《生活e5台语，台语e5生活》

 | | | 转寄

被上帝开光点眼ê盲人调音师―邱瑞渊

作者 华语：高瑜 台语翻译：林俊育 2006.04.30

「有时chūn我lóng会想，如果当时我无信上帝neh?Án-ne现在我teh做什么？是m̄是就一世人做童乩去loh?」邱瑞渊tī开始挨(e)小提琴chìn前，微微á笑讲chiah-ê话。

今年五十六岁ê邱瑞渊，是台南德光教会ê会友，也是佑明福利协进会ê理事，旧年tú当选台南市模范父亲。特别ê是，伊iáu是全台第一个盲人钢琴调音师，音感非常精准。有趣味ê是，chit位调音师，当年差一点á á就成做童乩，人生因为遇tio̍h上帝续来了一个大转弯。

出身tī童乩世家ê邱瑞渊，tùi阿公hit一代起，就tī嘉义县布袋镇开始做童乩。一代传一代，到邱瑞渊chit一辈，已经是第三代，出生ê时to̍h是双眼失明ê邱瑞渊，因为chit-ê先天ê缺陷，厝里ê人kā伊送hō͘阿公侍奉ê池府千帅做义kiáⁿ，一方面祈求神明ê保佑，另外一方面，也希望chit-ê gín-á长大后ē-tàng继承阿公ê衣钵，成做一个童乩。到了五岁hit年，年纪iáu小ê邱瑞渊，就tī懵懵懂懂之间，由父亲代替kap神明咒重chōa,若是日后无做一个童乩，违背了kap神明之间所立ê誓言，伊也将绝子绝孙，断根无后。 因此，tùi五岁hit年起，邱瑞渊就开始慢慢接受「童乩教育」，除了学习做桌头（亦to̍h是童乩ê翻译官，当童乩起童ê时，tī边á为众人解说神明语言ê人），也兼学收惊、算命，一切lóng为tio̍h做一个童乩做准备。到十二岁hit年，学得差不多了后，该背ê mā lóng背起来lah,无想tio̍h,chit-ê时chūn却来了一个意外ê人。

某一工，厝门口出现了一个未bat见面ê女性，讲想beh见邱瑞渊，并且希望ē-tàng带伊去学校读册，伊是台中惠明盲校ê陈淑静校长。 Hit时邱瑞渊全家已经搬到屏东tòa loh,对tī chit-ê远道来ê生份人，厝里ê人除了感觉奇怪之外，对tī chit位盲校校长提出ê请求，koh-khah是无法度接受。Tī hit-ê封闭ê年代里，厝里ê人感觉，既然目睭看bē-tio̍h,为什么iáu beh去学校neh?另外一方面，也感觉邱瑞渊to已经十二岁lah,也该准备ài帮忙家计，为清苦ê厝境贴补一kóa工作酬劳；koh加上惠明盲校是教会学校，厝里ê人直觉这kap童乩ê身分互相无符合，因此拒绝了陈校长。

但陈校长却mî-nōa m̄放弃，一再登门拜访，连续来了三pái;到第三pái ê时，照常iáu是被拒绝。不过，陈校长却从来m̄-bat灰心，chit-pái伊换一个方式，当大家ê面前，伊kā邱瑞渊ê父亲讲：「Án-ne pah,咱大人mài替gín-á做决定，hō͘伊家己做决定，如果伊讲伊boài去读册，án-ne就mài,但是如果伊讲伊beh去读册，án-ne你也无条件拒绝我带伊去读册。」

原来满心认为邱瑞渊bē答应ê父亲，一嘴讲好。结果，无想tio̍h十二岁ê邱瑞渊，却kā大家讲，伊beh去学校读册！将án-ne,邱爸爸也哑口无言，只好hō͘邱瑞渊跟tòe陈校长去学校读册。问邱瑞渊为什么想beh去学校读册？伊笑出来，讲：「其实是因为当时kap我仝款大ê小朋友，in去上小学了后lóng会讲华语lah,用华语骂我我lóng听m̄-bat。所以我chiah想beh去学校读册，学了华语了后就thang kap人相骂。」这其实也是当年盲童ê普遍境遇，因为无受重视，lóng受冷落，致使真oh得入学接受正常教育；á一般ê家长，tī当时风气保守ê时代，若是家内底有一个残障gín-á,也真容易无自觉感觉见笑，感觉bē看kháu得，尽可能避人耳目。邱瑞渊讲，hit时chūn厝内若有人客来访，伊就tio̍h bih起来，或是溜去外头sńg。

十二岁ê邱瑞渊，因此开始了学校读册ê旅程，当别人tī chit-ê年纪lóng上了初中ê时，伊chiah tú-beh上小学。但是，无想tio̍h ê是，这一下上，也因此展开真正ê启蒙教育――邱瑞渊学会晓读书识字，另外一方面，上帝也为伊phah开了心眼。

Tī惠明盲校求学ê期间，邱瑞渊并m̄是一开始就接受福音，因为伊感觉家己已经hō͘阿公ê神明做义kiáⁿ lah,怎样ē-tàng接受福音？一直到伊小学六年级hit年，伊chiah终于下定决心，接受耶稣基督成做伊ê救主。

之所以会án-ne下定决心，邱瑞渊讲，tī he chìn前ê一段时间，伊一直听tio̍h一个声音tī内心回旋，kā伊讲：「你假使beh得tio̍h真正ê喜乐，你来亲近我。」连伊家己lóng有kóa bē了解。后来，当伊终于决定要接受福音，鼓起勇气去kā学校ê校牧讲：「Chit-pái ê受洗，我想beh参加。」当讲完chit句话ê hit一刻，伊心中ê一块大石头竟然完全kā伊放落地，伊也因此感受tio̍h,chìn前心内底听tio̍h ê hit-ê「喜乐」，原来就是án-ne ê tāi-chì。

