《生活e5台语，台语e5生活》

 | | | 转寄

终结威权阴影，发挥台湾历史正义

作者 王辰光 台北二二八纪念馆 志工 2007.12.02

台湾，我真是好字运，活tī何等民主ê时代，但是我也bat被威权ê「领袖教育」洗脑过。会记得细汉ê时chūn，tńg去厝里向爸爸讨tio̍h一百元，买ㄧ本册，册名：《蒋总统讲故事》。想看hit当年，阮用ê《华语课本》，翻起来第七课、第八课，分别是：「国父ê故事」kap「先总统 蒋公ê故事」，(iáu tio̍h空ㄧ格)来表示尊敬。到我长大了后，读历史了后，chiah知影事实完全无仝，故事册中：伟大ê蒋总统tī课本中：看tio̍h鱼á逆水沿溪á而上，突发奇想beh为国民革命相差真远，hit-ê伟大ê领袖，竟然是心狠手辣，国民革命、北伐、国共内战、对日抗战iáu杀无够，战后「台湾二•二八事件，连台湾人lóng thâi参落」chit种ê「英明领袖」，iáu需要纪念伊mah？这你我可能m̄知，台湾ê寸土，bat有jōa-chē人ê尸水、血水因为蒋中正ê残忍、暴政之下，死tī枪下。Chit-ê枪下是不分省籍、族群，只要：「顺蒋则存、逆蒋则亡」，咱常听chit句宗教名言：「信耶稣得永生」，tī禁忌年代：「信中正得永生、m̄信者生命不保」。结果台湾却ē-tàng为二二八加害者、元凶，立铜像、建纪念堂，对台湾人来讲，人情上thài会堪得。

我有一位朋友tī今年228纪念日前，bat tī《自由时报》写ㄧ篇文章，题为：《转型正义讲中正》：文中：伊用讽刺ê笔法讲：「当咱beh受国民教育有：中正国小、中正国中、中正高中、中正大学、咱beh出国有「中正机场」，出门处处是中正路，出去sńg，有中正公园。」如今，机场已经改成做「台湾桃园国际机场」，如今：政府koh进一步将中正纪念堂改成「台湾民主纪念馆。」这tī历史上何其有意义，台湾逐步挥别「威权体制」所留落来ê阴影。解严到taⁿ已经二十年，tī政治上，咱有民主ê成就，但是威权阴影iáu-kú如影tòe形。

因此，台湾民主纪念馆(前中正纪念堂)，koh无拆除，只是将名字koh-khah名正言顺，为何讲是「名正言顺」？每一pái ê任何游行、示威，m̄是lóng tī chia地方聚集出发mah？所以：这是民主园地，什么声音lóng ē-tàng包容，因此，名正言顺ê正名为「台湾民主纪念馆」，是台湾暨台湾桃园国际机场了后，siōng有意义ê正名运动。

请各位伙伴tio̍h理性去思考台湾历史问题，koh来解释「中正纪念堂」有必要存在mah？我只知影，全世界无一个国家像台湾仝款，kā「加害者」the̍h来供奉。因此「国家beh-ài进步，台湾无ài行回头路」，tio̍h tùi去「神格化」、「阴间领袖化」开始着手。难免有一点冲突，但是转型正义势在必行，台湾chiah有好将来。