《陈雷文选》

 | | | 转寄

一面缘

作者 陈雷 2008.11.16

(1)

一大阵人插插直直chiⁿ--来，雄雄后面有人大力kā伊chhia--一-下，tú-tú sak上车。这班m̄是伊beh坐--ê,伊teh等落南。赶紧beh跳落车，已经bē赴--a,车门关--起-来，车teh起行。窗á外一个查甫人，龟怪--a,tòe车teh走，hia̍h á拚汗，目睭gîn-ò͘ⁿ-ò͘ⁿ若鬼á火teh jiok--伊。面对中pit一大chōa,红kì-kì,bē输大枝西瓜刀phut--着，phīⁿ á siah一旁去。车内有人teh叫：「菊--a来chia坐。」oa̍t过来看，空空无半个人客，车尾hit头一个老查某人teh ia̍t手，白头毛，乌长liâu｡欢喜kā叫：「阿妈，你thài也坐这班？…你家己一个beh去tó位？」老查某人chhìn-chhái-á笑：「阿妈专工来chhōa菊--a｡」「Chhōa菊--a去tó位？」「来去hia行行看看--leh。」坐--落-来，so伊ê手tê,粗粗若桌布。问伊：「Hia是tó位？」老查某人tō无--去-a｡对面位坐一个查甫人，moa一su旧西装，面向外口the pok薰。好礼kā借问：「阿伯，这班车beh去tó位？」查甫人oa̍t头过--来，hiohN一惊，tō是伊ê老pē｡十外冬无看--着-a,面色红膏chhiah-chhih拢无khah老--去。Khiā--起-来kā讲：「好来--去-a｡」查甫人tō无--去。Kha-chiah后soah有人大力teh kā chhia,beh sak伊行。Oa̍t头看，也无半个人。着青惊，双手椅á bán--leh，大声hoah：「你mài kā我sak！我无beh去！」火车khīn-khōng hián ki-ki叫，雄雄pōng一声若炸弹爆发，人挂车直直péng,乌天暗地，bē输poa̍h入去pōng空底。惊一下精神--起-来，liàn tī眠床脚，头壳hîn车车，规身躯chhìn汗。

明明是梦koh概成m̄是梦，lú想lú奇怪。Chēng in过身到taⁿ，拢犹m̄-bat梦--过，thài全无代无志，梦kah chiah真？In二个拢讲：「Chhōa你来去hia行行看看--leh。」定着有一个缘故，敢是伊ê悲忧症ê关系？最近khah厉害，困bē好势，头壳内乌白想，药á食也无效。成大hit个精神科医生，生作少年koh缘投，叫伊hioh困一chām,mài去上班，先去旅行chhìt-thô,行行--leh心情tō会khah好。所以伊旅馆已经订好--a,beh去台东知本洗温泉，心情浸hō͘轻松。人讲南回铁路风景真súi,下晡tú-chiah去thiah车票，thài会随tō作这个龟怪ê梦？

Chit-má阿妈、阿爸叫伊去hia行行看看--leh。明á chài,坐hit班落南ê火车，敢tō是beh去hia,hit个所在，kap死约会？Lú想lú有影，lú确实che tō是伊chín ê运途，已经一切拢安排决定好势--a,chiah-ni̍h清楚koh tú好，m̄免koh再chhiâu-chhek。

按呢决心了后，心情tō安定落--来，药á停掉无koh食。Koh去国泰人寿纪太太hia买保险一千万。指名受益者老母黄月娇。阿母家己一个tī屏东，已经成半冬无转去看--伊-a｡Hit个纪太太上gâu招保险，公司业绩连续三冬拢tho͘-puh。见若招人客买险，tō一半用ha2N--ê:「万事人teh作，天teh chhiâu｡明á chài会死会活，无人知--lah。」菊--a应：「M̄-kú我知影。」纪太太叫是伊teh讲sńg--ê,指头á指天，讲：「Che,kan-na神明知。」

