《生活e5台语，台语e5生活》

 | | | 转寄

台语文ê喜kap忧

作者 Chuniok 2006.01.15

Chit-chōa tńg来台湾poe̍h墓，照常phah拚走chông台语文运动。透过「红皮圣经」ê上网，我开始认识信望爱网站(www.fhl.net)，弘尧兄kā我讲是教会公报社内面ê陈小姐kā「红皮圣经」做连结。我趁(thàn)三月16日khì拜访教会公报社ê时，来kap hit位陈小姐见面。我问伊看ē-tàng安排hō͘我认识信望爱网站ê负责人。伊讲负责人就是in ang--蔡先生。结果马上安排hit暗in两ang-á-bó͘来我tòa ê哥爸妻夫客栈。

我kā我电脑内所有ê台语文资料绍介hō͘ in知，Koh请教信望爱是m̄是ē-tàng增加台语部。哲民兄讲in真ài有台语部但一直无人thang支援资讯。Chiông án-ne阮「一拍即合」，伊将我ê外接硬碟带tńg去研究。

蔡先生是电脑博士，现此时tī大学做教授。伊了解我ê汉罗翻写作业程序，就讲beh替我设计自动翻写ê软体。感谢主！这ē-tàng增加我ê翻写速度，mā ē-tàng hō͘ khah ch ē 人来参与chit-ê工作。因为教会公报社ài我拚速度来提供汉罗出版品。伊koh答应tńg去马上写程式。若顺利完成beh khà电话kā我讲。第二工早起，伊khà电话来讲伊tńg去高雄探访父母了后，暗时ē-tàng来kā我装软体。我欢喜kah马上去办旅馆续tòa一暝ê手续。

Hit-ê软体装入去我ê电脑，原来我每工做梦所求ê就是这lah！我beh好好kā伊建立词库了后，tī信望爱网站公怖hō͘大家来使用，hō͘台语文运动进步koh-khah紧。感谢主...

我一直挂虑台日大辞典ê排序问题(EXCEL限制65,536列), 趁机会请蔡先生帮忙解决。伊答应beh写程式透过信望爱网站来进行修改，隔工我到竹山向布袋戏刘进春大师学艺ê时，到旅馆一上网就收tio̍h蔡先生hō͘我讲「写好lah」ê e-mail。我欢喜kah马上kā看一遍，随时kā测试结果报告蔡先生。伊马上修改koh送e-mail hō͘我ê时讲，我hiah紧脚手。我回e-mail讲是我跟tòe伊ê紧脚手，chit点阮两人仝个性。

我33年前tī台中忠孝路教会举行结婚典礼。透过陈浩德牧师ê安排，我去kap青少年及大专团契分享「台语文ê súi kap布袋戏宣教」。我上台讲无两句就tùi in ê 面容看出in对家己母语ê生疏kap冷淡。我紧换放阮蕃薯园布袋戏团tī 2004年美东夏令会演出ê「马偕过台湾」布袋戏。放影完，电火phah开一看，chhun一半人。讲是in台语听无，溜soan去lah。我有分台语基本发音ê单张hō͘ in，请in tńg去kap in父母tàu-tīn学台语。一位少年应讲：「无可能pah！」实在令人耽忧咱ê母语受华语迫害，沦陷kah hiah-nih严重！