《生活e5台语，台语e5生活》

 | | | 转寄

咱来演台湾布袋戏――分享《马偕过台湾》自编、自导、自演ê经验

作者 Chuniok 2005.07.29

布袋戏是台湾文化ê代表之一，Boston台语进步社为tio̍h推动拯救台湾母语运动，tī 2001年成立「蕃薯园布袋戏团」。

为tio̍h beh tī 2002年初(庆祝台湾新年)台湾同乡会ê年会中演出布袋戏，当时tī哈佛大学教台语ê李勤岸教授，向Chicago ê陈清风教授借《蛇郎君》布袋戏尪仔、录音带、布景、道具等来排练。阮tī一个月内设计舞台、画布景kap排练，结果[一鸣惊人]，热烈ê掌声鼓舞阮继续向前走落去。

李勤岸教授建议续落去演《鸭母王―― 朱一贵ê故事 》，我就利用三月tńg去台湾故乡pōe墓ê时，顺续去竹山向kap陈清风教授搭配ê刘进春大师订购17 sian尪仔，并向伊学习武戏ê拔(pu̍ih)剑、挥剑、射箭等技术。Tńg到Boston就迫切等候陈清风教授答应beh寄hō͘阮ê剧本kap录音带，一日过一日，一月过一月，一年过了mā是等无。约束beh tī 2004年美东夏令会演出布袋戏ê日期(七月初四)chhun无半年，阮只好家己设法自编、自导、自演loh。

Beh演布袋戏，事(tāi)先ài有剧本。阮决定beh演《马偕过台湾》，我将马偕ê故事写做剧本ê初稿，利用礼拜soah ê聚餐了后，团员聚集[脑力激荡]来讨论修改。守义兄讲ài有故事ê连续性、戏剧性kap娱乐性；鸿敏兄讲角色第一pái出场ài先自我介绍kap「四念白」。根据chiah-ê要求，我tńg去到厝就phah拚chhōe灵感来修改剧本。每礼拜日团员lóng作伙讨论剧本ê修改，到大家满意为止。

剧本ê配音kap录音是siōng重要ê工作，电脑专家ê鸿敏兄chhōe-tio̍h好用ê "Audacity"免费软体。我买一支美金15 kho͘ ê microphone,利用鸿敏兄中昼歇困时间，去伊ê办公向伊学习软体ê操作。学会晓了后，家己先将全部ê配音录音好势，chiah-koh chhōe适当ê人来做各角色ê配音录音。

完成剧本kap配音ê初稿，三月tńg去台湾选总统了后，就去竹山向刘进春大师请教并订制戏尪仔。Hit时我发现刘大师当teh无闲准备Toronto陈文隆编写ê《马偕ê故事》kap陈清风教授编写ê 《胡须番》ê戏尪仔kap配音制作录音带，伊koh一pái受北美洲各台湾人团体ê台湾周(Taiwanese Week)主办单位邀请去做45工ê巡回演出。一时间内，马偕ê布袋戏soah有三个版本，我注文ê 戏尪仔真简单就完成。但我tī刘大师ê厝tòa四暝，请伊利用下班时间kā我ê 剧本修改hō͘伊khah像布袋戏ê对话，加上员林ê吴清发大师( 年薪传奖得主)ê指导，完成剧本了后，koh去花坛请布袋戏配音专家 录音。本来beh请吴大师录全部ê配音做样本，可惜伊无法度读我ê汉罗台语剧本，只好我家己读剧本来录音， 加上配乐制作MD hō͘我做基础样本来制作阮家己ê布袋戏录音带。

MD完成tńg到台北，我紧麻烦视障艺文协会帮我kā配音kap配乐分轨转做MP3 ê CD，再将CD分轨输入电脑中Audacity ê程式内。每pái修改只要照WORD ê操作方法剪接，实在有够方便。Beh chhōe适当ê角色配音to̍h需要时间kap耐心，永仁兄对戏剧不止仔有天分，我去Toronto观赏刘进春大师kap吴清发大师演出《马偕ê故事》ê时，永仁兄夫妇招待我去tòa in ê厝。我报in知《马偕过台湾》布袋戏ê计画了后，永仁兄马上加入阮ê行列，kā 剧本改hō͘伊koh khah súi-khùi完美。请伊录马偕角色ê配音，koh请刘进春大师录清国官角色ê配音，效果非常好，录音带ê制作就进入满意ê阶段，心满意足ê滋味实在无法度用言语来表达。

有完整ê录音带，阮就利用每礼拜下午排练。Chit时阮也进行舞台ê修整，请治雄兄画两个布景，伊看「蕃薯园布袋戏团」ê招牌字用纸贴无好看，就教阮用「熨印」(iron print)直接印落去布条内，我完成chit-ê工作，有真大成就ê感觉，阮jú来jú像一个布袋戏团。

阮[心有成竹]ǹg美东夏令会出发，tī演出前五点钟，师傅头讲伊感觉马偕kap清国官出场ê顺序颠倒khah好，我马上修改剧本kap录音带(MP3)，同时请鸿敏兄修改字幕ê顺序。这to̍h是「自编、自导、自演」ê方便所在，随时ē-tàng修改到满意为止 。

阮ê用心无hō͘五百gōa人ê观众失望，掌声不断hō͘阮真大ê鼓励。第二集《台湾ê囝婿――马偕 》ǹg望有koh khah热烈ê掌声，hō͘代表台湾文化ê布袋戏ē-tang成做宣扬马偕献身台湾福音ê基督大爱精神。