(2)

伊行二步，koh oat倒转去chhōe,有听着niau-á kia2N teh叫，bih tī pùn-sò桶后壁，规身躯乌sô-sô,差一sut á看无，chhun二粒目睭金tok-tok，ku tī hia phi-phi-chùn｡伸手kā抱，惊生分kiu入去壁phāng,抱bē tio̍h,kā叫也m̄出--来。无法度oat--leh koh行。又koh teh iauⁿ，soah tòe tī伊后面，一直tòe来到大楼门脚口，khiā tī hia siòng一晡。门开，雨落大--来，soah tòe--入-来。

Niau-á kia2N抱--leh来坐电梯。第一摆遇着这个查某gín-á,伊掠伊看--一-下，伊mā kā看--一-下。「你新搬--来？」「昨hng搬--来。」kā伊笑--一-下，伊mā笑--一-下。人sán-sán,面色白苍苍，一su白衫白裙，一顶大顶草帽á插红花，坐tī轮椅顶面。「你几楼？」二个同齐问，soah起爱笑。「我七楼。」「我mā七楼。」niau-á kia2N头thóng出来看，iauⁿ一声。「伊啥物名？」「我m̄知，tú-chiah路--里khioh--来-ê｡」「我ê niau kap伊仝款，拢乌--ê｡…顶礼拜死--去…siuⁿ老--a｡」电梯出--来，伊oat这旁，伊oat hit旁。查某gín-á比hit个门，讲：「我tòa这间。」

巾á the̍h来拭，koh用吹头毛ê电风kā吹ta,身躯phōng松--起-来，tō是长毛ê pho-su niau｡Iauⁿ二声叫pak肚iau｡倒牛奶hō͘伊lim｡食饱Ǹg来脚尾beh hō͘伊抱。「来，我hō͘你一个名。」抱起来坐脚腿：「你叫作无厝--ê｡」无厝--ê目睭是咱台湾玉ê绿，a2N--leh呼呼叫。头壳直直nòa,概成teh讲：「多谢。」雄雄才去想--着，明á chài beh坐火车，过--来soah无人顾，taⁿ beh按怎？

Sa一罐牛奶，niau-á抱--leh去对面lòng门。门开，查某gín-á坐tī轮椅--里，无帽á,规个头壳光光，chhun无几枝头毛。HiahN一惊，bē输看着查某gín-á thǹg光光无穿衫，赶紧会失礼，phai2N势oa̍t头beh转--来。查某gín-á讲：「无要紧。请你入来坐。」

讲伊脑生瘤，chit-má teh作化疗，头毛落beh了。才注意--着，有影倒脚倒手无啥好势。伊讲chhun二礼拜化疗完成，tō beh转去成大读册，电机系第三年。「治疗完成，tō仝像你按呢，m̄免koh坐轮椅。」Óa来抱niau,菊--a讲：「伊ê名叫作无厝--ê｡」查某gín-á kā niau-á讲：「免烦恼，你chit-má有厝--a｡」菊--a拜托伊照顾niau,因为明á chài beh去知本chhit-thô｡查某gín-á讲：「上盖好，来kap我作伴。」Beh kā伊说多谢，才想着成实失礼，犹m̄知伊ê名。「我叫玉兰。」菊--a心内bē定tio̍h,一直teh想hit个大事顶龟怪ê梦。「你敢有信梦？」伊摇头，tòe伊ê目光看桌á顶chhāi hit张相片。少年家头毛长长sôe到肩胛头，倒旁hīⁿ-á挂一个hīⁿ钩。「你ê查甫朋友？」伊tìm头：「几lōa摆梦着伊来。结果等规日拢无来。」想想--leh才koh摇头：「我脑瘤，tō无koh来相chhōe--a｡讲是无缘。…我kap niau khah有缘。」「恁熟sāi外久--a?」「四冬外--a｡」「缘phai2N讲--lah，mā拢是人作--ê｡」

