《生活e5台语，台语e5生活》

 | | | 转寄

五洲新桃源布袋戏取经记

作者 Chùn-io̍k 2005.08.07

搭3月初八ê统联头班车(11:30a.m.)，tùi台北来到竹山已经下晡四点。刘进春团长来ê车头接我，留嘴须koh便装打扮，ká-ná tó位bat tú过ê艺术家。坐入去伊hit台草色ê跑车，热切ê见面话讲无几句，就来到五洲新桃源布袋戏团工作室。 今年年初成立蕃薯园布袋戏团koh成功 ī同乡会暗会成功初啼演出了后，阮就计画继续beh用布袋戏来推广台语kap台湾本土文化。Tī陈清风教授ê绍介之下，我就趁三月转来南投县国姓乡pōe墓ê机会，来平平是南投县ê竹山镇ê五洲新桃源布袋戏「拜师学艺」。

深落ê工作室tò面壁规片lóng排五样十色ê人物、神明木雕品，尘埃满面增加「古典」ê气氛。刘团长讲伊十四岁就开始雕刻柴尪仔，伊讲读小学ê成绩lóng tī三名内，父母ǹg望伊有好ê职业生涯。伊虽然深深爱布袋戏，父母却m̄肯hō͘伊行(kiâⁿ)这条伊上合意ê弄布袋戏之路，讲做戏ê「猪食狗困毛蟹行」；hit当时厝里散赤，当然无可能hō͘伊买布袋戏尪仔。伊就家己用柴刻尪仔头，koh用破衫剪来做尪仔衫，开始伊ê布袋戏生涯。

刘团长国校毕业无koh升学，伊讲读地理课本讲「长江、黄河流域是大米仓，物产丰富」，续落去ê国文课本讲「大陆的同胞生活在水深火热之中，我们要反攻大陆，解救苦难同胞」。伊问hit位外省老师讲按呢hiah-ni̍h-á矛盾，老师骂伊讲：「册按怎教，你就按怎读。」刘团长小小ê心灵感觉按呢koh读落去，浪费伊ê生命，伊就tòe布袋戏团去拜师学艺。包括我在内，真济人遭遇tio̍h kap刘团长仝款ê国民党愚民教育，却真少(chió)人像刘团长按呢用行动来表示抗议。

以上ê心路历程ē-tàng看出刘团长所行ê路线kap其他布袋戏团无仝款，绝大部分ê布袋戏团lóng演中国戏，刘团长只演台湾本土ê民间故事。伊放录影带来一一解说：《蛇郎君》、《鸭母王》、《廖添丁》、《虎姑婆》等等。前阮演ê《蛇郎君》是文戏，taⁿ看tio̍h《鸭母王》是武戏，我kui个心肝热起来，细汉时阵对布袋戏ê热情koh再爆发。

阮蕃薯园布袋戏团决定beh tī今年ê台湾传统周演《鸭母王》，我请刘团长指导「拔刀」、「挥刀相thâi」、「收刀入鞘」、「射箭」、「suh阿片薰」等等ê功夫，练几pái就做会出hia-ê动作，非常有成就感。以前看布袋戏ê特技lóng感觉真不可思议，原来功夫点破就无啥物稀奇。

刘团长不但是资深ê布袋戏大师，mā是杰出ê木偶雕刻师，戏偶造形创新，充分表现出台湾本土文化ê súi,得过1988, 1989, 1990年ê手工艺研究设计种，2000年入选参加总统府艺廊掌中戏戏偶奖，2001年得tio̍h「台湾生活用品展」优选。

Hit暗我受安排去tòa刘团长山顶故居改建ê别庄，客厅壁顶摆设真济美国各台湾人团体颁hō͘伊ê感谢状、匾额。上起头是1996年受郑良福教授邀请去美国密西根kap休士顿参加亚洲文化节，续落去每年lóng受邀请去美国ê台湾文化节演出，2001年koh tī美国国会山庄由布希总统夫人主办ê国家图书节演出《蛇郎君》布袋戏，亚洲地区干单印度kap台湾参加。

刘团长感觉我千里迢迢来向伊请教，伊将所有ê功夫报我知，hō͘我感觉有真济意外ê收成，希望我ē-tàng tī美国将有台湾本土味文化ê布袋戏绍介hō͘人认bat,kā台湾文化传扬出去。我订购《蛇郎君》kap《鸭母王》ê戏尪仔，带转来去波士顿hō͘阮蕃薯园布袋戏团好好仔发挥一下。(3/9/2003)