《陈雷文选》

 | | | 转寄

我beh hō͘恁知

作者 陈雷 2008.11.09

雄雄身躯通电，脚手麻--一-下，头壳内大声hoah：「挡车！…紧挡车！…」真知tō beh出代志，已经bē赴--a。Tú冲过十字路，车tō cheng--来，ùi巷á口chông--出-来，无顾看，tú-tú好pâng --一-下chiⁿ着车尾。干！新牵车tō食pōng,今á日注衰。

这个少年家，绅士hái-kat-á头，西装tiàu ne-khu-tai，行óa来会失礼。佳哉车kha-chhng-phóe细细khê一chōa,无大伤害。量其大约，参详赔四千kho͘准算。龟怪--a，看tō斯文斯文，thái见若óa--来，bē输teh吹冷气，畏畏chhìn-chhìn,强beh起鸡母皮。Kā看，目kho͘乌乌thap-thap，目仁thó͘-thó͘ pok-pok，概成niau-á目bih tī暗间teh当niau鼠。是tó一tah kò-样têng-tâⁿ，kap人无仝？Kan-na有一个奇怪ê特感，khah想to想无，规日上班拢bē清彩。

Chēng细汉tō有这款奇怪ê特感，老母讲伊大金嘴，「未卜先知」。厝--里姊妹三个，伊上大汉，kan-na伊会晓。身躯通电，脚手麻--一-下，按呢tō知--a。八岁hit时，半暝梦着阿妈来kah被，讲：「幼真--a，你乖乖，阿妈beh转--来-去。」透早起--来，kā阿母讲：「阿妈转--去-a。」老母骂伊大金嘴，che话m̄通乌白讲。幼真应：「阿妈讲--ê｡」雄雄才会记--得，ai--ioh，家己昨暗mā梦--着，阿母衫穿súi-súi,头毛loa̍h齐齐，眠床头吩咐：「菊--a，我taⁿ beh来--去。」赶紧入去房间巡，老母83，好势好势，目睭kheh-kheh，无代无志困困á已经过身--去-a。也是按呢佳哉，hit年29暝，菊--a无êng teh煮大顿，幼真讲：「阿母，m̄免煮chiah-chē｡」菊--a讲：「今á日29暝，大家煮chheⁿ-chhau。」幼真讲：「阿爸kap阿兄无beh转--来。」半信半疑，拍电话去店--里问，无人接。拜托厝边明--a驶车去chhōe｡侥幸，tō是cheng着电火thiāu péng车。赶紧车去病院，险险bē赴救两条命。所以菊--a学hō͘人听，这个gín-á生成kap人无仝，未卜先知大金嘴。

下班等来到厝，艺芬khiā tī门外teh等--伊。「阿姊，你chín才转--来？」「Ah你m̄入--去，khiā tī chia teh等啥？」艺芬tō是二姨ê查某kiáⁿ，ùi高雄来台北上班beh一冬--a，kap伊公家税这间a-pha-to͘h 。In二姨讲，tòa作伙khah省，也通相照顾。「阿姊，我m̄敢入--去。」「M̄敢啥？」「内面有声…」「啥声？」「便所声…便所有声…」「Ai-ioh，ná有啥！阿英--lah。我tō有kā你讲--过，若有听着便所lìn-lòng叫，m̄免惊，mài chhap--伊。阿英bē kāng--人。」门开tō kā e--入-去。

这个少年查某阿英chēng in搬--来tō有tī chia，m̄知伊ê名，chhìn-chhái kā伊号作阿英。定定便所内吵，有时châng水，有时唱歌。另外犹一个细汉查甫gín-á,上爱房间内pin-pòng走，mā是m̄知影名，叫作Boy。幼真kā表小妹吩咐：「作你mài chhap--in。In bē kāng--人，m̄免惊。」艺芬问：「阿姊，是按怎kan-na你有听--着。我拢无？」幼真应：「阿姊身躯通电，你无听--着-ê,阿姊tō有听--着，你无看--着-ê,阿姊tō有看--着。」Ai-ioh-ôe,che阿英m̄ tō若像魔siûⁿ-á?人讲魔siûⁿ-á有好--ê也有pháiⁿ--ê,好--ê叫作魂，pháiⁿ--ê叫作鬼。Che阿英kap Boy，阿姊讲bē kāng--人，kap人仝款，应该tō是好--ê,m̄是鬼，按呢家己安慰，tō khah m̄惊。Ná知这日下班转--来，家己一个，第一回听着便所lin-lin-lòng-lòng,soah m̄敢入--去。

半个月无事，艺芬来劳保局上班满一年，幼真讲：「来，我请--你。」chhōa去「麦当劳」庆祝。一粒双料汉堡咬tī嘴--里，才注意着隔壁桌hit个少年，绅士hai-kat-á头，西装tiàu ne-khu-tai，对对tō是hit日kap伊tōng车hit个。身躯通电麻--一-下，无m̄ tio̍h--lah，细声kā表小妹讲：「Hit个，你看。」艺芬使目尾lioh--一-下，面骨骨，目kho͘乌乌thap-thap，目仁thó͘-thó͘ ，bē输bih tī暗间ê niau-á目，讲：「Bái-kê-kê!阿姊，你beh叫我看，mā kéng一个khah ian--ê｡」幼真讲：「看hō͘真，这个，伊tō是你ê翁。」艺芬骂：「你是teh讲啥？大金嘴，…这个，我一世人透底m̄ bat看--过。… 」

