《陈雷文选》

 | | | 转寄

荔枝大出ê时阵

作者 陈雷 2007.12.02

1)

He捷运ê电车tú-chiah iⁿ-ò͘ⁿ iⁿ-ò͘ⁿ 驶离车站，月台hit头chhun伊一个人。起先无看着伊ê面，因为伊头chhih-chhih，顾看土脚，概成teh chhōe啥物。M̄-kú he健美ê形体若吸石kā我吸leh，我变作一尾ia̍h-á hō͘大蕾芳味ê牡丹siâⁿ óa 去。电车又koh入站来，伊跳上车，车门tō关起来。这时伊才gia̍h头起来，tú好有影着伊ê面。我无张持gāng-gāng kā伊ia̍t手，伊mā kā我ia̍t，kheh tī车门内底，长长ê头鬃á尾pa̍k一条红phà-phà ê li-bóng。He车iⁿ-ò͘ⁿ iⁿ-ouN3koh起行，月台chhun我一人。我头chhih-chhih，学伊土脚chhōe。成实tī pùn-sò筒hia有一粒金金，我假无意pa̍k鞋带，ku落去kā耳钩khioh起来，koh有挂一粒细粒真珠。

隔转日早起伊又koh tī hia，穿一领水红ê té-ńg衫，白色半通光ê百景裙。Tòe伊kheh上车，ùi士林站到双连，伊拢无oa̍t头过来，大概tèⁿ m̄ 知？Tòe伊落车，伊koân屐á khī-kho̍k khī-kho̍k直直行，明明是teh赶时间。街á路三oat四oat，oat入去一间店内。

店面一枝铁门，khang-páng有五个红字“茵娜委托行”。伊khiā tī柜台后面叫：“欢迎光临”，kā我行礼。The̍h siah-chuh出来hō͘我看，讲：“今á日一律拍五折。”我无注意teh听，kan-na看伊现光ê肩胛kap手骨，he皮肤光生（siⁿ）koh幼mī-mī，若通光ê hûi á。Khiā óa去，身躯koh有牡丹ê芳味…，我chhìn-chhái kéng一领siah-chuh kap一条拍花ê neh-khuh-tái。“拢总一千八百五十khì …”伊最后笑一下，我耳钩bē记得还伊tō精神起来a。

普通时真少作梦，连续二工作这个梦，koh头á尾ta̍k项记kah chiah详细，也是真龟怪。拍电话去查，成实有一间“茵娜委托行”。这日，专工ùi士林坐捷运去双园，tòe梦里ê路三oat四oat，chhōe着hit间店。Khang-páng写红字，铁门已经拍开a。我入去店内，柜台后面一个查某gín-á teh叫“欢迎光临”，kā我行礼。Kā看，细细汉电khiû头鬃，koh m̄ 是梦里hit个。“先生，今á日一律拍五折。”伊the̍h siah-chuh hō͘我看，我问伊：“恁店里敢犹有另外一个小姐？”伊摇头，概成无啥欢喜我ê问题。“头鬃留tn̂g-tn̂g,pa̍k一个红li-bóng hit个。”“丽蕙ìh?”伊koh摇头，“前几工tú-chiah辞头路，无tòa a。”我chhìn-chhái kéng一条neh-khuh-tái。“你敢知影伊sóa 去tó 位？”伊tiām-tiām，大概对我生份无信心，知影mā m̄ kā我讲。我ioh是按呢生。

以后无koh作这个梦。最后这学期，教阮天文物理ê是一个少年姓范ê教授，听讲是美国phuh-lin-su-tun(Princeton) tú-chiah转来ê。伊上爱讲这个论理：“根据量子力学ê理论，宇宙是多数ê，m̄ 是单一ê。Tī hia ê算bē了ê多数ê宇宙中间，有可能有一个宇宙kap咱这个仝款仝款，…m̄-kú in中间时空ê距离实在太大太hn̄g，互相交流相遇ê机会会使讲是零。…”Tō tī乌pang顶koân 写一大堆公式数字，证明hō͘阮看。我感觉这个理论是纯数学演算ê结果，若beh算作是创造者hō͘咱ê一个基本现实，实在是sa无niau-á毛，khah想to想无lah。

毕业了，hō͘人派去高雄大岗山基地作炮兵。因为阮读物理ê khah会晓算炮弹发射ê导线。Hit个礼拜日，部队放假，我坐一只野鸡á车转去台南阮tau。Tú-chiah上公路无外hn̄g，野鸡á pōng 车，车lián phàng-khuh。运chiàng操一句“驶恁…”，公路边tō停落来。Hit chām咱南部荔枝当teh大出。路边树á脚一担卖荔枝ê，插一支牌á:“现挽荔枝，一斤12 khì。”阿婆看有人停车，tō hoah：“买荔枝来。…现挽ê，无tiⁿ m̄免钱。”Kā看，láng-á底chhun二把，koh一大堆落米á，kap阿婆仝款ta-pó͘ ta-pó͘。“Chhun chia ê货底？”我kā嫌。阿婆phùi一嘴槟榔，大声应：“内面犹足chē leh。Che家己ê，hō͘你买bē了leh-lah。”随tō 手机á the̍h出来khà:“Ôe，Lēng a，a̍h你m̄叫恁阿姊hit láng荔枝khah紧先车来。”Tu椅头á叫我坐，koh at一oe荔枝hō͘我，讲：“试看māi 。Liâm-mih来。”我pháiⁿ势走。看运chiàng ku tī土脚，车lián犹未换好，树á脚坐落来bóng等。

