《陈雷文选》

 | | | 转寄

放帖

作者 陈雷 2007.12.23

阮bân叔a以早tòa tī草地关庙hia，作人上盖土直，一tō是一，bē晓khi-khiau计较。若是作sit上盖gâu种绿竹á笋。普通时无啥teh出门，罕罕有来市内，拢会功夫kōaⁿ一笼笋á来相送，讲：“无啥tah。Che家己ê tah。早起现割ê tah。”Hia ê gín-á有时会学伊讲：“Bân叔tah，你che笋á tah，上盖好食tah。”成实he笋á鲜koh tiⁿ-but，市内买无这款ê。五十出头tō来过身去，阮老母定定念：“冤枉lah，草地人一tō是一，成实hiah刁直。” 这项代志尾a tī龙崎、关庙传成久，迷信ê人讲kah一大堆，有影koh有迹。M̄-kú无信ê人也真chē，讲he无啥，拢是咱人家己想出来ê，pháiⁿ运tú-chhiāng着ê niā-niā。

阮三叔大汉后生水盛a hit年teh beh chhōa某，亲成大妗介绍ê，代志khah chē he狗毛。查某gín-á台南女中毕业，叫作淑娟。In tau tī民权路开布店。听讲生作koân-koân lò-lò，鼻á直直，bē输美国阿tok á电影明星，外súi tú外súi leh。M̄-kú我m̄-bat亲目看过。Hit chām盛a tú-chiah作兵转来，看了一下 tō kah意，无外久tō问名、kōaⁿ定。盛a人kut力，ta̍k项代志家己hoat-lo̍h，亲成、朋友一位一位去放帖hēng饼。娟a mā tòe去，讲起来，这点市内人有khah开化。听讲hit暗到五姑hia ê时已经òaⁿ-òaⁿ ah，五姑讲：”Ai-ioh，盛a，你thái chiah功夫，一chōa路chiah hn̄g，你也专工来。” 看娟a生作súi koh iû-ia̍h，欢喜叫in入去坐。盛a kā帖á kap大饼hēng了，lim一嘴茶tō beh走。姑丈讲：“Koh坐lah，敢有beh赶啥？”盛a应：“姑丈，今á日阮chēng透早出门，到chín tú-tú走一工无停脚。犹chhun一位犹未去。”姑丈问：“按呢nih？Tó一位犹未去？”盛a讲：“Hioh lah，bân叔a hia lah。上盖sòa尾lah。分hō͘了通转去歇困。” 姑丈应:“若是bân叔hia，关庙顺路lah，chia去无外hn̄g。”盛a骑一台o͘-to͘-bái红phà-phà，娟a坐tī后面相载。离开龙崎ê时，天开始sap-sap落雨。五姑吩咐讲：“Teh落雨ah，咱chia山路滑溜，ta̍uh-ta̍uh-á驶。” 盛a应：“会lah，五姑、五姑丈，时到hit日会记得来hō͘阮请。” O͘-to͘-bái催leh tō走，有听he盛a teh hoah：“来去！赶来去！”。


M̄知到底怎样，in òaⁿ-òaⁿ离开龙崎，听讲到bân叔hia ê时，已经天beh拍phú光，鸡犹未啼。Bân叔a āiⁿ一枝锄头，tú beh去园里作sit。看in来，叫:“盛a，ah你thái chiah gâu早tah？”盛a应：“Ah tō ùi五姑hia来。”Kā看，侥幸a，规台车挂人拢是路糊á moâi，问：“Ah是按怎tah？全全土tah？”盛a应：“落雨路滑，去hō͘ chhu去。Tō是按呢chhiân到chín｡”叫入去厝内，the̍h巾á hō͘ in拭身躯。盛a the̍h帖á kap大饼hō͘ bân叔。Bân叔讲：“恭喜tah，ah tiâng时beh chhōa tah？”“后个月lah” Bân叔欢喜，指娟a讲：“恭喜tah，新娘súi tah。” Tō是话讲了chē，问题出tī chia！Taⁿ he娟a市内gín-á m̄-bat听人讲话chia tah hia tah，起爱笑，代先lún-tī心内，尾a挡bē tiâu，chhi̍h一下大声笑出来，ki-ki叫笑bē soah。Bân叔听伊笑，才斟酌kā看，ai-ioh-ôe，thái会大细hīⁿ tah！无彩一个súi查某gín-á，一旁hīⁿ á若柚á bān，另外一旁若柑á bān。Tō是草地人土直，he hīⁿ á指leh hoah讲：“心适tah，大细hīⁿ tah。”mā是挡bē tiâu，笑kah哈哈叫。二个人tī hia你笑我，我笑你，lú笑lú大声。He娟a笑kah bē输猴teh吱，强beh无khùi，雄雄起变面，tiām去无koh笑，二蕾目睭青gîn-gîn，受气掠bân叔a一直chîn。Bân叔a惊一tiô，soah bē笑。Tú好这时埕里chhio鸡啼，二个少年ê雄雄peh起来，面色白死杀，讲：“阮taⁿ紧来去。”行到门口，无张持盛a oa̍t过来，kā bân叔a讲：“时到hit日tio̍h会记得来hō͘阮请…。”Bân叔a应：“定着去tah！定着去tah！”雄雄手骨会痛，kā看，盛a一枝手白死杀，冷ki-ki若冰，出死力kā伊掠ân-ân m̄放。He手骨soah teh流血水，bē输鬼á jiàu着，身躯起畏寒phòng鸡母皮。

