《陈雷文选》

 | | | 转寄

大树公

作者 陈雷 2009.04.12

咱这个小所在西港，bi tī曾文溪南旁，óa溪á出口ê所在，不时风大水大。北旁有一间将军庵，西旁有一间镇海宫，讨海人迷信，靠in保庇。M̄-kú，日本时代以来，老大人hit辈亲像阮阿公、阿妈，也有人拜大树公，仝款迷信，不过有一个心适ê因缘。

Taⁿ大树公外老--a确实无人真知。阮阿公--a伊，作gín-á ê时bat听阮阿祖讲，日本兵来西港hit年，beh展威风háⁿ西港ê人，用炮pōng大树，规欉pōng一半去。大树着伤流红膏，庄--里ê人惊，讲大树替西港ê人流血，m̄甘心，感恩kā拜，大树公ê名tō是按呢来。结果大树无倒也无死，soah lú发lú旺。Chit-má树oe树叶ām-ām-ām，圆圆一kho͘围，若thí开ê大枝雨伞，比将军庵khah大bô͘。Chhêng-á须hô͘-sà-sà，有ê sôe到土脚，钉入去土--里，大细枝上无2、30枝，有ê比咱人脚腿khah粗。Taⁿ che大树古早hō͘炮pōng着伤，chit-má空嘴拢生好--a，树皮结作kāu-kāu一丸一丸ê瘤，有文旦hiah大粒。Hn̄g-hn̄g看--起-来，概成一个老岁á，khiau-ku gia̍h一枝大枝雨伞。庄--里ê人讲，200岁敢有--a。

阮阿公上盖敬意，ta̍k日ùi厝--里骑o͘-to͘-bái，去hia清扫。有时eng-ia大，用水châng，kā大树洗嘴须、洗身躯。阮阿妈讲，chēng少年m̄-bat làng工，连娶某hit日mā去。树á脚不时一大堆人，lim茶行棋、开讲消凉，闹热chhih-chhih，比庙á khah ka-ia̍h。

这日阮阿公骑o͘-to͘-bái beh出门，目头结结，面忧忧。阮阿妈kā叫：「旺--a，你人若无看活，一日无去无要紧，…水清--a mā会扫。」Hit chām阮阿公67，身体有无tú好，心脏无勇，应讲：「惜--a，我梦去大树公hō͘水淹。」阿妈讲：「咱chia海脚，作大风会淹水。」阿公应：「To也天清，无风也无雨。」连续三工，梦去大树hō͘水淹，lú淹lú koân，规欉淹kah无看--去。

Lú想lú bē放心，去镇海宫poa̍h杯抽一枝签，写讲：「尽心尽意尽感恩，救草救木救家己。」想想--leh，去请教朝木老师，火炉伯--a in后生：「朝木--a，咱chia无风台无地动，thài会大树hō͘水淹bē退？」朝木--a应：「旺伯--a，会--lah。Koh 30冬、50冬，咱chia tō会淹水bē退。」阮阿公惊一tiô:「朝木--a，你m̄通创治我老人。Koh 30冬、50冬，我早tō m̄知去到tó位去--a。」「旺伯--a，我kap你讲真--ê，世界lú来lú热，南极、北极ê冰溶了，海水涨koân，海脚tō淹水bē退。」

阮阿公转来厝，ām-kún kiu-kiu，面忧忧，念：「30冬、50冬，大树无彩工。」阿妈问：「Taⁿ你是teh念啥？Che大树100冬、200冬，照顾咱西港，怎样30冬、50冬无彩工？」阮阿公kā朝木老师ê话学hō͘伊听，阿妈问：「Ta°咱tio̍h紧来kā救。」

隔转日去大树脚kap朋友参详。Hit个赤牛伯，khah早tī市á thâi牛，kā笑：「旺--a，朝木--a少年人创治咱老岁á，讲讲he无--ê。」另外hit个茂松，薰suh大，he-ku hī-hū叫，讲话tō khuh-khuh嗽，也讲：「30冬、50冬，咱to m̄知走去到tó位--a，烦恼啥？」Tō是火炉伯上有岁，普通时讲话人会尊重。「Ah若是大树淹水，咱tō kā sóa khah内面去。」再生--a in tòa tī东旁khah内底hit头，手kā giú--leh，hoah:「火炉--a，你mā讲khah有谱--ê。Che大树若大庙，四围大thiāu 2、30枝，beh按怎sóa?！」「Ah若无法度sóa，咱tō用围--ê。」大南á少年ê时bat tī水利局食头路，讲是bat水利。「咱起堤á来kā围。」大家kā笑：「起堤á围大海！南á，che堤á围外阔、外koân?你mā teh讲he gín-á话。」一句来一句去，lim茶膨风，规晡无一个头尾。

阮阿公koh去请教朝木老师，面忧忧，ām-kún kiu-kiu，问伊：「朝木--a，这个大树淹水，bē sóa--得，也bē围--得，taⁿ beh怎样？」朝木--a应：「旺伯--a，che kan-na一步。」「你紧讲。」「减碳--lah。」「啥物叫作减碳？」伊讲tō是地球碳气siuⁿ chē，才会lú来lú热，海水涨koân。阮阿公问：「Ah che碳气ùi tó来？」「汽车、工厂烧油、烧炭来--ê。」阿公想想--leh，讲：「若是按呢，m̄ khah简单。」

