《陈雷文选》

 | | | 转寄

Thâi好--a

作者 陈雷 2009.05.31

已经破病冬外--a，医bē好，lú来lú厉害。这个进前，人好好ê时，súi有出名，阿富时常来tshuē--伊，对伊有意思。Tsit-má看--着tō走，概成刁工teh闪--伊，惊hō͘伊uè着病。M̄-kú这点明星心内明白，有一个解说。M̄是阿富m̄爱--伊，是伊人细字，惊人看--着ê关系。Kan-na伊知影，阿富原在定定来tshuē--伊，拢是伊家己一个tī厝--里ê时阵，别人无看--着，老母mā无看--着。见来tō o-ló伊衫súi，所以hit su白衫红裙，穿规个月m̄甘换。头毛也m̄剪m̄洗，因为阿富有讲，伊ê头毛上tn̂g上súi。老母骂伊la-sap臭kô͘-kô͘，gī-gī笑，kā老母讲，阿富缘投，伊beh嫁阿富。老母骂，查某gín-á m̄通家己乌白想！人阿富已经有查某朋友，无爱tshap--伊。明星无受气，原在gī-gī笑，因为kan-na伊知影这个秘密，阿富有爱--伊，定定来tshuē--伊。

大热这日，下晡阿富koh来厝--里tshuē--伊，o-ló伊súi，叫伊thǹg衫thǹg裙hō͘伊看。明星听了心肝头热，hīⁿ-á筋烧，笑bi-bi:「你tshuā我去tshit-thô，我kap你相好。」阿富讲：「我bē-tàng kap你相好，tshuā你去tshit-thô。」 「为啥物？」「你身躯边有一个恶魔，不时tuè tiâu--leh。」「Tó一个恶魔? 我thài无看--着？」阿富比hō͘伊看：「这个！…这个红目睭、白身躯、khiû头毛--ê ?…」明星惊一tiô:「伊？！…伊是阿娟…」阿富tìm头，讲：「Tō是伊！伊是恶魔来化身。」明星斟酌看，成实--ê，he阿娟，…发二枝鬼á角，拖一枝魔神尾，pok二tsuā青燎牙，teh beh咬--伊。「你先kā恶魔thâi好，斩作三kue̍h，头壳tsûi--落-来，血流hō͘ ta，…」阿富hā-hā笑:「我kap你相好，tshuā你去坐火车，台南tshit-thô。」无等伊应，tō koh走无--去。

明星惊koh受气，无想着恶魔假作阿娟来害--伊，害阿富bē-tàng爱--伊，kap伊相好。大力双手kā恶魔掠--leh，beh催hō͘伊死！骂：「Tō是你！…你这个恶鬼！」拖去灶脚，桌顶一枝菜刀，gia̍h--起-来tō kā phut！Ai-ioh，红phà-phà若水道一直phū，血tsuāⁿ bē停，àu koh臭tsho，恶魔ê味。照阿富吩咐，斩作三kue̍h，头tsûi hō͘断，血流hō͘ ta，按呢算作thâi好--a。Tsông出来街á路，看无阿富，ná hiu:「我thâi好--a。」沿路tshuē，一脚挂一粒铃á，gin-gin giang-giang。来到火车头，碰着老母，kā老母讲：「我thâi好--a。」老母看，ai-io-uê，双手红ki-ki，衫裙拢是血！是啥货thâi好--a?！敢是明星tī厝--里家己thâi鸡，bē晓thâi，舞一身躯？明星gī-gī笑，讲：「我beh嫁阿富，kap阿富坐火车，台南tshit-thô。」脚铃á gin-gin giang-giang，uat--leh tō行。这时火车beh入车站，明星走去jiok火车，ná jiok ná ia̍t手，huah讲：「我thâi好--a。」老母有看--着，火车慢--落-来，车门开，阿富khiā tī车门边，teh等明星。伸手来牵伊peh上车。二个欢欢喜喜，笑gī-gī，teh kā伊ia̍t手。

车门关好，火车khin-khōng khin-khōng teh起行。雄雄头壳gông tshia-tshia，亲像作龟怪ê梦tú-tsiah精神。目睭皮垂垂，hīⁿ空筋hōng-hōng，有听着明星teh吩咐；「…斩作三tè，…拢总三tè--lah，…」来花bē放心，若是thâi鸡，thài kan-na斩作三tè?…赶紧转来去厝--里看māi。

后--来调查结果，m̄是驶火车--ê m̄-tio̍h。这个火车祸，新营火车站30冬来第一回。现场jû-tshiáng-tshiáng，乱糟糟。有看--着ê人讲，查某gín-á teh jiok火车。白衫红裙，bak kah全血，ná ia̍t手ná huah:「我thâi好--a。」这班落南ê快车tī新营站无停，过月台ê时驶真紧，无慢--落-来。查某gín-á jiok uá--去，一下tō--跳--落-去。火车bē赴挡，规个人拖leh tshê，拖去到月台koh过--去hn̄g-hn̄g，上无一百公尺才停。Kauh作三kue̍h，iā作三位。看ê人一人一句：「可怜--lah，犹tsiah少年。…」「夭寿--a，thâi人才家己自杀，…」尾--a有调查详细，是查某gín-á家己去tsông火车，m̄是驶火车ê司机m̄-tio̍h。

来花转来到厝，哀一声「ai-io-uê｣，taⁿ死--lah，规间厝红ki-ki ê血。入去灶脚，天公--a，看一下强beh吐。倒tī土脚，tok作三tè，一粒头liàn tī椅á脚，侥幸，嘴á开开，目睭金金，tō是in阿娟！这只古锥ê贵宾狗，红目睭、白身躯、khiû头毛，tsīng细只明星tī路边khioh--转-来，上疼--伊。二个上盖相好，不时tuè作伙。Thài会thâi好斩作三tè?…走去kap阿富坐火车tshit-thô?

