《生活e5台语，台语e5生活》

 | | | 转寄

M型社会下基督教事工策略省思

作者 陈凤翔 2007.11.18

中产阶级ê崛起，不过是chit两、三百年ê事。十八世纪中叶工业革命了后，chiah渐渐phah破贫富贵贱两造极端ê社会型态。工业革命造成银行家、工商业者、律师、医生、工程师、教授、小店主、公务员、艺术家……，in构成了chit-ê新兴ê社会阶层。Chiah-ê人ê成功是因为自身ê努力，以及社会ê变迁所造成。In具有专业能力、ē-tàng独立谋生，kap hiah-ê靠微薄工资为生ê工、农人无仝。君主政体ê瓦解kap民主制度ê建立，mā thang讲kap tio̍h中产阶级ê崛起，有真大ê关系。

M̄-koh如今全球竞争化财富重新分配，经济活动造成ê社会型态倒退，hō͘真无简单chiah崭露头角ê中产阶级，竟然渐渐消失。日本学者大前研一指称tī当今全球竞争下，中产阶级渐渐沦落到中下阶层，ná亲像英文字母「M」仝款，tò-pêng ê sàn-chhiah人pianze 变chē，正pêng ê富人mā变chē，中产阶级消失，就是「M型社会」。日本已经有八成人口，沦入中低收入阶层，á美国比日本koh-khah早步入M型社会，台湾当teh行向M型社会。

「中产阶级消失」对台湾人民生活方式带来ê影响，有真chē例显见。数一数二ê知名剧团果陀，面临经营kap票房上ê困境，剧团导演呼吁政府有关单位应对文化团体有补助机制kap扶植计画。惨淡经营ê剧团并m̄是只有果陀，其他顶港有名声下港有出名ê知名剧团mā lóng teh度寒冬，讲到基督教剧团，亚东、天艺、晨星、乌门山顶ê剧团…，则雪上加霜。这to̍h是teh说明了M型社会ê来临，对艺文产业造成ê威胁。

艺文产业蓬勃发展，原kap中产阶级崛起带有密切bē-tàng分割ê关系。Tī十九世纪以前，艺文工作者服务ê对象是社会ê上流阶级，绘画、音乐、写作是为tio̍h满足chiah-ê人。到了中产阶级兴起，成做艺文ê新观众，艺文chiah行出贵族殿堂，大都市tùi án-ne有了公共ê音乐厅、歌剧院、博物馆、图书馆。但如今，中产阶级渐渐渐渐沦落到sàn-chhiah ê下阶层，无够额ê经济能力来进行文艺赏析活动，只chhun金字塔顶端ê少数有钱人有能力，自然艺文团体会面临经营瓶颈。

对tī一般人来讲，食衣住行育乐，tī收入变少，或大环境物价上涨但薪水无涨chit种变相减薪ê情况下，会先删减ê预算，khah大面tùi「乐」开刀。The̍h视觉享受来讲，看现场表演tio̍h开ê钱siōng chē，就改看电影；首轮院线片看bē起，就看二轮，甚至tī厝租影片，或是收看第四台电影频道。

Ē-tàng预见绘画、音乐、写作、摄影、舞蹈、雕刻ê等相关八大艺术文化产业，若M型趋势继续延烧落去，无久结局会面临重新洗牌。Ná亲像十几年前，台湾经济繁荣，各家传媒林立。以出版社为例，koh-khah是chē到台湾每月出册量以万为计。但，当M型社会来临，购册ê主流群体—中产阶级经济能力降低，m̄是无买bē-sai2e5册，就会改为去图书馆借册，小型、经济困窘ê出版社，自然会应声先倒。观察敏感局势ê团体，早to̍h构思如何针对chit-ê M型社会现象，来重拟获利策略。

加上，这是一个「全有，不然就全无」ê竞争时代。Ná亲像搜寻引擎，一般网友kan-ta会知影google kap奇摩，而bē晓/bōe/bē知影第三名以后ê搜寻引擎。Mā就是任何一项产业，若做未到前三名，就无jōa有生存立足之地。M型社会则hō͘ chit-ê情况koh-khah明显，若m̄是前三大ê团体，大概lóng oh得支持落去。

对tī教会界，各种教会机构ê奉献收入，主要mā来自中产阶级。M型社会ê来临，thang预见整体ê奉献（以十一奉献来估算）mā会跟tòe渐渐变少。Chiah-ê奉献分配到各项事工，ē-tàng想像以艺文等福音事工方式ê机构，会是第一波面临奉献不足困境ê，ná亲像顶面所讲ê福音剧团。社会救助类ê机构，其次。教会应该是到最后chiah受tio̍h冲击。

Tī整体教会界资源有限、并可能跟tòe中产阶级消失而jú来jú紧缩ê情况下，各种教会机构（音乐、文字出版社、剧团、社会公益救助…）应该tio̍h严肃来进行思考，家己存在ê意义kap价值。是m̄是自身存在带有其他机构无法度取代ê独有特殊意义？á是目前ê存在，kan-ta只为tio̍h证明家己有法度，却是浪费整体神国资源？若是后者应该谦卑来考虑退出，hō͘其他同性质ê主内机构会得thang取得够额ê资源，继续为主奋斗。

M型社会究竟kám bē遍及台湾，bē-ōe确定。但是tī外面社会ê资源重新分配iáu无来临chìn前，教会界应该以耶稣ê心为心，先行智慧来对教会资源进行整合。若准想beh家己创立诗歌音乐出版社者，不妨加思考是m̄是ē-tàng借助现有ê音乐出版社力量达到仝款ê目的？各样传媒（文字广播、电脑电视）机构，是m̄是有合并ê必要？

目前台湾社会大多数ê人，当teh为tio̍h油价kap各样民生物资价格猛涨所苦，民生问题siōng重要，娱乐活动放一边，lóng已经学会晓kā资源khǹg tī刀口。Ná亲像陈水扁总统最近参加台北音响影视大展开幕活动，便遭民众呛声：「人民kiōng-beh活bē落去lah！」教会资源运用，也tio̍h有宏大ê普世教会观，以基督为首，百体联络得合宜，扎实来将资源用tī上帝所喜乐ê所在。

Tī chit-ê艰困ê时chūn，为家己ê存在大声疾呼奉献、发动连锁禁食祈祷，可能并m̄是siōng要紧ê项目，却是beh先为家己祈求拥有上帝国度ê眼光，chiah bē致使têng-tâⁿ因应M型社会将boeh带来ê严峻考验。