《陈雷文选》

 | | | 转寄

演讲家

作者 陈雷 2009.03.22

民族路教会其实m̄是伊ê建筑本身出名，已经百外冬--a，日本人进前tō有。出名--ê是hit个新来ê陈牧师，人肥肥、嘴阔阔、phīⁿ狮狮，真gâu讲道理ê关系。台á顶讲着作人ê道理、是非ê教示，he声hoah起hoah落，牵长牵té，bē输teh唱o͘-phe-lah ; he人比脚比手、会háu会笑，bē输teh搬大戏。人人感动，若像伊tō是高尚ê圣者，道德ê天使，khiā tī众人面前，头壳顶荣光圆满。莫怪大家o-ló伊天才演讲家，咱台湾ê Ma-tin Lu-soh Khín。

特别是郑长老悲剧性ê事件以后，台á顶大声hoah-hiu:「Tōaⁿ枪抢劫ê人有罪--lah！责罚是上帝ê旨意。一眼赔一眼！一手赔一手！」叫大家替长老祈祷，早早恢复。Khah紧掠着tōaⁿ枪ê人。

专工来病院看长老，表示同情兼愤慨。因为伊知影，郑长老tī教会人人尊敬，真有地位，献金mā真chē。伊kā长老讲：「Tōaⁿ枪抢劫ê人有罪lah！责罚tō示上帝ê旨意。一眼赔一眼！一手赔一手！」koh讲，伊叫大家祈祷，求长老早早恢复，khah紧掠着贼。长老tiām-tiām无应。伊问长老：「这个恶人强盗，伊ê面你认有真--无？」长老应：「我认有真。」「你敢bat伊是啥人？」「我m̄-bat看过伊，m̄-bat--伊。」牧师kā安慰：「无要紧，贼面记hō͘清楚。我替你祈祷，警察紧紧掠着贼，你来作证tō是。」长老感谢牧师，m̄-kú有一句话khǹg tī心内无讲--出-来。

这个少年剃一粒火箭头，头毛浆ám，一簇一簇chhāi直直，亲像火箭teh beh发射。一旁hīⁿ-á挂3、4个hīⁿ钩，pīⁿ空chǹg手指，ām-kún khong 5、6条phoa̍h链，khin-khin khiang-khiang，双脚khòe tī桌顶，chē tī伊面前。讲话蕃蕃颠颠，一个头直直hàiⁿ，若m̄是食「摇头」tō是lim酒醉。厝--里现金拢hō͘--伊-a，犹m̄走。手--里一枝乌枪，iāⁿ来iāⁿ去，枪管对对tú tī长老ê面前，ná讲ná比：「这枝枪…我若按呢kā pōng--落-去，…你tō按呢死，…」话讲未soah，枪tō pōng--落-去，piàng-piàng两声，无nih目，无回头，peh--起-来，作伊oat入去客厅。家己一个，电视choān开，橱á顶半干XO the̍h来lim，M̄知过外久，半干XO lim了，才koh倒转来房间看。长老phak tī土脚，一堆血。少年--ê骂：「Ah你tī chia犹m̄死！」长老目睭thí开，chhun一嘴khùi，beh死beh死，kā伊求：「请你kā我救，…」少年--ê受气：「干！有够衰！…老岁á也pōng bē死，…」koh khiāu脚坐--落-来，一枝刀á póe--出-来，kā长老展：「我这支刀…thâi足chē人…割--一-下tō死！…干！犹是用刀á khah紧…」Tō beh koh kā tuh。长老koh kā求：「拜托--你，…请你叫救护车来救--我，…」少年--ê起爱笑：「你看我是tòng-gōng--ê？！我kā你救，你通叫警察来掠--我。」长老讲：「你救我ê命，我kā你保证，绝对bē报警察，绝对无去作证认你。…」「你保证？…你teh beh 死--a，chhú这枝嘴保啥物证？！…」Hī-hā笑，酒kap｢摇头」拢teh行气，一枝刀tī长老面前比：「今á日算你好狗运，注你免死，…恁pē救你一命，…你保证？…干！你保证一kho͘ siâu，…」成实电话gia̍h--起-来tō khà，长老一时头壳乌暗hîn，m̄知人去--a。

