《陈雷文选》

 | | | 转寄

罚

作者 陈雷 2009.05.10

(1)

普通穿西装ê人罕得chah枪，tú-chiah伊有看--着，明明kha-chhng头藏一枝té枪。这个挂lô͘-lê-á表、结ne-khu-tái ê绅士，皮鞋金tak-tak，koāi°着椅á脚，差一sut-á poa̍h倒。注死衫á尾掀--起-来，hō͘伊看--着。Soah oa̍t头过--来，hoah一声：「你teh看啥siâu?」恶死死，目睭beh thâi人。害伊赶紧头chhih-chhih，tàm--落-去，ka-pi一直lim，tèⁿ无听--着，准无看--见。

等ka-pi厅ê青春小姐穿té裙好礼来thîn ka-pi，才un-un-á头giâ--起-来，偷偷á使一个目尾，已经无看tī hia，出--去-a。店--里人客chhun伊一个。无张持目睭皮chhoah一下，手肚肉tiuh二下，赶紧peh起椅，也好通来走。才注意着隔壁椅á顶一粒金金，tō是一枝手机á，hit个穿西装ê查甫人lak--去-ê。续手khioh--起-来，袋tòa lak袋á，离开丽娜尚贵ka-pi厅。

街á路一阵人，炮á pìn-piàng叫，giâh旗á lòng鼓lóng锣，tō是庆祝民进党赢，昨hng投票，阿扁--a选tiâu总统。大步紧行，ná行ná想，hit个穿西装--ê是啥人？…thài会偷chah枪？…若是间谍、杀人犯hit款ê pháiⁿ人，beh按怎？…。转到厝，手机the̍h--出-来，新新金tak-tak。机á拍开，hòⁿ-hiân chhìn-chhái kā看，tú好读着信箱一chōa字留话：「Eng暗12点八德路13号等。」八德路hit tah伊知影，tī市外南旁beh去田庄ê所在，旷地khah chē。奇怪--a，半暝约hit款所在，大概m̄是啥好空--ê。

想讲êng事mài chhap。等到eng暗11点，挡bē tiâu，o͘-to͘-bái骑--leh，七se̍h八se̍h，家己一个来到八德。旷地一大片，月光脚hóaⁿ-hóaⁿ°iāⁿ-iāⁿ，三、四欉koân树，五、六间kē厝，四四角角，概成仓库。Bi tòa厝后面等，liâm-mi hn̄g-hn̄g路头狗pūi，一只细台tho͘-la-khuh ùi大路hit旁过--来，khīn-khōng一声，tī仓库头前停--落-来。

灯hoa--去，狗tiām--去，二个查甫人车顶落--来。作头hit个细细汉，行路pái--一-下pái--一-下，tō是驶tho͘-la-khuh ê司机。另外一个tòe tī伊后面，koân koh大chhiâng，一粒西瓜头siah kah金金，比伊koân一粒头。来到仓库路前，有人内面开门，二个tō入--去。一时á，门开二个人出--来，扛一khū大箱，tn̂g-tn̂g lu-lu，tō是咱té死人ê棺柴！大汉--ê作头前，另外二个扛后面，tō是司机kap下晡ka-pi厅穿西装hit个。喘phèⁿ- phèⁿ舞一晡，扛上tho͘-la-khuh。穿西装--ê hoah讲：「Lim一杯才去。」三人又koh oat入去仓库。

一晡久无动静，hn̄g-hn̄g狗á吹狗螺，雄雄pōng一声，概成teh tōaⁿ枪，又koh一声，惊kah m̄敢tín动。Liâm-mi仓库门开，hit个大汉--ê肩胛头giâ一kho͘人，白布卷--leh，làu二枝脚皮鞋金tak-tak，tōng-tōng-hài°。又koh扛上tho͘-la-khuh，棺柴挂掀开，规kho͘人kā tàn--落-去，挂khàm好。二个peh上车，车灯光--起-来，ian-jín lòng-lòng叫，tho͘-la-khuh hián--leh hián--leh驶leh走。等到月á bih无，狗螺tiām--去，才敢tín动，足紧o͘-to͘-bái骑leh走。

