。Bē少基督徒可能tú信主ê时，会努力遵守。但是久了就顽皮。因应时势、考虑大局，小讲一个白贼或是做一个假见证有什么关系，上帝何必凡事lóng hiah-ni̍h认真？

这就kap戴安全帽有点á类似，当伊成了习惯，无戴就会感觉怪怪ê。但是戴安全帽iáu无成做习惯chìn前，表面看起来是每pái骑车chìn前，不断来做选择「戴？或是m̄戴？」实际上，心里每pái ê念头lóng是「m̄戴」，却是靠各种理性思辩或罚款压力来帮助家己戴起lih。

仝款ê，「bē-tàng作假见证」若无变成咱ê生命习惯chìn前，事实上心里每pái ê念头lóng是「讲白贼比较khah方便」，却是靠各种理性思辩或白贼被拆破ê压力来帮助家己mài讲白贼。

遵守上帝ê律法看起来kah-ná麻烦或愚戆，事实上透过遵守律法，thang帮助咱将chiah-ê行为规范化成生命内涵，成做习惯，mā就是所谓ê「脱去旧我」，一步一步提升成做配得耶稣十架代赎所hō͘咱「新造ê人」身份，享受真自由。

Thang悲哀ê是，上帝所设ê律法kap王医师in努力推动ê『骑机车tio̍h戴安全帽』ê法律仝款，虽然救人无数、会带hō͘ hiah-ê人幸福，但是却被无知ê hiah-ê人咒骂「无聊，真是teh chhōe麻烦」，hiah-ê人khah大面看bē-tio̍h律法ê设立，原是带有无限ê爱kap恩典tī背后。

姊弟两人自从了解『骑机车tio̍h戴安全帽』ê法律形成原因，现在即使只有一分钟ê o-to-bái车程，in mā主动戴安全帽。虽然我m̄知影王医师chit张牌ē-tàng用jōa久，毕竟我koh-khah深知人类内底侥幸、省事态度ê趋势是thang惊ê强大，但是至少我hō͘ in看见律法kap恩典是常常同时存在ê。