《陈雷文选》

 | | | 转寄

死人戏

作者 陈雷 2008.01.13

1

Hit暗伊第一遍亲目看人死去，tú-tú对对tī伊ê面头前。Hit个煌a ê头壳kap面hō͘枪pōng pháiⁿ去，血kap肉幼á phùn着伊ê衫，chhòng lap-sap去。不而过因为死了siuⁿ紧，前后一个目nih niā-niā，所以经过看也无详细。「死tō是按呢o͘h。」Che是伊hit一暗tī谋杀现场ê印象，算起来已经beh 20冬a。Hit时伊tú-chiah 19岁，Ma-sah讲beh chhōa伊去看人死。Ma-sah比伊大3岁，胜a叫伊大ê，凡是食薰、食酒、sńg查某空、作贼偷拢是Ma-sah教ê。

「死无啥。」Ma-sah kā胜a讲，「你家己看一摆tō知影。」二个人骑o͘-to͘-bái tī街a se̍h一liàn。来到郊外ê空地，已经半暝翻点，对面一间kám-á店火犹光光。O͘-to-bái停leh，二人tō入去。注hit个头家这日该死，tú beh关店，店内kan-na伊一个。看in入来，好礼问：「人客爱啥？」Ma-sah行óa去，笑笑应：「头家a，我这个朋友犹m̄ bat看人死---。」头家m̄知伊ê意思，tú beh koh问，已经一枝短枪póe出来，对伊ê面chiong-chiong piàng落去。连续2枪，血kap肉幼á phùn kah一四界。胜a无料着Ma-sah会tōaⁿ枪，惊一下gāng-gāng，无顾看tō走。Ma-sah作后壁jiok来，一手kā chang leh，问：「看有真无？」胜a一身躯phi̍h-phi̍h-chhoah，惊kah嘴齿哺豆á。Ma-sah起爱笑，手里hit枝枪tu hō͘伊，讲：「Koh入去，看khah真leh！」

胜a惊Ma-sah笑伊无胆，成实枪gīm leh koh入去。Kā看，土脚一kho͘人chhiò-chhiò倒tī hia。目睭一蕾pōng无去a，另外一蕾开开，嘴舌thóng一半…。「死无啥。」伊学Ma-sah按呢家己大声讲，胆tō khah在，手枪gia̍h起来，相真真tō pōng，手chhoah tōaⁿ无chiong，pōng着khong-khuh-lih ê土脚。Oat leh tō走出来，已经无看Ma-sah tī hia。

这暗绣a人艰苦无顾店，tī楼顶teh歇困。半暝听着楼脚pìn-pòng叫ê声，惊一tiô，独强peh起来，落来到楼梯头，听着有人teh讲话；「死无啥。」Bih leh kā看，一个查甫gín-á手gīm一枝短枪khiā tī hia。雄雄pōng一声，oat头tō走，绣a bih tī楼梯头m̄敢tín动，等到o͘-to͘-bái ê声远远去a，才chông落来。一看，taⁿ惨a，in煌a一kho͘人chhiò-chhiò倒ti7hia，土脚一chhok血犹teh流，叫bē应，已经死a。

Hit暗三重埔ê警察teh chhōe一个骑o͘-to͘-bái ê查甫gín-á，长头鬃pak一个尾，ām-kún kho͘一条红巾á，行路正脚小khóa pái脚。隔转日tī菜市á掠着胜a，o͘-to͘-bái坐椅下面抄着一枝走私ê乌星手枪。叫绣a来认，siàⁿ-siàⁿ tō是伊。

胜a讲枪是Ma-sah ê，人是Ma-sah thâi ê。叫Ma-sah来问，讲he枪是胜a kā伊借ê。Koh绣a来认人，认m̄是伊，是胜a无m̄-tio̍h。结果人证、物证拢总有，胜a hō͘人起诉，判抢劫凶杀罪，定有期徒刑25年。判官戴念伊年岁轻，koh无前科，无判死刑。

2

「阿母，hit个人m̄是我thâi ê。」阿丽a ta̍k个月按屏东来看胜a，胜a ta̍k摆按呢kā伊讲。阿丽a mā知影，in胜a无thâi人，kā伊讲：「你koh忍耐一下，我想办法hō͘你khah早出来。」Koh三个月，胜a关20冬到期，会使申请假释。5冬前15年期满，申请假释无过。人kā阿丽讲，这lō代志ài行后路。Chit-má阿丽a后壁路已经探听好势a，这回决定beh hō͘胜akhah早假释放出来。

