《陈雷文选》

 | | | 转寄

最后ê玫瑰

作者 陈雷 2009.04.05

有一摆伊爱真深，欠憾也真久，若精彩ê小说内底teh写hit款。了后有一chām，bē输pak肚内生一粒胆结石，无去手术the̍h掉，不时心糟糟，giâ--起-来ui-ui-á痛。

伊知影，概成che早tō注定。Hit阵伊读台南女中，伊读台南一中，ta̍k日早起去学校ê时，tī巷á口会相遇。M̄知tiâng时开始，看着伊，心肝tō会跳。M̄知tiâng时开始，阿母若讲着伊，「这个gín-á古意koh gâu读册」，面tō烧hut-hut发面hông，tèⁿ无听--着。

Taⁿ今á日teh beh毕业--a，伊读台大外文系，伊读土木工程系。同学mā是拢teh讲，花枝--a kap英俊早tō注定--a，che，伊听了真惯势，mā真自然koh当然。

所以英俊招伊去「流星」食冰，伊已经半知，ioh tī心内。M̄-kú英俊一碗冰直直lā，冰溶一半--a，hit句话犹讲bē出嘴。所以花枝bē等--得，先讲：「后礼拜beh毕业--a，...」冰拢溶了--a，伊才应：「我...我...beh结婚--a。」这个美丽王子，生作若像美国ê电影名星James Dean，等chiah chē冬--a，chit-má这句才讲出嘴！亲像小说内底写--ê，ùi chit-má起，二个永远快乐，beh作伙圆满过一世人。

伊伸手摸英俊ê手细声问：「Tiâng时？...Tiâng时beh结婚？」Soah换伊一句话讲bē好势。「后礼拜。」「后礼拜？！...Chiah-ni̍h迫，...我...我拢犹未kā厝--里通知。」「我足失礼。无khah早kā你讲。」伊头chhih--落，koh讲一摆：「我足失礼。」规个面乌阴忧愁，m̄是出日欢喜，o͘h，成实teh chhē m̄-tio̍h。「足失礼？...失礼啥？」花枝问。「我chit-má先kā你通知。」「先kā我通知？」奇怪--a，看伊ê面，雄雄才了解，伊先kā伊通知，因为后礼拜tō beh kap别人结婚！身躯soah畏寒ka-冷-sún，是m̄是店--里冷气放siuⁿ强？「失礼--lah，花枝。」伊gīm伊ê手，beh koh说明。花枝--a手kiu--转-来，khiā--起-来：「M̄免koh讲。多谢你先kā我通知。」面对面，目tú目：「你teh beh kā我bē记，我khah久to会记--得-你。」oa̍t一个头，tú好踏出店门口，一阵风烧hut-hut，心头冷ki-ki，目屎已经liàn--出-来，chhun--ê拢m̄免知。

半行半走来到土木系。大进--a看着伊，紧óa--来。花枝--a一手kā giú--leh：「来，你chhōa我来去食冰。」拖--leh tō行。这个大进--a，jiok花枝--a四冬--a，人é-é，挂一副目镜kāu-kāu，花枝--a无啥beh chhap--伊，同学叫伊四脚水鸡候补--ê。Taⁿ今á日无出日teh落红雨，花枝--a giú伊去食冰！欢喜一下，chông作前行。来到放冷气ê｢流星」，英俊已经无tī hia。大进--a问：「食啥物冰？」犹未坐好势，花枝应：「你毕业了beh创啥？」微微笑--一-下，射一枝目箭，准准射入去大进ê胸坎窟。大进--a心肝中着箭，话讲bē出--来，一个嘴开hāⁿ-hāⁿ：「我...我...公司斗脚手。」花枝--a知影，大进--a老pē大间建筑公司，等伊去作总经理。「你ê查某朋友啥物名？」花枝--a使一个目，又koh射一枝目箭，mā是koh准准射着大进--a心肝头。可怜大进--a，食半碗冰中二枝箭，ná会堪--得。「我...我...无朋友，...我...我eng-暗请你看电影...」最后才勇敢讲--出-来。Hit暗去新生看「巨人」。花枝--a爱看James Dean，大进--a爱看Elizabeth Tayler。

一礼拜后宣布订婚，毕业典礼hit日，花枝一脚钻石手指土豆仁hiah大粒，展hō͘同学看。外文系ê同学拢hoah：「I can’t believe it！」有ê欣羡，有ê替伊欢喜流目屎，有ê替伊可惜thó͘大khùi，拢真意外。Mā有人替英俊不平，êng话四界iāⁿ，讲花枝爱钱khah赢爱情，四脚水鸡变王子。这年毕业典礼，外文系kap土木系拢真闹热。

花枝嫁钱了后，心内ê大厝空空，ta̍k日看大进，ta̍k日想英俊，这个无情变心ê伊。Lú想lú m̄愿。Chhiah-ia̍h koh chhì-chha̍k，ak-chak兼郁卒，出去siok-phin买物件，开钱解心闷。百货公司买súi衫、买han-to-ba-khuh。心情小bái tō小买，大bái tō大买。概成买khah-chē物，心厝hit位空落ê所在beh通khǹg hō͘ tīⁿ。M̄-kú这个心厝ê空位真奇怪，tún lú chē物，soah空lú大位。