转来家己ê房间，无张持已经天暗--a｡电火无开，一个人坐tī窗á ki5N看，下面街á路ê灯火，青--ê､红--ê､黄--ê,一pha一pha光ia3N-ia3N，bē输gín-á teh sńg ê鸡kui á｡车kap人teh无êng来来去去，对面夜市á mā开始闹热。明á chài,明á chài chia ê灯、chia ê车、chia ê人kap夜市拢会无--去，因为伊beh去坐火车，去赴死ê约会。…明á chài新文会报，落南ê火车出事相pōng,阿母tī电视顶会看--着，国泰人寿会kā伊通知。…hit个老岁á koh来--a,ta̍k日拢准准这个时阵se̍h来到巷á口，tō phóng一大phóng花teh卖。有时khah oa3N下班，转来到厝tō会tī大楼门口遇--着。「小姐，买一蕾súi花--lah！送hō͘男朋友…」伊m̄ bat kā买花，mā无查甫朋友…雄雄紧peh--起-来，chông--落-去楼脚大门口。今á日，老岁á无招伊买花，因为伊知影伊bē买。「阿伯，…」伊kā叫…老岁á停脚落--来…菊--a óa--去，hoah：「阿伯，我拢总kā你买。」规大phóng ê花拢kā mo͘h--来。钱chiⁿ tòa伊ê手--里，oa̍t--leh tō走。老岁á gāng-gāng khiā hia,人去了才会记得kā叫：「小姐，买一蕾súi花！送hō͘你ê男朋友。」按呢今á日花拢销了--a,概成肩胛头一担重担也无--去，khiau-ku ê身躯soah khiā khah直--起-来。

规大phóng ê玫瑰红--ê､黄--ê花贡贡，插tòa大个花干，规个phóng去chhāi tòa玉兰ê门口，无beh lòng门，giap一张纸，写二字「多谢。」

隔转日无去坐火车，改坐ba-suh。因为伊有考虑一暝，决定无beh赴死ê约会。伊beh koh转--来，看玉兰化疗完成，看街á路ê灯火，看车看人，抱无厝--ê…。这几工困无好势人siān,车内ná想soah眠--去。M̄知困外久，也m̄知ba-suh走外hn̄g,去到tó位--a,雄雄车内音乐大声tân｡精神--过-来，目睭thí金，tú好tī运chiàng头壳顶ê后视镜内底，看着运chiàng ê面。Ai-io-ôe!thài会面对中一chōa刀phut ê khî,红ki-ki,phīⁿ-á siah一旁--去！雄雄会记--得，tō是梦--里hit个！tī月台顶kā伊jiok，ùi后面kā伊chhia hit个查甫人！hiohN一大惊，hiu一声跳--起-来，chông去车门大力一直lòng,一直hoah：「开门！开门！我beh落车！」

司机听着后面人客大细声hiu,m̄知啥物紧急ê代志。Oa̍t一个头过--来，tú-tú好面对面相siòng,目睭相拍电，惊一下胆破，pōng一大炸弹爆发，乌天暗地，m̄知人--去。尾--a公路局调查车祸ê原因，tō是车内真chē人客拢有看--着，拢讲hit个查某gín-á雄雄起青狂，peh起来hoah hiu,司机顾oa̍t头teh看，无注意头前铁路平交道，soāh be赴挡车，kap hit班落南ê火车相pōng｡To也犹好佳哉，规ba-suh ê人客拢好好，kan-na hit个女性人客黄菊cheng一下重伤，现场死--去。玉兰抱无厝--ê tī电视顶看着新闻，听着黄菊ê名，坐ba-suh kap落南ê火车相tōng死--去。规个心肝碎糊糊，亲像也cheng着火车。想起黄菊讲ê hit个梦，敢成实有准算hahN？M̄-kú看he电视顶teh访问司机，to也生作斯文斯文，面á四正无半chōa khî｡