《陈雷文选》

 | | | 转寄

身世

作者 陈雷 2009.04.18

(1)

进前，阿月有tī--leh ê时，阮tī hia tòa真久。大路koh过--去，离市á无外hn̄g hia。厝足大间，墙á壁围--leh，顶头一chōa红花，足好认--ê。Óa壁一欉chhêng-á，khiau-ku khi一旁，树ōe tàm--落-来，sôe tī墙á外。过路狗ùi hia过，食饱siuⁿ-êng，看bē做--得，无欢喜会pūi。我若peh起lih树á顶kā看，he狗tō lú无欢喜，pūi lú大声。阿月m̄爱人吵，墙á内hoah，狗tō tiām--去。

这个以外，其实ta̍k项sù是。阿月人上好，bē输家己ê老母。阮母--a，chēng细汉我m̄ bat--伊，我出世无外久hō͘车tōng--死。人讲我生作成--伊。Chēng细汉hō͘阿月io，食伊ê奶大汉--ê。实在hia tòa真久真惯势--a，搬--出-来是姑不而衷，主要是hit个少年--ê，bē合--lah。

阿月老--a，身体无好。去看医生，到taⁿ犹未转--来，che我上烦恼。这个少年--ê孝男面，嘴角一粒痣，新来tō会kā我phngh，人客khah恶主人？Hit阵我顾teh烦恼阿月，m̄爱kap伊计较，ná知lú让--伊lú恶。我拍算，阿月无tī--leh，mài chhap--伊，搬--出-来khah头路直。阿月若有tī--leh，才无通hō͘伊恶sńg--ê。主要是这个少年ê问题，我出来chhōe阿月。

Chit-má chia真细位，无前--a hia好势。头前一脚大脚pùn-sò桶，落大雨会泼水。M̄-kú tī巷á尾，mā有墙á壁，顶头有红花。Uat--出-去一-tè-á tō到大路，ta̍k项有，主要取方便--lah。精差不时车足chē，走真雄，过大路ài细字。临时--ê-leh，主要是chhōe阿月。

头--a家己一个bē惯势，chhōe无阿月，想beh koh转--去。少年--ê犹tī hia，khiā tī门口kā我恶，我紧beh走。Tō是这个缘投--ê看bē做--得，走来为--我，kā伊phngh倒转。少年--ê看伊勇，惊--伊，soah走入去厝内bih，乖乖m̄敢出声。阿月以外，kan-na伊为--我。

有影是缘投，亲切koh好礼，chhōa我四界chhit-thô，chia伊ta̍k位熟。Kap伊，我bē输细汉gín-á，无烦无恼，也无想beh转--去，连阿月mā bē记--得。人kā我劝：「好是好，khah细字--leh。」，讲『缘投--ê』人无实，bē靠--得。敢是看阮二个相好teh怨妒，加讲--ê。我刁治无beh kā听。查某gín-á tō是惊人嘴tiⁿ，讲我外súi tú外súi，beh kap我作伙一世人。画天画地，hō͘我酒醉兼作梦。Thài有影--leh？！无一礼拜，phiu--leh作伊去，也无相辞，走kah无看影。惊我kā jiok？总--是，我也无后悔，chit-má kā想--起-来，tō是我一生上盖快乐、满足。我敢是目睭放kheh-kheh，家己teh骗家己？若是有影，mā是欢喜甘愿。阿月若知影，定着会骂我gōng呆，查某gín-á感情粗俗，bē晓想。

Chit-má搬--出-来-a，ta̍k项看真chē，犹是家己一个khah清khah自由，精差chit-má大pak肚无方便，大路车chē pháiⁿ过。市á hit旁chit-má我无啥爱去。大kho͘查某卖鱼--ê，金hīⁿ钩、金phoa̍h链，看--着tō hiu:「恁看！巧-a-lah！…娟--a teh chhōe伊无。…」Tàn鱼á hō͘我食。「可怜，thài会变chiah sán?！…侥幸--a，恁看，大pak肚有身--a。」大细声，bē输是偷生--ê。Beh kā我抱。我m̄爱人按呢ko-ko-tîⁿ，紧走。市á hia我chit-má无爱去。

阿月chín若有tī chia tō好--lah。Che婴á ê代志伊khah bat。人讲头胎pháiⁿ生，生--出-来soah bē háu。Pak肚iau，食无奶，suh二嘴tō m̄ suh。阿月奶上chē，我食伊ê奶大汉--ê，chín若有tī chia tō好--lah。Ài食khah chē才有奶，市á hit旁ta̍k项有，khah有通食，ài过大路。婴á无人顾，siaⁿ放--chia，出--去随转--来。