当teh想无，m̄知beh怎样才好，着急灶脚khok-khok se̍h。隔壁云--a喘phèⁿ-phèⁿ tsông--入-来，hiu:「紧！来花--a!…紧来--去！…」青狂无顾看，一脚踏着血，差一sut á滑一倒。惨--a，目睭teh作怪，规土脚红ki-ki ê血，一只狗斩作三tè，…。惊一下ua̍t倒头tsông--出-去，来花kha-tshng后jiok，一手kā tsang--leh，m̄ hō͘走。这个云--a，tō是厝边阿富in老母，食菜人心肝清气，bē堪得看狗死，bē输细汉婴á分尸切作三tè，un tī hia直直吐。一时青tso̍h，双手khok-khok比，讲话suah大舌：「火…火…火车…」Tō是tú-tsiah新营车头车祸，紧来teh报。Suah一句话咬tī嘴内，hō͘舌that tiâu--leh，讲bē出--来。Tī hia thi-thi thū-thū一晡久，雄雄人tshāi-tshāi bē tín动，目睭仁吊吊无teh nih，tō是惊一下身魂出窍，飞无--去-a。

来花看伊人tī hia，魂无tī hia，青狂拳头母gīm--leh，心肝窟大力tō tsing，一下koh一下，佳哉才精神，魂倒转--来，huah讲：「…火…火车…kauh死…，恁…明…明…明星…」来花讲：「阮明星tú-tsiah坐火车，kap恁阿富去台南tshit-thô。」云--a讲：「阮阿富下…下…下晡kap静美牵…牵…手去看…看电影。」Kā来花讲，thâu-tú-á tī火车头有看--着，明星jiok火车，ia̍t手teh huah:「我thâi好--a。」一下tō跳--落-去。火车bē赴挡，kauh作三tè，拖去到月台外才停。来花讲：「看着鬼！你乌白讲。我thâu-tú-á tī火车头亲目看--着。阮明星jiok火车，火车入--来，停tī月台。车门开，明明恁阿富khiā tī车门边teh等--伊，牵伊peh上车。」一人讲一款，二款bē对角。沿路ná tsèⁿ。来到火车头，围一阵人，hi-hi hè-hè teh看闹热。「查某--ê-lah，…tsiah十八、九岁niâ，…」「可怜，ah thài tsiah无细字，pua̍h落火车脚，…」「m̄是--lah，家己刁工跳去hō͘车tsông--ê，…」一人一句，tshi-tshi tshū-tshū。E-e kheh-kheh，tsiⁿ来到月台边，规tsuā铁枝á路m̄是血tō是肉，tsia一位hia一位，衫一tè裙一tè，iā-iā一四界。「你看，…」身边hit个大kho͘查某人比hō͘看，头前铁枝路顶近近一堆肉挂骨，tshun二枝脚挂鞋á犹好好，一脚挂一粒铃á。一阵风吹走，概成hīⁿ空内gin-gin giang-giang，hiu一声「我明星--a｣，昏昏m̄知人--去。

无teh张持，m̄知tiâng时，查某gín-á uá来khiā tī伊身边。Gī-gī笑，kā伊讲：「我beh嫁阿富。」白衫红裙，清气tam-tam。Tn̂g头毛乌sìm-sìm，lua̍h kah súi-súi齐齐，tō是in明星。实在讲--ê-lah，tsīng伊大siáu，一冬以来，m̄-bat看伊这款平安自在，笑kah tsiah-ni̍h欢喜满足，m̄是teh gōng笑，概成雄雄病医好--a，无koh teh 起siáu，无koh家己一个人关tī房间，有时衫裙thǹg光光，家己讲话家己笑：「你tshuā我去tshit-thô…，我kap你相好，…」

欢喜一下，suah精神过--来。人倒tī土脚，一阵人hò͘ⁿ-hiân围leh看。「醒--a!…醒--a!…」「查某gín-á ê老母--lah，…可怜，tsàn bē tiâu，…」又koh teh tshī-bú-tshī-tsū。这时雄雄才心肝内明白，伊看--着-ê tō是查某kiáⁿ头壳内起siáu ê世界。火车慢--落-来，停tī月台，阿富khiā tī车顶teh等--伊，beh牵伊peh上车。因为阿娟已经thâi好--a，血流ta，斩作三tè。阿富beh tshuā伊去tshit-thô。Tse tō是伊tōng车进前，上续尾一目nih，头壳内ê经验kap幕景，也tō是明星ê现实，kap别人看--着-ê无仝。概成仝一个舞台顶，仝hia ê演员teh演二出无仝款ê戏，一出别人看，另外一出kan-na伊kap查某kiáⁿ看。Tó一出是现实，tó一出是起siáu ê幻觉？一时suah分别bē出--来。