《陈雷文选》

 | | | 转寄

圣徒保罗

作者 陈雷 2009.03.29

「万亿集团」其实资产khah无一亿，有钱人号名爱膨风ê关系。简董--ê in某西丝，好额人pak肚肥肥，面á油油，嘴唇不时胭脂红ki-ki，厝--里接电话，拢先应「阮chia万亿」。这个名叫惯势--a，出门入门自然是万亿ê扮势。

这日tī高岛屋遇着彩娥，giú--leh thi-thi tha̍p-tha̍p讲bē soah。Taⁿ这个彩娥，以前杨董--ê秘书，chit-má杨董ê某，少年iû-ia̍h，优美thiau-lāng，m̄-kú kan-na有百亿ê扮势。In翁杨火狮，人叫伊火狮董，tō是「全国」ê头家。Thái有影全国，拢tī台北起贩厝niâ，mā是有钱人爱膨风ê关系。

这个简西丝thi-thi tha̍p-tha̍p，规厝内pùn-sò车bē了，刁工一脚手指金siak-siak tòa伊面头前iāⁿ过来iāⁿ过去。彩娥手kā giú óa来chîn，一粒蓝宝石，土豆仁hiah大粒。蓝koh反绿，光彩反射，若像天使ê目屎珠，天顶尾poa̍h--落-来-ê｡看kah目睭强beh闪--着。「Uâ!这粒外chē?」西丝指头á thí开，五枝té-té若煎好ê腌肠。「足俗--lah！才30万niâ，…你若爱tio̍h赶紧，我chhōa你来去看。」讲hit间丽娜珠宝行，买kah头家有熟似。Koh讲：「蓝宝上盖好，避邪保身。我kā你讲，chit-má珠á､玉á无人爱，蓝宝上时行。」彩娥ām-kún 一kōaⁿ珠，手--里一脚玉，hō͘伊讲kah pháiⁿ势，紧应：「西丝姊，珠宝这款物件，阮是chhìn-chhái买，犹是你khah内行。」

转来厝--里，thoah-á底chhōe phoa̍h链出--来，顶面一粒蓝宝，细细粒绿豆phí，旧年去泰国chhit-thô买--ê｡Kā火狮吵：「我kā你讲，蓝宝上盖好，避邪保身。Chit-má珠á､玉á无人teh买--a，蓝宝上时行。」火狮讲：「若是蓝宝，巴西上chē，súi koh俗。」

所以参加月底巴西旅行团，去巴西观光买蓝宝。一路辛辛苦苦，chia停hia停，che看he看，一位赶一位，若像teh赶鸭bî á。最后来到巴西第一大都市圣保罗。导游陈先生介绍这个城市，讲是纪念圣徒保罗起--ê，所以号伊ê名。Koh讲，恁飞机顶若koân-koân看，规个城市一身基督ê大像，双手伸tn̂g-tn̂g，永远teh保庇这个圣徒保罗ê城市。

