《陈雷文选》

 | | | 转寄

面会

作者 陈雷 2007.11.04

我想这回设使m̄是坐hiah暗班ê飞机，大概tō bē去遇着这件代志。总是tī Vancouver等候转机ê时，已经是半暝过后，规个机场空lòng -lòng，无几个人客，khih-mo͘h-chhih有khah稀微。另外tō是hit时我已经真thiám ah，爱困神tîⁿ leh，头壳bē清楚，che难免也是一个缘故。

这时机场内面ê店拢关ah，飞机ê时间犹真久，无别位通好去，所以原在gōng-gōng-á kā坐，ka-pi khoaⁿ-khoaⁿ-á lim。

无tāⁿ-kìⁿ有眠去一时a，tiâng时伊入来隔壁hit头坐，我mā m̄知影。不过，第一目我tō有一个chheⁿ-chhìn 龟怪ê直觉，伊ê人气质无仝。M̄-kú看起来koh面熟，m̄知tī tó位bat见过？大嘴ka-pi lim落去，mā犹koh想无。

伊穿一su tah身ê phòng纱，蓝海软布ê短裙，长长ê乌头鬃，水水ê红胭脂，真是青春气味，摩登小姐ê打扮，mā是家己一个坐tī hia lim ka-pi。Liâm-mi the̍h一枝薰出来beh suh，我用手势kā伊比，伊概成m̄知影我ê意思，或者有误解我ê意思，soah peh起来，行按我chia来。我讲：「No Smoking。」Koh比罚金1千kho͘。伊笑一下，薰chhòng掉，chôaⁿ大方tī我对面坐落来。

看起来kap我仝款，是teh等che暗班ê飞机。「你beh转去台湾？」伊tìm头。「Tòa tī加拿大？」伊摇头。「来chia chhit-thô?」Koh摇头，这时笑神变无去，sīm一下才讲：「来chhōe人。」

「你tòa tī加拿大？」我tìm头。「去台湾chhit-thô?」我摇头。「南鲲鯓开会。」伊欢喜一下讲：「南鲲鯓，离台南近近a niâ。」「你tòa tī台南？」「公园路hia。」我欢喜一下，「阮tau以前mā tī公园路。」「Hit条大沟hia，夜婆洞ê对面。」我惊一tiô，tō是阮旧厝ê隔壁边，chit-má远东百货公司ê对面。

「你tī加拿大真久ah ho͘ⁿh？」「30外冬ah。」「作啥事业？」「作医生。」「医生上好。」「你tī台湾作啥代志？」伊停一时á ，想想leh讲：「我拚车。」「拚车？！」我叫是听m̄-tio̍h，koh问一摆，伊tàm头。「拚车chhit-thô。 」 我知影有一chām，台湾ê少年时行拚车，mā有按呢teh poa̍h输嬴。M̄-kú这个长头鬃，穿短裙，斯文摩登ê小姐thái也会拼车？敢是无聊teh kap我讲sńg ê。

「拼啥款车？」 「O͘ -to͘-bái。光阳150cc，时速200公里。」听起来概成真内行，我知影hit阵，o͘-to͘-bái大台ê政府不准进口，in拚车拢用细只ê去改装。「真危险ho͘ⁿh？」「Bē lah。」「戴安全帽á ho͘ⁿh？」伊起爱笑。「你外行，那有拚车戴帽á ？Beh拚会赢？」koh讲：「Thǹg赤脚lah。」「Thǹg赤脚拚车？」伊目睭微微，一枝指头á tuh天：「Kā你讲一个秘诀。Thǹg赤脚，伊tō kā你保庇。」这款讲法我kan-na tī小说内面bat读过。「真刺激ho͘ⁿh？」「Heⁿh ah。」「你拚车敢bat出过代志？」

伊想想leh，讲：「Kan-na一摆，tī健康路hia…」这时伊若像迷去，无张持目睭神神，嘴里tuh-tuh念：「…大只BMW chông过来，刁工ê lah，阿良hō͘伊cheng一下chhū出去，cheng着电火thiāu，o͘-to͘-bái áu作二koe̍h，…」lú 念lú 细声，目睭钉leh，bē输teh kā 我念chiù。我头壳起gông，耳空ki-ki叫，无koh听着伊teh讲啥。现现目前出现一个大车祸ê现场，足chē人teh看闹热，tō是「飞车女」拚车ê结尾，10年前我写ê hit篇小说。Hit个thǹg赤脚ê查某gín-á，cheng一下按o͘-to͘-bái siak落来，péng二liàn，chiⁿ着电火thiāu，规身躯拢血，倒tī土脚，m̄知人去……。Tī hia看闹热ê查某人ná看ná骂：「夭寿o͘h！你看he 17、8岁查某gín-a，倒按呢，双脚开开看现现，一领裙lek hiah koân，敢成实会看得？！」

「阿…英…」我手尾a la̍k-la̍k-chhoah，按呢细声叫出来。「Tio̍h lah。Tō是阿英lah。」伊tàm 头，雄雄身躯phîn óa来，目睭chiah大蕾问我：「你thái会知影？你thái会知影阿英？」「我…我知影这篇小说『飞车女』…」「He tō是我！He拚车ê飞车女tō是我lah！」亲像学生gín-á考一百分hiah兴。我注意看伊ê面，伊ê身躯kap脚手，lú看lú成，原来tō是hit个ùi佳里去台南，chhōe无头路，kap阿姊去拚o͘-to͘-bái ê飞车女阿英！

