《陈雷文选》

 | | | 转寄

天使

作者 陈雷 2007.11.18

1

虽然chēng 4、5年前伊tō无teh chhap代志a，所有ê企业拢放hō͘ hit二个后生去hōaⁿ，m̄-kú tī伊身躯边ê人，亲像司机羊á拢犹称呼伊董事长。Bē输按呢叫，人才bē bē记得，这个王永来财团所有ê大企业拢是伊一个人空手拍拚起来ê，到taⁿ资产上无mā成千亿。

不过人总是人，有岁了后，身体无病mā一年输一年，有钱无钱ê拢仝款。特别是旧年狭心病入院了后，伊感觉人老lú紧。以前追求无限ê财富，若准人生是一项永远ê代志，chit-má才觉悟，世间上价值ê tō是「日子」这项物。若是所有ê财富会tàng换10冬、20冬ê少年，伊mā欢喜甘愿。

医生叫伊食bi-tha-min(vitamin)，出门行路运动，bē使坐车。食清食chiáⁿ，好食ê油臊拢m̄通tam。有人教伊食仙丹秘方，会发嘴齿生乌头毛，结果嘴齿落了了，头鬃白白去。人老tō无效，事实bē计较得。

In kiáⁿ看伊规日忧头结面，活kah无滋无味，想beh hō͘伊欢喜，去百货公司买一条裤带来送伊，讲：「阿爸，你一世人钱thàn hiah chē，mā tio̍h-ài用hiah chē。」看he数单，一条裤带一百万，镶一chōa金tak-tak ê钻石，khian-á中央一粒大蓝宝！伊心内hàiⁿ头：「阮kiáⁿ a，你犹少年m̄ bat，世间tō是这项kap钱无关系！」

隔转日叫羊á驶车载伊去永来百货公司，电梯坐到3楼，来卖裤带ê所在。顾店ê查某人当teh无êng，叫讲：「美玉a，人客你先照顾一下。」一个查某gín-á笑gī-gī出来，好礼问：「阿伯，你爱啥？」bē输金铃á teh giang ê声。Kā看，这个查某gín-á 21、2岁á，穿一领白色ê短衫，tha̍h一领ka-pi色有格á ê短裙。生作koân-koân，胸坎挺挺，像标准ê运动员。皮肤是日头pha̍k过ê粉红ê浅铜色，金koh幼。像lù kah光光ê大理石。王永来掠伊看，m̄知怎样，面soah会烧，一句话讲bē好势：「这…条裤带m̄知会使还一下无？」查某gín-á应：「阿伯，无要紧。你若无合意，我替你还掉。」十分温纯ê笑意，koh讲：「失礼，hō͘阿伯加行一chōa。」王永来讲：「阮后生买ê，che…咱老人khah无合lah。」查某gín-á讲：「Bē lah，阿伯，你看起来比阮阿公khah少年。」「我83 a。」「Kap阮阿公平chē岁。」查某gín-á ná笑，王永来面soah烧hàng-hàng，心脏pho̍k-pho̍k跳，讲：「换一条khah普通ê tō好。」另外kéng 一条5百kho͘ ê皮带。查某gín-á讲：「阿伯若是bē合，才koh the̍h来换。」

转到厝，顾厝ê阿月á问伊：「董事长，你今á日tī外面作啥？一个面红红？」隔转日，车坐leh又koh去百货公司。来到3楼，hn̄g-hn̄g tō有人叫：「阿伯，你裤带有合无？」仝款白色ê短衫，ka-pi色ê格á裙，hit个查某gín-á笑微微teh问。「有合lah 。」想想leh讲：「Koh买一条。」查某gín-á讲：「阿伯，koh买一条khah少年ê，好无？」Kéng 一条浅ka-pi色ê皮带，边a有tǹg花，khian-á顶面二尾镶金ê金鱼。王永来真欢喜，新裤带hâ leh转来。阿月á看着koh问：「董事长，你今á日去tó?一个面红红红。」

过几工，伊又koh去。先去二楼卖查甫人衫ê所在，买一领有花ê Ha-oah-i(Hawaii) ah-ló͘-hah ê丝á衫，配一领意大利「无啥钱」(Versace)ê长裤。旧ê衫裤换掉，规身躯新新，来到3楼。Hit个查某gín-á看着tō叫：「阿伯，chiah chē工无来？」仝款白色ê短衫，ka-pi色ê格á裙，规个乌金ê头毛放来到肩胛头，若清水洗过ê丝á，sìm一下sìm一下。「阿伯，你穿chiah新，差一sut á认bē出来。」王永来欢喜问：「你敢有khah少年一sut-a ê裤带？」报伊看一排新新人类时行ê裤带。圆ê扁ê，粗ê幼ê，五花十色ta̍k项有。Kéng一条ne-khu-tái hiah大板ê金链á，挂一个太空船ê khian-á。查某gín-á讲：「 阿伯，你lú来lú少年。」