但奇妙ê tāi-chì iáu teh后头。

当时决心beh受洗ê邱瑞渊，并无phah算马上kā厝里ê人讲chit件事，因为担心厝里ê人可能会反对或有意见。Hit年ê复活节，同时也是邱瑞渊受洗ê hit一工；就tī hit工ê透早，童乩阿公匆匆pōng-pōng tùi嘉义坐车专程赶到屏东，一到屏东厝里，阿公竟然就开始起童，厝里ê香炉也莫名奇妙「发炉」lah,内底插ê香lóng无预告to̍h烧起来，火舌焰焰，tī民间信仰里，chit种情形通常意思讲是：厝里有tāi-chì beh发生loh。

Hit工早起ê六点到七点中间，tī台中ê邱瑞渊，tú beh领受洗礼；tī屏东ê童乩阿公，to̍h已经起童，全身tiô跳bē停，嘴里不断teh-hoah「害了了、害了了、一切lóng害了了a-lah!」邱瑞渊ê父亲看tio̍h chit款情形，禁bē-tiâu问伊，究竟是什么tāi-chì「害了了」。童乩阿公讲：「Tùi今á日起，我koh phah无去一个kiáⁿ儿lah!」邱爸爸一问，chiah知影原来神明指ê就是邱瑞渊。

幽默ê邱爸爸，忍bē-tiâu继续问落去：「你本身是一个神明，phah-m̄见一个kiáⁿ儿，kám讲bē-sái kā伊chhōe tńg来oh?」童乩阿公竟然回答讲：「讲sńg笑！he是beh怎样chhōe tńg来ah!即使是咱五王众神联合起来，也无办法kā伊chhōe tńg来。」邱爸爸继续追问落去：「是因为咱瑞渊真pháiⁿ mah?」童乩阿公真无奈何回答：「无ah!he m̄是pháiⁿ lah,lín lóng m̄知影oh,伊今á日早起六点ê时chūn,伊ê面上就有一个特别ê记号，hit-ê记号oh,咱众神lóng无人敢去kā伊盖掉，无人敢去侵犯tio̍h伊。」 就án-ne,邱瑞渊成了上帝ê kiáⁿ儿。

Hit年暑假放假回家ê时，邱爸爸亲嘴问伊是m̄是已经受洗，邱瑞渊大惊，厝里ê人怎样已经知影，邱爸爸chiah kā伊讲童乩阿公ê事，也hō͘原来担心m̄知如何开嘴ê邱瑞渊，顿时间食了一粒定心丸。 Koh-khah奇妙ê是，邱瑞渊向父亲提起，希望邀请牧师来厝内做一pái家庭礼拜，父亲也同意了。就tī进行家庭礼拜ê前夜，童乩阿公koh再现身，来到邱瑞渊屏东厝内。Chit回阿公讲，beh tī厝里做家庭礼拜ē-tàng,但是伊有两个请求，第一个是mài tī厝里吟圣诗，第二个是拜托牧师mài tī厝里祈祷。邱瑞渊问阿公为什么，阿公讲：「Ah我hō͘ lín吟诗吟到底、hō͘ lín祈祷到底，á我ê众神就行了了lah!」

因为án-ne,邱瑞渊终于笃定地相信，伊所认识ê上帝，是万王之王，万主之主，也因此tī信仰上完全确立落来，无koh有丝毫ê担忧giâu疑。

若án-ne,当年hit-ê五岁时chūn所立ê「毒誓」neh?下文又koh是如何？

后来，邱瑞渊tī惠明盲校完成了初中教育后，心眼因此被phah开了，学会晓读书识字，也giú得一手优美ê小提琴，而且渴望继续升学，所以又koh前往台北ê淡江中学就读高中部，完成高中学业了后，投考台南神学院神学系。Tī台南神学院，伊tú-tio̍h伊ê终身伴侣。 当伊tùi神学系毕业、被派到台南北门屿教会牧会ê时，一工邱妈妈手the̍h麻油tùi屏东来看伊，见tio̍h了kiáⁿ儿，偷偷á问新婚媳妇ê近况：「Á有无听讲lín教师娘beh生无？」邱瑞渊讲有a,已经怀孕loh。这chiah想起来，当年五岁hit时bat立ê绝子绝孙重chōa,也是邱妈妈所担心ê tāi-chì,无想tio̍h,chiah-ê咒诅(chó͘)早就已经卸除，长女平安出世。

对邱瑞渊来讲，因为信靠上帝，一切lóng无koh有所惊惶。邱瑞渊提起，hit时伊kap太太tú搬到台南tòa ê时chūn,也bat租过一间厝，当in确定beh搬到hit位tòa ê时chūn,厝边阿婆好心kā in讲，hit间厝bat有人吊tāu自杀过，chìn前来tòa过ê人也tú-tio̍h过奇怪ê tāi-chì,总是无法度tòa久，因此劝in三思，考虑清楚是m̄是beh搬入去tòa。但邱瑞渊感觉，身为基督徒，有上帝ē-tàng倚靠，无什么thang惊惶ê。邱瑞渊一家人就tī-hia tòa了两年，小女儿也tī-hia出生，健健康康成长。M̄-nā hō͘厝边头尾看做奇怪，也因此做了美善ê见证，活出基督徒ê貌样。

回想起chiah-ê历程，邱瑞渊感觉，这也是做童乩kap做基督徒无仝款ê所在。做一个童乩，必须受限制tī头壳顶ê小神或邪灵，看时看日跟tòe行；但是，做一名基督徒，心却是自由ê,只要mài做pháiⁿ事，上帝所应允ê日子，日日是好日。(译自「台湾教会公报」第2815期ê「人物测写」)