隔转日，叶赞成无去学校，家己一个bih tī厝内乌乱想。Hit二个啥人？…为啥物半暝扛棺柴？内底藏啥？…是按怎thài beh thâi人？…。Lú想lú giâu疑，lú疑lú惊，lú惊lú好奇…。挡bē tiâu，手机拍开koh kā巡，信箱一chōa字：「3月19日下晡阿扁台南着枪。」tō是3日前，阿扁--a tī台南扫街路拜票，hō͘人tōaⁿ°枪。斟酌kā看，惊一tiô，是3月18中昼时一个姓庄--ê khà--来-ê?奇怪--a! Thài会未曾未tō知影？！时间、地点讲kah准准！…敢tō是暗杀阿扁ê人？！赶紧照hit个电话番khà倒转--去，无人接…。手机á内底电话番一个一个kā khà，「羊á｣、「阿月á｣无人接。阿兰--a hia一个查某人ê声，出嘴tō骂：「干！chit-má几点！你是teh闹siâu--ê-nih?」过--来牛头hia一个查甫人应：「福寿棺柴。」夭寿鸡屎运，透早叫着棺柴间。想beh挂掉，雄雄想着昨暗半暝扛棺柴ê代志，心头chhek一下，紧问：「借问，咱店今á日敢有开？」查甫人报伊地址，tī七星路，离无外hn̄g。

O͘-to͘-bái骑来到七星路，路边一tè红khang-páng，四字乌字：「福寿棺柴」。探头kā看，臭phú臭phú，暗sàm暗sàm。Liam脚入--去，内底无人，横直chhāi四khū棺柴。Koh踏一步，内底吱一声，oat头想beh走，kha-chhng后有人叫：「坐--来-lah。」Tō是查甫人tī后面teh看电视，拖一双木屐，khī-kho̍k khī-kho̍k，oai--leh oai--leh行--出-来，koh是一个pái脚--ê!「食薰--lah。」Tu一枝薰来请。Kā看，手骨挂一粒lo͘-lê-á表，金壳四粒钻石，kap穿西装ê hit个查甫人hit粒仝款！侥幸--a，tō是昨暗hit个pái脚司机。「看棺柴nih?…大人抑是gín-á?」中央hit khū，tn̂g-tn̂g lu-lu，漆kah红ki-ki，一手hōaⁿ tī棺柴，讲：「这khū福州杉，chit-má上有销。…昨暗tú-chiah到--ê。」像teh鼓舞卖俗货。详细看，用指头á kā摸，夭寿--a，一滴kian ta ê血！「Che棺柴thài有血？」Pái脚--ê雄雄变面无欢喜：「Che无啥，拭拭--leh tō清气。」Àⁿ落去ná拭，概成刁治工衫á尾lāng--起-来，ai-io-ôe，kha chhng头乌乌一枝té枪，惊一下心肝khut pōng-pōng chhiáng，目睭皮tiuh-tiuh-chhoah。「我…我…另日才koh来。…」安全帽戴--leh，o͘-to͘-bái骑leh走。

(2)

庄严法师今年67，坐禅30冬，功夫第一流。为着今á日这chân大事，莲花坐禅，kha-chhng无tín动，无放屁无喘khùi，足足三点钟，圆满神通，神明指点：3月19下晡阿扁--a台南着枪。惊一tiô，随tō khà手机á hō͘机á男，留一chōa字。机á男臭hīⁿ，kap伊联络，手机á用讲--ê bē通，拢用留字。

