《陈雷文选》

 | | | 转寄

谋杀者

作者 陈雷 2008.02.10

Hit个gín-á hō͘人按圳沟救起来hit日，in老母kā伊lám leh meh-meh-khàu m̄放，bē输真知影，若放去tō会koh无去。按呢mo͘h一暝，隔转早chông去仙公庙烧金，kā神明chiù-chōa下愿，ùi这日起ta̍k日敬神拜佛食长斋。In老pē chhoân一副猪心猪肝，一只蕃面鸭角，koh一担官田ê菱角去金印a in tau，kā伊拜kā伊谢。“这个国生a我生ê，m̄-kú是你才有ê 。”这句话讲四、五遍，招伊结拜换帖作兄弟。

Hit日sit头作soah按hia过，tú-tú听着沟á底人teh hoah救命，无顾看tō跳落去，顺he水势一手kā伊chang起来，抱起来沟á顶。Kā看，侥幸a，tō是磅婶a in后生。这个国生a灌一肚水，直直吐，佳哉犹有khùi，险险tō无死！抱转去in厝，磅婶a看he kiáⁿ一身躯死人色，bē 输死猪á thâi好倒tī hia，叫是已经去a，mo͘h leh大声khàu ：“我kiáⁿ ôe!我ê心肝á kiáⁿ ôe!…”

这个国生a kap春a仝岁，二个不时结作伙，相好若兄弟。金印a in查某人量a，hit日看国生a hō͘人抱转来，目睭仁吊吊，规身躯死人色，bē输阴间转来ê水鬼，心内tō无欢喜，迷信koh kāu khiàn-sńg，七念八念：“这个gín-á有带（tài)命底lah！”金印a骂伊：“查某人这枝嘴！你无看人gín-á乖乖，册拢读第一名。咱春a敢tòe伊会着？”

M̄-kú人讲日时想鬼，暗时作梦。这个金印a前a罕得作梦，hit日soah作一个bái梦。梦见in春a坐tī灶脚teh thó͘大khùi，烦恼kah一个面jiâu-jiâu，目睭皮kōaⁿ水。三、四十岁a，看起来比伊khah老。Tú想beh问，tō精神a。连续二日仝hit个梦。Hiàng时人khah khiām，m̄甘去问拆（thiah）梦ê，孤孤闷闷khǹg tī心头。

隔几工又koh梦着春a，mā是忧头结面，beh khàu beh khàu，问伊啥代，应讲：“pōng-pōng ta̍uh-ta̍uh beh tó sa chiah chē钱？”金印a问：“外chē 钱？”春a应：“五百万lah！”“Chiah chē钱beh创啥？”“国生a teh讨！”惊一tiô，bē赴问tō koh精神a。天已经光iāⁿ-iāⁿ，国生a phāiⁿ一个册包tī门口teh等。春a伸手kā老pē讨sí-siù-á钱，金印a想起tú-chiah梦里ê代志，顺嘴骂：“讨chiah chē钱beh创啥？”春a应：“Ham国生a去买冰枝。”金印a看he国生a，衫裤穿kah清气清气，手里一本册teh读，心内讲：“梦bóng梦，m̄通乌白想！”

嘴按呢讲，心koh放bē落去，隔二日又koh作梦，问in春a：“国生a讨钱beh创啥？”春a应：“国生a poa̍h大kiáu输人钱。”“我to知知，细汉乖乖gâu读册，大汉khioh-ka̍k作pháiⁿ kiáⁿ。看会出来lah！看会出来lah！”骂：“Mài chhap伊！这款pháiⁿ kiáⁿ mài hiù-lān伊！伊输kiáu kap咱无代。”春a摇头：“阿爸你m̄知。国生a chit-má大尾a。”“按怎大尾？”“咱chia兄弟拢伊teh hoah起hoah落。若无钱去，放tiāu beh掠银印a tú数。”“银印a？”“阿爸，我kan-na这个kiáⁿ，你kan-na这个孙！”soah醒起来，国生a来tī门口，狗teh吠。春生a伸手讨冰枝钱，金印a手kā掠leh，骂：“Mài chhap伊，这款pháiⁿ-kiáⁿ mài hiù-lān伊！”

过来规礼拜心闷闷。暗时倒leh，目睭金金m̄敢困，惊去梦着春a。眠床头翻来péng去，in某问，才讲he梦hō͘伊听。“我to知知leh，这个gín-á有带命底leh lah！”起来泡牛滂茶hō͘伊lim ，lim落tō会困，梦着春a teh khàu，“去a lah！去a lah ？”“啥人去a？”“银印a hō͘国生a掠去a lah。无钱tō beh hō͘死！”金印a讲：“救gín-á khah要紧，钱先hō͘伊才讲。”家己身躯边ê钱khêng-khêng leh，斗斗五百万，布袋袋leh tō去chhōe国生a。

