《生活e5台语，台语e5生活》

 | | | 转寄

萧泰然大师受奖

作者 郑儿玉 台译：潘为欣 2009.01.25

萧泰然老师 beh受文化奖 ê前几日，我才接着行政院文建会ê正式邀请函，大概是由bet tòa tī LA ê林衡哲医师kā承办单位介绍ê。邀请书连提起一摆“萧泰然”三ê字lóng无，因为我事前已经接过林医师电话，所以知影受奖人是萧老师，不过照邀请函ê含糊文句来看，可能也有其他人士beh受奖。总是，不管受奖ê人有几个，因为我kap泰然兄弟ê个人交情，就拨工起身上北参加，去到现场才知影，受奖人只有萧老师一个人nā-tiāⁿ。

文化奖ê活动手册封面，相siâng无提起半字受奖者萧泰然ê名。Tī手册头页下脚，有用真细ê字印讲：「台湾ê拉赫曼尼诺夫情系乡邦ê作曲大师」，这位“大师”到底是啥人，犹原无提起。手册第二页才有行政院长刘先生ê写文内底讲着萧泰然ê名，这是头一摆提起“萧泰然”ê名，tī第三页mā有讲着《1947序曲》ê代志。 总是，由承办单位准备ê VCR当中，看着内面所介绍ê“得奖人”，就明显展露出主办单位进退两难ê苦心。Tī“年表”内底有讲着：「1994年完成《1947序曲》」，VCR就直接ùi 1991年跳过去1995年，kan-nā有意忽略1993到1994那年ê代志，也就是救主诞前后ê心脏大病，佳哉经过名医救活，才ē-tàng完成伊人生上高峰ê作品《1947序曲》(包含《台湾翠青》)。

1997年萧泰然病后第一摆回国，tī国家音乐厅划时代ê来演出《1947序曲》，但是tī VCR ê“年表”当中，有关这号代志那亲像编者lia̍h无着中心点仝款，故意模糊。颁奖典礼hit日大略有五、六百人参加，hông邀请ê来宾， 以当场ê气氛来看，大部分是文化界或欣赏古典音乐 ê人士kap学生，无看见欣赏《台湾翠青》ê民主运动人士。

隔转天(09.01.08) ê自由时报只有刊tī「D版」nā-tiāⁿ。今仔日(09.01.09) ê《自由时报》(A版p.15) 卢孝治先生彼篇，那准是hō͘萧老师ê弥补。最后结尾来讲，tī马英九ê天下，“萧泰然老师被表扬”比无khah好。

以下是卢孝治ê文章。

如果更多人听萧泰然

今仔日下晡tī台北喜来登饭店参加一场使人感动ê颁奖典礼。由行政院刘兆玄院长将第廿八届文化奖颁hō͘作曲家萧泰然。 感动是因为萧泰然大师，伊ê人、伊ê音乐。大师虚怀若谷，伊ê音乐展现ê是上帝hō͘伊ê感动，以及伊对这块土地ê爱kap奉献。萧大师已经是有岁ê人，伊慢慢行上台顶受奖讲：「我鼓励大家，大家mā鼓励我，做伙来行这chōa有意义、无简单ê路—―继续为台湾付出。」

颁奖典礼上，演出伊ê名作「上美ê花」、「永远ê故乡」，真chē人kap我仝款受感动，伊ê人、伊ê音乐hō͘阮感动，心灵受圣洁ê洗礼。

萧大师因为做chia-ê曲，bat是黑名单，有厝bē-tàng转去。Kap真chē爱台湾ê人仝款，阮有「福尔摩沙之梦」，阮希望台湾成做新koh独立ê国家，阮期待公义tī这块土地上实现。 Siáⁿ hō͘萧老师变做黑名单？Siáⁿ 造成「福尔摩沙之梦」无法度实现？Siáⁿ阻碍公义降临这块土地？当然是外来ê国民党政权。萧老师ê音乐安慰每一位为台湾受难、受冤、打拚付出ê人，伊写ê「台湾翠青」，早就是咱心中ê国歌。

1945年中国ê国民党政权，theh枪来到版图之外ê台湾（in制宪ê版图无包括台湾），1949年in失去所有ê版图，soah宣称光复台湾。但是国际上已经无人承认「中华民国」，也无人认为这个流亡政府对台湾ê统治是合法ê。现实上ê占领kap残忍ê屠杀、白色恐怖，留下太chē血泪kap不公不义。

萧泰然—―咱敬爱ê大师，竟然beh ùi残害打压「台湾魂」ê国民党刘兆玄手中领这个奖！当然刘会讲伊是合法ê,因为马指派伊，马也讲伊是合法ê,因为伊得着七百万票，是lín台湾人甘愿选出非法ê政权，hō͘ in穿合法ê衫。

唉！假使有koh khah chē ê台湾人听萧大师ê音乐，今晚颁奖人就m̄是刘兆玄。