Hit日下晡包一台游览ba-suh，市内游览，来到圣保罗教堂观光。陈先生介绍，che教堂mā是纪念圣徒保罗起--ê｡火狮kap彩娥tī教堂头前khiā óa-óa hip相，通the̍h转来hō͘人看。教堂内se̍h一liàn，khah无20分钟，大家kā陈先生吵，beh khah早去市内siok-phin，足chē物件犹未买，惊时间无够。规阵赶上车，来到就近闹热ê市区，大间店、细间店规街路光iàⁿ-iàⁿ，súi当当ta̍k项有，游客一大堆。陈先生kā大家讲、tī chia自由siok-phin，m̄通走hn̄g--去。Koh吩咐讲，街á真chē gin-á乞食，会来ko-ko--tîⁿ，大家ài细字，上好拢mài chhap--in。大家落车--来，成实一大阵gín-á若ho͘-sîn作一下chhîⁿ óa--来。有ê teh卖物，有ê beh分钱，脚来手来，闪bē lī｡彩娥kā火狮giú--leh想beh走，hō͘三个查甫gín-á围--leh。Hit个大汉--ê 12、3岁，乌目睭大大蕾，thǹg phak-theh，穿一领内裤，另外二个成10岁á，thai-ko流phīⁿ-kô｡三个chia giú hia giú，七tîⁿ八tîⁿ，m̄知teh讲啥。Tī hia tîⁿ一晡，陈先生óa来斗châm，才好佳哉走有lī｡赶紧chông入去店内，kā看，规间光iāⁿ-iāⁿ，súi当当。橱á内m̄是金tō是银，也有真珠，也有宝石，红--ê､绿--ê､蓝--ê满满是。穿西装、结ne-khu-tái ê店员óa来「Go͘d afterno͘n」招呼，tìm头行礼，介绍头到尾。陈先生替伊翻译，chia ê宝石拢是咱巴西出产--ê，世界出名，súi koh俗，这个月圣保罗ê生日，一律八折。彩娥看he蓝宝石ê手指、phoa̍h链、hīⁿ钩，大粒细粒排规排，蓝koh反绿，光彩反射，bē输天使ê目屎，天顶尾poa̍h--落-来-ê｡Hoah一声「火狮，你看！」，hē落去七kéng八kéng，一晡kéng一脚白金手指，一粒蓝宝比土豆仁khah大粒。算算--leh，折台币45万。Kā in翁讲：「火狮，che巴西ê蓝宝石súi koh俗。」欢欢喜喜买--落-来，笑bi-bi家己念：「Taⁿ比你西丝ê khah大粒。」算钱ê时，才注意--着，火狮ê表-á thái会无--去！？赶紧四界chhōe，lak袋á､皮包á内底拢抄--出-来，青狂直直hiu:「火狮--a､你ê lō͘-lê--leh！你ê lō͘-lê走去tó?！…」大家听伊hiu，围来看，一人一句，二人十句，顾teh摸家己ê表á､钱袋á，hi-hi hōa-hōa，闹热chhih-chhah。头家khiā hia看，无彩一车ê人客tī店内，顾teh讲话，无顾买物。气tī心内，lún tī pak内，知影又koh是街á路hia ê gín-á乞食抢人客，闹kah生理bē作--得，骂tī嘴内：「Chia ê死gín-á，又koh欠人修理！」

Tō是hit三个查甫gín-á，落车ê时七tîⁿ八tîⁿ，hit个大汉--ê Carlos，剪钮á专门，m̄知tiâng时，一粒lō͘-lê-á剪剪--去。Carlos作顶前，二个细汉--ê作后壁，三个ná行ná走，chông转来圣徒保罗ê教堂。坐tòa石gîm-á，hi-hi ha-ha，koh sńg koh笑。Hit个大汉ê Carlos，表á jîm--出-来，khǹg tī手--里看，日头脚金sih-sih，一粒金壳ê lô͘-lê，顶面镶六粒钻石phí｡另外hit二个，Jose kap Pedro，相争抢leh看。「敢是真正金--ê?」「定着mā是，恁摸tō知。」「外chē peso？」「外chē peso?」Carlos ná讲，ùi in手--里kā表á the̍h--转-来。「Kā恁讲恁也m̄信。旧年一粒像che，Mario hō͘我2000。」「2000 peso！--ôa!」二个细汉--ê目睭chia̍h大kòng:「2000 peso！会tàng买一粒脚球？」「新ê o͘-lin-phi-khuh ê脚球！」「白--ê!牵乌线kap红线！」Carlos bi-bi á笑，ná tìm头：「O͘-lin-phi-khuh ê脚球！全San-phau-lo͘h(圣保罗)kan-na咱有。Angelina ta̍k日来kap咱踢脚球…」Carlos上爱Angelina。

Hit个绅士穿西装，kōaⁿ一脚kha-bang ùi in头前行--过，头hiàⁿ-hiàⁿ，概成无看着in三个，koh概成惊in来抢，一koe̍h薰kha-chhng cho̍h tī土脚，赶紧大步行。二个细汉--ê紧jiok--去，薰kha-chhng ni--起-来，一人一嘴照轮suh。三个gín-á欢喜坐tī石gîm-á，稳心等Mario来。一时圣保罗都市ê西照日红ki-ki，照着教堂ê大门kap石壁，亲像teh火烧厝。Liam-mi天暗--去，火hoa--去，一个一个观光ê人客也无--去。

