《陈雷文选》

 | | | 转寄

主席万万岁

作者 陈雷 2008.03.16

这个人口真chē ê国家有一个大独裁者，一人统治已经20外年。Tī国内，伊ê地位bē输人间ê神明，讲乌tō乌，讲白tō白，全国拢无人kap伊有无仝款ê意见。伊ê正式称呼简单叫做“伟大ê主席革命ê舵手万岁万万岁”。

这个国家tī伊统治之下，社会改制作像军队hit样ê组织。中央命令落来，上下一致，一通电话，全国动员，beh拍hô͘-sîn tō拍hô͘-sîn，beh掠niáu鼠tō掠niáu鼠，会使讲，全国ê精牲鸟虫kap百姓仝款，拢管kah好势溜溜。其他ê国家大事，亲像工业增产、农业大产种种，随时beh外chē tō外chē，bē输用hoah ê tō 有按呢。

这个伟大ê主席革命ê舵手虽然讲是看起来若神，事实是人，年岁大来，身体也会有无tú好ê所在。特别是规日薰suh无停，肺部伤害，不时khuh-khuh喀，大khùi喘bē lī，造成一个全国忧心ê问题。Tú好hit年大水灾，死人几lōa 十万。He百姓知影，自古以来ê传说，凡是遇着这款百年天灾，m̄是gâu人ài死，tō是朝代ài换。所以谣言四界，讲主席病势 siong-tiōng,m̄知tiâng时tō会死。总是主席kap in某tòa tī皇帝城内面，四围koân城，警察卫兵，五步十步，m̄是báng-á hô͘-sîn会tàng乌白出入ê所在。关于这项代志，一切消息封锁，bē-tàng进一步证实，也无人知影详细内容。

Taⁿ这个主席ê某比伊少年20外外岁，以前是作戏á ，chit má是革命同志。虽然伊tī政府内面无正式ê职位，总是有组织一个四人帮，靠in翁ê势，利用主席ê名义控制权力，把握一切。He四人帮知影主席病重，会议决定，伟大ê主席绝对bē使死。所以全国四界派人chhōe奇巧(khá)ê药草、秘方仙丹来hō͘伊食，to也无彩工。到尾无法度，叫留美ê专科医生来看。in某kā留美医生讲：“伟大ê主席革命ê舵手绝对bē使死。”Koh kā伊警告：“主席若bē讲话，你tō死; 主席若会讲话，你tō活。”

这个医生详细检查诊断，taⁿ苦ah，he主席现现肺癌尾期，thòaⁿ kah规身躯，心肝pak内拢pháiⁿ 去，明明作人到chia尽磅ah，taⁿ beh按怎？横直拚也死，无拚也死，kā主席in某讲：“Kan-na这个办法。”结果手术大开刀，死牛作活马医，用最新ê科技，ngē救才救起来。

过来无外久，全国新闻电视报真chē消息，伟大ê主席身体真勇健。Liâm-mi去海边phak日，liâm mi跳大河siû水，比全国选手代表siû khah紧koh khah hn̄g。按呢人心才安定落来，革命又koh充满光iàⁿ-iàⁿ ê前途。

这个以后，佳哉主席真紧精神恢复，比以前重倍独裁。国内年年革命，国外到处战争。Tī西南有一个已经受in军事征服ê国家，主席讲he蕃á 人种，文化拢m̄好，sóa百万ê移民入去占领，beh kā蕃á 改作像in按呢。又koh南旁ê隔壁国，讲是无礼得失着主席，出兵beh kā in教示，颠倒hō͘人修理转来。连hit个海峡外旁ê岛国Hok-lu-mo͘-sah，讲是in ê，自古以来kap in分bē开。后来全国发动文化大革命，教百姓相斗争，作革命。有读册ê就是pháiⁿ人，送去作sit；作sit ê tō是好人，送去读册。按呢舞过来舞过去，连续舞几lōa 冬，舞死几百万人。到尾a舞一下siuⁿ大场，soah bē收脚。He反对派联合起来，组织一个五人帮，姓邓ê chhōa头，用军队包围皇帝城。

