《陈雷文选》

 | | | 转寄

写hō͘ 学生朋友ê代志 44 - 黄昏美梦

作者 陈雷 2019.12.29

（Siá hou7hak8-seng pêng-iú ê tāi-chì 44）（写hō͘学生朋友ê代志 44）

Hông-hun bí-bāng / 黄昏美梦

Lán lâng ta̍k-mê chò-bāng, m̄-kú khah siông sī cheng-sîn tō bē kì-tit liáu-liáu. Chòe-kīn chi̍t-ê bāng, cheng-sîn liáu, bāng--nih ê tāi-chì, tùi-ōe, kéng-tì...chêng-chêng-āu-āu chheng-chheng-chhó-chhó, si̍t-si̍t-chāi-chāi, bē-su sī tú-chiah ùi hit-ê hiān-si̍t ê sè-kài tńg-lâi chit-ê hiān-si̍t, m̄-sī chò-bāng.

咱人ta̍k瞑做梦, m̄-kú khah常是精神tō bē记得了了. 最近一个梦, 精神了, 梦--里ê代志, 对话, 景致...前前后后清清楚楚, 实实在在, bē输是tú-chiah ùi hit个现实ê世界转来这个现实, m̄是做梦.

Góa kiâⁿ-lâi kàu chi̍t-châng tōa-chhiū-kha. Tōa-ki chhiū-oe ē-bīn tiàu chi̍t-pak tô͘, chha-put-to phó͘-thong ê tiān-sī hiah tōa-bīn. Chhái-sek hún-pit ōe--ê, chin súi koh chin se̍k-sāi. Kā khòaⁿ, goân-lâi sī Tâi-oân lâm-pō͘ hit-ê chháu-tē sió só͘-chai Môa-tāu ê kéng-tì. Góa ê kò͘-hiong ê chhân-hn̂g, joa̍h--lâng ê hông-hun. Chi̍t tōa-phìⁿ kim-sek ê tiū-á. Hn̄g-hn̄g chi̍t-chōa thn̂g-chhiúⁿ ê sió hóe-chhia teh cháu, chi̍t-chat chi̍t-chat, kam-chià thūn tīⁿ-tīⁿ. Siông-sè kā khòaⁿ, siōng ē-bīn-kak kak-á chi̍t-chōa iù-jī. Bū-bū tha̍k-bô. Khó-lêng sī chit-tiuⁿ tô͘ ê miâ he̍k-chiá ōe ê lâng-miâ. Khòaⁿ--khí-lâi chin sêng góa ê pêng-iú Lîm Sim-tì sin-seⁿ ê hêng-thé.

我行来到一丛大树脚. 大枝树oe下面吊一pak图, 差不多普通ê电视hiah大面. 彩色粉笔画--ê, 真 súi koh 真熟似. Kā看, 原来是台湾南部hit 个草地小所在麻豆ê景致. 我ê故乡ê田园, 热--人ê黄昏. 一大片金色ê稻á. Hn̄g-hn̄g 一chōa糖厂ê小火车 teh走, 一节一节, 甘蔗thūn tīⁿ-tīⁿ. 详细kā看, 上下面角角á一chōa幼字. 雾雾读无. 可能是这张图ê名或者画ê人名. 看--起-来真成我ê朋友林心智先生ê形体.

Lú khòaⁿ lú ài, chiah-ni̍h un-loán chhin-chhiat. Sim-lāi siūⁿ, chit-tiuⁿ tô͘ nā-sī góa ê, ta̍k-ji̍t pôe-góa chò-phōaⁿ, kám m̄-sī chin-hó?Tú-hó chi̍t-ê cha-po͘-lâng kiâⁿ-óa--lâi, 30 thóng hòe, chò-kang-lâng hit-khoán. I kóng chit-pak tô͘ sī lán Môa-tāu chi̍t-ê ōe-ka, choan-kang ōe hō͘ lán Môa-tāu chi̍t-ê Tâi-to̍k ūn-tōng ê sian-pòe. I pí tōa-chhiū koh kòe--khì hit-keng tōa-chhù, saⁿ-chàn-lâu, le̍k-sek ê chhù-khak, kóng:「Chit-pak tô͘ pún-lâi sī chit-keng bí-su̍t phok-bu̍t-koán ê. Chit-má sī góa ê.」Góa khòaⁿ hit-keng tōa-lâu, tō-sī góa í-chêng tī Ka-ná-tāi tòa ê chhù, ná ē piàn-chó bí-su̍t phok-bu̍t-koán?I kóng chit-tiuⁿ tô͘ i beh bé, khui-kè bí-kim sì-bān nn̄g-chheng kho͘.

Lú看lú爱, chiah- ni̍h温暖亲切. 心内想, 这张图若是我 ê, ta̍k日陪我做伴, 敢m̄是真好？Tú好一个查埔人行óa--来, 30 thóng岁, 做工人hit款. 伊讲这pak图是咱麻豆一个画家, 专工画hō͘ 咱麻豆一个台独运动ê先辈. 伊比大树koh过--去hit间大厝, 三层楼, 绿色ê厝壳, 讲：「这pak图本来是这间美术博物馆ê. Chit-má是我ê.」我看hit间大楼, tō是我以前tī 加拿大tòa ê厝, ná ē变做美术博物馆？伊讲这张图伊beh卖, 开价美金四万二千kho͘.

Khó-sioh bē-hù kā bé tō cheng-sîn--a. Chhíⁿ--khí-lâi thàu-chá saⁿ-tiám saⁿ-cha̍p-hun. Chi̍t-sî soah bē-hiáu hun, iáu tī bāng--ni̍h, á-sī tńg-lâi tī lēng-gōa chi̍t-ê hiān-si̍t. Tī góa jîn-seng ê hông-hun, chin hok-khì bāng chit-ê bāng. Góa ê nn̄g-ê kò͘-hiong, Tâi-oâng kap Ka-ná-tāi, bāng-chò chi̍t-hóe. Khòaⁿ-tio̍h chit-pak súi-tô͘, éng-oán kì tī thâu-khak-lāi. Kám-sī ùi lēng-gōa chi̍t-ê pêng-hêng ê ú-tiū(parallel universe)sàng--lâi ê sìn-hō? He̍k-chiá sī chhin-chhiūⁿ goán Môa-tāu ê Bûn-hē sin-seⁿ chhiùⁿ ê koa, hông-hun ê kò͘-hiong teh kiò-góa--leh？

可惜bē赴kā买tō精神--a. 醒--起-来透早三点三十分. 一时soah bē晓分, iáu tī 梦--里, á是转来tī 另外 一个现实. Tī我人生ê黄昏, 真福气梦这个梦. 我ê两个故乡, 台湾kap加拿大, 梦做一伙. 看tio̍h这pak súi图, 永远记tī头壳内. 敢是ùi另外一个平行ê宇宙（parallel universe)送--来 ê信号？ 或者是亲像阮麻豆ê乡亲文夏先生唱ê歌, 黄昏ê故乡teh叫我--leh？

（Chok-chiá chù:chhiáⁿ-iōng pe̍h-ōe-jī) （作者注：请用白话字）