《生活e5台语，台语e5生活》

 | | | 转寄

百分百少奶奶

作者 陈小小 2008.06.29

今年iáu过无一半，我ê膀胱炎就发作了三pái。He真正是惨绝人寰ê痛，解尿ê时chūn，每排出一pái，ná亲像刀子tī心头划上一刀。老公mā会连带倒楣，因为chit种病tī治疗期间 是禁止性行为。通常治疗ê方法是服用抗生素一周，koh加上一周ê隔离期，相当tī得禁欲半个月。若是koh续落来tú-tio̍h月经，he iáu tio̍h koh加算一周。

真chē医生kap一kóa友人知影我有chit种病，就是判定我水lim siuⁿ少，或认定我个人卫生习惯无好。这真正是大人冤枉ah!我ê水绝对是一杯接一杯teh lim，我iáu担心会siuⁿ过chē产生水中毒现象。有一位仁兄一工lim超过6000CC，便送医急救，一般人siōng好是lim 2000到3000CC。除了这以外，我iáu lim蔓越莓汁。

讲到个人卫生习惯，一工洗3-5次，换3-5条内裤，甚至我iáu kā内裤the̍h去微波炉消毒二分钟，有谁比我iáu卫生ah?房事前后mā必清洗，并且排尿。卫生纸绝对是以前以后擦拭。甚至非常爱牛á裤ê我，已将所有ê裤类phah入冷宫，只穿裙，除非tú-tio̍h寒天寒流。

我突然想tio̍h，该bē晓/bōe/bē是白带所致使？便去看妇产科，因为我已经查不出来自己有何问题。结果妇产科医生讲，白带状况iáu好。伊颠倒认为我洗得太频繁、太清气了，颠倒无益菌保护。

续落来伊怀疑我是困眠品质有问题，便问：「你是m̄是常失眠困bē/bōe去？」我nah会困bē/bōe去ah!困ē-sái讲是我一生siōng大ê享受。见若tú-tio̍h所有bē爽快ê事，我m̄免se̍h街路、看电影、mā m̄免食好料，只要枕头抱teh倒tī软软ê床顶困，情绪就会好去一大部分。

我向医生讲：「我m̄是困bē/bōe去，是太忙无空困。」伊就ài我tio̍h睡足八小时，并表示困眠不足会致使抵抗力无够，膀胱炎容易复发。其实身边一kóa亲友，多因为困眠问 题，所以有肩膀痛、落枕、郁症、胃痛、焦虑症、湿疹等皮肤病……等宿疾。Hit工竟然又koh加学tio̍h，困眠问题mā会致使膀胱炎！感觉chit-ê医师真是超级厉害ah。Tńg去厝里 后，老公问我情况如何？详细禀明，最后讲了一句：「横直就是beh当少奶奶lah！困眠ài有够，保证bē晓/bōe/bē发作。」

希伯来书第四章10-11节提起「因为hit-ê进入安息ê，tùi án-ne是歇了家己ê工，tú亲像神歇了伊ê工仝款。所以，阮/咱一定tio̍h尽力进入hit-ê安息，免得有人学hit-ê m̄信ê款 跌倒了。」突然感觉基督徒分两种人，一种人是做了siuⁿ-chē ê事，bē/bōe晓得进入安息，其实是一种骄傲kap对上帝ê信心不足。Á另外一种人则是啥事lóng m̄做，满口「倚靠上 帝」，kui工thèng候上帝tùi天顶la̍k物件落来，其实是pîn-tōaⁿ。

父母大部分lóng希望儿女ē-tàng渐渐长大成人、独立自主，koh同时tú-tio̍h重大tāi-chì，无bē/bōe记得向父母寻求支援kap建议。人间父母心是上帝对人类爱ê缩影，thang/ē-tàng讲上帝希望伊ê儿女会晓倚靠伊，但mā无因为án-ne/ni lán-si m̄做tāi-chì，iáu tio̍h尽人ê本分，致力完成上帝所托付ê使命。

马丁路德神学说，「上帝是百分之百慈爱，同时是百分之百ê公义。」人类ê逻辑真oh接受chit种同时是百分百ê观念。但tī生活里，却ē-tàng体会tio̍h chit种尊贵ê吊诡Paradox（kah-ná m̄是却是）。我突然想tio̍h基督徒应该是「百分百ê少奶奶或少爷，kap百分百ê殷勤管家。」

工作过度ê我当teh学习百分百少奶奶ê功课，mā ài我老公随时提醒我ài做一个少奶奶，会晓安息。毕竟，bó͘身体健康，老公mā chiah会有幸福（性福）ah!