《陈雷文选》

 | | | 转寄

约束

作者 陈雷 2008.02.03

(1)

头gia̍h起来e5hit时，火车已经teh tín动起行a，tú-tú好面对面影一下，目睭相咬，心肝íⁿ-á chhia̍k一tiô，奇怪a，这个查某gín-á，现现tō生分无熟sāi，thài目睭会讲话，teh问伊：「你敢会认得我？」

He âng-á头深深深看bē到底，若日月潭ê水。伊the tī火车内窗á口看，想讲thài有这个少年人chiah龟怪，无代无志tòe火车teh走，手gia̍h koân-koân，kho̍k-kho̍k比，直直 ia̍t？是m̄是bat伊？Chhìn-chhái也续手kā伊ia̍t一下，mā是犹teh走。火车离车站a，才停落来，khiā tī月台尽磅hia瞻瞻看。第一回相遇，tī台北车头5号月台，人ká-ká滚。伊ùi台南上北起来，伊beh落南去台中。按呢雄雄闪一个面，相咬目差不多2分钟niā-niā。

赶紧chông出来车头门口，跳入去tha-khu-sih，tō hoah：「台中车头！…拜托拚khah紧leh，我加一千kho͘ hō͘你。」运chiàng无应声，tìm 一个头，油催落，车se̍h一liàn，驶leh tō走。一路tī高速ê拚死chông，pháiⁿ运tú着车chē，khah拚tō才100、110。拚到台中车头，台北落来ê快车10分前到。车头se̍h三遍，看无伊。

隔转工koh去台北车头5号月台，ká-ká滚，等无人。过来ta̍k礼拜仝hit个时间去hia等，无koh再看着伊。Kā朋友讲，这个查某gín-á目睭会讲话，问我敢会认得伊？朋友kā笑，m̄是伊目睭会讲话，是你这粒头壳乌白想。Kā阿姊讲，这个查某gín-á目睭会讲话，m̄知tī tó位bat见过？阿姊看小弟ta̍k礼拜去车头等无人，问伊：「Ah是外súi nih？」小弟应：「Bái-súi-á bái-súi。」Kā劝：「你看一个影生一个kiáⁿ！连名tō无，beh tó去chhōe？准soah lah。Mài koh无sit担pùn担，家己giâ-kê。」想想leh，阿姊讲ê也是有理，决心m̄去kā想，mā无koh去车头等。过来连续几lōa工作梦，查某gín-á tī火车内窗á口ia̍t手，the̍h车票hō͘伊看。明明手肚á hia一粒痣，银角á hiah大粒。Kā朋友讲：「查某gín-á手肚á一粒痣，银角á hiah大粒。」朋友kā笑：「按呢你去登报纸刊广告：陈约瑟chhōe人，无名氏。Bái-súi-á bái-súi。目睭会讲话，手肚一粒痣。」

(2)

Tī新楼beh 30冬a，罕得遇着痨伤chiah厉害。这个少年查某人，看起来才20外niâ，血直直bū，khùi喘bē lī，人强强beh昏去。「恁新妇ài随接血，若无，有性命危险。」伊kā老查某人讲。老查某人乌衫挂乌裤，面皮kiâm菜脯。作sit-á看着医生穿白衫，pháiⁿ势头chhih-chhih，细声应：「是阮静美lah ，我ê查某kiáⁿ 。」「你ê查某kiáⁿ若无紧接血，血吐bē止tō无救。」医生惊伊听无真，koh再讲一摆「无救」。老查某人听了有真，惊kah脚á手la̍k-la̍k chhoah，bē输hō͘大人á 判死罪。到chia来知影是查某kiáⁿ性命ê问题，看扮势钱无开落bē soah得。出来ê时，旺a有吩咐，m̄通乌白开，厝里chia ê钱niā-niā，开了tō无a。Kā医生讲：「先生，若是要紧，ah无注一枝大筒盐水射，敢会使得？」真害a，chia ê草地人，成实命khah轻钱khah重，讲着开钱食药á，bē输beh hō͘人掠去剥皮兼liô肉。

