《生活e5台语，台语e5生活》

 | | | 转寄

骆维仁博士受颁荣誉神学博士感言（台语汉罗版）

作者 骆维仁 2012.10.07

1, 认同受剥削ê原住民
阮全家ê人lóng真尊重原住民，看in做家己ê人。Tī 1928年ê歇热，阮爸爸受派去凤林实习。有一日，伊看tio̍h一个太鲁阁ê同胞tùi山顶背一大笼kin蕉落来街á卖hō͘一间细间店。店主hō͘伊一角半银，伊随时开九钱钱去买一罐米酒，koh用三钱钱买小鱼脯，坐tī树á脚lim酒；无久，伊开始唱酒歌，讲酒话，lim了就倒落去土脚困。困醒，看tio̍h日头teh beh落山，感觉腹肚mā iau，伊就倒tńg去siâng hit间店，用所chhun ê三钱钱买几条á已经烂去ê kin蕉，一时á久吞了了，然后空手倒tńg-khi厝里，无买半项tńg去hō͘ tī厝里teh等，teh iau饿ê bó͘-kiáⁿ。

所看tio̍h chit-ê奇异ê情境一瞬间变做异象：阮爸爸tī hit时，hit所在决志，将来beh去对hō͘政府欺压kap台湾人剥削ê原住民传福音。为tio̍h beh实践chit-ê决志，阮全家tī 1948年搬去台东。Tùi hit-chūn起，阮厝就变做kán-ná旅馆，有原住民出出入入，不时都有原住民来tòa，来食饭；阮lóng对待in ká-ná家己ê兄弟á是姊妹。因为án-ni，天香kap我tī 1995年beh tùi香港搬tńg来台湾ê时，阮开始想，将来chiah-ni̍h chōe ê册beh hō͘啥人。阮一久á就决定beh留hō͘家己所认同ê族群–专门训练原住民传教者ê玉山神学院。

阮m̄是有钱人，生活朴素。Tī Princeton读册头chit年(1960) ê冬天，因为真寒，我就去Salvation Army ê旧衫店买一领jacket；hia teh卖ê lóng是人m̄-ti̍h ê旧衫，真sio̍k，我用两角半kā伊买tńg来。Hit领jacket到今á日(60年后)我iáu-teh穿。Thang讲，chiah-ê册是阮俭肠neh肚买ê。虽然阮真俭，m̄-kú若买册就真phàⁿ手。Chiah-ê册有jōa-chōe本，我m̄-bat算。玉神ê truck已经来载四遍，至少tio̍h koh来两遍chiah搬会了。阮mā有收集成千片ê CD，大部分是圣乐。Koh无久chiah-ê lóng会离开阮，有ê已经tī阮身边五六十年ā ，算是老朋友；beh kap chiah-ê朋友相离，bōe免得悲伤。玉神来搬第四遍以前，连续两暗，我一个人戆神戆神坐tī已经整理好势ê册面前直直siòng，特别是看tio̍h一kóa天香用真chōe精神，真chōe时间，真chōe钱tùi世界出名ê博物馆买tńg来ê；有ê是伊iáu无机会使用就进入伊ê孤独世界–看tio̍h hiah-ê名画kap册ê时，bōe禁得目屎chha̍p-chha̍p滴，ná chún beh kap siōng亲密ê亲人相离别一样。无册tī身躯边实在真悲伤koh无方便。我ta̍k日都因为beh读á是参考某题目á是某本册，总是已经无tī身边来感觉苦恼。

其实，chiah-ê圣经、册kap CD —阮所有ê一切，是beh留teh hō͘家己所认同ê族群ê，beh收藏tī玉神ê 「记念骆先春，骆洪敏圣经文教馆」内面，应该tio̍h因为有hiah-ni̍h好ê所在thang hē来欢喜chiah tio̍h。阮真ǹg望有真chōe人会使用chit-ê文教馆，thang帮赞家己khah了解上帝ê话ê奥秘，得tioh教示kap造就，也tùi chiah-ê好听ê音乐得tio̍h激励kap安慰。

