《陈雷文选》

 | | | 转寄

赢

作者 陈雷 2007.11.11

1.

恼（ló͘)恼死m̄是伊本来ê名，m̄-kú按呢叫久了顺嘴，soah变作亲像是伊ê正名，比赛ê时mā是这款叫法，无人koh再叫伊正式ê英语名Dorothy。

照旺a ê意思，凡是有开（khai）大钱外国买来ê血统，拢有号这款名。本地ê土种，比赛优胜，赢过 大钱ê，才罕罕有号这lō名。一方面事实是这款名咱有khah pháiⁿ叫，若叫了无liàn转，意思去hō͘走choa̍h去，好ê变pháiⁿ ê，ah tō真食力。特别是in比鸟ê人，号名是真kāu khiàn-sńg ê代志，随人有随人ê规矩kap头路，bē使chhìn-chhái得。照旺a ê意思，比鸟会赢bē赢，有时tō是看这个名字。

另外一方面，当然血统mā真要紧，总是旺a伊本人对咱本地ê土种khah无信心，所以ta̍k年拢有按外国买鸟转来。特别是旧年，有拜托人去Holan，去chhōe Holan ê粉鸟专家，掠一只鸟公，一只鸟母转来，二百万现金phóng hō͘人，koh kā人姑成说（soeh)多谢。听讲是欧洲ê新种，飞紧koh gâu认路，放khah hn̄g mā飞会转来，bē pháng去，有hit个价值。

号英文名拢是叫伊ê大汉后生号，伊ê大汉后生读五专，tī学校内chēng第一年家己tō有号一个英语名，叫做Tony，伊ê好朋友叫伊 “「吐奶（ni）」”。所以讲起来，虽然是五专ê学校，英文程度犹是bē bái lah。

旺a kā Tony讲：「这只好鸟咱beh做种鸟生kiáⁿ用。」鸟á sit thí开，摸鸟á kha-chhng hō͘伊看。Tony看he鸟目睭红红，嘴kóng尖尖，面á古意古意，kā伊号一个宗教性ê好名，叫做骂你a。旺a问伊：「骂你a是啥物意思？」Tony讲tō是in西方世界天主教圣母ê名Maria。旺a听了真正真欢喜，想讲：「我这个后生确是英语有一步七a。鸟母号圣母骂你a，意思真合，一定会生真chē好kiáⁿ。」结局“恼恼死”kap“拍锣”tō是骂你a kap in翁来台湾ê新生代，仝一siū二粒卵pū出来ê阿姊小弟。所以in这个家族，m̄-nā是优秀ê新种，而且宗教气氛真重，有圣母Maria kap圣徒Paulo ê名，本来“恼恼死”mā是beh号圣徒ê名，可惜tī圣经十二个圣徒内面，Tony chhōe无一个查某名。

所以总讲起来，这回比鸟旺a有相当ê信心，作一下出手拚三只，“拍锣”kap“恼恼死”伊无烦恼，“达摩”伊心khah胆（tám)胆，che也是莫怪，因为背景完全无仝。虽然“达摩” ê父母bat比赛优胜，m̄-kú几代以来拢是咱本地ê纯土hong-á，无啥物会tàng kā人展风神ê出头，所以无号英语名。M̄-kú这只鸟，薰吹a见若phōng tī手里，嘴tō念：「这只会赢。」你m̄通看薰吹a才二十出头，人猴猴，若chhit-thô gín-á，若是咱本地ê土hong-á，伊看了上准，所以旺a是掠伊作粉鸟军师teh款待。讲是按呢讲，tī旺a心肝内，犹是khah无英文鸟hit款ê信心。

2

旺a ê朋友刘先生有chhōa一个少年某，以前是舞女出身，本名叫做阿笑，艺名叫做丽娜，有开一间丽娜珠宝行，不止有趁钱。伊kap旺a仝款爱poa̍h鸟，m̄-kú爱poa̍h m̄爱饲，家己厝里无饲鸟，拢是tòe旺a插会á 。可惜伊珠宝专门，鸟á无内行，定定赢鸟tòe无着，输鸟tòe着着，in某丽娜kā伊讲：「无效lah，鸟á bat你，你m̄ bat鸟á 。」总是咱会phoa̍h-kiáu ê人，拢有一个癖，lú输lú爱ī所以会使讲，刘先生比鸟是看运气，m̄是靠实力，这点kap旺a小寡无仝。

