《陈雷文选》

 | | | 转寄

Tì帽á ê人

作者 陈雷 2009.03.01

Hit个恶梦已经来几lōa摆，这chām khah chia̍p｡龟怪--a,伸手去摸，he头毛tō一枝一枝lak了了，变作完全ê秃头。惊一下醒--来，身躯犹teh拚chhìn汗。赶紧peh起来照镜，电火拍开，好得佳哉，一簇花花，犹koh tī hia｡细字用手去so,好势好势，一枝一枝在在，tī头壳心hia｡Koh算一摆，拢总原在156枝，一枝无减。拢是阿玉á可恶，平时m̄-bat kā鼓励，颠倒拢teh kā phí-siùⁿ：割chhun ê久菜尾，koh发也m̄成物--lah。也是有影，kā看，he毛ta̍k枝黄酸黄酸，bē死bē活。不而过伊有坚持，已经进入严重危机ê阶段，这个最后防守ê战线，绝对bē使失败。

Tī伊面头前，无人爱讲『秃头』这二字，kan-na in妹婿lò脚昌--a敢讲，因为昌--a家己有秃头：「无啥--lah，若是秃光光，作一顶假--ê来tì tō是。」Ná讲tō伸手去摸头，家己ê假头鬃ni--起-来：「你看！」一tè薄薄--a,bē输桌布用siuⁿ久无换。Hit粒头壳光光若金瓜，hô͘-sîn hioh--起-lih tō会滑--落-来，一枝毛to无。在昆旭--a看--来，昌--a按呢光头hiàn-hiàn, bē输一kho͘人thǹg光光，khiā tī新光三越大门口hō͘人看thiòng--ê｡「我无像你，我无秃头。」昆旭--a应。「你无秃头？！木--a,泉--a,来，恁拢有看--着。昆旭--a,你帽á thǹg起来hō͘大家看！」激kah昆旭--a挡bē tiâu,帽á thǹg--落-来，ná比ná hoah:「che...che...che chiah chē,m̄是头毛是啥？！」一簇花花，bē输割chhun ê久菜尾。

大概阿玉á拍长途电话kā政雄tâu:「恁老pē头毛落beh了--去。」政雄惊老pē头壳无毛受风寒，旧年昆旭--a 69岁生日ê时，专工ùi美国寄这顶帽á转--来，吩咐讲：「这顶帽á有Pete Rose亲手签名。」这个Yankee ê球手tī美国上出名，昆旭--a m̄ bat--伊。M̄-kú听后生ê口气，无输美国总统签名。Ùi hit时起，人去到tó位，帽á tì到tó位。头无离帽，帽无离头。阿玉á对野球无看重，骂伊：「日时也tì,暗时也tì,hit粒头beh hip hō͘生菇。」其实虽罔无爱野球ê人，看着hit顶帽á,外观mā是真chhio-iāⁿ。规顶khóng色，一个帽á舌长长若鸭嘴，头前红字一个N，一个Y，tō是正港ê New York Yankee野球帽。

Lò脚昌--a beh嫁查某kiáⁿ进前，阿玉á早tō kā昆旭吩咐：「你去hō͘请，作大舅坐大位。千万m̄通失人ê礼！」结婚hit日，tī台南大饭店请桌，闹热chhih-chhah。连hit个市议员林有信mā有去。昆旭--a这日作大舅坐大位，tiau西装，拍ne-khu-tái,taⁿ惨--a!成实连hit顶帽á也tì--来！全场几lōa百人，tō是伊kap新娘tì帽á｡大家桌脚chhi-bú chhì-chha,Ai-ioh，ná有一个大舅生作这款？bē输外国jû-sù蕃，连这个礼数也m̄ bat！

可怜lò脚昌--a,目睭掠hit顶帽á直直看，规个面拢乌--去，pháiⁿ势kah m̄知beh去bih tó位。暗静kā阿玉á giú一边，gīm拳头母放tiau讲：「Koh 5分钟，恁昆旭--a hit顶破帽á若无the̍h掉，kā我出出--去！」阿玉á应：「你m̄知，tō是为着今á日这顶帽á,我kap伊冤家几lōa日！m̄听tō是m̄听！」当teh m̄知beh怎样好，临时去想着一步，哀pak肚痛。昆旭--a讲：「你sió lún--leh。等我台á顶好话讲几--句-a才走。」阿玉á hoah:「Bē等--得。定着是急性盲肠炎。」一个面反青反白，直直hoah beh吐。昆旭--a着惊，kā昌--a念一声「失礼」，犹未上台讲话，先tō chhuā阿玉á走。按呢才好得佳哉，问题解决，昌--a面主留一半。了后害in某kap查某kiáⁿ khàu一晡，chiù死chōa后回绝对m̄请大舅。这个笑话传--出-去，过--来凡若好事pháiⁿ事，hia ê朋友弟兄，拢无人敢请伊去。

