《陈雷文选》

 | | | 转寄

Tak牛káng

作者 陈雷 2008.10.26

阮阿公名宝，kan-na阮阿妈叫伊这个名。庄--里ê人拢叫伊「牛伯-- a」，大概是伊生作四壮，乌koh大欉，pak肚圆圆若牛ê关系。上盖好性地，不时笑gi-gi，bē输五岁gín-á,m̄-bat看伊受气--过。Kan-na有一回，hit个坤--a ài chhit-thô,无去学校，tī溪沟sńg水hō͘伊看--着，叫来问：「坤--a，你thài无去学校？」坤--a chhìn-chhái应：「牛伯--a，我无鞋。老师m̄ hō͘我去上课。」「按呢o͘h？来，牛伯--a chhōa你去买--一-双。」成实拖坤--a去宏--a hia买新鞋。隔转日，又koh溪沟á遇--着，叫来问：「坤--a，你thài无去学校？」坤--a mā是chhìn-chhái应：「今á日siuⁿ热，老师讲会使hioh困。」「按呢o͘h？来，牛伯--a ham你来去问老师。」一手kā坤--a giú--leh，一路pái脚thōng来到学校。Thài有影？规班gín-á拢teh上课。老师问：「坤--a，ah你m̄是讲人艰苦，beh转去hioh困？」这回阮阿公tō成实无欢喜，kā老师吩咐：「坤--a若koh无来上课，你kā我通知。」坤--a tòa tī阮tau后壁，in母--a tī市á卖菜无êng,尾--a the̍h鞋á钱来还，阮阿公讲：「月--a，你卖菜无êng,恁坤--a爱chhit-thô,我来kā你斗张持。」koh讲：「Gín-á当teh大，he鞋á liâm-mi tō bē穿--得。」Thài会beh kā the̍h鞋á钱？

龙叔--a讲beh掠牛，念真久--a。这日去发--a hia看牛，价数拢讲好势，kéng一只赤牛母kap一只牛á kiáⁿ。He牛放tī牛埔看活过日，自由走。龙叔--a问：「明á chài来，牛beh按怎掠？」发--a pok一嘴薰，割一把甘蔗尾，gīm-tī手--里ná ia̍t ná hiu：「牛来，…牛来，…」像teh唱歌á戏。成实he牛chhōa牛á kiáⁿ tō óa--来，牛舌tn̂g-tn̂g来giú蔗尾。发--a讲：「明á chài,你tho͘-la-khuh驶--来，牛索kho͘--转-去tō是。」

隔转日，龙--a驶一台tho͘-la-khuh来，红kì-kì ê细只Tho͘-io-tah。发--a pok一嘴薰，割一把甘蔗尾，一手gīm牛索，khiā hia ná ia̍t ná hiu：「牛来，…牛来，…」像teh唱歌á戏。He牛母近视，chhōa牛kiáⁿ óa--来，beh到--a才看着发--a手--里一khûn牛索，soah停脚m̄行，头oat--leh作伊去。发--a看牛去，作后面ná hoah ná赶：「牛来，…牛来，…」。He牛拍着惊，青狂走，二个jiok一困，掠无牛。龙--a讲，明á chài叫阮海--a来斗围。

透早ham in后生清海--a、厝边大钟来掠牛。这回hia̍h á顶pak面巾，bē输giâ 妈祖扛轿，按算beh大hut一困。发--a又koh手--里一把甘蔗尾、一khûn蔗索，khiā hia唱：「牛来，…牛来，…」牛母行óa--来，近视看着牛索，cha-hng拍着惊，oat--leh又 koh走。四个人taⁿ好--a作一困jiok。随tō pháiⁿ天siàng大雨，pin-pin piàng-piàng,liâm-mi土脚路糊á moâi,人kap牛浆浆，牛头、牛尾溜khah滑he ho͘溜，掠thài会tiâu!发--a hoah：「牛kiáⁿ先围！」Chhîⁿ óa--去，二个ián头，二个koāi脚，phiâng…一-下siàng tī土脚。赶紧牛索liù来捆，四脚pa̍k粽，捆作一kōaⁿ。Hiⁿ-hiⁿ hàiⁿ-hàiⁿ，摇摇háin-hián扛上tho͘-la-khuh。牛母看牛kiáⁿ hō͘人扛上车，khiā hia háu;「m̄-môa,…m̄-môa,…」头犁犁，soah来cheng tho͘-la-khuh。牛母有kǹg-phīⁿ，发--a giú牛索，tioh牛phīⁿ。另外hit 3个ùi后面sak牛kha-chhng，按呢sak一下thōm一步，舞一晡才上车。