2, Khiā tī异端作神学
Taⁿ请容允我tùi一生ê工作做简单ê交带，ōe-tàng讲，我一生ê工作lóng是khiā tī异端chit pêng来做ê。

我tī 1960年去Princeton神学院读册，tī 1968年完成学业就tńg来台神教册。我tī台神教无jōa久就开始感觉有问题。我所教ê hō͘人判断做「异端」。保守ê宣教师先开炮，后来董事kap校友开始抗议，造成困扰。佳哉，当时ê院长陈皙宗博士每一遍lóng khiā出来维护我讲：「少年ê学者应该有自由发表家己ê见解。」

Chit-chūn一下想起来，问题是出tī我siuⁿ注重理论，无考虑tio̍h实践。Princeton ê创学理念是「Learning and Piety」(学习kap敬虔)，就是学问kap信仰，理论kap实际ê关系；严格来讲，是tio̍h两项兼顾。M̄-kú，到现在iáu有一kóa圣经学者主张讲，圣经研究ê目的是kan-taⁿ使用「历史批判ê方法(historico-critical method)」推论某一个事件，某一句话á是一段话ê历史圣就完成伊ê任务。他ê研究是tio̍h提出圣经对原读者有传甚么信息(what it meant)，无应该探讨圣经对现代人有甚么信息kap意义(what it means)，因为这是系统神学家á是传教者ê任务。

我看chit款ê想法siuⁿ简单，甚至siuⁿ幼稚；因为，对基督徒来讲，圣经是上帝ê话，是基督徒ê信仰kap行为ê准绳。因为án-ni，咱mā tioh关心读者ê了解kap感受。我担任圣经公会ê翻译顾问了后有戏剧性ê改变，chit款ê改变thang讲是一种ê 「范畴转移」(paradigmatic shift)，tùi 「特殊ê原读者」做重点(original reader specific)转移到「特殊ê现代读者」(present reader specific)做重点。这mā是圣经翻译所tú-tio̍h ê问题，因为翻译是beh传达上帝beh hō͘人ê信息；若无达成chit-ê目的，翻译就无意义。Án-ni thang讲，paradigmatic shift mā是一种ê反动。

现代联合圣经公会大部分ê翻译lóng是根据Dr. Eugene Nida ê 「功能对等」(functional equivalence) ê理论，无koh再使用传统ê直译，是注重意思ê传达，无koh看「字对字ê对应」(formal correspondence)。Chit字单字á是chit-ê词，无伊单独ê意思；意思是tùi上下文ê前后关系(context)来决定，无hō͘原文ê字所束缚，目的是beh hō͘译文ōe-tàng koh-khah完整，koh-khah自然将原文ê意思用家己ê话表达出来，hō͘现今ê读者kap原文ê读者lóng得tio̍h siâng款ê信息，mā有siâng款ê感受(closest natural equivalence)；这thang讲是对特定ê读者来翻译ê，是已经踏入「what it means」ê界限。真明显，chit款ê翻译真注重读者ê了解，译文khah活，khah自然；m̄-kú有人看chit款翻译做反动、异端，甚至公开开审判会。

Án-ni看起来，我ê工作真正kap异端无法度thang切断关系。其实，异端不过是khiā tī另外一pêng，tùi无siâng款ê角度来看tāi-chì，来研究，来解说，来了解上帝通过圣经 beh传达hō͘人ê信息。M̄-kú因为角度无siâng，诠释出来ê信息无相siâng，结论可能是代表小数人ê观点，kap传统ê了解有所差别，是一种ê创新。所以，咱ōe-tàng结论讲，kap传统无相siâng无tú-tú是pháiⁿ tāi-chì，是有创见；有创见就有异端，有异端chiah会产生异象。

