《生活e5台语，台语e5生活》

 | | | 转寄

讲我美丽又koh生份ê母语― 聚会使用语言ê省思

作者 徐玫玲 2006.12.10

台湾基督长老教会ê聚会传统是以母语为主，所以自细汉tī教会中习惯使用台语。Tī学校教育强制boeh kā台语消灭ê时空下学习华语，但放学了后真自然tī厝内学会晓日常生活中ê台语对话，甚至有时iáu真得意听bat厝内长辈用日语讲gín-á m̄是ê谈话；tī教会中，则注意听牧师每周一pái经过几nā pái构思ê文雅台语，日积 月累，也bōe记得tang时，台语真正成做我ē-tàng流利使用ê语言，当然也成做我认知中ê母语。今á日回想起来，台湾基督长老教会对母语聚会ê坚持，实在对台湾当今母语ê推广极有贡献。当然，了后又koh学会晓ê外国语文，则帮助我方便接收真chē资讯，这是我tùi小到大ê语言经验。

M̄知tang时开始，tī白色恐怖时代坚持使用母语聚会，七十年代m̄惊白话字圣经被没收ê感动人精神，却tī解严后不敌年轻世代语言ê变迁，纷纷以「传福音」hō͘少年人ê考量，某种程度soah弃守对母语ê坚持。Chit种ê困境，我也亲身体验过：大cha-bó͘-kiáⁿ tī德国出世，tī回台读小学一年chìn前，伊tī厝内ē-tàng讲正港ê台语，tī幼稚园ē-tàng讲同年纪gín-á程度ê流利ê德语，礼拜日去华语教会，也自然讲起带tio̍h德语腔ê华语。Án-ne看起来kah-ná有点á厉害ê状况，tńg来到台湾完全走样，因为一接受学校ê认字教育了后，伊脑中ê语言系统全lóng是华语，kap死党mā lóng是以华语哈拉，m̄-nā无愿意讲台语，德语也bē记得kah一干二净。我终于体会tio̍h学校教育kap同伴团体对孩童语言ê强烈影响，所以tī厝内，我siōng罗唆ê一句话就是：「讲台语！」这是我gín-á ê语言经验。

Bē-tàng否认，每一个世代lóng带有无仝ê语言习惯kap经验，家庭中所使用沟通ê语言，是父母文化认同ê选择，但咱却常常听tio̍h阿公阿妈teh讲所谓ê台湾华语，为tio̍h是boeh kap宝贝孙á沟通，chiah会有时下流行ê「粉可爱」、「看电ㄙㄨˋ」之类ê词语出现，父母kap gín-á koh-khah有用台语kap华语互答ê对话。这是一种透过语言所呈现复杂ê文化现象，但是咱是m̄是也tio̍h思考，是谁剥夺了gín-á学习家己母语ê机会？是大人siu°过爱护in, siu°过保护in,或者siu°过以成人ê学习限制来抹煞众细kiáⁿ ê学习潜能neh? 国家所选用ê语言政策是「政治性」ê考量，常常是为tio̍h巩固具有权力之统治阶级，所以地球上弱势族群ê语言常有面临消失ê危机。Á咱ê「信仰」应该phah破无仝语言ê藩篱，tī上帝ê疼内面彼此沟通。但是，「传福音」却是kap语言ê使用息息相关，这thang tùi来台湾ê外籍宣教士为着传讲福音ê缘故，用心学习华语或台语ê实例看出。所以，目前真chē长老教会因为「传福音」之故，tī礼拜日开设两堂讲道ê时，根本无需要考虑就将聚会语言真直接来划分做一堂华语，一堂台语，美其名是拓展m̄-bat台语ê会友，但实际上，bē少教会因此人数增长ê非常有限，反倒方便无法度早起或礼拜日有tāi-chì ê会友，错过chit堂iáu有下一堂，省得iáu会接tio̍h关切ê电话！Chit种ê逻辑就ná亲像改变聚会ê方式，以所谓敬拜赞美、外表活泼ê诗歌吸引少年人，聚会人数就ē-tàng直线顶升ê速食思考！

东门长老教会结局kap其他长老教会仝款，ài面对聚会语言抉择ê问题。这是大家应该tio̍h好好祈祷ê tāi-chì,是bē-sái根据「会友民调」来决定chit两堂是beh用toh一种语言来进行。未来ê chit一步是tio̍h谨慎而且坚定ê!总..是，我只有一个疑问，当咱ê gín-á tī教育部规定ê小三时开始学英文，或如真chē小学tī小一时就偷走教英文，真chē小学生英文真溜ê同时，却bē晓讲家己ê母语；tī教育部全面培植母语教师，推行母语教育，咱长老会颠倒不断放弃过去ê美好传统，kap社会虚伪ê高尚语言文化妥协，这代表ê是什么意义neh?坚持以母语来聚会，是历经台湾政治长期戒严真正「焚而不毁」ê见证，今á日为tio̍h某种重大ê缘由，假定开设了另外一堂华语ê聚会，án-ne kui-ê教会应该iáu是ài有真清楚ê语言坚持，这m̄-nā是tī礼拜日ê聚会，甚至tī主日学、少契、社青等lóng应该鼓励多使用台语，并请尽量tùi老师、辅导者做起，ná惊只是台语、华语参杂使用，lóng会有真好ê教导作用，致使台语tī教会中ē-tàng传承落去。现在三、四十岁chiah-ê世代，tī成长阶段，其父母基于政治上ê考量，大多数无做讲台语ê要求。等chiah-ê世代ê人成做父母，tī经历「转换ê母语」(tī学校被要求ê语言替代自然ê母语) 后，当然也忽略了对家己gín-á讲母语ê教育。现在母语对真chē人来讲，是相当生疏，但请练习讲属tī家己美丽又koh生份ê母语，这并m̄是狭隘ê语言观念，却是只有透过对母语ê学习、认同，chiah会清楚知影你是toh一块土地所孕育ê子民，chiah会晓感恩伊、珍惜伊。台湾长老教会久长以来持守「钉根土地、关怀弱势」ê信仰观，正是实践chit项语言坚持ê信仰告白。