可能tō是这个关系，才会去看hit尾鱼。听讲hit尾鱼本来是真品古董行头家饲ê，刘先生kap伊有熟sāi，是按呢牵过来ê。刘先生kā旺a讲：「咱来去看鱼。」旺a讲：「食鱼我bóng来去，看鱼我无趣味。」刘先生讲：「这尾鱼无简单。」旺a人铁齿，讲：「按怎无简单？是会讲话hioh？」刘先生chhōa旺a去古董店，拜托头家hō͘ in参观一下。头家chhōa in去办公室看鱼，水箱内面饲一尾大尾金lē鱼一尺外长，全身白底lām红花kap乌花。He鱼tī水里，嘴á 开leh合leh，尾á ia̍t leh ia̍t leh，看一晡，无啥出头， 旺a头oa̍t leh tō beh行，刘先生kā伊giú leh讲：「你看hō͘真，这尾鱼有你ê名！」

旺a koh kā看，ai-ioh，成实koh有影lah！He鱼kha-chhiah hia一tah乌乌，tú-tú三横一直，对对排作一字’王’字，伊目睭nih一下，心肝跳二下，惊一tiô讲：「明明是一字王字！」刘先生tàm头讲：「我kā你讲，che鱼无简单。神明khah-mi-sa-mah指你ê名，报你好空ê。你kā伊买转来厝里饲，好好款待，招财进宝，比鸟包赢ê。」

旺a听了有理，问古董店ê头家：「Beh卖外chē?」He少年头家讲：「Che鱼阮pâ ê。咱台湾姓王ê鱼kan-na这一尾，无亲无chiâⁿ。」无beh卖。旺a kā伊拜托：「是按呢lah，少年ê，小弟姓王，che鱼有小弟ê名。少年头家tu一枝薰来请伊，讲：「王先生，是按呢lah，小弟mā是姓王，che鱼kap咱拢是亲堂。」亲堂bóng亲堂，鱼á mā是m̄卖。旺a七姑成八姑成，刘先生出一枝好嘴斗讲，尾a出现金三十万，ah才卖。所以讲，这尾鱼实在是半捞（lo）半抢，好运ngē买来ê lah。

一尾鱼三十万phóng转来厝报某看，in某四鹤a人细汉，真khiàng脚，kan-na普通时gâu kā伊chauh念。这回看khah嘴á合合，soah bē晓讲话，欢喜khah bē食饭，去poa̍h杯拜神明，求神明赐一个名，叫做“金kiáⁿ”。这个“金kiáⁿ ”饲tī客厅，水箱内面水温控制，水流调节拢是自动ê人客若来，tō展宝hō͘人看。koh惊人’王’字看bē清楚，hip一张相片，放大tah tī边a，点一pha电火，照hō͘光光。in某hit头ê亲成，hia ê阿姊，姊夫，第一个到第三个拢听着这项消息，专工按台北驶车chông来看。

