《陈雷文选》

 | | | 转寄

Pháiⁿ嘴

作者 陈雷 2009.03.15

万--a tī黎明国小教音乐，人是bē bái，tō是hit枝嘴bái。特别be-a-luh lim--落-去了后，hit枝嘴bē输he屎ha̍k á空，见讲tō是臭ko͘ⁿ-ko͘ⁿ--ê，定定按呢得失人。这日来tī 『阿秋鹅肉』食鹅配bi-luh。Lim了差不多--a，peh--起-来beh去便所放尿。Hoa̍h一步颠二步，无细字踏着人客ê脚，差一sut á poa̍h倒。受气骂hit个人客：「你这个死人！别位m̄去死，死tī chia tìn路，kā恁pē koāiⁿ脚。」拳头母gīm--leh tō beh cheng。Hit个人客坐tī壁角家己一个，面sán-sán，嘴薄薄，目眉tn̂g-tn̂g，看--起-来绅士绅士，穿一su khóng色ê西装，结一条红色ê ne-khu-tái，khoaⁿ-khoaⁿ-á应--伊：「你来踏我ê脚，koh骂我pháiⁿ嘴。」khiā--起-来，chiah大汉，lò-lò比伊koân一粒头。万--a无lún--伊，chhîⁿ óa--去：「恁pē骂你tō按怎？！你好死m̄死。…干！你看，恁pē这枝脚…」「我也无踏着你ê脚，…」「无踏--着？…你看，踏一下折--去-a，痛kah beh死。」一脚giâ起来桌á顶，ná比ná hoah：「干！比死khah艰苦！」Hit个人客本来犹好礼teh讲，听伊骂这句「比死khah艰苦」，雄雄面白死杀，目睭chheⁿ-chin一直kā gîn，乌仁反绿chiah大蕾，讲：「少年--ê，你m̄-bat死--过，thài会乌白讲这款pháiⁿ听ê话？」万--a mā气kah面红ki-ki:「干！恁pē m̄-bat死--过，ah你tō bat死--过hioh？！…外pháiⁿ听？死外艰苦你敢知？」Hit个人客想beh koh应，壁顶时钟khiang一声，tú好六点半。一句话吞--落-去无讲，嘴念：「失礼，我ài赶时间。」oat--leh作伊去。万--a ná骂：「好死m̄死，紧去死hō͘恁pē看。」

小停尿放了，bi-luh lim ta，鹅肉食饱，气犹未消。问头家娘：「Tú-chiah hit个人客是啥人？」阿秋应：「生份人客，m̄-bat来--过。」万--a念：「干，来chia欠恁pē教示。」车驶leh走。酒醉chhìn-chhái驶，chia chông hia chông，红灯绿灯也无teh看。来到十字路口，雄雄m̄知按怎，目睭小寡起花，一堆人围tī hia，相争teh看车祸，一台西美lòng kah歪哥chhih-chhoa̍h。另外路中央一台救护车，风螺hīⁿ-hō͘ⁿ叫，灯火lia̍p-lia̍p sih。Tú好隔壁阿泉in老pē ùi hia过。奇怪--a，这个春木伯，断脑筋成半冬--a，倒tī眠床bē tín动，thài会chit-má soah好--起-来，穿一su困衫tī大路行？Tō kā叫：「春木伯--a，ah你m̄是teh艰苦，beh tó去？」老人应：「Bē--lah，拢bē艰苦--lah。」koh讲一句：「失礼，我ài赶时间。」oa̍t头作伊行。斟酌看，ai-io-ôe，边--a tòe一个查甫人，sán-sán lò-lò，khóng色ê se-bi-loh，红色ê ne-khu-tái，注死m̄死，tō是tú-chiah阿秋hia hit个人客。Tō kā tòe--去，ná讲；「干！你这个好死m̄知死。恁pē来教示--你。」

二个作前lú行lú紧，去到一位天桥tō peh--起-lih，beh过大路。万--a也tòe in起--lih。Ná知双脚踏一chàn，人soah Ńg骨强beh un--落-去。规身躯ê khùi力bē输水道水无关，放leh一直lāu，身魂teh beh流无--去。

Tok强peh到天桥顶，突然间人足看活，轻松浮浮teh beh飞，阿秋--a hia be-a-luh lim有够khùi hit款。才注意着桥脚大路顶，车kap人拢无--去，tiām chiuh-chiuh一大片，青--ê､红--ê…，热--人ê公园花teh开。有听着轻声ê音乐，幼秀清亮，ùi hn̄g-hn̄g ê天顶飞--落-来。He音乐伊有熟悉，tō是Mo͘-cha-to͘h ê小提琴奏鸣曲。M̄知啥人演奏--ê，真正好听。He小提琴kap钢琴一句来一句去，bē输高尚ê天使欢喜teh对话。也bē输teh kā伊讲，万--a，你一世人真chē欢喜kap福气。伊想，我知，我beh kā真chē人说多谢。天桥hit旁光--起-来，阔旷旷，天teh出大日。时间一目nih概成停tī hia，无teh tín动变作永远，一时心内底真正和平，罕得这款无烦无恼。又koh bē输he天顶ê光彩kap音乐tō是伊ê祈祷，一世人第一回，chiah-ni̍h虔诚谦虚，o-ló伊ê生命。M̄-kú he Mo͘-cha-to͘h ê音乐，虽罔是天顶--ê，伊知影总是也是人写--ê，有lām着淡薄á数念ê人情、无彩、可惜。有影--lah，chiah-ni̍h好ê所在，咱chia阿秋ê鹅肉、be-a-luh，…。失礼ho͘ⁿh，定定kap英--a冤家，骂pháiⁿ嘴。

