《陈雷文选》

 | | | 转寄

出外人阿燕

作者 陈雷 2008.12.14

干，早tō知知--lah，成实偷走--去-a｡Che越南á bē信用--得。阿月讲，早起出去买菜，过中tàu犹未转--来。Tú-chiah才khà电话入--来，m̄知ùi tó位khà--ê,讲伊m̄转--来-a｡问伊人tī tó位，拢m̄讲。干，按呢tō走--a,hō͘-liu soan入去臭沟á水，chhōe无--a-lah。

财--a讲in无teh chhap che｡He菲律宾á､越南á ta̍k ê teh走，chhap bē了。干，che代志in牵钩á无teh chhap，啥人chhap?钱the̍h了，ta̍k项the lī-lī｡Koh会kā我háⁿ，叫我紧去报警察。Ah无，阿燕--a tī外口出代志，我负责bē了。规个the-the hō͘我。

阿月kan-na会晓顾háu,惊我骂，去报警察，赖伊kap阿燕--a斗空，设计hō͘伊走。平平in越南á,二个厝--里tòa隔壁庄，hioh-lah，ta̍k项mā讲。阿燕--a beh走，ná有可能伊m̄知?！佳哉厝内物件无pháng--去。这个阿燕--a,连家己ê衫裤to无the̍h,行李拢tī--leh。讲直是刁直，讲gōng mā是tòng-gōng｡厝内物件一大堆，chhìn-chhái偷--几-项-a,ah m̄ tō有够衰siâu,pháng见人koh pháng去物。

平平按呢teh tòa,人阿月tō加真会晓想。莫怪，khah chē岁--a,也来久--a,连咱ê话mā会晓讲。我看，beh chhiàⁿ犹是像阿月这款，厝--里有翁有kiáⁿ ê khah好用。像阿燕--a这款单身--ê,kha̍p bē着hoah走tō走，m̄是头路。

这个阿燕--a生本成khah狗怪。顶回tī Lái(赖)--sàng hia tō走一摆--a｡干，这个财--a,也m̄ kā咱介绍一个好--ê｡Lái--sàng大家拢讲--伊，好额kah便所囤银票，比乞食khah kia̍t,phēng卖盐--ê khah kiâm｡Beh叫人作，m̄叫人食，按呢kā人克薄。也m̄是第一回走人，已经chhiàⁿ几lōa个拢tòa bē tiâu｡老实讲，作头家无khah严--一-下，chia ê薪-hô-á m̄ tō peh上天。这个财--a,有钱通thàn,啥物白贼to讲会出嘴。阿燕--a外乖tú外gâu｡厝--里一个老母，二个小弟，阿兄规家伙拢伊teh饲。Ta̍k项教tō会。

Ah che政府mā是teh糟踏人chhōe无空。本成作kah好好，雄雄kā你改按呢，限制签二期。阿燕--a,前--a Lái--sàng hia签一遍，作无了tō走，mā是有算。所以这回到期，bē使koh签，一定ài转--去，规气走去bih。你敢有伊ê ta-ôa?koh二个月tō到期，无--lah，thài有beh转--去，khah讲mā咱chia好。有食有tòa,有薪水通领，定着是这个关系，阿月thài会m̄知？

Taⁿ这个黄董--ê,ta̍k项beh赖--咱。咱牵钩á kā绍介，续--落tio̍h kā phāiⁿ一世人？越南á､菲律宾á偷走--ê一大堆，敢kan-na阿燕--a一个？讲啥物咱tio̍h kā负责。干，恁pē tō kā háⁿ，紧去报警察，ah无阿燕--a外口出代志，越南hit旁in tau beh讨人，你tō负责bē了。按呢才tiām--去。赖讲咱无kā介绍好--ê｡Taⁿ是看着鬼？顶斗签约mā有kā讲，第一回Lái--sàng hia偷走，m̄是阿燕ê问题。He Lái--sáng你m̄知，银票khǹg tī便所拜，钱是teh看爽--ê,khah kia̍t he死人。Beh叫人作，m̄ hō͘人食，啥人chàn会tiâu? Che Lái--sáng,黄董ê好朋友，伊也m̄是m̄知。