Uàⁿ-òaⁿ等到暗暝，Mario无来。三个kiu tòa教堂边，bih tī壁脚路灯照bē着ê所在。因为in有经验，知影暗时hia khah安全，khah bē hō͘人看--着。Carlos讲：「我先来去看Maria。」Beh去kā伊报好消息。表á the̍h hō͘ Jose，吩咐讲：「收hō͘好，恁二个tòa chia等Mario。我liâm-mi转--来。」kho͘ sî-á，家己一个ná走ná跳，亲像teh踢脚球，sut--一-下走无--去。

Maria减Carlos一岁，ta̍k暗Carlos拢来看--伊。因为3冬前，in老母Maria beh死ê时，有kā伊交代：「Carlos，你khah大汉，tio̍h照顾Maria。」3冬概成足久，伊kan-na会记--得，老母足súi，乌头鬃，大目睭。Maria成in老母。Carlos看着Maria，tō会想着in老母。代先Maria kap Carlos作伙，chit-má khah大汉--a，换去kap Angelina作伙。Angelina比伊大二岁，kap Maria上盖相好，tī离教堂无外hn̄g hia，hit个大车路ê桥脚。

Hit三个查甫人来到位ê时，脚步无声。In已经困kah眠眠，二个gín-á kiu作一伙，bih tī大间圣保罗教堂边ê壁脚，路灯照bē着ê所在。因为Carlos khah大汉有kā in教，暗时hia khah安全，人看bē着。所以这三ê查甫人bi óa--来ê时，in也无听着脚步声，mā无听着tōaⁿ枪ê声，拢是用细枝机关枪，pi-pi pia̍k-pia̍k，5、6声tō soah--去。Ji-puh驶走，koh去巡别条街á路。这角势日时闹热作观光客ê生理，暗时巡壁脚路灯照bē着ê所在。

Carlos hn̄g-hn̄g看着ji-puh驶走--过，bi he路边乌暗ê所在紧张细字行。转来到教堂，tiām chiuh-chiuh，四界阔long-long无半个人。二个gín-á倒tī壁角lám--leh，kiu作一伙，bē输困--去，tī圣保罗教堂边--a ê壁角，路灯照无着ê所在。Liâu-liâu-á爬óa--去，摸伊ê身躯，一chhok tâm lok-lok ê血，伸手入去jîm伊ê裤袋á，jîm着表á，赶紧peh--起-来tō走，青狂走，…拚死无顾看，一直走，一直走，…。

隔转日旅行团坐飞机离开圣保罗。Tī飞机顶有看--着，淡薄云雾遮--leh，bē输基督ê大像双手thí开，teh祝福这个圣徒保罗ê都市。Mā bē输teh kā旅客讲，欢迎koh再来chhit-thô｡彩娥坐tī飞机内，看手--里蓝宝ê手指，金金sih sih，lú看lú kah意，kā in翁讲：「大狮，咱这chōa chhit-thô了有价值--lah。」规路欢喜困bē去，转来到台北。

无几工tī菜市á碰着添花，以前in翁作土水，chit-má teh作董事。「你巴西转--来-a nih？Ah有好chhit-thô--无？」彩娥应：「实在好，我kā你讲，he物件俗koh súi｡」一枝手伸--出-来，五枝指头á，一脚手指，一粒蓝宝，金金sih-sih，比土豆仁khah大粒。「你看，这粒才45万。」添花看kah目睭无nih，强beh闪--着，嘴nōa直直吞。「我kā你讲，蓝宝上盖好，避邪koh保身。Chit-má珠á､玉á无人beh爱，蓝宝上时行。」添花直直tìm头，表示十分赞成。「你若去hia siok-phin，ài khah细字。阮火狮，一粒lo͘-lē-á phàng-phàng--去！」「Ah是按怎？」「He街á路，猴死gín-á一大堆，chhîⁿ óa--来，一个giú，二个giú，sut--一-下，剪钮á tō kā你剪--去！」「Ah警察拢无teh赶--nih？」「无--lah，拢是无pē无母--ê，困tī街路一大堆，beh赶去tó位？」

添花--a去kā简西丝tâu:「人彩娥，巴西转--来，一粒蓝宝才45万，比土豆仁khah大粒。」西丝听讲巴西ê蓝宝比伊ê khah大粒，心内无欢喜。一手伸--出-来，五枝指头á té-té，mā是一脚手指金金，一粒钻石sih-sih，比土豆仁khah大粒，应讲：「添花，你m̄知，我kā你讲，chit-má蓝宝无人爱。Che苏联钻上盖好，减肥koh保庇长岁寿。」