He鱼真巧，电火拍光，伊tō定定无tín动，乖乖tī hia摇尾hō͘人看。Hia ê阿姊，姊夫chîn一晡，看kah嘴á 开开，无一句话讲。成实有影，三横一直，虽然小寡歪歪，无啥四正，总是清清楚楚，明明是’王’字一字。一鹤问四鹤：「Ah庙里神明按怎讲？」四鹤a笑微微，无应伊。二鹤问：「我听bat代志ê人teh讲，神明赐这款物，定着有一个另外ê意思。」四鹤mā是笑微微，无应伊。三个阿姊目睭掠chiah大蕾kā伊chîn，伊才慢吞吞讲：「无啥lah，一尾鱼niā-niā。」三鹤m̄放伊soah，问伊：「号啥名？」四鹤讲：「神明赐名，号做“金kiáⁿ”。In三个阿姊听讲赐名’金kiáⁿ’，明明是金钱财富这项头路，心肝头tō会chhia̍k，心肝尾tō会chhiáng，雄雄去想着旺a比鸟ê代志，问小妹：「Ah旺a比鸟是tī tâng时？」In chìn前定定劝小妹，旺a比鸟poa̍h kiáu代，m̄是正经事。所以四鹤pháiⁿ势，应伊讲：「Ai-ioh，mài讲khah bē受气，阮旺a khah劝tō劝bē听。我不时teh kā讲，ài学咱姊夫，作一寡事业，sńg鸟m̄是正经事。」一鹤讲：「Ah-ioh，讲sńg ê你也teh认真啥？旺a比鸟mā是一个工艺，khah赢恁姊夫，ta̍k日tī外面lim酒走pha-pha，无看人。」三个阿鹤a一句来一句去，姑成三姑成四，拜托小妹kā旺a讲，hō͘in插一个会á ，「意思意思，心适心适tō好。」结局一个人插五万，算大嬴，奖金上无tō有百外万。阿姊kap姊夫笑微微，四鹤a mā笑微微。

3

比赛hit日，ùi台东太麻里透早放鸟，一阵成千只，顺太平洋 ê气流，飞过中央山脉，冲按西海岸来。电话报告，东部天乌阴，山内落大雨，鸟á ak kah tâm lok-lok。四鹤kā旺a讲 ：「雨tō是水，水tō鱼，鱼王tī咱chia，包赢ê!」旺a讲：「八（pat）马！八马！」in poa̍h kiáu人讲八马，tō是真有自信， 总赢ê意思。一组三只拢总入，上大嬴，奖金算千万ê。

三人tī厝顶稳心á 等，一分一秒过，时间beh到ah，犹未看着鸟á影，旺a心内开始着急。目睭niau-niau看he天，东旁一大tè乌云tòe山内ê风飞过来，soah teh落雨。Hit时天顶尾才看着一点乌乌ê鸟á 影，若枪子直直冲来。旺a跳起lih椅á顶，pî á一直pi，巾á 一直ia̍t ，he鸟sut一下chông到厝，mā无se̍h lin-long，pu̍t一下poa̍h落来。旺a chheⁿ狂无顾看，鸟á sa leh，赶紧拍鸟钟，掠时间，叫薰吹a chông去粉鸟会验身算时间，tú-tú干in娘差1.5秒！Bē赴入围，连入等ê资格to无。

He薰吹a鸟á phóng tī手里，kā伊操干kiau，「干恁娘！免假仙，明明会赢ê，hō͘你pìⁿ kah输去。」He“达摩”hō͘伊骂，身躯phih-phih chùn，紧张chhoat一pû屎，薰吹a bak kah一双手，受气beh koh骂，雄雄看着二枝鸟á脚tōng-tōng hàiⁿ，夭寿tō是已经断去ah！包是今á日pháiⁿ天视线bái，顾chông无顾看，去hō͘电线sut断去。可怜这只鸟，原来是好鸟，伊自早tō按呢讲过，确实无m̄ tio̍h，脚断去ah mā koh拚命飞转来到厝，若m̄是按呢，早早tō到ah，无彩现liáu几lōa百万。

转来到厝，旺a犹tī厝尾顶等，身躯tâm lok-lok，拍锣ê kap恼恼死犹未转来。听讲达摩无入等，差1.5秒，鸟脚去hō͘电火线sut断去，气一下，鸟á chang来gīm tī拳头母里，tō kā骂：「干！无目睭ê hioh?!」一手tō kā kiat入去土脚鸟láng á内面。

