《陈雷文选》

 | | | 转寄

传道者

作者 陈雷 2008.03.23

（1）

卢重义长老今年74岁，作人乐观，身体犹足勇健，不时家己一个出国，四界去旅行。不过伊有一个习惯，tō是游览爱兼传道，去到tó位，有机会tō讲福音hō͘人听。少年ê时，bat去巴西作生理移民，tī hia tòa过成十年，也看过真chē艰苦人想bē到ê凄惨代志。这个习惯大概tō是hit个时阵tùi hia开始ê。

这几年伊常常去中国旅行，听讲最近有发生一件龟怪ê代志。旧年tō无koh再去。不过关于这个故事，伊本人m̄ bat kā人说明过，是经过伊ê细汉后生hia听来ê。

大概四、五年前，伊tī上海有熟悉一个地下教会ê朋友，经过这个朋友安排，去江西ê草地旅行讲道。来到一个细细ê庄脚叫作石口，khiā家无外chē,大部分姓石，穿破衫tòa土厝，真是散赤。长老tòa tī一个作sit人ê厝内，姓石名大斤，是三代ê基督徒，真是虔诚，看起来五、六十岁，in某chiah 20外。原来这个所在散乡，查甫人四、五十岁chiah有才调chhōa某，ah查某gín-á 十外岁á tō hō͘ 人嫁出门去，所以庄里真chē拢是这款老翁少年某。

大斤招人来厝里听长老讲道，有七、八个人，一个70外岁ê阿婆讲是外庄行路来ê，长老真感动，替in祈祷吟诗，讲道理，大家听了真入耳（ní）。Tú好聚会soah ê当时，雄雄听着一声凄惨ê叫声，亲像野兽teh叫。长老惊一tiô，问大斤啥物代志，大斤讲：“长老免惊，无啥物事。”这时又koh叫一声，长老chông出去看，原来厝后面一个细ê猪椆，内面一只猪倒tī hia teh叫。Óa近去看，ái-iō-ôe，m̄是猪！有脚也有手，明明是一个人！He人倒tī土脚nòa，规身躯ê屎尿，头鬃长lò lò散iā iā，kā面kap身躯khàm一半。一枝脚hō͘铁链链--leh，tī hia chhoah bē开，大声哀叫。He声像猪á hō͘人thâi hit时teh吱，长老听kah起ka-léng-sún鸡母皮。问大斤：“靠主名怜悯疼惜，这个人是按怎pa̍k tī chia？”大斤应：“长老m̄免不安。伊已经按呢真惯势a，liâm-mi家己tō tiām去。”长老beh入去猪椆内，大斤kā挡：“你m̄通入去，伊会咬人拍人。”He人看有人入来，mo͘h去壁角，身躯kiu作一球phih-phih-chhoah。长老ku落来对伊讲：“你m̄免惊，我bē伤害你。”Hit个人头gia̍h起来，规个面乌má -má，一iân厚厚ê土kap屎尿，kan-na有二个目睭仁，看bē出是人ê面。长老jîm一条巾á kā伊拭目睭kho͘拭面，chiah看出来是一个十外岁-á ê查某gín-á，鼻目嘴拢有。长老hoah：“这个是啥物人？Thài会按呢hō͘人准精牲款待？”大斤吐一个khùi，讲：“长老，这个是我ê查某kiáⁿ。”长老惊一tiô，hoah：“主a，请你赦免，请你原谅伊。…你ê查某kiáⁿ是作啥物pháiⁿ代志，犯啥物大罪hō͘人pa̍k tī chia？”大斤讲：“伊无犯罪，也无作pháiⁿ代志！…伊起siáu!” “起siáu?！…” “Siáu真厉害。伊m̄知影伊是人，想讲伊家己是猪，规日土脚nòa，四脚pê，已经二冬a拢bē好。”长老问：“有去看医生食药-á无？”大斤恬恬，摇二个头。

长老拜托inkoaN7水来，he查某gín a看着水，一下tō àⁿ落去，面tu tòa水桶，lim一大困水犹bē到khùi。双手kā长老掠leh，m̄ hō͘伊走。长老看，虽然分bē出是人抑是精牲ê表情，he目神是深深ê 惊惶、恐怖kap哀求。长老gīm伊ê手，kā伊讲：“请你m̄免惊，无人会koh再放舍你。”伊向大斤请求：“请你kā伊放开。” 大斤摇头，连续五、六遍m̄肯，目屎soah liàn落来，讲：“长老，我若kā伊放去，伊会hō͘庄里ê人拍死，受伤害。”长老讲：“请你祈祷有信心。我kā你保证，你若kā伊放开，伊bē受伤害。” The̍h五张一百kho͘ ê人民币hō͘伊：“Chia ê钱hō͘你去看医生食药-á，买清气ê衫hō͘伊穿。”大斤kā钱收起来，in某跪落去感谢，kōaⁿ水来kā查某kiáⁿ洗头洗身躯。大斤kā铁链a拍开，扶伊ê查某kiáⁿ双脚khiā起来，脚软koh un落去，几lōa 摆chiah khiā-tiâu｡。长老问：“你叫啥物名？”伊koh听有，应：“冬。”长老讲：“冬，你liâm-mi tō会好。我明年koh再来看你。”