Hit个挂目镜ê查甫学生gín-á 跪tī伊ê身边，出力ji̍h伊ê胸坎，青狂 teh kā急救。围tī边a teh看ê人，一人一嘴，chèⁿ来chhèⁿ去：「He死a lah，犹teh ji̍h啥？」Hit个gia̍h拐á ê老人khah有自信，用手里ê薰吹指土脚ê阿英：「Kan-na看he血流hiah chē mā知影，he无ah lah。」远远警察车ê风螺lú tân lú 大声，无张持hit只白狐狸ê o͘-to͘-bái 火烧chhèng koân起来，pōng一声作一下爆炸…

阿英撞死ah，故事ê结局是按呢写ê，我明明会记得。Chit-má伊thái会来tī chia ，kap我teh讲话？概成伊知影我心内teh想啥，续落讲：「撞一下m̄知人去。险险死！」但是hit二个葬仪行ê运转手已经kā伊kap阿良扛起lih车顶，hit个棺材形ê死人车载走去，thái会koh无死？我挡bē tiâu，一时仓pōng大声hoah：「A̍h明明撞死ah，thái讲无死？」伊无应，雄雄变面，春天ê面色作一下loa̍h无去，像冰冻死去ê人坐tī我对面。Lú想lú m̄-tio̍h ，一阵一阵阴thim ê冷气对我ê面冲来，我身躯起ka-léng-sún ê鸡母皮。

足久伊才问：「你真知？…你敢有真知？」我受气应伊：「He故事我写ê，我thái无真知？」伊大笑：「你写ê?你tō是陈雷？」He笑声尖koh利（lāi)，牵kah ló-ló长，像受苦刑ê犯人teh哀叫，tī阔long-long ê机场内面se̍h ling-long，走bē出去。

「你thái写我死？你是按怎一定beh写我死？」伊大声问。「我…我…」「你怎样写我倒tī hia，双脚thí开开，裙le̍k hiah koân，现现hō͘人看？」「我…我…」「我m̄是hit款ê pháiⁿ查某gín-á，你thái beh kā我写按呢？」我一时应bē出来，为啥物beh按呢写。虽然he kan-na是一篇小说，m̄-kú内面ê人物拢亲像是我艰苦亲生ê。我m̄是beh侮辱伊，mā m̄是准伊作小说内面一个方便ê角色，一个无血无肉ê人物niā-niā。我是按怎beh写伊死？Hit当时mā m̄知影。是m̄是因为hit个拚车ê社会暗中要求伊死，期待伊去死？Hia ê真chē看闹热ê人拢teh等伊，等beh看伊撞车死ê刺激？Hit个o͘-ba-sáng mā teh等，等伊出事死ê时，通得着赢大家乐ê名牌？Hit二个葬仪行ê运转手mā teh等，因为in是作抢死人ê生理。我照in ê要求按呢写出来。

但是chia ê理由我无讲出来，因为我无确实，可能是借口niā-niā?「你拢无想着我ê老母，我ê阿姊，in拢想讲我死去ah…」Tō是为着这篇10年前ê小说，in teh受苦，伊teh不平。所以专工家己一人ùi台湾来加拿大chhōe我？Beh kā我讲伊无死，伊m̄是hit款ê pháiⁿ查某gín-á？

「你tō是陈雷？」伊koh一摆足正经按呢问我。我tàm头，伊受气讲：「你写小说mā是tio̍h ài负责任！」Che我知影，对我ê艺术感kap人生观负责任，其他敢犹有啥物规则leh？是m̄是另外犹有对社会ê责任？我想beh kā说明，写「飞车女」ê经过，雄雄伊等bē tiâu khiā起来。「你若有时间南鲲鯓开会了，拍电话hō͘我，我chhōa你来台南chhit-thô。」我the̍h笔kā伊讲ê电话番写起来，244-3838，chhoah一tiô，he尾a 6字tō是「飞车女」内面hit只白狐狸o͘-to͘-bái ê车牌，hit二个o͘-ba-sáng teh等ê大家乐ê号码。赶紧gia̍h头起来，伊已经踏koân屐á ê脚步行远远去ah。

班机ê时间到，我peh上飞机，规路tī机顶困bē去，注意kā chhōe，头到尾拢无看着阿英。

Tī南鲲鯓开会ê中间，我一直考虑这个问题。尾a hit工，照伊hō͘我hit个号码拍电话去，一个老查某人接。「喂，请问阿英有tī leh无？」「你是啥人？」「我伊ê朋友lah。」停一时a，概成足久，老查某人才应：「A̍h 你m̄知影阮阿英过身去ah？」「O͘h…」「成久ah lah。Beh10冬ah。」「O͘h…」「车祸lah。市内kap in姊a去拚O͘-to͘-bái…」「O͘ h…」「Ah你chiah久ah，chhōe伊beh chhòng啥？…ôe …ôe …」雄雄我头壳起乌暗hîn，耳空内chhi-chhi chhā-chhā、无停ê、ki-ki叫ê电话声…。