佳哉随kā接血，救一条命转来。医生去chhōe明道牧师，tō是新楼ê院长，kā伊讲，这个少年查某人郭林静美，永康hia ê作 sit人，厝里5个细汉kiáⁿ，散kah鬼beh拖去。院长讲，救人作代先，费用教会才来想办法。Koh去chhōe荣理牧师，tō是长老教会总干事，讲这个查某人永康hia ê作sit人，厝里5个细汉kiáⁿ， 散kah鬼teh beh拖去 。总干事讲，靠主怜悯，若是老母无去，这5个细kiáⁿ beh按怎？Taⁿ我tio̍h祈祷，你尽你e5khui3力kā伊医tō是，费用教会来负担。Khiā hia感恩祈祷。

按呢血接了，病势才安定落来，无koh吐血。医生早暗来巡，ta̍k日2、3摆，真是顶真周至。一礼拜过了，也是奇迹，soah有khùi 力peh起来行。静美kā医生讲：「先生，我明á chài beh来去转。」医生惊一tiô，kòng-thûi-á hám着大头母，嘴á开hāⁿ-hāⁿ，hoah：「你tú-chiah险一大险，差一sut á无救。Chit-má才会起来行，怎样明á chài tō beh出院？」查某人应：「先生，tòa chia hō͘教会开chiah chē钱，足pháiⁿ势。」「钱！钱！…成实钱比命khah要紧？！」医生大声hoah。老查某tī边a斗讲：「先生，m̄是lah，ah tō厝里gín-á无人顾，旺a差人来teh叫。」Koh讲：「阮静美，嫁这个翁，一世人pháiⁿ命。」医生才去想着，伊有5个gín-á放tī厝里，入院到taⁿ也无人来看，心内同情伊。第一回无张持斟酌kā看，mōa一领布衫阔long-long，坐tī眠床kîⁿ，双手ji̍h tī胸前teh嗽。担头起来，he面是三月粗重ê乌阴天，hia̍h-á顶一chōa一chōa忧愁ê白云丝。

Hit时昭和17年年底，台南州立结核疗养院清风庄成立。医生去chhōe疗养院 ê院长参详，安排kā静美sóa去清风庄治疗静养。Kā老查某人讲：「你转去厝顾gín-á。查某kiáⁿ tī chia护士顾。」老查某人kā查某kiáⁿ讲，「这个医生kap教会实在照顾咱。替咱纳chiah chē钱，koh叫护士顾你。」

医生mā是ta̍k日来疗养院看伊ê病，渐渐有起khùi。半个月过了，静美想kiáⁿ，kā医生讲：「我转来去厝里看一下。」医生讲：「Liâm-mi转来。你病犹未好。」成实转去3工tō koh转来，ai-io-ôe，身躯脚手四界乌青结血，bē输tho͘-la-khuh cheng着ê。Hit个面若甘á蜜teh tī笼á底，大naih细naih，一tah青，一tah乌，一tah红。问伊啥物代志，m̄讲。问老查某人，才讲是转去hō͘旺a拍，骂伊好胆死，chiah久叫bē转来！「阮静美，嫁这个翁，一世人pháiⁿ命。…食酒pháiⁿ改，…食酒拍某bē改lah。」医生柴柴khiā hia，看kah神去，才koh精神过来，一晡久，嘴里念：「…会改，…若beh，mā是会改lah。」

静美tī清风庄疗养二个月，加真好势，tō beh出院。这日，kā医生讲：「我这条命，你救ê，这世人我bē bē记得。」医生koh顶真kā看，这日头鬃loa̍h齐齐，bē输透早时木麻黄ê树欉hit款清芳。担头起来，tō是好天时轻松ê天顶尾，he面清清清，无半chōa忧愁ê云丝。二粒âng-á-头大大个，深深看bē到底，ùi hia入去，thàng去到另外一个神秘ê世间，亲像teh问伊:你敢会认得我？雄雄，心内有一种特别ê灵感kap冲动，kap伊真熟sāi。Soah坐落来，kā伊讲：「这世人bē赴a，…后出世lah，…。」「后出世？」静美m̄知影伊ê意思。医生问：「你敢有信后世人？」「有，ah无死了beh tó位去？」讲soah无啥自信，才问：「敢有hahN？」医生牵伊ê手tê-á，讲：「有lah，有lah。…后世人，…后世人你tō是我 ê牵手。」静美惊一tiô，无张持也第一回看医生ê睭，有深底沈重 ê诚意，有giâ浮讲bē soah ê话，紧应：「我…我已经嫁人a，…我有5个kiáⁿ，…」