Che国生a坐tī路边teh等伊，四kho͘围是koân-koân kē-kē ê草埔，边a一间细细ê有应公祠，li-li làu-làu，漆拢落无去a。这个国生a看起来原在十三、四岁，kan-na hit个面ê hia̍h-á kap鼻头一大jiah lù破去。金印a骂：“国生a，你好胆死！掠阮银印a beh创啥！”国生a讲：“阿伯，pok一枝。”tu一枝薰hō͘伊。金印--a骂：“你这个猪狗精牲，无情无义！若m̄是恁pē kā你救，你犹有今á日这条命！”He薰大下suh一嘴，头壳hîn se̍h lin-long。“哈！哈！tō是这条命你救ê，chit-má拢你ê!好bái你担当！”póe一枝短刀出来，大大力ùi土里tu̍h落去。He刀直直插tī土里，深深深chhun一枝柄，kā看，he土soah流血出来。雄雄国生a身躯soah无去，chhun一粒头浮leh沉leh，亲像tī水里teh beh淹去a…“救命lah！…救命lah ！…”。着惊hoah：“钱拢tī chia！”布袋piaⁿ leh，钱chhia-chhia出来。Kā看，规土脚一tha̍h一tha̍h死人用ê金纸，那是钱！Chhoah一tiô醒醒起来。

一身躯chhìn汗，脚尾手尾冷ki-ki，嘴内犹有臭薰味，taⁿ m̄知是醒犹未？Kā看，外面风透，窗á门si-si soáiⁿ-soáiⁿ，犹是半暝暗眠摸niau。坐起来喘大khùi，想讲taⁿ怪a，若m̄是人死，那有hiah chē金纸钱？Lú想lú无自在，耳空内ki-ki叫，有听着国生a尖尖ê声teh hiu：“这条命拢你ê，好bái你担当…”

目睭金金m̄敢koh困，等到天光狗吠，国生a来tī门口，phāiⁿ一个册包，the̍h一本册teh看，金印a念：“这个gín-á有带命底leh lah！”Tī hia tō下一个决心。

Hit一工国生a又koh按圳沟hia过，金印a kā叫：“国生a，你家己一个beh tó去？”国生a应：“我teh liam田婴。”金印a kā ia̍t手：“来，你来kap我掠水鸡。”国生a kap伊peh起沟顶，hit时西北雨tú soah，圳沟ê水kòng-kòng流。国生a惊水，讲：“阮阿母吩咐，沟á水大，m̄通óa去。”金印a讲：“阿伯tī chia kā你顾，无要紧。”Khiā tī koân-koân ê沟á顶，四围一大片ê稻á青青绿绿，已经齐齐一尺koân。这时日头tú tú落去，田里拢无人，kan-na几只大只白鴒鸶hō͘五彩ê天照kah红hóaⁿ红hóaⁿ，tī hia行来行去。雄雄出一下大力，kā chhia落去。国生a bē晓siû水，身躯沉落去，chhun hit粒头tū tī水里浮leh浮leh，koh liòng二下，bē赴哀tō无去a。

伊khiā tòa沟á顶等，久久无koh浮起来，才大声hoah：“救人o͘h！救人o͘h！”挂衫挂裤跳落去，tī沟á底sa着国生a ê脚，hô͘起来khǹg tī沟á顶，kā看，已经早tō死去a。Hit个十三、四岁ê gín-á面，hia̍h-á kap鼻头一大jiah lù破去，kap梦里ê仝款仝款。抱转去in厝，磅婶a看he kiáⁿ一身躯死人色，目睭金金，嘴á开开，水也无吐，知影已经去a，lám leh大声khàu:“我kiáⁿ ôe!我ê心肝á kiáⁿ ôe!…”

法医来验尸，鉴定是淹水死ê。出山hit日，金印a烧足chē金纸钱hō͘国生a，kā in pē母讲：“我若早一步tō好lah！”He老pē讲：“这个gín-á该去ê，第一摆救有着，第二摆也tio̍h去。”而且庄里相命ê阿有a讲，陈国生有带命底，in老母食长斋也无彩工。磅婶a khàu kah有目睭无目屎，怨家己长斋食无清，hit日偷tam一tè麻油炒猪肝。