过来伊ta̍k礼拜来百货公司买裤带。见若看着伊tō发面hông，心脏直直chhiáng，kap少年hit时，看着súi查某gín-á hit款ê反应仝款。渐渐ùi伊ê心khut á底有一个新ê奇怪ê要求，家己也想bē到ê欲望，lú来lú强。伊一直lún leh m̄敢讲出来。

Lún到hit日才kā美玉讲：「我有一项代志beh拜托你，请你m̄通奇怪。」美玉讲：「阿伯，阮tī chia tō是beh服务顾客，你m̄免细字」。王永来讲：「这项代志kan-na你有法度。」美玉讲：「阿伯，是啥代志？」「是按呢lah，…」王永来一句一句详细讲，惊伊听了无真，又koh ùi头讲一遍。美玉lú听目睭lú大蕾，千万无想着，这个80外岁看起来chiah古意ê老岁á会有这款奇怪ê要求，比少年家á khah食力！M̄-kú伊讲了hiah-nih顶真，hiah-nih诚意，hō͘伊少年ê心感动，一字「m̄」讲bē出来，tō答应伊。

王永来真欢喜，讲：「拜一车来kā你载。」美玉讲：「阿伯，我ta̍k日拢tio̍h-ài来上班。」王永来讲：「无要紧，我ta̍k项拢安排好势a。」拍手机hō͘伊ê后生王金泰，tō是chit-má永来百货公司ê大头家董事长。讲伊tī 3楼，叫伊马上来。王金泰叫是啥物要紧ê代志，随tō到位。3楼ê主管看大头家董事长到位，紧也chông来。王永来kā后生讲：「这个店员真好心，拜一beh去我hia kā我斗脚手。你hō͘伊m̄免来上班。」He后生想讲，大概老父无伴爱人陪，kā主管交代，郑美玉拜一m̄免来上班，薪水照发。

2

拜一羊á驶车来载伊去北投ê大厝，大大间ê别庄tī半山顶，红hiā白墙，墙á顶规排白色野牡丹。铁门入去，王永来tī hia teh等伊，chhōa伊入去一间大间房间，四围全部是规大phiáⁿ ê玻璃窗，窗á外面看会tio̍h ê tō是一片青翠ê花园。窗á边chhāi一tè大tè大理石，一个中年人挂目镜teh斟酌看，用手teh摸。He石á差不多一个人koân，有lām淡薄粉红ê浅铜色，专工按花莲取来ê。王永来讲：「这位tō是黄水牛先生。」这个黄先生目镜thuh koân掠美玉一直看，按头chîn到脚，koh按脚chîn到头，亲像beh kā伊看thàng过，teh看伊ê肉kap骨，一晡才tàm头，讲：「王先生，这位小姐kap这tè石头tú tú好双生一对。」王永来讲：「请你尽你人所作会到ê，liâu-liâu-á是，m̄免赶狂。」Kā玻璃厝ê锁匙交hō͘伊，oat leh tō出去。

伊khiā tī hia看tiām-tiām ê四边，鞋á khǹg一旁，kā长长ê裙带kap短衫ê liú á一粒一粒tháu开，he裙kap衫tō poa̍h落tī土脚。双手thèⁿ koân，头鬃póe一下，规个头毛放开去，tú好phoa̍h来到肩胛头。赤脚踏起li̍h台á顶，面向这旁，chhun ê内面拢总thǹg掉，规身躯光光，khiā tī玻璃厝ê中央，和平安静，充满自信。因为伊家己真知影，伊无穿衫ê美丽比有穿koh khah完全。外面日头光经过有色ê大蕾花反射入来，照着伊siâⁿ人ê丰满ê裸体，变作一领半通光ê薄衫，像彩虹kā伊掩leh，伊khiā tī hia bē输是一身已经刻好ê美神ê石像。

