《陈雷文选》

 | | | 转寄

写hō͘ 学生朋友ê代志 41 - 中医ê危险性

作者 陈雷 2019.12.29

（Siá hō͘ ha̍k-seng pêng-iú ê tāi-chì 41）（写hō͘ 学生朋友ê代志 41）

Tiong-i ê hûi-hiám-sèng / 中医ê危险性

Chòe-kīn ū chi̍t-chat sin-bûn. Li̍p-hoat-īⁿ thê-àn “Tiong-i hoat-tián hoat”, poah-chîⁿ thui-sak hoat-tián tiong-i. Góa siūⁿ chit-ê hoat-àn ū su-iàu chìn-chi̍t-pō͘ khó-lū.

最近有一节新闻. 立法院提案 “中医发展法 ”, 拨钱推sak发展中医. 我想这个法案有需要进一步考虑.

Lán lâi khòaⁿ tiong-io̍h pō͘-hūn. Tiong-io̍h chheh（pí-jū Siōng-hái Tiong-i ha̍k-īⁿ kàu-châi-chheh “Tiong-chháu io̍h-ha̍k”）kā tiong-io̍h io̍h-sèng hun sù khùi(hân, jia̍t, un, liâng)gō͘ bī(sin, kam, sng, khó͘, kiâm). Hân-liâng io̍h tī jia̍t-sèng-pēⁿ. Un-jia̍t-io̍h tī hân-sèng pēⁿ……kam-bī io̍h ē pó͘, ji̍p pî. Khó͘-bī io̍h chheng-jia̍t, sià-ē, kàng-ge̍k, ji̍p sim-keng……chióng-chióng. Pí-jū:chio̍h-ko chheng-jia̍t sià-hóe, ti-táⁿ-chiap kái-to̍k, lêng-iûⁿ-kak pêng-koaⁿ…….chha-put-to choân-pō͘ sī hêng-iông-sû, thiaⁿ--khí-lâi kài-sêng ū-iáⁿ ū-chiah, ná-ū ná-bô. Lí kám chiâⁿ-si̍t ē-tàng liáu-kái I teh kóng-siáⁿ？ Siáⁿ-mi̍h sī hân, jia̍t, un, liâng? Siáⁿ-mi̍h sī sià-hóe, kái-to̍k? siáⁿ-mi̍h kiò-chò ji̍p-koaⁿ-keng, ji̍p pî-keng？ Kám ū jīm-hô si̍t-thé kho-ha̍k ê tēng-gī? Tui-kiù lâi-goân, tap-àn lóng-sī kó͘-chá “pún-keng” “pún-chháu kang-bo̍k” …….ū án-ne siá. Kî-si̍t bô pòaⁿ-tih sò͘-jī, kho-ha̍k si̍t-giām kin-kù. Kui-phiⁿ tō-sī chò bûn-chiong, ōe-hó͘-lān. Bô kū-thé lāi-iông.

咱来看中药部分. 中药册（比如上海中医学院教材册“中草药学”）kā中药药性分四气（寒, 热, 温, 凉）五味（辛, 甘, 酸, 苦, 咸）. 寒凉药治热性病. 温热药治寒性病…..甘味药ē补, 入脾. 苦味药清热, 泻下, 降逆, 入心经..……种种. 比如：石膏清热泻火, 猪胆汁改毒, 羚羊角平肝……差不多全部是形容词, 听--起-来盖成有影有迹, 若有若无. 你敢成实ē-tàng了解伊teh讲啥？啥物是寒, 热, 温, 凉？啥物是泻火, 解毒？啥物叫做入肝经, 入脾经？敢有任何实体科学ê定义？追究来源, 答案拢是古早册“本经” “ 本草纲目” …..有按呢写. 其实无半滴数字, 科学实验根据. 规篇tō是做文章, 画虎烂. 无具体内容.

Kúi pah-chióng sīm-chì chhian-chióng tiong-io̍h lāi-té, tiāⁿ-tio̍h ū ē éng-hióng sin-thé, ū io̍h-sèng ê mi̍h. tān-sī ū io̍h-sèng, bô io̍h-sèng, in tī-liâu pēⁿ-chèng ê hāu-kó lóng-bô kho-ha̍k-te̍k ê phêng-kó͘, liáu-kái. “Ti-táⁿ-chiap kái-to̍k”, iōng-lâi tī ba̍k-chhiah, n̂g-thán, sī siáⁿ-mi̍h kin-kù? Koh-khah giâm-tiōng sī, kin-pún chit-ê “to̍k” m̄-chai sī siáⁿ. Bô-hoat-tō͘ tēng-gī, beh chóaⁿ-iūⁿ lâi phêng-kó͘?

几百种甚至千种中药内底, 定tio̍h有ē影响身体, 有药性ê物. 但是有药性, 无药性, in治疗病症ê效果拢无科学te̍k ê评估, 了解. “猪胆汁改毒”, 用来治目赤, 黄疸, 是啥物根据？Koh-khah严重是, 根本这个“毒” m̄知是啥, 无法度定义, beh怎样来评估？

Tiong-io̍h í-gōa, kî-tha tiong-i ê lāi-iông mā-sī kâng-khoán ê būn-tê móa-móa-sī. Tiong-i só͘ kin-kù ê kin-pún lí-lūn chhut-hoat-tiám, chhin-chhiūⁿ keng-me̍h, khì, hân, jia̍t…..bô kū-thé, bêng-khak ê tēng-gī. Só͘-í bô-hoat-tō͘ iōng kho-ha̍k ê hong-hoat lâi chèng-bêng I tio̍h iah-sī m̄-tio̍h. chhiáⁿ-mn̄g beh án-chóaⁿ chèng-bêng “chio̍h-ko chheng-jia̍t sià-hóe” “ti-táⁿ-chiap kái-to̍k” ？ In-ūi che “hóe” “to̍k” sī bô kū-thé ê mi̍h-kiāⁿ, bô-hoat-tō͘ chhek-niû.