“来a！来a！”无一bān-niah阿婆hoah。成实一只细只红thì-la-khuh ùi公路hit头chông来，hut一下停来tī树á脚。驶车ê koh是一个查某gín-á，戴瓜笠、包面巾、带手siū 、koh lông 手lông ，包kah一大堆密密。伊ùi thì-la-khuh后面lêng一láng大大láng ê荔枝落来。Láng-á拍开tō 问：“Beh几斤？”

注意kā看，he面若pha̍k日ê牡丹红hóaⁿ 红hóaⁿ，thài会面熟面熟？荔枝秤好，我the̍h钱hō͘ chāu。伊oa̍t头叫：“母a，你一千ê有通chāu无？”阿婆the̍h钱来chāu，吩咐讲：“你先转去kā Lēng a斗脚手。”这时伊kā我笑一下，oa̍t头tō 行。我看伊去，he健美ê形体若吸石kā我吸leh。我头壳内若kan-lo̍k se̍h lin-long，赶紧直直想，tī tó位bat遇过？雄雄才想起以前hit个龟怪ê梦，有一个头鬃á尾pa̍k红li-bóng ê查某gín-á!足紧jiok óa去，问伊：“你敢是bat去tī台北？”…“你敢是bat tī台北ê委托行作--过？”伊停脚落来，目睭chiah大蕾kā我chîn,雄雄瓜笠the̍h掉，he头hàiⁿ一下，规头壳乌sìm-sìm ê头毛落来到肩胛头，头鬃á尾pa̍k一条红phà-phà ê li-bóng ，我惊一tiô，hoah一声：“丽蕙！”伊概成也无意外。“是你ìh?穿che兵á衫拢bē认得。”雄雄伸手kā我ê肩胛chang leh：“你是按怎无纳钱tō走？！”“无纳钱？…我tú-chiah一千khì hō͘你chāu a”“拢总一千八百五十khì｡”“A̍h m̄ 是一斤12 khì?”伊摇头，“He siah-chuh kap neh-khuh-tái ê钱。Tī台北hit 间委托行…”“我…我…”我一身躯肉phi̍h-phi̍h-chhoah，伊…伊是啥人？…伊…thài知影he siah-chuh kap neh-khuh-tái外chē钱？Thài会知影我梦--里ê代志？“你害我hō͘头家娘辞头路。”伊瓜笠á戴起lih，ná讲ná发车。Hit只旧旧ê Nissan thì-la-khuh khu̍h-khu̍h-khu̍h嗽几偌声，chhèng一bông ian-ia tō peh上公路去a。

“Oeh，少年ê，好行a。”运chiàng车lián换好势a，坐tī车内kā我hiu。我行óa 去车边，jîm一把车钱hō͘ 伊，“你先去。我到chia tō好。”“台南m̄去a？”“M̄去a，我chia有代志。”

2)

所以今年荔枝大出ê时阵，我专工chhōe这副有挂真珠ê耳钩送伊，心内不时感谢这二冬ham伊作伙ê祝福。Kā伊挂耳钩ê时，伊细声问：“你敢会记得咱第一回tī hia相遇？”“Thài会bē记得？！Tī公路边树á脚kā你买荔枝，一斤12 khì，离大岗山koh出来hia。…”伊摇头：“Koh khah hit个进前，上盖第一摆。”我tiām-tiām无应。伊身躯the óa来，耳钩tīn-tōng hàiⁿ，目睭chiah大蕾咬我ê目。“你成实bē记得？”我摇头。“Tī士林捷运hit个车站。我tī月台hia teh chhōe 耳钩。”Ah！Hit回，hit回第一摆我梦着你，你thài会知影？你敢会tī你ê梦里也作kap我仝款ê梦？拢总二摆。Che是啥款ê缘份leh？我知影伊会讲，che是命运注定ê，m̄-kú命运是啥货？或者像大学上尾年hit个美国phuh-lin-su-tun转来ê教授讲ê，事实有几偌ê宇宙，tī chia ê满亿满万算bē了ê宇宙中间，有另外一个kap咱这个宇宙仝款仝款。…是m̄是虽然in离开真hn̄g真hn̄g，mā有时oan-nā会相遇、时空交流？Hō͘咱经验着，bē输亲像teh作仝一个梦？

“你实在kāu面皮。”伊liàm我ê面皮。“按怎kāu面皮？”“成实hit二láng荔枝拢总买！”“害我一lak袋á钱开kah ta-ta。”我gīm伊ê双手烧hōng-hōng 。“无按呢你ná会koh转来？”伊mā gīm我ê双手烧hōng-hōng 。“害阿母手机á直直khà，讲hit个阿兵哥荔枝食了好食，beh总买。叫我赶紧koh挽二láng去。”“我tī hia等你等二点钟。”“我挽荔枝挽kah手破皮。”“我食荔枝食kah pak肚痛。”我kā伊身躯mo͘h leh，二人the tī古古古干乌（kan-o͘）ê火山石，看热人ê恒春kap恒春尾ê大海。

这时海风一阵thàu，海鸟tòe风chhèng koân起lih，si̍t thí开tī头壳顶ì-ià叫。阿丽óa来tī耳á边，微微á笑，讲：“我昨暝昨一个梦，…”