《陈雷文选》

 | | | 转寄

虎姑婆

作者 陈雷 2008.04.20

1

美国加州南部这个所在气候热，koh定定有地动，所以台湾人来chia tòa拢会惯势。Los Angeles本地免讲，tī四围附近亲像Irvine这个所在，tō真chē台湾来ê移民tī hia作生理食头路。

Tī hia大家拢知影陈太太Lily，因为台湾人中间，伊ê厝tī好额人区，koh上盖大间。陈太太翁tī台湾作特种布料ê制造，内销兼外销，不止成功有thàn钱。几年前来Irvine买一间大厝，hō͘某kap二个kiáⁿ tòa，家己台湾美国来来去去，一年几摆，tō是咱所讲ê太空人ê生活方式。 不而过陈太太一个人tī美国顾kiáⁿ实在是真尽心。关于这点，kap伊tòa上近ê黄太太Rosa tī代志发生了后mā是按呢讲，实在m̄是伊ê错误。Hit个大汉查某kiáⁿ Jessie 12岁，ta̍k日去学校拢用车载，近近a mā m̄甘hō͘伊行。Hit个细汉查甫ê Michael才5岁，犹未去学校，mā是车出车入，chhōa伊去学siû水，学phiⁿ-ia-no͘h，学sńg电脑。Koh有一点，kap陈太太有熟悉ê人拢知影，伊真注重gín- a ê语言教育。不时kā人讲：“咱gín-á 来tī chia，家己ê话m̄ thang hō͘ bē记得。”M̄-kú陈太太讲ê｢家己ê话」，事实m̄是家己ê话，tī厝内伊kap gín-á 拢讲hit lō中国话，罕得讲英语，正经家己ê台湾话是chēng tī台湾tō真少teh讲ah。又koh ta̍k礼拜六拢一定ài驶成点钟ê车，chhōa gín-á去中文学校学中文。

也tō是这个原因，陈太太Lily chhiàⁿ佣人hit时有kā黄太太讲：“成好运，chhōe着这个韩太太会晓讲国语，顺续教阮Jessie kap Michael。” 黄太太讲：“Ah你tī厝里m̄是拢家己有teh教？” 陈太太讲：“无仝lah，咱che thái有算！人讲he才是正港ê国语。咱gín-á hīⁿ空利，beh学tio̍h学hit款标准ê。” 黄太太bat kap韩太太讲过话，听无啥有，上海腔足重ê。

韩太太Nancy kap陈太太Lily差无几岁，tú好足爱讲话。伊kā陈太太讲，伊kap翁拢是上海某大学毕业ê。翁是电脑工程ê博士，日时上班，伊家己一个tī厝里无聊，所以出来chhōe代志bóng作。陈太太本人是台湾家职毕业ê，hō͘伊讲一下，家己soah pháiⁿ势，薪水tō算khah koân hō伊，khah粗重ê mā pháiⁿ势叫伊作。

有一项陈太太上放心ê，tō是韩太太看起来真疼gín-á，特别是Michael上爱chhōe伊chhit-thô。伊kā陈太太讲，看着Michael tō想着伊tī中国ê kiáⁿ。侥幸真久以后才知影，韩太太讲chiah chē话ê中间，tō是kan-na这句话上盖实在。伊the̍h相片hō͘陈太太看，成实一个查甫gín-á，kap Michael平chē岁，又koh生作足仝面，雄雄看分bē出来。陈太太想，伊按呢kap细kiáⁿ分开chiah hn̄g，m̄知外苦心。莫怪看着Michael，tō bē输看着家己ê kiáⁿ，心内十分同情伊。Hit年圣诞节，买衫、买鞋koh买gín-á chhit-thô ê汽车，仝款ê chhoân二份，一份hō͘ Michael，一份hō͘韩太太寄转去中国hō͘ in后生。


2

旧历过年了后hit暗、无想着台湾电话来，讲陈先生车祸出事，着伤入院，等teh beh开刀。陈太太急kah规暝无困，隔转日韩太太来，听着这个代志，mā tòe伊急，讲：“你紧转去看恁翁。” 陈太太讲：“Jessie ài读册，Michael无人顾，beh按怎？” 韩太太安慰讲：“作你去，免烦恼。Gín-á kap厝我替你顾。” 陈太太想讲韩太太gâu疼gín-á，看起来人也实在实在，tō讲：“按呢我转去，看一下tō转来。” 韩太太kā伊讲：“你一chōa路hiah hn̄g转去，陈先生开刀ài人照顾，上无mā tòa二礼拜，等到出院才转来。” Koh讲：“Chia ê代志你放心，我kā你顾。有啥事拍电话联络tō是。” 陈太太急beh去看翁，the̍h二千kho͘先交hō͘韩太太作厝内所费，一直kā伊万事拜托soeh多谢。韩太太一手the̍h钱，一手kā陈太太giú--leh：“老实讲，咱平平是中国人，斗相工是应该ê。” 讲kah有头koh有尾，有影koh有迹，陈太太心内真hō͘伊感动，讲：“咱中国人上有人情味。” 吩咐Jessie kap Michael乖乖听阿姨ê话，妈妈liâm-mih tō转来。Hit日家己一个坐飞机转去台湾。

