《生活e5台语，台语e5生活》

 | | | 转寄

中风了后ê现象

作者 高英男 2007.03.11

我ê丈母Chiong Siù-khêng女士，高雄县内门乡埤后ê人， 1947年生。伊出世tī一个基督教(长老教会) ê家庭， 自细汉就接触教会罗马字。一直有高血压ê症头(血压平常lóng保持tī 170、180以上)， bōe困，头壳gâu gông， gâu晕车，血运无好。1998年年底中风到taⁿ。

Kap平常时siāng款， hit一日透早，我ê丈母早早就过去kám-á店开门做生理。Kap丈人交换班了后，换浅拖准备beh洗衫ê时，发觉伊ê chiàⁿ脚穿bōe着浅拖，tùi脚底开始麻，到手，然后到面，就án-ni发病中风。Kui-ê面lóng歪chhoa̍h去， 大小便失禁。丈人要紧用针凿丈母ê指头á，随chhiàⁿ车送林口长庚病院急救。透过病院ê脑部电脑hip相知影，头壳内有一块约略直径7公分ê血角teh-tiâu leh。

经过两工ê昏迷，精神了后，我ê丈母chiàⁿ半身bōe tín动mā无感觉， khah心适ê是伊上liàn-tńg ê台语soah bōe晓讲半句， kan-ta会晓讲北京语nā-tiāⁿ。产生听台语，讲北京语，大舌koh hèng-thi̍h ê现象。譬如讲：问伊有khah好势无？伊会tìm头应讲：『好！谢谢』 (有时伊会摸ka-tī ê手kap脚讲：『我的手和脚不能动了』)。教会ê会友来探访，伊会表示，我祷告让上帝给我（赶快）好，回家煮饭(我ê丈母真gâu煮食)。用提示ê方式请伊认人，伊会tìm头回应(『是我的女儿』)。丈人kā伊穿尿chū-á，手势无顺，伊会埋怨嫌讲：『你都不会穿』。我ê姨á kā伊饲饭，因为伊半pêng ê面无感觉，致使嘴唇、嘴舌，咬kah流血流滴，伊会反应， siuⁿ过头大嘴，伊咬无法，以上等等。

Chit种情形约略维持有一个月久。另外，tú-á出院hit段时间，丈母ê目chiu mā有变化，伊感觉看电视ê时， ná亲像望远镜sa tò-péng看一样，银幕变真细。因为丈母真kut力复健，致使伊ê心、身lóng恢复了真紧。

现此时ê伊kap正常人siāng款， kan-ta感觉脚、手会麻、头壳会晕kap bōe困ê症头îⁿ缠伊。另外一方面，我感觉伊tī言语ê表达、反应kap思想，亲像早前ê 变窍hiah紧一样，并无受中风ê影响。心理方面，对伊ê言行用举止，hō͘阮感觉伊真无安全感，真自卑。这是阮无法度去理解伊ê内心ê所在。M̄-kú我ê丈母ê积极siāng时亦hō͘我有体会复健ê重要。