《生活e5台语，台语e5生活》

 | | | 转寄

台语信望爱台语输入法专案募款说明

作者 陈柏中 2008.12.14

台语信望爱长期关心台语文运动，向望台语有阁再兴ê一工。阮毋但定期提供好看有营养ê台语文章予读者伫线顶欣赏，嘛发展 佮整理真济台语文用ê家私方便社会大众来利用。毋过伫台语输入法ê这部分，一直无真正好用ê家私会当予社会大众轻松ê拍出台语ê文字。虽罔伫输入汉罗这方面本站有推捒出KKS，YKS等等ê台语汉罗输入法，伫全罗输入方面嘛有教育部ê「台湾闽南语罗马字输入法」抑是抛荒工作室ê 「Taiwanese Package」 通用。毋过遮ê输入法拢有怹欠点ê所在。有ê歹安装，有ê输入齿ê长度伤限制，有ê无支援 Windows Vista。益阁有伫汉字ê用字方面嘛真无一致。咱会使讲，一ê好安装，简单用，拍--出来ê字媠气阁正确ê台语罗马字／汉字输入法，的确是关心台语ê人伫现此时真需要，毋过犹无存在ê家私。

为着欲予社会大众会使伫电脑顶面轻松如意ê拍出媠气阁正确台语罗马字佮台语汉字，台语信望爱这马欲来成立一个台语输入法专案，向望会使募一笔钱，用来委托专业个软体公司开发台语输入法佮安装程式，免费放送予社会大众来利用。输入法是真专业ê软体，毋是一般人有才调开发--ê。透过关系，台语信望爱佮伫输入法这方面是不止仔专业个石磐软体公司有初步个接触。石磐软体公司愿意用十五万个价数，来开发予Windows XP kap Vista用ê台语输入法。

伫输入法ê本体以外，嘛会开发一个简单免费气ê安装程式，简化逐家安装台语输入法个手续。这个安装程式毋但会自动替你斗台语输入法本体，嘛会佮替你斗一寡台语汉字佮罗马字个字型。伫汉字用字这方面，台语信望爱ê工作人员嘛已经开始校对现此时ê词库内ê用字。基本上会参考教育部ê推荐用字佮教育部 线顶ê「台湾闽南语常用词辞典」ê用字。向望伫输入法正式开始放送ê时，配合ê是校订完成ê词库。

这个计画按算拢总欲募十五万，分两阶段来完成。第一阶段ê目标是七万箍。募着七万箍ê时，石盘软体公司就会开始开发输入法佮安装程式，而且会开始开始放送粗胚ê软体(alpha version)予第一阶段有寄付ê寄附者优先来试用。募够额十五万ê时，石盘软体公司着会开始收尾，完成输入法。会按顺序放送幼胚ê软体(beta version)佮半成品(release candidate)等等试用版ê软体予逐家来试用。按算伫进入第二阶段两个月以内完成正式版ê台语输入法佮安装程式，正式推捒予社会大众来利用。

各位关心台语文ê朋友，你若是有认同这ê专案ê理念佮做法，向望你寄附入来台语输入法专案ê口座。愈济人来寄附，这ê专案着愈早会使来开始佮完成，咱着早一工有好用ê台语输入法通用。

寄附ê方法请上网台语信望爱 http://www.fhl.net/main/fhl/fhl6.html 做线顶捐款，tio̍h请注明：[为台语输入法专案]。

________________________________________ 下跤简单说明输入法本体拍算欲支援ê功能，予逐家参考：

输入法本体ê功能ê说明：

支援平台：
Windows XP SP2 以上、Windows Vista

全罗输入：
会使拍罗马字（台罗佮白话字）。佮教育部ê台湾罗马字输入法有差不多ê功能。

汉字输入：
基本功能：用罗马字（台罗抑是白话字）作齿（key）输入台语汉字。会使拍单字（爱拍数字调号），嘛会使直接拍词（免拍数字调号）。 汉字用字主要参考教育部公布ê建议用字佮教育部ê线顶台湾闽南语辞典。

例：
拍： lán 出现：
1 咱
2 嬾
3 懒
4 摊
5 赧

予你选。

拍： kongsi 出现：
1 公司
2 攻势
2 公示

予你选。

进阶功能：罗汉模式（主要输入罗马字毋过嘛会使输入汉字）佮汉罗模式（主要输入汉字毋过嘛会使输入罗马字）。

罗汉模式（并列、汉字优先模式）

拍： kongsi 出现：
1 公司(kong-si)
2 攻势(kong-sì)
2 公示(kong-sī)

予你选。用 1 选「公司」用 shift-1 选「kong-si」。


汉罗模式（并列、罗马字优先模式）

拍： kongsi 出现：
1 kong-si(公司)
2 kong-sì(攻势)
2 kong-sī(公示)
予你选。用 1 选「kong-si」用 shift-1 选「公司」。

附注：
1. 同时支援四种输入模式：台罗、POJ。罗马字输出可选择台罗、POJ、POJ相容（不组合nn等）
2. 输入法会有一个状态列显示现在是在「全罗／全汉／汉字优先模式／罗马字优先模式」mode

预计需要制作时间：本体约一个月