过来韩太太规日来tī陈太太hia，替伊顾gín-á看厝。陈太太ta̍k日拍电话转来，gín-á欢喜kā叫：“妈妈，阿姨煮ê成好食。” 陈太太koh kā韩太太万事拜托soeh多谢，讲陈先生已经手术二摆，犹未好势。韩太太kā伊安慰：“作你放心，阮翁下班了mā有专工来看。免急，陈先生好势才转来。”

那知拜一hit日，Jessie放学转来，厝里无半人。想讲大概阿姨chhōa小弟出去，liâm-mi tō会转来。等到天beh暗，犹无看人。Pak肚iau，冰箱内面chhun半罐牛奶，thîn来lim。Choān电视来看，he电视teh作Halloween ê鬼故事，像咱台湾ê虎姑婆会食gín-á。Jessie爱看鬼á 故，bih tī房间内看，惊kah脚手尾冷ki ki。Liâm-mi外面天暗暝摸，大厝内面gín-á家己一个，概成厝脚壁角拢有鬼，怪声sīⁿ-soāiⁿ叫，惊kah挡bē tiâu，拍电话叫台湾ê妈妈。陈太太雄雄接着电话，听Jessie teh khàu，惊一tiô，kan-na知影是阿姨kap小弟无转来，无头也无尾，赶紧拍电话hō͘黄太太，拜托伊专工去看māi。黄太太kap黄先生透暝驶车chông去，可怜一个gín-á khàm tī被kó͘内面，惊kah嘴唇乌绿bē讲话。

黄太太kā Jessie chhōa转去厝里，隔转日koh来陈太太hia巡，mā是看无人。Lú想lú m̄-tio̍h，去警察局报案。警察讲，无够36点钟，犹bē使报失踪。结果koh等一日，去kā登记在案，大人gín-á二人。失踪ê大人kan-na知影叫作韩太太Nancy，讲话上海腔，无电话号码，也无地址。警察kā黄太太吩咐，tòa厝里等，若有人拍电话来，马上kā通知。 按呢koh等二日，无消息。陈太太台湾电话一直khà，急kah chhoah头鬃。尾a bē等得，kā翁放tī病院，家己一个又koh坐飞机转来Irwin。一看，成实Michael无去ah，kā Jessie lám tiâu leh，惊kah m̄敢放开。因为伊tī台湾时常有听人讲，gín-á hō͘人绑票，hō͘人掠去thâi ê代志，无想着来美国也会有。警察安慰伊，讲若是绑票beh爱钱，应该早tō有电话来ah。

黄先生ta̍k日驶车替伊四界问四界chhōe，bē输青盲ê teh碰壁，碰无出路。Taⁿ按呢当teh想无步，才发现厝内Jessie kap Michael ê护照拢无去，金á手只、phoa̍h-liān mā phâng去。Koh去报警，警察想bē晓，若是beh爱钱，金á 、护照偷the̍h去卖，是按怎连gín-á也chhōa去？按呢二礼拜过去，二个月过去了…，无半滴消息… 。陈太太ta̍k日驶车四界去，tī路- -里、tī mall内面，遇着人tō问，the̍h Michael ê相片hō͘人看。到尾a，连暗时也去厝边隔壁kā人lòng门，问人有看着Michael无？附近ê人拢会了解同情伊，知影伊家己gêng心食罪。…若无伊kā Michael放 leh，家己转去台湾，…若无伊转去hiah chē日，…若无…、若无…，Michael tō bē无去lah。


3

二年后tī NewYork Bronx所在，有一个查某人chhōa一个查甫gín-á去小学一年级，报名作Michael Chen，kap这个查某人有熟悉ê人拢知影，伊ê翁叫作钱强，翁某拢tī中国城餐馆作工，kan-na这个gín-a。但是拢无人知影，二年前伊按加州坐飞机ê时，身躯边有一个五岁ê查甫gín-á，叫作Michael。这个gín-á乖乖tòe伊一路飞来到中国上海，落飞机了tō无人koh再看着伊。三日后，查某人坐飞机离开上海来美国，身边原在有一个查甫gín-á，kap Michael仝面平大汉，手里掠一只细只汽车teh sńg。这个gín-á m̄-bat出过门，m̄-bat坐飞机，一路问东问西。Beh过关以前，伊ê老母一直kā吩咐：“会记得，你ê名叫作Michael。”

结果Michael Chen hō͘人骗去中国，放sak tī hia，后来怎样咱m̄知影。是m̄是tī中国hō͘人卖去作kiáⁿ？是m̄是hō͘人卖去作路里ê乞食，像咱tī 香港ê街á 看会着断脚断手ê gín-á teh分钱？抑是早tō hō͘人灭口消迹去？Che一直拢无人调查出来。总是tī南加州Irwin kap Los Angeles附近，he天气热koh定定有地动ê所在，陈太太Lily不时the̍h伊ê相片问过路人，敢有看着Michael？二冬、三冬、几偌冬ah，犹koh日日按呢teh chhōe无伊。