中药以外, 其他中医ê内容mā是仝这款ê问题满满是. 中医所根据ê根本理论出发点, 亲像经眽, 气, 寒, 热….无具体, 明确ê定义. 所以无法度用科学ê方法来证明伊tio̍h ia̍h是m̄-tio̍h. 请问beh按怎证明 “石膏清热泻火” “ 猪胆汁改毒 ” ？因为che “火” “毒” 是无具体ê物件, 无法度测量.

Tiong-i ê pún-chit sī hui kho-ha̍k--ê. I tī Tâi-oân, Tiong-kok ē sî-kiâⁿ chûn-chāi, chú-iàu sī khò chèng-tī ê chi-chhî kap it-poaⁿ lâng ê bû-ti. Lî-chhiáⁿ chin-chē pēⁿ-chèng, pí-jū kam-mō͘, sī khah-siông m̄-bián chia̍h-io̍h chū-jiân ka-tī ē hó. Lí nā khì chia̍h saⁿ thiap tiong-io̍h, kam-mō͘ hó--khì, kám ē-sái kóng sī hit saⁿ-thiap tiong-io̍h tī-hó--ê?Chin-chē lâng chia̍h tiong-io̍h kám-kak ū-hāu, kî-si̍t sī pēⁿ ka-tī hó--khì. Só͘-í i-liâu ê hāu-kó it-tēng tio̍h-ài kho-ha̍k-te̍k ê thóng-kè pí-kàu, chiah ē-tàng kiat-lūn.

中医ê本质是非科学--ê. 伊tī台湾, 中国ē时行存在, 主要是靠政治ê支持Kap一般人ê无知. 而且真chē病症, 比如感冒, 是khah常m̄免食药自然家己ē好. 你若去食三帖中药, 感冒好--去, 敢ē使讲是hit 三帖中药治好--ê?真chē人食中药感觉有效, 其实是病家己好--去. 所以医疗 ê 效果一定tio̍h-ài科学te̍k ê统计比较, chiah ē-tàng结论.

Tōa Tiong-kok chú-gī kā tiong-i tòng-chò kho-ha̍k ê sêng-chiū, che-sī ka-tī phiàn ka-tī. Tiong-i m̄-nā sī hui-kho-ha̍k, lî-chhiáⁿ sī ké kho-ha̍k （psedoscience), hoán kho-ha̍k. chit-ê bô keng-kòe kho-ha̍k chèng-bêng, he̍k-chiá bē-tàng chèng-bêng ê i-liâu, sī lōng-hùi chu-goân, sīm-chì ē ín-khí i-liâu siong-hāi. Che tō-sī tiong-i ê hûi-hiám-sèng. Tī au-bí, bô keng-kòe giâm-keh kho-ha̍k chèng-bêng ê tī-liâu sī hui-hoat.

大中国主义kā中医当作科学ê成就, che是家己骗家己. 中医m̄-nā是非科学, 而且是假科学（psudoscience), 反科学. 一个无经过科学证明, 或者bē-tàng证明 ê 医疗, 是浪费资源, 甚至ē引起医疗伤害. Che tō是中医 ê 危险性. Tī 欧美, 无经过严格科学证明ê治疗是非法.

Chèng-hú chi-chhî tiong-i tī-liâu, tō-sī kā tiong-i chit-ê hui kho-ha̍k, ké kho-ha̍k, hoán kho-ha̍k ê mi̍h-kiāⁿ chún-chò ū kho-ha̍k kin-kù ê tì-sek！Tong-jiân bô ha̍p-lí, bô eng-kai. Che tō-sī tiong-i lēng-gōa chit-hāng ê hûi-hiám-sèng. Ko͘-bú chiòng-lâng khin-sī kho-ha̍k.

政府支持中医治疗, tō是kā 中医这个非科学, 假科学, 反科学 ê 物件准作有科学根据 ê知识！当然无合理, 无应该. Che tō是中医另外一项 ê 危险性. 鼓舞众人轻视科学.

Chèng-hú èng-kai thêng-chí chi-chhî tiong-i tī-liâu. Thêng-chí i-liâu chèng-tī-hòa. Thêng-chí iōng kong-ka ê chiⁿ lâi hù “iûⁿ táⁿ-chiap tī hì lô-siong” chit-khoán mi̍h-kiāⁿ, chit-khoán ké i-ha̍k. èng-kai iu-sian iōng kho-ha̍k hong-hoat kap koan-liām lâi phêng-kó͘ tiong-i chit-ê mi̍h-kiāⁿ.

政府应该停止支持中医治疗. 停止医疗政治化. 停止用公家ê钱来付 “羊胆汁治肺痨伤” 这款物件, 这款假医学. 应该优先用科学方法kap观念来评估中医这个物件.

（Chok-chiá chù:chhiáⁿ-iōng pe̍h-ōe-jī)（作者注：请用白话字）