五人帮kā四人帮拢总掠起来关。姓邓ê kap刘司令同志入来皇帝城见主席。主席四四正正坐tī大交椅顶，四围有枪子tōaⁿ bē过ê玻璃围leh。看in入来大声tō骂：“恁chia ê反革命ê走资派！出卖无产阶级革命ê罪人！美国帝国主义ê走狗！…”目睭gîn ò͘ⁿ-ò͘ⁿ ，一支嘴一直骂，大声hoah：“刘司令！你chit má马上kā我拍原子弹！美国炸掉！…”一时siuⁿ 过激动，m̄知啥物原因，雄雄pông一下一声，主席ê面kap嘴soah歪一旁。过来又koh pông一声，主席ê头soah khi去，目睭chhauh -chhauh nih，kan-na hit支大嘴ki-ki kia̍uh-kia̍uh犹teh骂。姓邓ê惊一tiô，赶紧拍开玻璃chông óa去扶主席ê头壳。Ná知taⁿ苦ah，摸一下he头soah lo̍k-lo̍k hián，强beh落去。侥幸ah，tō是he ām-kún早tō切断ah，下面接几lōa条塑胶kóng kap一大堆电线，通tùi身躯后面去。斟酌kā看，taⁿ惨ah，he身躯有脚有手，原来是假ê，作来chhāi hit粒头壳用ê niā-niā。

这时隔壁khin-khin-khong-khong，走去看，规房间ê仪器kap机器，几lōa 排ê开关，一大堆红红绿绿ê电火闪闪sih sih，明明是电脑控制ê先进ê科技品，拢无人teh顾。原来伟大ê主席肺癌尾期，thòaⁿ kah规身躯，kan-na头头壳犹未有。He留美医生kā伊手术大开刀，规个身躯切掉tàn thó-kak，留hit粒头，用塑胶kóng kap电线接电脑kap机器，所以犹活leh 无死。因为当时主席in某有讲：“主席若bē讲话，你tō死; 主席若会讲话，你tō活。”所以留美医生有专工另外装一台le-soh(laser) hip相机，主席ê嘴nā振动讲话，le-soh hip相传去电脑，照he嘴形换作人工发声，所以会讲话，会骂人，koh会hoah号令。In某问主席：“你按呢有舒是无？”主席应：“我beh suh薰。”真实会讲话。医生theh nih-ko͘-tin (nicotine) ê 射注入去塑胶kóng内面，按呢tō是hō͘伊suh薰。主席ê某问医生：“按呢会tàng挡外久？”医生讲：“若照起工保养照顾，一百年无问题。”In某真欢喜，hoah：“主席万万岁！”

Taⁿ这个姓邓ê khiā tī hia看kah gâng-gâng，he 主席ê二粒目睭chhauh-chhauh nih，kā伊看，明明嘴to歪一旁ah，犹koh teh骂：“原子弹！原子弹！美国炸掉！…”伊双手phóng hit 粒头，想着chiah chē冬来，天下大乱，liâm-mi战争，liâm-mi革命，hoah起hoah落，拢是手里这粒圆圆ê物件teh作怪，chit-má koh命令拍原子弹…心肝会chhoah，m̄知beh如何处理？雄雄这时主席ê面色作一下变无去，目睭kheh 去，he嘴才tiām去…。Tō是刘司令tī隔壁出手kā先进ê机器ê开关拢总关hoa去。He姓邓ê这时才决定，双手kā hit粒头抱leh ，kā伊koh chhāi转去大交椅顶坐。

无外久政府宣布，伟大ê主席革命ê舵手万岁万万岁过身去。He百姓若像有预料着，无啥意外ê反应。因为hit时国内有发生大地动，强力八级，死四、五十万人。He百姓知影，自古以来，不管有百年ê天灾抑是无，一个国家见若经过这款chiah nih久人造ê苦难，m̄是gâu人ài死tō是差不多朝代ài换lah。

五人帮kā主席ê遗体khǹg tī水晶ê棺材内面，四围khàm鲜花，排tī纪念馆hō͘人敬看。He百姓看了，有人流目屎怀念主席ê伟大，总是拢无人知影，革命ê舵手头壳已经切断去ah，he ām-kún以下ê身躯是假ê。