不过空虚mā是会结籽，隔冬生一个查某kiáⁿ，kap大进仝款，仝一个模印ê水鸡面，欠一副目镜。亲chiâⁿ朋友pháiⁿ势嫌bái，拢讲古锥成老pē。花枝心内知影，想着hit当时，若是来嫁英俊王子，生一个查某婴súi kah若公主。结局心情越 lú沈落，忧愁m̄爱讲话。医生讲是欢喜了过头，产后悲忧ê症头。

过--来悲忧越lú gâu结籽，二冬生三个，拢是查某--ê。侥幸，一个比一个lú-khah成老pē。三个查某kiáⁿ，未去学校拢挂目镜，目镜仁kāu-kāu tah一iân雾。花枝--a chiù-chōa，m̄敢koh再生。

过--来饲kiáⁿ、教kiáⁿ无êng，无时间去想东想西，心情khah chhe̍h--落-来。这个意外ê婚姻，亲像临时发生tī路口ê车祸，后悔无khah choa̍h。时间久了，to也会惯势--去。这个婚姻，无去kā计较，概成是teh食头路，尽一份作人ê某、作人老母ê责任义务niā-niā。渐渐，少年时ê热情变作âng-á册内底ê gín-á故事，差一sut á，差一sut á tō拢总准soah bē记--得。

M̄-kú咱人有时tō是这个差一sut á teh作怪。Hit年台大土木系同窗会，毕业了30冬第一回。Hit个âng-á册内底ê缘投王子，bē输美国电影名星William Holton，穿西装结ne-khu-tái，óa来介绍：「你敢犹会认--得-我？」会认--得-你？我定着mā会认--得。「你，...你是...？」花枝tèⁿ bē认--得。「英俊，我tō是英俊--lah。」Taⁿ害--a，hit二蕾目睭少年ê时hō͘伊bē食bē困，又koh掠伊ê身魂m̄放。

「这个tō是我ê牵手淑惠。」英俊kā in介绍。「你tō是花枝o͘h？...阮英俊定定teh讲--你。」淑惠大声hoah，手kā giú--leh，bē输30冬无见--过ê姊妹。「恁是按怎熟sāi--ê?」花枝想beh问，无张持hīⁿ空内ki-ki-叫，有听人teh hoah：「你已经kā我通知--a，chhun--ê我拢m̄免知。」话挂nōa吞--落-去，也牵淑惠ê手，讲：「英俊kap阮大进上盖好朋友。」

大进嘴--里一枝si-gah (cigar)，手--里一杯XO，讲：「花枝kap我有三个查某kiáⁿ，拢大学毕业结婚--a。」The̍h相片出来hō͘英俊看。三个排一排，挂目镜，kap大进仝一个模印--出-来-ê。又koh刁治故大声kā英俊、淑惠讲：「阮公司chit-má足无êng，厝起kah bē赴通hō͘--人。」因为伊有听同学teh风声，最近英俊生理失败，公司beh倒。英俊tiām-tiām，淑惠也tiām-tiām，客气一直tìm头。这日，30冬后，伊tō是完全ê胜利者。

所以同窗会了后，花枝又koh去百货公司siok-phin，买súi衫、买han-to͘-ba-khuh。连续一礼拜，买bē够khùi。尾--a chheh心，去美娜珠宝店，买一粒蓝宝石，土豆仁hiah大粒，心情才khah安定落--来。

Liâm-mi毕业31年，又koh同窗会。这日，花枝--a头毛电té-té，白衫tha̍h乌裙，大学时代ê打扮。看着英俊，家己一个，又koh心头phok-phok跳，面á发hông，问伊：「淑惠thài无来？」才知影in某淑惠半冬前车祸过身去--a。

这时乐队奏「热--人最后ê玫瑰」，以前有人kā伊改作oa-lu-chuh，in大学时代上盖时行，花枝上盖爱跳。无张持伊来牵手，无声说伊来óa身，双脚滑溜浮--起-来，bē输水--里ê鱼teh siû，热--人最后ê玫瑰芳贡贡，人生最后ê玫瑰醉醉醉。

生日hit日决心，kā大进讲，伊beh离婚。大进--a惊一tiô，叫是teh老蕃颠，老人gōng呆症。叫三个仝模á印--ê查某kiáⁿ来斗讲。花枝讲，伊beh kap英俊结婚。丽娟、丽惠、丽玉三个查某kiáⁿ骂老母：「你是teh老蕃颠？！食到七老八老--a､才来teh离婚tòe人走。M̄惊笑破人ê嘴！」骂伊老三八。花枝--a想，人生一摆niā-niā，我以前错误，已经30冬--a，chit-má生命ê热--人teh beh过--去，我bē-tàng koh再等候，我是热--人上sòa尾ê玫瑰。应讲：「笑作in去笑。我无teh蕃颠，也无teh三八。」三个查某kiáⁿ受气：「你m̄惊人笑，ah阮--leh？！」花枝--a坚持，决心离婚。54岁hit年，离开大进。出门hit日，一领衫，一领裙，规橱á súi衫、han-to͘-ba-khuh拢无the̍h，双手空空行出--去。

隔转年同窗会，大进--a无去。后--来同窗--ê teh kā讲，花枝--a牛á裤穿e̍h-e̍h，头毛染红红，kap英俊--a oa-lu-chuh跳规暝bē siān。乐队一直奏「热--人最后ê玫瑰」。