这时bân婶a ùi内面出来，问讲：“煌a，ah你笑kah chiah大声，是kap啥人teh讲话？”Bân叔指埕里，“盛a kap娟a tah。专工来放帖tah。”Bân婶看he埕，几只鸡á teh chhéng食，thái有啥物人，骂：你是teh看着鬼！也无半个人。…敢是家己kap鬼teh讲话。“话讲soah，埕里chhio鸡ia̍t一下si̍t，又koh啼。Bân叔a看hit二个少年ê青青狂狂o͘-to͘-bai骑leh，ia̍h一下手tō无去，kā bân婶a讲：“鸡teh啼tah。去a tah。”

Liâm-mih厝内电话giang，龙崎五姑丈khà来ê:“煌a nih。讲hit lō ho͘ⁿh，盛a kap娟a o͘-to͘-bái péng车lah…”“Hioh tah。Tú-chiah有来tah。” “Tú-chiah？Tú-chiah tiâng时？” “天beh光进前tah。鸡啼tō走tah。” “天beh光hit阵？你是看tio̍h抑是m̄ tio̍h?” “Tio̍h tah，来hēng饼tah。路滑去hō͘ chhū去tah。Chhiân到chín tah。规身躯全土tah。…人nih，人拢无按怎tah …ôe?…ôe?…。” 惊一下电话chôaⁿ按呢挂断去。Tō是这日透早三叔ùi台南有拍电话去五姑丈hia，讲盛a，娟a昨暗车祸过身去。半暝警察叫去认尸。O͘-to͘-bai péng tī山路边a，离龙崎无外hn̄g hia。二个siak kah规身躯血，死tī现场。

雄雄吱一声，厝kòa beh péng去。Bân叔电话放leh，chông去看，taⁿ惨a，bân婶a面á白死杀，khiā tī hia脚手phi̍h-phi̍h-chhoah，话that tī nâ喉头讲bē出来。一土脚红ki-ki，拢是血。HiahN一tiô，土脚巾á khioh起来，血chhauh-chhauh tin，hoah：“Tú-chiah hō͘ in拭路糊á moâi tah，ah thái红ki-ki tah，全血tah？”

根据派出所调查ê记录，hit暗落雨，山路滑，o͘-to͘-bái驶离龙崎出去无外hn̄g，犹未到关庙hia tō péng车，cheng着大树。二个cheng kah规身躯血，死tī现场。

Bân婶着惊，m̄敢kā厝边头尾讲盛a来放帖ê代志。Ta̍k日家己去庙里烧香拜拜，kā盛a、娟a讲好话，烧足chē金hō͘ in。过一chām了后，tō也ta̍k项代志平平，人好好，sit头照作，bân婶a才lio̍h-lio̍h-á定着安静落来。

Hit一日bân叔早早去园里，割一堆竹笋，装装作一笼。猪tiâu修理一半，雄雄家己念：“我taⁿ紧来去tah”Tō去换一su西装，穿一双皮鞋beh出门。Bân婶看了龟怪，问：“Beh去tó?”Bân叔a kan-na直直念：“我taⁿ紧来去tah。”作伊行去隔壁火a hia，大声叫：“火a，taⁿ咱tio̍h紧来去tah。”火a驶一只tho͘-io-tah ê细只tho͘-la-khuh，ta̍k日载咱关庙ê青菜去市内，问伊：“煌a，beh去市内nih ？”Bân叔无应伊，一笼竹笋giâ上车，peh起tho͘-la-khuh坐。路尾警察阿泉去现场调查，有详细记录hit个经过。讲tho͘-la-khuh也m̄是驶外紧，离关庙出去无外hn̄g hia ，ùi车路冲出去，cheng着大树。M̄知cheng着tó位要害，无流血，也无破皮，bân叔西装穿齐齐，一仙人好好坐tī车里，现场死去。火a讲是一只红色ê o͘-to͘-bái驶足紧，m̄知ùi tó来，雄雄对面冲来，一个少年家载一个查某gín-á tī后面。Tō是beh闪he o͘-to͘-bái，tho͘-la-khuh soah chông出去，cheng着大树。O͘-to͘-bái无停落来，phiû leh作伊去。结果警察mā chhōe无tio̍h，不而过，阿泉普通时kap bân叔、火a拢有熟sāi，看伊这日西装、皮鞋穿齐齐，感觉龟怪，身躯kā巡，lak袋á内底摸着一张帖á，tō是盛a、娟â ê结婚请帖。看he好日，咱人八月初十，一日to无差，对对tō是hit日。

所以真chē人迷信，讲hit日bân叔a穿súi-súi，tō是赶beh去盛a、娟a ê婚礼，beh去hō͘ in请。盛a用o͘-to͘-bái来kā伊载去。前a，盛a、娟a赶beh去bân叔hia放帖，犹bē放tō来tōng车死，tō是按呢m̄愿死心，隔转早鸡啼进前，二个身魂专工koh拚去bân叔in tau，帖放了才走。Koh特别吩咐，kap bân叔约：“时到hit日tio̍h会记得来hō͘阮请。”Bân叔mā有答应“定着去tah。定着去tah。”阮老母定定khioh起来讲，tō是这句话上盖关系。Bân叔a人直，讲一tō是一，bē晓变khiáu。有人铁齿无信che有ê无ê，koh敢讲sńg笑：“昆煌a算bē hô lah，专工走去到hia食这顿。”

阮三叔、三婶迷信，mā有可能是疼kiáⁿ ê关系，尾a kap新娘头参详，kā盛a、娟a ê墓sóa作伙，准翁á某hit款礼数kā in安tâi tī关庙口hia。听讲关庙、龙崎hit tah ê人，会记得bân叔a收帖á ê时，笑人大细hīⁿ ê代志，后来若是新娘生作有小khóa khiap-sì ，查甫、查某拢khiàn-sńg，无人敢koh khioh起来lām-sám讲。