中昼机á男看着消息，欢喜一下，走去牛头hia，poa̍h一枝大--ê。牛头看伊来，刁治kā问：「机á男，这过啥人赢？」机á男hīⁿ空重，看嘴形知影意思，应：「啥人赢？无人知，也m̄是我讲tō有算。」牛头kā激：「嘴讲--ê无算，钱讲--ê才有算。」机á男心内笑，你这只牛头犹m̄知死，顶回输了m̄惊，等恁pē来教示。Hoah:「干，我kap你áu--一-枝。」Teh连--ê tiâu，输赢2百万。牛头看伊成实poa̍h大kiáu，心内无自在。顶回选立委，teh五个，五个总tiâu，五彩开花，输伊百外万。牛头帮ê头--ê刘茶壶，实名刘世界，tī大桥市场后面开茶壶店卖古董，kā牛头soān:「干，这个臭hīⁿ--ê m̄成gín-á teh变啥空？kā咱装sńg--ê!另回koh来，会使输bē使赢。」Kā牛头放tiau:「koh来，拢算你ê数！」牛头知影意思，若是koh出têng-tâⁿ，这粒牛头tú数。所以机á男来poa̍h大kiáu，牛头无自在。想beh m̄ hō͘ ī，koh惊hō͘伊笑无lān核。头壳皮tēⁿ--leh，面主皮顾--leh，大声话也讲：「惊你无niâ，外chē作你来!」Hit chām国民党民调kap电视台拢讲连--ê大赢，假仙kā háⁿ：「想hō͘真，bē使koh改！」「真--lah!真--lah!比神明讲--ê khah真！」机á男自信满满，bē输关帝庙tú-chiah烧香出--来。Taⁿ莫怪，因为有kap佛金山ê庄严法师技术合作。顶回选立委，神明指点，五彩开花。这回又koh指点，3月19日阿扁--a会hō͘人tōaⁿ枪暗杀，定着是连--ê稳赢！

3月19日下晡，阿扁--a kap吕秀莲tī台南扫街路拜票，hō͘人tōaⁿ枪。Ná知tōaⁿ一下枪子chhè破pak肚皮，无啥伤害，会痛bē死。民进党kap国民党协调，hit暗竞选活动全部停止，明á chài照原在投票选举。结果3月20日选总统，阿扁--a赢，连--ê输。电视顶起phùi面，讲阿扁--a tī台南hō͘人tōaⁿ枪，是伊家己安排，刁治叫人来tōaⁿ--ê，苦肉计giú同情票。当场乌绿面，一枝手gia̍h-koân chiù-chōa，讲伊宣布这回投票无算数，ài koh重选。

隔转日透早，牛头khà电话叫七虎，约伊hit暗作伙去机á男hia，kā伊吩咐，讲时到按呢生…按呢生…。这个七虎tō是牛头m帮ê拍手，大kho͘ koh大欉，beh kah六尺七，所以叫作七虎…。过--来khà手机hō͘机á男，mā是简单留一chōa字，约hit暗半暝12点去八德路the̍h货，乌枪一箱。这个机á男进口红棺柴，ùi中国走乌枪。乌枪tōaⁿ死人，红棺柴thàn活钱，生理双头choán。牛头帮是按呢kap伊有交陪。