转去kā朋友讲：「简单--lah。」朋友问：「啥物步？」阮阿公讲：「M̄免sóa树，m̄免围海。咱mài坐车，mài骑o͘-to͘-bái tō会使。」kā朝木老师ê道里讲hō͘大家听。火炉伯讲：「若是按呢简单。我m̄-bat teh骑o͘-to͘-bái。」大南á讲：「Hioh--lah，我mā罕得teh坐车，拢骑铁马。」

自按呢大家拢用行--ê，抑是骑脚踏车。Kan-na hit个赤牛，khah早tī市á thâi牛pūn-tōaⁿ，讲伊脚痛有关节炎bē行，无骑o͘-to͘-bái bē使。成个月过--去，大家lú行lú hèng-chhih。Hit个茂松--a，3冬前bat断细条脑筋，kā人展：「Kā恁讲恁m̄信。Khah早我不时秘结，chit-má ta̍k日行路，放屎规条--ê，通去到菜市á去。」大南á大kho͘有糖尿病，也讲：「实在有好，我糖尿减几lōa度。」一人讲一嘴，有ê好困眠，有ê好放尿，lú讲lú好用，无想着减碳koh会顾身体。

koh拜托体育老师春东来教体操练工夫。这阵老岁á ta̍k日大树脚作体操，练喘khùi，加食菜，减食臊，叫作大树功。Hit个赤牛kā in笑：「无彩工--lah，练心愿--ê niâ!」热--人过了，大家功夫ná练路ná行，pak肚一直消--去。赤牛in查某孙花影18岁99公斤，听着大树功会减肥，爱súi也来参加。

一日tī路--里遇着一个老岁á，老khok-khok，嘴须hô͘-sà-sà，khiau-ku gia̍h一枝伞。无代无志雄雄poa̍h倒tī土脚，紧óa去看，二枝脚断一大koe̍h，血kòng-kòng流，…。惊一tiô精神过--来，kā阮阿妈讲：「Ta°害--a!」青狂tō出门，大步细步赶来到位，一大阵人hì-hè叫，4、50人密密围一个kho͘-á，kā大树包围。Gia̍h头一kā看，惊一tiô!规欉大树chhò kah光光，chhun一kho͘心，若牛车lián hiah粗，无半枝oe，无半枝叶，连hia ê chhêng-á根钉tī土脚，2、30枝chhun无半枝。阮阿公hoah一声「ai-io-ôe!」，心脏bē堪得痛，目屎bē赴通流，tī hia现倒倒昏昏--去。

结果tō是hit tah着路，造路--ê透早天母未光来偷chhò树，无人知影。水清--a早起去将军庵看--着，叫人来已经bē赴--a，chhò kah chhun一kho͘心。大家ùi早起围到下晡，kā大树包围，无人beh走，m̄ hō͘ in chhò。电视台听着围大树，派人来hip相。He记者中国意识，头脑浸尿，听讲大树hō͘日本á pōng炮虐待，作文章o-ló讲，大树光光一kho͘心，看--起-来「象徵中华魂」，是西港抗日ê民族英雄，写写一大篇。尾á真chē人抗议，才改路。好得佳哉留一kho͘大树心，斩头斩手chhun一个身。

阿公过身了，换阮阿妈去照顾清扫。这日招我：「顺--a，今á日kap我来去看大树。」行beh半点外钟去到位，四kho͘围种真chē花，整理kah清气清气。Taⁿ he大树无oe也无叶，也tō无人tī hia lim茶开讲。单独一kho͘树á心chhāi tī hia，牛车lián hiah粗。古早hō͘日本人pōng炮着伤ê所在，百外冬来，空嘴已经生好--a，树皮生kāu-kāu，结作一大丸一大丸ê瘤，若文旦hiah大粒。看--起-来bē输讲gín-á故内底ê大bú汉，khiau-ku khi一旁。我问阿妈：「阿公上盖m̄甘大树？」伊chhōa我去大树头坐，讲：「恁阿公少年ê时，大树救--伊。」伸手去摸he粗pê-pê ê树皮：「Chia，你看。」斟酌àⁿ落去看，一tah金金，tō是一粒枪子，tiâu tī树皮内底，挽bē出--来。真久以前，hit年228，中国兵á来庄--里四界乱tōaⁿ枪掠人。阮阿公peh起lih大树顶bih，m̄敢落--来。Hit暗看着一个老阿伯，嘴须hô͘-sà-sà，khiau-ku gia̍h一枝伞，kā伊讲：「作你tòa chia bih，m̄免烦恼。In chhōe你bē着。」我摸hit粒枪子，咬tī树á内底，ân-tòng-tòng ngiauh bē出--来。问阿妈：「大树bat hō͘人tōaⁿ枪？」阮阿妈tìm头，今á日刁治工报我来看。