Ta̍k礼拜一美玉来hō͘黄先生刻像，时间一礼拜一礼拜过。按呢beh 2冬了后，王永来85岁a，hit一日，黄先生才kā伊讲：「明á早起，日头出来了后，你才入去。」kā锁匙交还伊。隔日早起，日头大出。伊kā玻璃厝ê门拍开，内面tiām 静静，中央chhāi一个人像，一tè大tè乌绒布khàm leh 。行o̍a去，轻轻á kā乌布giú开，无想着下面一个thǹg光光ê美玉。伊ê面hō͘早时ê日头光照着，淡薄粉红，头毛拍开若丝á网，胸前ê乳koân-koân挺起来，饱饱ê乳水teh beh tin出来。伊一脚踏半步，身躯àⁿ前teh beh跳舞。He优美ê大腿肉感亲像会sìm，伸手kā摸，滑滑koh幼mī-mī。He美玉笑微微，开嘴teh beh讲话，差一sut á叫伊名出来！这时外面厝角鸟chhih-chhiak叫，kā伊叫醒过来。Se̍h一个头看，to也m̄是teh作梦，是欢喜teh醉。窗á外四围白色、紫色、红色ê九重葛，tī日头下bē输五彩ê大尾ia̍h-á teh飞，teh无êng in热人短短ê生命…。忽然间，伊单独一人khiā tī I-tong (Edon) ê花园，tī hia美神kā伊ê少年又koh交还伊lah。

伊kā人像chhāi tòa大门入来ê大厅中央，厝顶吊一pha kám-ō͘-á大ê三chàn ê水晶灯。每一遍按hia过，tō khiā leh kā看，kap伊讲话。Hit一暗，伊困bē去，koh来人像头前，khiā tòa hia看真久，he人像bē输teh kap伊讲话。伊一时挡bē tiâu，行óa去，双手kā人像lám leh，面phak tòa伊ê胸前，ù tòa伊ê乳顶面，大声讲：「你tō是我teh chhōe无ê青春。」

雄雄听着thih-tho̍k thih-tho̍k ê声，按人像ê胸坎内面出来。想讲是家己头壳teh作怪，耳á ù khah ân kā听，又koh thih-tho̍k thih-tho̍k ê声音，清清楚楚，明明是心脏teh跳，着惊退一步看，he人像犹teh笑，一脚踏半步teh beh跳舞，亲像开嘴teh kā伊讲：「我hō͘你这个秘密，kan-na你知影，m̄通讲出去。」

伊kā这个秘密保守leh，拢无讲hō͘人知。Ta̍k暗落来kap人像约会，kā烧hut-hut ê面phak tòa清凉ê胸坎，ù tī伊ê乳顶面，听伊心跳，thih-tho̍k thih-tho̍k，thih-tho̍k thih-tho̍k..。伊若跳紧，伊tō tòe伊跳紧；伊若跳慢，伊tō tòe伊跳慢，tī无声ê大厅跳风流优美ê oa-lu-chuh。

但是hit一暗，雄雄oa-lu-chuh ê音乐无去，kan-na有phok-phok-phok，phok-phok-phok ê声。Lú跳lú紧，bē输火车teh chông，紧kah伊tòe bē着，khùi喘bē lī，差一sut á poah倒昏去。隔转日mā是仝款，音乐拢无去a，kan-na phok-phok-phok ê声，hō͘伊头壳会hîn。

伊心内感觉奇怪，叫羊á驶车载伊去百货公司，来到3楼，chhōe无美玉。问顾店ê小姐，小姐讲：「阿伯，你是伊ê啥人beh chhōe伊？美玉昨暗车祸，入去tī病院。」赶去病院看，he美玉倒tī白床巾ê病床，看起来人好好，目睭kheh-kheh teh困。美玉ê老母透暝ùi新营小脚腿拚来kā顾，讲：「医生讲，拢无伤，kan-na脑震动，困bē醒。」王永来tī耳á边叫：「美玉，美玉。」mā是bē醒。

伊包一间特等病房，koh chhiàⁿ三班特别护士24小时轮流看顾。家己一日来几nā遍，坐tòa病床边，讲话hō͘伊听：「你赶紧精神，我有一个秘密beh讲hō͘你知影。…」

这暗，伊kā耳á ù tòa人像ê胸坎认真听he声，phok-phok-phok，phok-phok-phok，渐渐lú跳lú慢，lú来lú弱，像细只掠鱼船出港ê时，he phòng-phuh-á phok-phok-phok ê声，lú去lú远，lú走lú细声，尾a规个拢tiām去。雄雄伊心肝头一支尖刀tu̍h入去，痛kah胸坎强beh piàng破，挡bē tiâu un落去土脚，phiang tī人像ê脚边，tō m̄知人去a。

这时美玉倒tī特等病房ê病床，伊ê心脏lú跳lú慢，lú来lú弱，tī护士无注意ê中间，呼吸停止。伊年轻美丽ê面和平温纯，看起来概成是咱人类幻想中ê天使，chit-má m̄知啥物原因hō͘天顶ê主人叫转去a。暂时倒tī hia hō͘人hip相起来teh欣赏，印tī大张相纸顶面仝款，清清楚楚，最后kan-na留一个真súi ê，充满生命ê热情ê印象niā-niā。