Hit暗乌枪藏tī棺柴内，三人扛上车，机á男讲：「Lim--一-杯才去。」倒转入去仓库，三个人be-a-luh灌一打。Lim了烧lō，牛头讲：「来！来！男--a，…咱干--一-杯……。」机á男讲：「来！来！牛头兄…干--一-杯…」三人干杯，khin-khin khiang-khiang，拢有teh醉。牛头讲：「男--a，ah taⁿ°这回神明保证，你大输，…」机á男目睭放bui-bui，chhìn-chhái应：「神明保证--ê，bē m̄ tio̍h--lah。…你无看电视，连--ê teh讲，选举无算，ài koh重选。…」Taⁿ--a，soah kap国民党仝款，m̄认输，起phùi面，钱m̄ hō͘--人。牛头讲：「Heh，男--a，咱兄弟交陪chiah久，你mā m̄通按呢创治。…阮头--ê会kā我…干，…干…干恁娘！…」m̄知死，机á男hā-hā笑：「恁头--ê?！Hit枝老茶壶，…干，mā是m̄成猴假大仙，…」牛头受气，起变面：「你这个m̄成kiáⁿ，敢kā恁pē作脚手创治！」使一个目色，七虎chhîⁿ óa--去，双手ām-kún tēⁿ--leh tō kā催，ná大枝虎头ngeh-á，咬tiâu--leh m̄放。出一大力，pi-pi pia̍k-pia̍k，nâ喉tēⁿ破--去…，soah笑bē出--来，喘bē入--去，机á男双手jiàu二下，双脚liòng一下，ah tō乌绿面，断khùi去--a。牛头té枪póe--出-来，头壳心chiong-chiong pōng--一-下，骂：「干！才koh看你kā恁pē创治！」

(3)

佛金山ê庄严法师知影阿扁--a着枪tōaⁿ无死，又koh选赢连--ê，当选总统，kap神明讲--ê péng倒péng!敢会这回神明糊涂，创têng-tâⁿ--去？赶紧入去禅房坐禅，又koh 3点钟无tín动，无喘khùi无放屁。神明指点，m̄是têng-tâⁿ，是teh无欢喜受气。因为前--a庄严法师有kā神明讲，kap李正男合作，请神明报伊赢kiáu，赢ê钱共家，一半分神明，有按呢chiù-chōa。Taⁿ年底选立委，报伊五个名，五彩开花拢总tiâu，大赢百外万，到taⁿ一仙钱to犹未the̍h来分，是按呢teh无欢喜受气。

所以这回报伊阿扁--a着枪，kan-na讲一半，无讲阿扁--a tōaⁿ枪无死，会选赢。机á男听讲阿扁--a着枪，tō想讲是hō͘人tōaⁿ死，连--ê会赢。所以雄心去牛头hia poa̍h一枝大--ê 2百万，teh连--ê赢。结果输kiáu无钱通hō͘--人，学连--ê起phùi面，家己赔一条命。Chiù-chōa神明，无照约束，tō是这个责罚。

庄严法师知影神明受气无欢喜，赶紧khà机á hō͘机á男。仝这时，佛金山ê主持圣严法师tī电视顶公开声明，连--ê讲了无m̄-tio̍h，阿扁--a hō͘人tōaⁿ枪，是家己设计，刁治工叫人来tōaⁿ--ê。Ah无，thài会tōaⁿ°hiah准，tú-tú好枪子chhè破pak肚皮，m̄成伤无死。关于这点，kan-na庄严法师知影，是神明ê意思，这款安排。M̄-kú tiām-tiām无讲，mā是宣布支持连--ê，一手giâ--起-来，讲选举结果无算数，ài koh全部重选。

叶赞成听着手机á tân，拍开来看，简单一chōa字：「神明受气，钱紧the̍h来还。」又koh是姓庄--ê khà--来-ê。Chhoah一tiô，koh气koh惊，chēng khioh着这粒手机á，tauh-tauh pháiⁿ事来，好事无来！Liâm-mi半暝扛棺柴，仓库thâi人，…liâm-mi暗杀阿扁，当选无效，…。续--落-去，chit-má神明受气，teh讨钱！Lú想lú无妥当，这枝手机á，明明衰siâu m̄是好物。一大力按窗á口khian--出-去，五楼siak到土脚。窗á关--起-来，想想--leh，khà电话hō͘铨玉，招查某gín-á去丽娜尚贵lim ka-pi。一时á，一个猴gín-á ùi大楼头前过，土脚一枝手机á，金金sih-sih，siak无破。Chiān手kā khioh--起-来，袋tòa lak袋á，欢喜kho͘-sî á ná行。