(2)

无想着二个会bē合。害巧--a规日miau-miau叫，拢m̄食。Soah m̄知tiâng时家己一个走--出-去，到taⁿ拢chhōe无。博爱兽医讲，狗kap niau若m̄是细只抱来作伙，拢bē合--lah。像巧--a，细只路边khioh--来-ê，目睭犹未开，niau母讲是hō͘车kauh--死。Pak肚iau，家己一个爬出来tī沟á边，chhōe老母。Tú好hit阵阿月生一siūⁿ狗á kiáⁿ，抱转来hō͘阿月饲。心适--a，阿月奶hō͘ suh，准家己ê。食阿月ê奶大汉--ê。莫怪阿月去了后，m̄食m̄困，miau规日，soah会数念。精牲kap人仝款，有感情--lah，bē晓讲niā-niā。阿月老--a，博爱诊断淋巴生瘤，koh医是加拖加艰苦--ê。抱去博爱注射hō͘困。阿月家己知，巧--a tī身躯边iⁿ-iⁿ叫，m̄ hō͘走。

母--a讲，koh饲一只来hō͘巧--a作伴。这个勇--a，军用狗母生--ê，khah孤hng pháiⁿ性癖，会kā pūi。害巧--a bih kah无位m̄敢出--来。M̄知tiâng时，家己一个偷走--出-去。Tī chia tòa chiah久--a，侥幸，m̄知外艰苦--leh，若m̄是真正姑不而衷，bē按呢tō出--去-lah。

秤--a hit日tī市á卖鱼有看--着，讲规身躯thái-ko lōaⁿ-lô，毛落kah一簇一簇，概成着thái-ko皮肤病。巧--a无m̄ tio̍h--lah，规只乌--ê，尾溜一簇白--ê。Iau kah sán-pi-pa。侥幸，koh大pak肚teh beh生。The̍h鱼á hō͘食，好心beh kā抱，soah拍青惊走无--去。巧--a出去作野niau，chēng细汉关tī厝内，m̄ bat出门，beh thài讨有食？！Taⁿ大pak肚teh beh生，iau koh sán-pi-pa，m̄知siū作tī tó位？害我街á路巡几lōa日，mā是无看影。

In宏--a先看--着，去报--伊。秤--a走去认，无m̄ tio̍h--lah。规只好好，倒tī路头，规身躯乌--ê，尾溜一节白--ê。过路人有看--着，讲o͘-to͘-bái冲足紧，bē赴挡。秤--a来学校kā我报，紧走去看，已经无tī hia，扫街路--ê清掉--a，土脚一tah血。过路人讲，hia定定有niau á、狗 á hō͘车kauh--死，拢驶siuⁿ紧--lah。我问秤--a，敢有生--a?伊hàiⁿ头，规只好好，倒tī土脚，无注意kā看pak肚。走去问in宏--a，mā是讲看--起-来规只好好，无去注意。

Tú好巷á内真tiām，有听着niau á kiáⁿ iⁿ-iⁿ háu，kā chhōe，bih tī pùn-sò桶边，tī『菊之乡』边--a ngiauh-ngiauh爬。足细只，规身躯tâm-lok-lok，臭ko͘ⁿ-ko͘ⁿ，phi̍h-phi̍h-chhoah，目睭犹未开，若niau鼠á kiáⁿ。用手巾á kā包--起-来，抱转来厝，拭清气，用电火球kā chhiō hō͘烧lō。可怜，sán-pi-pa，pin-á骨一枝一枝。饲牛奶，suh二嘴，phēⁿ-phēⁿ喘tō m̄ suh。阿母讲是着肺炎，巧--a细只抱--转-来mā是按呢。抱去博爱急诊，已经关--a，明á chài透早才koh抱--去。

半暝起来巡，犹teh喘。透早tō停--去，bē赴救。Tī巾á内底规只好好，规身乌--ê，尾溜一节白--ê。Kap巧--a生作相仝。出世ê身世也仝款。Niau母hō͘车kauh--死，pak肚iau，爬出来路边chhōe老母。路口hia车真雄，定定kauh死niau á、狗á。

勇--a pháiⁿ，害巧--a走出去作野niau，hō͘车tōng--死。狗精牲bat一个啥？怪我家己m̄ tio̍h，抑是骑o-to͘-bái ê人siuⁿ雄？