有人kā阿丽讲，这款代志ài去拜托咱chia ê立委。阿丽去立委蔡万能服务处问，服务员kā伊讲：「太太，你放心。这项代志阮一定转达hō͘咱蔡立委知影。伊一定会kā你想办法。」几礼拜过了，拢无消息。人kā伊教，beh拜托立委mā ài行后路。Taⁿ这个后路tō是tī市内教插花ê蔡千娇，立委蔡万能ê亲小妹。阿丽想，咱kap伊也无熟无悉，beh怎样去拜托人？Tō专工去千娇插花班报名学插花。一班二、三十个太太小姐，m̄是上班族ê，tō是厝里êng-êng族ê，穿kah súi-súi，装kah撇撇。Kan-na阿丽a一个粗脚短手，穿一双运动鞋，一看tō是thàn食人ê扮，无啥人beh chhap伊。班里ê陈太太khah亲切，bē kek-khùi，问伊作啥事业？伊讲：「光明街hit担卖鹅肉ê，你知无？」「光明鹅肉」上出名，大家mā知影。」「He tō是阮ê。」陈太太心内想奇怪，taⁿ这个tok鹅肉ê，拍算钱thàn了siuⁿ chē a，thài有hit个êng工来学插花？

Tú好这暗天赤热，半暝过了，无啥人客，阿丽tú beh收担。雄雄十字路口来二阵少年ê，一党七、八个khiā tī光明街这头，另外一党10外个占tī自由街hit旁，隔一个十字路大细声teh相嚷。无张池拍起来，chông过大路用槌á，也有用铁链sut。过路人好闲（hiân）koh惊去sîn着拳头phōe，拢khiā远远看。雄雄一个细汉gín-á拚命chông来，一个大汉ê tī后面jiok，来到「光明鹅肉」亭á脚tú-tú好jiok着。一枝长刀tō kā phut落，连续二刀，一刀斩着kha-chiah，一刀sut着ām-kún，a̍h tō倒落去。后面一阵gín-á hè-hè叫jiok到位，看人倒tī土脚，血kòng-kòng流，喝一声「干！」，作一下走了了。阿丽a才óa去看，侥幸a，koh是一个查某ê，短头鬃，穿牛á裤，khah无16、7岁á。

Liām-mih警察kap救护车拢到，先kā查某gín-á载去病院，血流siuⁿ chē，到位tō死a。警察问阿丽，有看着啥？阿丽讲，二党少年ê tī十字路相拍。Hit个大汉ê jiok到位，长刀phut二下，tō倒ù落去。警察问：「Hit个大汉ê你看有真无？」阿丽讲：「A̍h to tī这个亭á脚niâ，thái看无真？」

隔转日，掠着一个大汉gín-á，叫阿丽去认。阿丽in翁庆a，驶计程车代志bat khah chē，kā伊吩咐：「你去，拢讲你bē认得。这lō chhit-thô gín-á相拍ê代志bē chhap得。」阿丽去到警察局，警察kā伊讲：「这tè玻璃咱看伊会着，伊看咱bē着。作你放心认。」阿丽看玻璃hit旁，坐一个大汉gín-á 17、8岁、长头鬃pak一个尾，倒旁耳á钉一chōa三个耳钩，薰直直pok，手phi̍h-phi̍h-chhoah。边a桌顶二条相拍用ê铁搭链，一枝二尺长ê开山刀。阿丽看看leh，摇头：「M̄是伊。」警察问：「你看有真？」阿丽tìm头讲：「有。」

出来ê时，遇着一个查某人坐tī hia teh háu，kā看，tō是插花班ê陈太太。「阮敏a pháiⁿ-kiáⁿ是pháiⁿ-kiáⁿ，绝对bē去thâi人ê lah！」koh讲：「伊连死人to m̄敢看leh！」阿丽a讲：「我知影，m̄是伊。」「你知影？」「我有看着。M̄是伊。」这时警察放敏a出来，讲无代志会使转去a。