3, 我所受tio̍h ê帮赞
a. 遗憾：
我接受联合圣经公会ê目的是beh做翻译顾问，特别是beh帮赞我所认同ê原住民ê翻译。M̄-kú，iáu未真正有机会开始chit-ê任务，我就hō͘ UBS调去做翻译总顾问，主要是行政ê工作，协调亚太区15个翻译顾问ê工作，负khah大ê责任。虽然我无辞掉顾问ê任务，结果mā是tio̍h将指导台湾ê原住民ê工作交hō͘别人负责，我只有参加翻译者ê研习会，á是用phoe帮赞翻译者解决问题。不过，我iáu会记得，mā非常钦仰咱内面几nā位我khah有接触ê朋友，有ê是孤军奋斗，坚持拚到路尾ê勇士，亲像Amis ê颜武德牧师，太鲁阁ê田信德牧师，Paiwan ê许松牧师，客话ê彭德修牧师kap曾昌发博士，等。做一个翻译ê总顾问我至少有坚持每一个原住民ê翻译lóng有得tio̍h够额ê预算thang做翻译。Chit项，我做有到。

b. Siōng Bōe-tàng bōe记得ê事件：
Tī 1980年代，一kóa出版社开始出版「研读本圣经」(Study Bibles)。联合圣经公会mā感觉有需要出版chit款ê圣经，不过m̄知beh怎样开始；因为UBS传统ê政策是所有ê圣经 bōe用得有注脚á是解说(「no note or comment」)，惊了tī教会中引起无必要ê纷争。我就好胆招三位朋友陈南州、黄伯和kap 郑仰恩三位博士kap我组成小组(以外叶约翰、张德麟、童春发博士，以及张明佑kap梁重光牧师mā bat参与讨论。)小组决定先用现代中文ê 「路加福音」做试用本，用「Hō͘边缘人ê福音」做册名，读者目标定高中程度，列出一kóa原则kap方法了后就着手写稿。稿件经过讨论koh修改了后有请几nā个学生来试读。结果，阮发现学生读是无问题，总是掠bōe-tio̍h主题。小组就随时决定重写，每段ê开始lóng加一句「主题提示(thematic highlighting)」，thang激起读者开始问信息对in现在有甚么意义ê问题。

阮tàu阵做chit-ê project，hō͘我得tio̍h siōng大ê收成，学习tio̍h我tī读册ê时无学tio̍h ê一面，就是Princeton所讲ê “piety”chit面。

我有将chit遍ê经验写做论文。我先介绍原则kap方法，续落去谈论怎样使用Gadamer ê诠释理论(the fusion of the two horisons)做基础，最后将结果详细报告。Chit篇论文我tī 1984年热天，tī每三年chiah有一遍，每遍有一月日久，为tio̍h全世界ê翻译顾问ê研讨会时发表。Hit chūn是UBS siōng盛ê时，全世界lóng总有七十个参加；ta̍k-ê人lóng tio̍h读一篇论文。研讨会beh soah ê两日前有做一个民意调查，所问ê问题真笼统：「Chit遍ê研讨会甚么siōng好？」大部分ê人讲「食kap tòa真好」；有ê讲「会议ê所在真方便」；mā有ê讲「weekend ê旅游安排了真理想」；只有七个人讲起论文ê tāi-chì，七个lóng讲 “I-Jin Loh’s paper is the best”。后来UBS ê执行委员会有发表一张position paper，其中咱所提出ê观点大部分有受采用。阮tī台湾所做ê对世界有贡献，有引起共鸣！

c.Siōng Bōe bōe记得ê人
蔡仁理博士kap我tī工作上siōng密切，伊bat做过台湾圣经公会ê总干事，亚太区ê执行委员会ê主席，kap总干事。Tī伊在任ê中间，伊有支持我完成一kóa圣经公会一般bōe做ê项目，亲像《新约希汉辞典》(叶约翰kap张德麟博士有参与)、《圣经简明辞典》(高金田kap郑仰恩博士有参与)、《新约圣经并排版》、《溪畔静思》、《日读圣经》(这是为tio̍h ta̍k日上班ê无闲人准备ê；每日有一小段圣经，简单ê解说，有思考ê问题，kap短短ê祈祷)，等。翻译TCV (Todays Chinese Version)时，tī反对声中，伊mā强力支持kap推广，tùi做辞典chiah-ê项目，阮有学习tio̍h chit类ê册是bōe-tàng用翻译ê方法，是tio̍h一字一字个别讨论ê。