静美转去厝khah无一个月，又koh大吐血。车来新楼，已经m̄知人。马上接血注大筒射，才精神过来。目睭thí金，看着医生khiā tī眠床边，tō讲：「旺a无信。」医生问：「旺a无信啥？」「伊讲死了tō sa-io-na-na，无去a。无koh有后世人。」医生àⁿ落来，真tú真kā伊讲：「有lah。后出世，…我等你。」静美ná喘ná问：「我敢有súi，这世人？」He声若浅流 ê溪水 teh beh ta去。医生牵伊ê手，óa近去讲：「有lah，你足súi。」惊伊听无真，koh再讲一摆，直直tìm头。「后出世…我若生作bái kê-kê，你敢会认得？医生gīm伊ê手tê，亲像冰á枝冷ki-ki：「会lah，你去到tó位我mā会认得。」「Beh按怎认？」医生伸一枝指头 á，指伊 ê âng-á头，真自信讲：「看chia tō知。」koh kā伊保证：「后世人，我bē食酒拍某。」静美知影伊teh讲sńg ê，bē像旺a食酒拍某，beh讲hō͘伊轻松bē烦恼，目睭尾tòe伊bún-bún-á笑，犹未赴应 tō m̄知人去。

大村医生tī这lê床边khiā真久真久，想起秋子，30外冬a，生头chiūⁿ-á漏胎过身去。因为伊食酒醉拍伊，用拳头母cheng头壳，用脚踢伊ê腹肚。「食酒pháiⁿ改，…食酒拍某bē改lah。」伊chiù-chōa m̄ koh lim酒，m̄食酒拍某。30外冬a，有照按呢作，无koh娶，无lim酒。Chit-má这个约束有讲出嘴，伊真自信，mā真期待，因为后世人真紧，若亲像明 á chài,隔转日天光tō beh到a。

(3)

六个月过了，陈约瑟大学毕业，派去台中hia作兵。Hit年9月22日中部大地动，南投山内走山，死真chē人。军队入山救灾，来到集集，tō 是地动 óa 中心 ê地点，规庄倒kah平平。有ê所在规旁山崩去，有ê规chōa土脚pit开，有ê规排厝挂人tâi kah无看见。军队暝日无停 ó͘ koh掘，救真chē人出来，死ê khah chē，mā有着伤犹活ê。

伊概成有听着人teh叫 ê声，ùi土脚底出来。Phak落去斟酌听，ai-io-ôe,koh是人teh唱歌。惊一大tiô，赶紧拚死直直 ó͘，大声ná hoah：「我来a！…我来a！…」雄雄土脚底 ê人声tiām --去，伊kā叫：「Oe！koh等一下！…我来a！…」出力大tè石 á kiāu开，鸡母ôe!现现一枝人手，指头 á 5枝开开，已经拢乌绿去a。「紧来oh！Chia有一个！」伊大声hiu，àⁿ 落去 giú hit枝手。Ai-io-ôe，thài有影lah？！手肚á一粒乌痣，银角á hiah大个。

救出来已经m̄知人ah，注大筒射才恢复过来。Taⁿ害a，hit个面若甘á蜜teh tī笼á底，大naih细niah，一tah青，一tah乌，一tah红。Kan-na hit二粒âng-á头清清清，若日月潭ê水，深深看bē到底，teh问伊：「你敢会认得我？」无m̄ tio̍h lah，tō是伊。问伊ê名，应讲：「我高再丽。」「你tú-chiah tī土脚底唱歌？」查某gín-á tìm头：「我知影有人beh来救a，唱歌tō bē惊。」「你teh唱啥物歌？」伊唱hō͘伊听：「…向前行，…向前行…，m̄免惊…。」tō是林强ê歌。「你敢会记得？」「会记得啥？」「Tī台北车头，我 ùi窗 á外kā你叫，kā你 ia̍t。」伊认真kā看，siòng一晡无nih目，才hoah：「Tō是你o͘h！？」「我lah，tō是我lah。」「你 teh jiok火车，tòe火车走，手khok-khok比。」「我 teh问你ê名。」「我the̍h车票hō͘你看。」「我jiok去到台中。」伊概成m̄敢信，目睭chheⁿ-chin kā chîn，二粒 âng-á头若台湾海峡 ê水，深深乌乌看bē到底，thàng去到另外一个神秘ê世界，秘密ê境界，ùi hia来，轻声teh讲：「会lah，我会记得。」问伊：「你，啥物名？」「我…陈--约--瑟。」「你…等--约--束！」二个人，挡bē tiâu，你看我，我看你，大声笑…笑…笑…。