一礼拜后，下班转--来，见着阿姊tō骂：「拢mā是你这个大金嘴！」幼真问：「你今á日遇着伊？」结局hit日劳保局来一个新手--ê,siàⁿ-siàⁿ tō是hit个「bái-kê-kê｣ê少年家，kap伊仝出纳组。「我讲--过-a。注定--ê｡啥物名？」「陈天佑」「无m̄ tio̍h,tō是伊--lah。」话讲soah，雄雄便所水又koh lin-lòng叫。

这个陈天佑虽罔无明星hit牌ê看头，to也斯文斯文，对人有礼，办代志有头有尾。有机会tō来chhōe艺芬七tāⁿ八tāⁿ，有讲有笑，明明对伊有hit个意思。Taⁿ查某gín-á你to 知，上惊好意，bē堪得人po-so。这个天佑--a，嘴nōa kiáu tiⁿ-tiⁿ，好话哺烂烂，不时来kap伊thi-thi tha̍p-tha̍p kho̍k bē soah。渐渐、渐渐，he人tō lú看lú也bē bái｡这个艺芬--a，一粒青春ê心，若棚á顶ê菜瓜花pha̍k着日，un-un-á,un-un-á也tō开。无外久热--人过了，hit日kā幼真讲：「阿姊，你讲了无m̄-tio̍h｡这个tō是我ê翁。」作伙chhōa转去高雄见pē母，tō挂手chí订婚。

了后越jú闹khah厉害。不时房间pìn-pòng走，便所水lìn-lòng叫，koh有救护车hīⁿ-ho͘ⁿ hīⁿ-hoⁿ风螺tân bē soah。幼真hō͘ in吵kah挡bē tiâu,受气便所门拍开tō beh kā骂。第一回，头一摆，面对面khiā直直，白苍苍，sán-pi-pa，lò-lò-lò,moa一领困衫阔lòng-lòng,长头毛乌mà-mà,散iā-iā｡双手kā头毛póe开，ai-ioh-ôe,白死杀，kan-na空空一个面框，无鼻无嘴无目睭。一直念：「…我m̄是自杀--ê,…我m̄是自杀--ê,…你m̄通听in乌白讲。…」He声bē输铁枝路火车头teh挡车，ki-ki叫…想beh kā问，hu̍t--一-下koh无--去。

幼真kā艺芬讲：「这个阿英，伊m̄是自杀--ê｡」「人害--ê?」「冤枉死--ê｡」 Taⁿ惨--a，人讲冤枉死--ê会来报冤讨债。这个阿英，是魂抑是鬼？Lú想lú畏，心内青chhìn｡隔日上班，问天佑：「你khah早敢有交一个查某朋友？」「我m̄是有kā你讲--过-a？」「你有kap伊订婚无？」「有--a，我有kā你讲--过-a。」「尾--a按怎soah--去？」「Che…che…我mā有kā你讲--a，尾--a，…尾--a，…伊自杀。」艺芬双手拳头母gîm ân-ân,冷ki-ki。「为啥物自杀？」「悲忧症，医生看足chē拢医bē好。」「伊按怎自杀--ê?」「吞药á｡…规罐吞--落-去…家己一个关tī便所，in老母市á转--来看--着，便所水lìn -lòng叫，叫救护车hīⁿ-ho͘ⁿ hīⁿ-ho͘ⁿ，已经bē赴--a。」「Ah你--leh？…你tī tó?」天佑--a无欢喜，强beh起变面。「我teh作兵。…Tú好放假转--来。」「伊…伊啥物名？」身躯起ka-冷-sún,m̄敢问，tok强问…「淑英…阿英…阮大学仝班，in tau kan-na生伊一个。」雄雄畏寒phi̍h-phi̍h-chùn,起鸡母皮，头壳会hîn,hīⁿ-á ki-ki háu,抱心强beh吐。Tō是已经二个月月经无来，有身--a。

In koh惊koh欢喜，m̄敢讲hō͘表姊知影。Tō按呢kap天佑赶年底结婚，搬--出-去。过--来便所tō tiām--去。M̄-kú定定听着阿英teh唱歌：「火车已经到车站，…阮ê心肝渐渐重，…看人欢喜来接亲人，…阮是伤心来相送，…无情--ê…无情--ê…无情--ê…」

过一个外月，hit暗艺芬雄雄转--来，面皮青sún-sún,目睭红ki-ki，嘴唇乌绿绿，moa一领困衫阔long-long拖土，kā幼真讲：「…阿姊，我m̄是自杀--ê,…你m̄通听伊乌白讲，…」幼真坐tī房间teh看电视，惊一tiô,脚手通电麻--一-下…tú好这时电话giang，阿姨ê声ki-ki叫，ùi高雄拍--来-ê:「…你紧去kā看--一-下！艺芬--lah，佑--a tú-chiah电话来，…讲艺芬食m̄-tio̍h药á,规罐吞--落-去，m̄知人……hioh--lah，救护车车去病院…」这时便所门oâiⁿ--一-下家己开，阿英khiā tī hia teh照镜，手--里牵一个细汉查甫gín-á,2,3岁á｡「我m̄是自杀--ê,…你m̄通听伊乌白讲…」雄雄oa̍t头过--来，第一回看着伊ê面，真súi ê少年查某ê面，抹胭脂、画目眉，若ang-á｡Phīⁿ-kóng teh流血，下hoâi一chōa细细chōa ê khî,一直念：「…我无beh食药á自杀，…我pak肚已经2个月--a，…」