- TCV ê新约由许牧世教授翻译，翻旧约ê时有周联华、王成章两位博士kap焦明女士加入。Chit-ê译本非常重要，是头一本由华人所翻译ê，文笔真自然，表达清楚，真好了解，所以现在iáu teh翻译e现代台语译本以及其他原住民翻译á是修译ê蓝本。我tùi chit-ê翻译学tio̍h翻译者需要谦卑、合作、包容，bōe坚持家己ê意见ê精神，因为华语运用ê空间真阔，翻译khah有意见。

另外一项tāi-chì我bōe用得bōe记得，我去Princeton读B.D. ê时(960)，周联华博士已经tī hia teh做研究学者。伊已经是一位名人，m̄-kú真友善；伊多才多艺，总是m̄-bat显耀家己ê学问。伊tùi hit chūn起，我所负责真chōe中文ê翻译项目，伊每一项lóng有义务参加，伊是促进和睦ê精神人物。

现代台语译本是现在iáu teh做ê翻译，这是头一遍圣经公会kap长老会合作ê翻译。Chit-ê翻译真特别，会用得讲是「道成肉体」ê翻译，读起来，会听tio̍h上帝真正成做台湾人，用纯粹ê台湾话teh对咱讲话，lóng无外国腔。我tùi每一位翻译小组ê人学习tio̍h真chōe。

我siōng ài，mā siōng惊翁修恭牧师讲：「这m̄是台湾话」，á是「台湾话m̄是án-ni讲」：siōng 爱，因为tio̍h修改，修改了ê意思一定会khah正确；siōng惊，因为tio̍h koh了时间讨论。杨启寿院长特别关心ài保持原文所用ê意象(image) kap暗喻(metaphor)，因为án-ni译文chiah会活koh súi，khah有力，mā khah好记。张宗隆牧师是真有才能ê主席，读真chōe册，是一本活ê百科全书。吴明雄牧师siōng gâu péng各种版本做参考；mā对现在ê少年人teh用ê台湾话有把握，因为Chit遍ê翻译真ǹg望非基督徒mā读有。张刚荣牧师特别注意罗马字注音ê正确；颜信星牧师对诗kap古字ê写法真有把握；薛伯赞牧师特别注意tī讲台顶ê宣读；康进顺牧师对原文有真好ê了解；梁重光牧师对电脑ê运用kap翻译ê一致性，等ê问题lóng有特别ê注意。最近chiah参加ê 陈南州博士对翻译mā有特殊ê贡献。伊有时代理主席开会真果断，因为伊kap我合作ê时间khah长，有建立真好ê rapport，伊所beh问ê问题kap我想ê问题常常是siâng款，我若无问，伊lóng会问。Koh一项好ê tāi-chì，就是只有伊是头一代ê基督徒，所以不止了解非基督徒ê用词。咱也已经有一位会晓用电脑来处理稿件ê梁重光牧师。最后，咱mā已经有一位比我khah有能力ê旧约专家，mā会晓电脑排版ê梁望惠博士做咱ê翻译顾问thang扶起lóng总ê责任。相信chit-ê真正用咱ê父母话ê圣经 koh无久就会出现。

一生对我有siōng大ê影响kap帮赞ê就是kap我saⁿ-kap做研读本本ê「南州、伯和、仰恩」chit三个「同伴。阮lóng是用in ê歇困日，日暝phah拚做工。阮tùi无摸起，讨论kap辩论，修改koh修改，写到满意为止。阮特别有重视特殊ê读者(audience specific)，特殊ê环境(context specific)，特殊ê信息(message specific)，等ê问题。Kap in tàu阵学习hō͘我体验tio̍h神学，á是圣经ê诠释，m̄是纯理论，mā是艺术，tio̍h靠锻炼koh锻炼chiah会老练，chiah做会出来；m̄是抽象ê，是ōe-tàng实行ê；m̄是个人做ê，是群体共造ê；m̄是lóng正统ê，常常是反动ê，是异端ê。这lóng是我kap in做工ê时所学tio̍h ê。Kap chit阵朋友做阵交谈，讨论kap辩论非常精彩，无一场冷场，lóng有创见，hō͘我tùi ta̍k遍ê开会感觉有期待koh兴奋，体验tio̍h作神学ê欢喜kap快乐。。