盖博知影昆旭秃头m̄认输，爱创治伊，kā煽动：「简单--lah，你the̍h一tè老姜母浸ui-su-kih，ta̍k日头壳皮kā lù kā chhè,免一个月，头毛发kah hō͘你剪bē lī!」又koh乌吐白吐，吩咐讲：「Lù了帽á tì--leh，拢m̄通洗。」昆旭买一干红标ê Johnny Walker，浸老姜母，大力lù细力chhè,头壳皮lú kah beh火烧，koh sīⁿ koh痛，成实帽á hip leh拢m̄敢洗，规个头lú抹lú臭。阿玉á骂，比人sīⁿ kiâm菜khah臭。M̄ kap伊困仝眠床。

这日kap木--a､ 泉--a in去台北chhit-thô｡Ùi淡水渔人码头坐渡船去八里。He淡水河tī hia嘴阔阔beh出海。看he景致，头前有八里半山ba̍t-ba̍t ê墓á埔，后面是台北平地cha̍t-cha̍t ê kuân楼á厝，真是优雅美丽。当teh欣赏赞美，雄雄船顶风透，无细字一顶帽á soah siàn一下飞--去。昆旭--a hoah一声「害」，伸手去sa,已经bē赴--a,soah王见王秃头照着日头，光光iāⁿ-iāⁿ，若一tè反射镜。赶紧àⁿ落去beh khioh帽á,tō是这时胸坎cha̍t,bē喘khùi,人tō un--落-去。不幸心脏病来发作。赶紧送病院急救，险一大险，差一sut á死无去。出院了后，lú想lú惊死，不时烦恼心脏病koh来。Kā in某讲，我这帽á若koh lak--去，心脏病koh发，ah tō无救。自che以后，顾hit顶帽á若顾命根，帽无离头，头无离帽。一顶Yankee bē输头壳生--出-来-ê,日--时tì leh行，暗时tì leh困。后--来hia ê朋友规气无叫伊ê名昆旭，改叫伊Yankee。

这下晡tī公园树á脚行棋，注该beh有代志。泉--a hō͘昆旭--a抽一枝车，m̄甘愿hoah讲：「干！Yankee，你敢食我ê车！…」昆旭--a无食háⁿ，应：「食tō食，敢有teh lún--你？」Tú好5、6个chhit-thô gín-á竹鸡á党ùi树á脚过，也是叫作Yankee。听着有人操干kiāu,hoah:「干！Yankee…」规阵围uá--来。Kā看，头壳顶拢tì Yankee ê野球帽，有N koh有Y，kap昆旭ê仝款。Tō是台南m̄成gín-á竹鸡á帮，号美国á名khah iāⁿ！Chhōa头hit个穿一领无ńg ê lan-lin-guh，二枝手股若鸡腿，正旁刺一只战车，倒旁刺一枝火箭，好礼tō问：「头--ê,你叫beh请 ？」Taⁿ这个泉--a操干kiāu,得失着竹鸡á Yankee帮，m̄敢tèⁿ-siáu,一顶瓜笠紧tō the̍h--落-来，比对面昆旭--a,讲：「这个朋友，伊叫作Yankee。」He鸡竹á头看昆旭，一粒hiūⁿ-hiūⁿ若pua̍t-á籽m̄成物，龟怪--a,koh tì一顶Yankee帽，有N koh有Y。明明是teh装假--ê,闹--sńg ê｡心内bē爽，tō beh惹事：「头--ê,che帽á小弟借看--一-下。」伸手tō来sa 。昆旭--a hiahN3一大惊，这顶帽á hō͘你sa--去，老身m̄ tō无命！赶紧双手帽á舌giú--leh，hoah讲：「Che…che帽á bē使the̍h…」he鸡竹看伊帽á m̄放，giú koh khah雄，龟怪，soah bán bē起--来，bē输he帽á发草钉根。大力koh hia̍p 3、 4下，连头壳皮也beh bán--起-来。昆旭--a哀一声「害」，he帽á才giú--落-来 。Taⁿ tō成实惊一下破胆兼siàm尿，刺激着心脏，koh再来发作，人tō un--落-去。Hia ê竹鸡本成想beh修理兼拍人，看昆旭--a未拍tō倒--落-去，一kho͘死人色gōng人面，惊一下无顾拍tō溜soan走。这时昆旭--a还魂一半转--来，泉--a,木--a看伊khùi犹有，大声kā叫：「昆旭--a,你看！」牵伊ê手去摸，ai-io-uê,奇怪--a,规头ê毛！té-té粗粗，ām-ām cha̍t-cha̍t,bē输新发ê hm̂-á草，m̄是割chhun ê久菜尾，soah无秃头！勉强kā泉--a､木--a讲：「恁看，我无秃头！」回复查甫作人ê尊严，嘴角bi一下，thó͘一个khùi,tō上路去。

犹是阿玉á生理头脑转khah紧，chuâⁿ按呢落去拍市场。叫人hip一张昆旭--a ê相，无tì帽，头毛发ām-ām,tah tī干á顶面，用伊ê âng-á头作标头。这个『起毛好』秃头药水，老姜母浸ui-su-kih秘方制造。干á顶面说明用法『起毛好』一日抹2遍。Tì帽á,m̄通洗。尾á卖去台湾全国各所在，听讲也有外销，生理外成功--leh。