「无--lah，你m̄通误会，黄董--ê,我m̄是teh讲--你，头家人m̄好。阿燕--a会走，m̄是你ê关系。…绝对无这个意思……我知，我知…阿燕--a､阿月二个顾恁老--ê一个，一日三顿煮hō͘食，kā伊洗，kā伊拭，实在规日êng-lo-lo｡若m̄是恁老--ê人大汉太粗重，扶起扶落ài二个人才有法--得，事实che是一个人ê头路，无比che khah轻可。…m̄是--lah，你m̄通误会。tio̍h,tio̍h,hō͘ in食，hō͘ in tòa,薪水也m̄ bat慢in｡…无--lah，你thài会对in bái?你看，阿月tòa外久--a,人伊to拢无问题。」

「我kā你讲，是这个关系。你家己mā知，这个阿燕，koh二个月到期，bē-tàng koh再申请。转--去tō bē tàng koh来。政府新规定，che你mā知。」

佳哉咱这个秘书林小姐chhap嘴讲：「Chit-má外劳--ê到期，无人beh转--去，khah艰苦mā是比in越南、菲律宾khah好。」

「我kā你讲，hia ê会转--去-ê,拢是有家庭--ê,有翁有kiáⁿ，像阿月这款。…阿燕--a有老母，…老母无仝--lah。」

「免烦恼，黄董--ê,我才koh替你chhōe一个好--ê,有翁有kiáⁿ--ê｡…免--lah，免三个月，liâm-mi tō有，一大堆teh等。」

干，这个黄董--ê pháiⁿ剃头。

「M̄通--lah! m̄通走！阿燕--a,你m̄通走！…chia你ta̍k项生疏，话koh bē通，beh走去tó位bih? 你犹少岁，m̄知外口hîm kap虎…无像你想--ê hiah简单.。…啥物？…朋友？…tó一个？…你chiah bat伊二礼拜niâ,taⁿ你是知影伊是圆抑扁？！…阿燕--a,m̄通--lah，m̄通走！…你chit-má tī tó位？…电话几号？…bē--lah，góa thài会去报警察？！…你听我讲，燕--a,…你m̄通háu,…阿燕--a...」

这个阿燕--a,kap我作伙tī chia二冬外--a,我上盖知影…若我ê小妹，你看，按呢出--去，身躯边无半项，连衫、裤to无the̍h,…taⁿ beh按怎bih?…连电话to m̄敢hō͘我，我会替伊烦恼--死。

早tō有kā讲，钱m̄通拢总寄转--去。家己身边chhun一kóa,留转去作老本。咱tī chia作三冬，牵钩á抽16个月，敢有外好thàn?Beh来，m̄ kā in借钱也bē使，利息据在in算。这个燕--a,老母讨tō koh寄--转-去。M̄是bē晓想，心肝nńg,麻糬nóa--ê｡Ah m̄ tio̍h想看māi,你心肝nńg,麻糬nóa--ê,老母敢有kap你仝心？我看，he老母心肝tēng,米心无透。Kan-na伊teh m̄甘hit个老母，…电话见来，讲kah阿燕--a háu,钱tō koh寄转--去，…hit lê in母--a,kan-na顾in兄嫂一家，m̄-tāⁿ tio̍h饲in规家伙大细，tio̍h koh寄钱转去hō͘ in起厝.…兄哥无--去，无查甫人thàn钱，可怜无m̄ tio̍h｡Ah这个查某kiáⁿ --leh? soah bē输养女，专门thàn钱hō͘人用--ê｡

阿燕--a ta̍k项kā我讲，tō是这回一句tō无讲。惊我反对，kā伊挡。定着--ê,我若知，早tō挡m̄ hō͘出--去。阿燕--a人单纯，讲hit个朋友外好tú外好，beh替伊chhōe tòa--ê,chhōe头路。讲khah好听。才熟sāi二礼拜niâ,敢知影hîm抑虎？

Chiah-nih少年，犹是m̄通出外来khah有影。阿燕--a in老母，我看是khah顾in阿兄hit家伙kap in小弟。牺牲阿燕--a｡查某gín-á家己生--ê,别人ê｡我若讲，阿燕--a tō应：「你家己m̄是相仝？」有影--lah，咱出外人拢仝款，心肝一个niā-niā,拢khǹg tī厝--里，出外ê时无顺续chah--来。别项无计较，tō是拢teh想hit个厝，khah散mā是hit个厝。我，计较kiáⁿ，计较翁，阿燕--a计较in母--a,规个心寄tī老母hia｡Taⁿ chit-má,设使我若是阿燕，少年家己一个，…敢oan-nā走去bih?「你家己mā是仝款。」阿燕--a拢按呢kā我应。

阿月á讲，等阿燕--a转--来，才kā我chhia起来坐。伊家己一个无法--得，出去规日--a,阿燕犹无看转--来。