隔转日，陈太太来chhōe阿丽，kōaⁿ一大盒水蜜桃，内面khǹg一包红包来说多谢。阿丽讲：「你m̄免kā我说谢。你ê心情kap我ê仝款仝款，我上盖了解。」Kā胜a ê代志规个讲hō͘陈太太听。「阮胜a kap恁敏a 仝款无thâi人，m̄-kú hō͘人认m̄ tio̍h，关beh 20冬a。」陈太太同情koh感谢，讲：「我替你来去拜托千娇。伊kap我中学、大学同窗，阮若亲姊妹。」所以陈太太去拜托千娇，千娇去kā蔡立委讲，尾a经过立委出面，成实假释通过。胜a tī 20冬到期hit日放出监狱。庆a kā厝里hit台中古计程车卖掉，用hia ê钱包红包hō͘立委蔡万能kap千娇。家己改去车行租计程车来走。

3

四个月后，胜a tī芳明馆chhōe着Ma-sah，hit时伊tō是后菜园帮ê头ê。胜a óa去kā问：「大ê，你犹会记得我bē?」Ma-sah目睭微微kā看，酒lim了小khóa有teh醉，bē认得伊，问身躯边陪酒ê恋a：「这个是啥人？」「20冬前你chhōa我去看人死，我tō是hit个胜a！」听着胜a ê名，酒醒一半，kā恋a讲：「阮细ê lah。」胜a拍二下声喀，问伊：「Hit日你是按怎先走，放我一个？」Ma-sah koh kā看，若像一晡才无张持去想着，大声笑：「我…我pak肚痛，先去漏屎lah，…哈！哈！…」面oat过kā恋a讲：「阮细ê脾气khah bái!」恋a看胜a生作大汉缘投，看kah目睭无nih，倒一au bê-á beh hō͘伊lim，一直kā使目尾。胜a看恋a生作白koh肥水，若红桃teh笑，四蕾目睭soah相咬。Ma-sah问胜a：「A̍h你…你hit日hit个死人看有真无？」这时胜a规个人khiā起来，一欉6尺koân，伸手来sa恋a手里ê bê-á，一嘴灌hō͘ ta，应：「Tō是看无真，今á日koh来看一遍！」au-á大力siàng hō͘破，khian kah碎碎规土脚。雄雄m̄知ùi tó位，póe一枝乌枪出来。He恋a目睭微微犹teh笑teh看伊，已经bē赴，先tōaⁿ一枪，倒tī土脚。过去Ma-sah mā弹一枪，pōng着nâ喉头，酒才醒起来，血直直bū，phiāng tī椅a顶peh bē起来。

胜a àⁿ落去，tī in大ê耳a边轻声讲：「死无啥。」tú-tú kap伊面对面，beh认真看伊死。He面规个kiù筋，若面巾 chūn作一球。嘴peh开beh大声哀，nâ喉pōng破--去，哀bē出声。目睭仁内底，恨 kap怒tō是火lām油作伙teh烧，伸手来sa胜a，chang着伊ê lan-lin-guh m̄放。Liâm-mih血流了siuⁿ紧siuⁿ chē，力无去，手才放去，人phiāng落去土脚。红贡贡ê血若水道按嘴phū出来，这时知影家己会死，soah起生惊，m̄敢死。目睭内ê火变作水teh求伊，叫伊m̄通hō͘伊死。Taⁿ bē赴a，血已经流了去，koh无teh phùn，规身人白sí-sat。明明he khùi to无去a，又koh 大力suh一下，按呢才拢总定(tiāⁿ)去，目睭神bē输二pha电火球á雄雄hō͘人choân hoa，a̍h tō真正死a。Hit个kiù筋ê面随tō放lēng去，概成按呢拢总无代志a，嘴开开teh困。

胜a khiā起来。In大ê一kho͘人细细汉倒tī土脚，双手开开phōa tī恋a胸前。嘴hāⁿ-hāⁿ，目睭也bē记得kheh。Hit领ut kah chhio-chhio ê西装裤，中央一chhok tâm-tâm，侥幸m̄知tiâng 时chhoat一pû尿tī hia。

「死无啥。」胜a嘴内念，「目睭若死，a̍h tō总死a。」桌顶sa一干bê-á来lim，连续灌二干，oat一个头，páiⁿ leh páiⁿ leh作伊大扮行出去hit间走kah无人ê芳明馆。