我mā对我指导in写博士论文ê三位老师学习tio̍h真chōe，这对in ê论文看会出。
曾昌发：《从亚洲诠释学的角度研究路加福音中耶稣的比喻》；秦明盛（Kapi）： “An Attempt at Reading the Story on Martha and Mary with Juxtapositional Narrative Approach”；邱淑嫔：《从「微不足道」的身份认同再思马太福音的宣教观》。

Tùi论文ê题目，咱ōe-tàng看出chiah-ê lóng是ǹg另外一pêng teh行，真优秀ê论文，结论lóng是反传统ê。不过咱m̄免惊，因为咱相信，有异端chiah有将来，chiah有异象。咱tio̍h继续ǹg chit-ê方向行chiah有办法thang做创新ê神学，来面对将来ê挑战。

4, 最后ê感谢
最后，我beh koh一遍向玉神ê董事长、诸位董事、院长Pusin kap各位教授表达我siōng深ê感谢，因为lín今á日颁授chit-ê极大ê荣誉hō͘我。我mā ài tùi bat kap我tàu阵作神学，行chit条坎坷ê路ê同志朋友说谢，kap in分享chit-ê荣誉。

天香kap我lóng是多病ê人，我tui 1967年就开始因为糖尿病家己注射，后来开始一连串ê慢性病、心脏病、高血压，koh来有Parkinsons，今年初koh有做摄护腺ê手术，也患tio̍h急性气喘病。天香是对她退休ê前两年就开始有问题，tùi 2,000年起完全入去她孤独ê世界，失去她所有ê记忆力、表达力，后来mā患tio̍h糖尿病；最近koh因为尿道发炎kap一kóa并发症入院四礼拜久。

Tī chit中间有得tio̍h三峡教会李全秇牧师特别ê照顾kap关怀小组ê帮赞，阮tio̍h深深kā in 说谢。

Mā有真chōe海内外ê朋友个别teh替阮祈祷，á是来探阮；koh有台语翻译小组ê同工ta̍k礼拜来探阮，替阮祈祷，我mā beh kā in讲「多谢」。

阮mā特别beh tùi阮至亲ê兄弟姊妹表示siōng深ê感谢，我患tio̍h chiah-ni̍h chōe koh严重ê病已经超过50年à，若m̄是有大姊ê照顾kap协调兄弟姊妹ê帮忙，我早就无tī chia a。我tī年初手术ê时，大姊mā亲身留tī病院照顾我几nā日。我现在因为Parkinsons行动lóng无方便，她做头协调全家来帮赞我：二姊常常寄人the̍h营养品hō͘我；小弟维道甚至替我出国办tāi-chì；小妹Sumih家己丈夫teh破病mā来帮赞我几nā月日久；孙á辈有荣耀医师专门teh送阮去急诊，颂苑牧师不时都teh安排阮看医生kap入院ê事，等。Beh chhē tio̍h chiah-ni̍h和好合作ê家庭实在无简单，这lóng是大姊ê功劳。阮感谢上帝hō͘阮有chiah-ni̍h gâu领导kap照顾家庭ê大姊，mā ài感谢上帝hō͘她有好ê丈夫kap完满ê家庭thang kā她协助。

最后，总是siōng重要ê，我beh对我「khah好ê一半(my better-half)」讲：「Nino，真多谢！」chit句话只有她听有。她mā是我作神学ê 「同伴」。阮两个lóng已经77岁à，三月日前mā tú-á庆祝阮结婚满50周年。她一生lóng用我kap家庭做中心，我因为有她chiah有气力做我所做ê一切。阮beh送hō͘玉神ê册真chōe是她所珍藏ê，她应该tio̍h分享一半khah加ê荣誉！

愿一切ê荣耀lóng归hō͘上帝！