音乐停--去，hit二个已经到天桥hit头，teh beh落--去。万--a赶紧jiok--去，kā叫：「小等--一-下。春木伯--a，我kap你来--去。」春木oa̍t头过--来，kā讲：「万--a，你无teh赶时间，先转--去。厝--里英--a teh等--你。」Hit个穿se-bi-loh ê人客，行óa--来，雄雄出大力脚尾kā chàm一下，万--a hoah一声：「我脚痛kah beh死！」tō精神过--来。

有人teh kā ji̍h胸坎，hoah讲：「转--来-a，…转--来-a，…」目睭peh金，tō是倒tī救护车内底，人teh kā伊急救。风螺ò͘ⁿ-ò͘ⁿ tân，救护车sù-sù走。原来m̄知tiâng时，也m̄知按怎出车祸，tōng一下m̄知人，心脏定--去，人死--去。好得佳哉，koh救活转--来。送去病院，kan-na脚尾小伤，chhun--ê拢好势，tō hō͘伊转--去。

转来到厝，in某英--a tō kā叫：「Ah你是走tó去？隔壁春木伯--a过身去--a。你紧去kā in看--一-下。」万--a讲：「我tú-chiah路--里才遇--着-伊，行路好势溜溜，thài有过身--去。」In某讲：「敢是你认m̄-tio̍h人。六点半脚-tau过身去--a。」万--a m̄信：「明明我有kā叫。伊讲，万--a，你无teh赶时间，先转--去。」Koh kā in某讲，m̄知按怎出车祸，hit台西美lòng kah歪哥chhi̍h-chhoa̍h。英--a念伊：「早tō kā你讲，lim酒m̄通驶车，拢m̄听。…你明明是teh chhōe死！」万--a走去隔壁看，成实泉--a in规厝内人拢teh khàu。春木伯--a已经平安过身去--a。Lú想lú奇怪，khah想to想无，心内giâu疑不安。

隔转工，koh来阿秋chia食鹅肉lim be-a-luh，siàⁿ-siàⁿ hit个人客又koh来tī hia。仝款绅士hit扮，khóng色se-bi-loh，红色ne-khu-tái。万--a想着前日春木--a奇怪ê代志，心内胆胆，好礼óa去kā讲：「人客，hit日我lim酒醉，踏着你ê脚，pháiⁿ嘴骂--你，khah失礼。」人客也好礼问--伊：「你脚敢犹会痛？」万--a应：「痛是犹会痛，…」人客koh问：「Ah敢会痛kah比死khah艰苦？」万--a心头chhia̍k一下，hit日pháiⁿ嘴讲一句「痛kah比死khah艰苦！」Hō͘人客骂：「少年--ê，你也m̄-bat死--过，thài会乌白讲这款 pháiⁿ听ê话？」赶紧kā伊chhē:「Bē--lah，bē--lah，死拢bē艰苦。」人客ná笑，khiā--起来，sán-sán lò-lò koân伊一粒头，讲：「少年--ê，若是你，chit-má讲这句话，才khah有理。」雄雄会记得hit日òaⁿ晡天桥顶ê景致，原来tō是死ê安排！原来伊tō是死！惊一下面青sún-sún，差一sut á siàm尿，直直kā chhē m̄-tio̍h，ná讲：「失礼，ài赶时间，ài赶时间......。」赶紧作伊走leh lōng。

青狂chông转来厝，喘phēⁿ-phēⁿ kā in某讲：「英--a，我看着死！」英--a骂--伊：「又koh这枝嘴！…Taⁿ你看着死，he死生作啥款？你讲来听。」「Sán-sán lò-lò，穿一su khóng色se-bi-loh，结一条红色ne-khu-tái，…」英--a起爱笑：「Hit个o͘h？伊tō是死o͘h？…Ah你m̄ khah早讲，tú-chiah犹tī咱门脚口行来行去，…敢是teh等--你？」万--a oa̍t头看门口，ai-io-ôe，成实是伊！Tī亭á脚行来行去。Tú想beh去kā赶，in某哀一声大大声：「我头壳痛kah beh死，…」一句话讲犹未soah，phiâng--一-下倒tī土脚，tō m̄知人去--a。kā看，亭á脚hit个查甫人也无--去。