Tī hia心情真bái，肚内一pak气，雄雄听着in某tī楼脚大声吱，chông落来看，四鹤a一kho͘人直直khiā tī客厅，一个面青sún sún，「He鱼…he鱼…」一直叫。旺a看he鱼，一尾好好tī水里，嘴á 开leh合leh，尾á ia̍t leh ia̍t leh，无啥代志，骂in某：「你是看着鬼hioh？大声细声teh hoah啥？！」in某比hit尾鱼讲：「你看！… 你看！」旺a一kā看，ai-ioh-ōe，nái变按呢？He鱼kha-chiah一tah乌乌，三横一直soah减一横去，夭寿’王’字变作’土’字！到chia来，才知影he姓王ê鱼本底tō是假ê，m̄是姓王，刺字起lih ê，技术无好，水里浸久了soah退色去！无彩神明赐金kiáⁿ，总报消去。「莫怪ah，雨tō是水，水遇着 土，输kah土土土！」in某又koh按呢ka伊chauh念。

人讲pháiⁿ事若来，二，三项相连续，确是有影，tú好tī hia火狂心热，m̄知beh按怎好，电话giang三声，旺a kā听，一个chhit-thô gín-á ê声：「Ôe，头家hoh？咱chia埔里草地lah，今á 日hoh，咱山内散步，khioh着二只粉鸟lah。阮某讲，chiah chán ê鸟无去，鸟主一定真烦恼，叫我赶紧拍电话hō͘你，…」到chia来，才知影拍锣ê kap恼恼死拢着网，tō是按呢才会无转来，he m̄成gín-á拍电话来teh讨钱。四鹤听一下，又koh kā伊念：「开二百万lah，mā是teh着网，讲是gâu认路，ah thái飞bē到厝ah？啥物拍锣ê恼恼死，khah m̄值着咱这lō土种á，上无拍chih脚骨mā会beh拚命转来，…」

旺a听in某念，平常时拢是念念he有ê无ê，无teh听伊，这回念了koh有一chōa大道理，che鸟若是会着网，khah会飞mā是bē转来，无khah choa̍h。实在这回nái hiah-nih衰，连续hō͘人骗三遍，lú想lú受气，一时烽火to̍h身躯，三步作一步chông起lih四楼，鸟厝内面，骂你a tú-tú teh孵卵，看人来，无欢喜，kù-kù叫，旺a一手伸去tō kā伊chang起来，m̄ hō͘伊孵，骂伊：「你免tèng siáu ！」二粒卵孵一半，la̍k起来siak hō͘破。又koh鸟厝内面，规排鸟笼á总巡。凡是骂你a ê亲成后代，查某kiáⁿ后生，全部总掠，无放伊走一个，拢总lok入去鸟láng á 内面，kap达摩作伙，kōaⁿ去阿佛a hia。

4

Keh转日，菜市á 内面阿佛a hia卖鸡tō mā有卖粉鸟。He鸟成十只thâi好好排一排，双脚斩齐齐，头壳tok掉，ām-kún sôe tn̂g-tn̂g ，倒头栽吊 tī hia。买鸡ê查某人问阿佛a：「Che粉鸟按怎卖？」阿佛a掠二只粉鸟hō͘查某人看，he鸟á thâi kah清气清气，规身躯liàm kah光光无一枝毛，查某人kā鸟á péng过来péng过去看，阿佛a讲：「太太，有chhiⁿ lah！你看che血犹teh tin，tú thâi ê lah！」He查某人用一枝肥肥té té ê指头á tōng骂你a ê胸坎肉，koh tēⁿ达摩ê kha-chhng，问阿佛a讲：「一只外chē?」阿佛a指“达摩”kap“骂你a”，讲：「Che土种á一只百二，he进口ê一只百五。」查某人看阿佛a讲：「Taⁿ你mā mài滚 笑，粉鸟也teh进口？！一斤beh卖外chē才算会和？」阿佛a起爱笑，kā伊讲：「太太，hō͘你讲kah tio̍h tio̍h。我che粉鸟，若是活活秤斤ê，一斤几lōa 万你to买bē tio̍h loh！」 Che tō是粉鸟“达摩”尽忠比赛ê记事，kap“骂你a”inhit规家伙tī台湾hō͘人抄家灭族ê经过。