精神--来，人倒tī病院，m̄知经过外久--a。In某tī眠床边，看伊目睭thí金，轻声kā叫：「你精神--a？」伊问：「我tī tó位？」「Tī病院。医生讲无要紧--a，」Tō是已经手术了，二粒枪chí拢ó͘--出-来-a。雄雄胸坎痛，才蒙蒙á会记--得，tī厝--里hō͘人pōng枪，teh beh死--去。问in某：「Hit个贼…」「免烦恼，警察teh chhōe。」一时起嗽，想beh翻身，soah翻bē tín动，概成双脚无tī hia。问in某：「月--a，我ê脚--leh？」被掀起来看，双脚好好tī hia，thái m̄听话bē tín动？In某liàn目屎：「医生讲，枪chí tōaⁿ着腰骨，伤着神经，…」才知影，神经pōng pháiⁿ--去，双脚麻痹bē tín动。

教会会友听着长老枪伤半身麻痹，一世人坐轮椅，人人痛心。陈牧师又koh台á顶大声愤慨：「Tōaⁿ枪抢劫ê人有罪--lah，责罚是上帝ê旨意。一眼赔一眼！双脚赔双脚！…」Chhōa大家祈祷，求上帝帮赞，赶紧通掠着贼盗。

明雄今年23，虽然食药á、偷抢拢会，gia̍h枪tōaⁿ人犹是第一回。注衰tōaⁿ二枪无死，惊kah m̄敢出门。等酒kap药醒--来，听着牧师kap牧师娘讲，长老hō͘枪pōng一下半身麻痹，一世人khioh-ka̍k坐轮椅，心内后悔kah惊惶。偷偷á kā in母--a讲，长老tō是伊tōaⁿ枪--ê。

牧师娘偷偷á kā牧师讲。牧师惊一tiô，tāⁿ m̄-tio̍h去--a，伊拢teh hoah: Tōaⁿ枪ê人有罪--lah！责罚tō是上帝ê旨意，…。紧叫in后生来问：「长老敢会认得你？」「伊bē认得我是啥人。」牧师讲：「按呢好，你chit-má拢tiām-tiām，一声to m̄通讲出去hō͘人知。」叫伊bih tòa厝内，拢m̄通出门。

隔转日作礼拜，台á顶换一枝嘴，hoah:「宽容原谅ê人有福--lah！--人若kā你siàn正旁ê嘴phóe，你tio̍h oa̍t倒旁ê嘴phóe koh hō͘伊siàn，…」大声细声，牵长牵té，若唱o͘-phe-lah;比脚比手，会háu会笑，若搬大戏…。会友听了又koh感心，感谢牧师，替长老祈祷，求上帝原谅tōaⁿ枪抢劫ê人。

专工koh来看长老，kā伊讲：「宽容原谅ê人有福--a!圣经有讲，人若siàn你正旁ê嘴phóe，你tio̍h oa̍t倒旁ê嘴phóe hō͘伊siàn。…」长老想想--leh，讲：「牧师，我已经原谅--伊-a。」才kā hit日贼á tōaⁿ枪抢劫ê经过讲hō͘牧师知。「我kā伊讲，你若叫救护车来救--我，我bē报警察，也无beh作证。」牧师赶紧tìm头赞成：「伊有叫救护车救--你，你才无死。…伊救你一命。」m̄-kú犹bē放心，因为伊想讲，长老是生命危险ê时，讲hia ê话来骗hit个贼，通救家己ê命。

经过几礼拜，警察问东问西，原在掠无贼。牧师才放心，知影长老讲hia ê话m̄是teh骗hit个贼。Hit日，长老第一回坐轮椅转来教会作礼拜，牧师欢迎--伊，tī台á顶教示作人ê道理，大家感动。礼拜soah，长老感谢牧师，o-ló--伊：「牧师，你实在是天才演讲家，bē输美国ê Ma-tin Lu-soh Khín。」牧师伸手来替伊sak轮椅，行去hit chōa花蕾火红ê凤凰树脚，细声kā伊讲：「长老，虽罔有人伤害咱，咱mā是讲真话，无欺骗--伊。」长老知影牧师ê意思，giú伊ê手，óa近来也细声讲：「牧师，我虽罔hō͘贼伤害，半身麻痹，一世人坐轮椅，m̄-kú看着死ê时，所讲--ê是真话。He tō是我ê约束。」牧师tiām-tiām无应，ná sak ná行，心内念：「M̄-kú我tī圣坛顶讲--ê，m̄是真话，取一枝嘴niâ。」

过--来hit个礼拜，牧师tī台á顶讲道。无像前--a大声细声、比脚比手，话也讲真té，khah无普通ê一半。会友听了奇怪，感觉kap前--a hit个牧师仝款，无啥特别，也bē感动。有人讲，牧师感冒nâ喉痛。有人ioh，牧师这礼拜无êng，无准备。总--是无人确实知影，hit个真正ê缘故。Chē少有人失望，感觉无彩。希望后礼拜，陈牧师台á顶才koh讲真好听ê话，hō͘大家感心激动。