2

隔转年长老koh来石口，大斤请伊来厝里。伊ê查某kiáⁿ已经加真大汉，穿清气ê衫，ka整齐ê头鬃，完全是一个无仝款ê人。长老问：“你敢会认得我？” 冬摇头：“我未认得你，m̄ kú我ê老爸不时kā我讲，你chhòng水hō͘我lim，kā我洗面，hō͘我看医生食药-á。” 长老无想着会有chiah大ê进步，意外ê欢喜。大斤讲：“长老，你讲了无m̄ tio̍h｡我kā伊放开，伊无受伤害。你看，我已经失去ê独生查某kiáⁿ又koh倒转来a。”长老koh the̍h五百kho͘ hō͘伊继续看医生食药á。

Hit日真chē人来听长老讲道，有ê是听着长老旧年ê故事好奇来ê。讲道了，一个少年来chhōe伊，讲：“长老，你讲ê道理hō͘我真感动心。请你来阮tau，我ê老pē 破病siong-tiōng，请你讲道理hō͘伊听。”长老kap大斤tòe少年人去in tau，mā是一间破散ê土厝，一个老人倒tī chhu草ê壁角teh喘。长老óa去伊身边，吟诗读福音hō͘伊听。He老人目睭kheh-kheh，m̄知听有抑听无。这时外面雄雄奇怪ê叫声，少年人马上chông出去，长老tòe伊后面，chông来到厝边一个猪椆，内面一个人倒tī hia teh叫。少年人sa一枝柴oe，一直kā kòng。长老惊一tiô，赶紧kā giú leh，讲：“Che是啥物人？你thài按呢kā伊责罚？”少年人停手，柴oe放leh，讲：“Che tō是我ê老母！”soah khàu出来。Koh问才知影，这个老母chēng旧年起siáu，mā是m̄知人，家己准作猪-á，四脚pê，不时to会叫，tio̍h ài kòng才会tiām 。长老kā看，这个查某人规身躯ê屎尿kap土砂粉，一枝脚铁链-á链leh，tàm土脚nòa，像猪-á kǹg-kǹg叫，liâm-mi koh me屎来食。长老不忍心，向少年人请求：“请你mài kā伊kòng，kā伊放开，chhōa伊入去厝内照顾。”The̍h五张一百kho͘人民币hō͘伊chhōa老母看病食药-á。少年人钱收去，kōaⁿ水来kā老母洗，铁链-á拍开，chhōa伊入去厝内面。

长老kap大斤转来到半路，又koh听着有人哀叫。路边人家厝ê猪椆内面，仝款有一个人起siáu m̄知人，hō͘人pa̍k leh，准作猪tī土脚thún nòa。长老m̄甘心，替伊请求，hō͘伊tháu放。 Mā the̍h 五百kho͘ hō͘伊看医生食药-á。

沿路转来到厝，长老chiah问大斤：“这个石口所在是m̄是自来真chē人起siáu ？”大斤摇头：“以前kan-na冬一个。”

第三年长老又koh来到石口。一大堆人来看伊，真chē是斗闹热ê。大斤ê厝内té bē落，长老tī厝外ê空地讲道。Tú chiah讲无几句话，雄雄听着哀叫ê声，有近也有hn̄g，大声细声叫bē停。众人ê中间有人hoah：“长老，长老，赶紧，有人起siáu a！有人起siáu a！”亲像teh hoah火烧厝。长老停落来，beh走去看，雄雄路hit旁三、四个穿制服ê保安警察ùi对面jiok来。众人看警察来、hoah一声作一下走kah lī lī。警察来到tè，kā长老kap大斤掠起来，手扣扣leh，ka7in ah转去隔壁庄，关tī派出所内面。

Hit暗tī lông -á 内，大斤细声kā长老讲：“长老，以后无法度koh再kap你见面a。分手以前，有一项代志我beh对你后悔，有一句话我beh讲明白。”长老讲：“我看你bē输兄弟，请你有话讲明白。”大斤讲：“有人因为无得着你ê钱，怨妒目睭红，去报警察来掠人。” 长老讲：“我知影。” 大斤koh讲： “Hia ê庄里起siáu ê拢是装假ê。”长老看大斤tàm头讲：“我知，kan-na冬起siáu医好a。” 大斤惊一tiô问：“你知影？！” 长老讲：“我知影，因为in目睭内是看着金钱欲望kap欢喜，m̄是得着疼惜ê安慰kap感恩。” 大斤问：“你to知影，thài beh koh钱hō͘ in？”长老停一时á，笑笑á讲：“Ah，我ê朋友，我ê兄弟，你看，一个好好人甘愿kā家己看作猪，准作精牲thún踏，敢bē比一个m̄知人起siáu ê koh khah可怜可悲？”大斤无应伊，久久才讲：“长老，阮想讲恁台湾人真gōng呆好骗，实在是家己无目睭骗家己。”

结果保安单位提出控诉，讲长老「妖言惑众，非法传道。」石口真chē人因为听伊妖言讲道起siáu，kā伊关起来。后来长老in tau ê人得着这个消息，赶紧叫伊ê细汉后生去中国走chông打tia̍p。M̄知罚外chē钱chiah放出来。又koh kā伊警告，以后不准入境中国。Tō是按呢自旧年起，卢重义长老无koh去中国旅行。