转来到the̍h-á,he牛原在钉脚m̄行。一个tio̍h牛phīⁿ，三个sak牛kha-chhng，一枝竹槌á ná扛ná hoah：「牛行，…牛行，…」Tú好阮阿公ùi hia过，óa来看牛，牛也kā看。阮阿公讲：「赶紧，龙--a m̄通扛牛。」龙--a应：「牛pháiⁿ tio̍h教示。」阮阿公讲：「牛母有身。」龙--a惊一tiô,taⁿ好--a，买一只送一只。竹槌á放--leh，kā牛讲：「Ai-ioh，我m̄知你牛á有身。…清海--a，紧去割一把蔗尾来饲牛。」阮阿公so牛phīⁿ，giú牛hīⁿ来嘴边，m̄知nauh 一句啥物好话，he牛母尾á sut--一-下，tō起行。阮阿公看牛kiáⁿ倒tī土脚，四脚pa̍k粽捆一kōaⁿ，规身躯浆糊糊，问：「龙--a，che牛kiáⁿ作pháiⁿ犯啥罪？」龙--a讲：「Ah to狗怪m̄行。」阮阿公讲：「你四脚kā pa̍k一kōaⁿ，khiā to bē khiā,beh按怎行？紧tháu--开！紧tháu--开！」索á tháu开，牛á hu̍t--一-下khiā --起-来。二蕾牛目掠阮阿公钉，雄雄hīⁿ á gia̍h直直，尾á khiàu koân-koân,头犁犁，chông--leh tō jiok来beh tak。阮阿公若像早tō知，闪一下身，koāiⁿ一枝脚，牛á siak tī土脚。He牛翻身peh--起-来，又koh jiok来tak。阮阿公伸一枝脚，牛á又koh koāiⁿ tī土脚，四枝khōng脚khiàu｡翻身liòng--起-来，气kah目睭红ki-ki、血狮狮。M̄认输，「m-mô͘｣一声，又koh chông--来。Ná知又koh koāiⁿ一下，siàng tī土脚喘。Tok强peh--起-来，khiā hia thó͘-khùi,雄雄头垂--落，嘴nōa直直tin，soah定定chhāi hia，无koh来jiok。阮阿公看牛m̄来，骂一句：「你牛青蕃！」进前一步，牛á退后一步，进前二步，牛á退后二步，直直退到竹抱脚，无位通走。阮阿公行óa--去，一枝牛hīⁿ tioh--来，好礼kā问：「Taⁿ你beh koh狗怪？」牛á m̄应，头chhih-chhih，尾tūi-tūi,四脚phi̍h-phi̍h-chùn,强beh un--落-去。

Hit暗the̍h á内lin-lòng叫。透早起来巡，一脚a铅桶，chàm kah mi-mi mauh-mauh，昨暗m̄知tó一只恶牛发性地！kā看，牛母、牛kiáⁿ拢ku tī竹抱脚hioh困。龙--a竹槌gia̍h--leh beh去问牛。Tú好阮阿公来，叫--伊：「龙--a，牛á有乖？」龙--a应：「牛pháiⁿ，一脚a铅桶chàm-chàm破。」Ná讲ná开篱笆门，犹未赴关，he牛á已经冲--出-去，头无回，脚无停，直直chông,khah惨是牛蜂钉着牛lān-pha。直透chông到大路尾，才停脚hioh喘。龙--a ná hoah：「你这只恶牛！」Gia̍h ná jiok。阮阿公kā giú--leh，讲：「Che牛犹细汉，用讲--ê,mài用扛--ê｡」「用讲--ê?！牛伯--a，你gâu,你去kā伊讲。」Che牛母看牛kiáⁿ走--出-去，óa来篱笆看。阮阿公一枝牛hīⁿ giú--来，嘴边细声nauh一句，m̄知讲啥好话，he牛嘴舌thóng tn̂g-tn̂g来chūiⁿ伊ê手，尾溜ná ia̍t,行来大路头，大声叫：「m-mô͘,…m-mô͘,…」牛kiáⁿ听着牛母叫，头giâ--起-来，khiā hia想一晡。He牛母koh叫，雄雄牛kiáⁿ头犁--落，四脚相jiok koh chông倒转--来。龙叔--a惊牛tak，bih tòa篱笆后hoah：「闪！紧闪！」阮阿公作伊khiā hia pok薰。He牛kiáⁿ顾chông无顾看，chiⁿ着牛母kha-chhng，差一sut á poa̍h倒。头àⁿ--落-去，tōng牛母pak肚，beh suh奶。牛母m̄ hō͘ suh，作伊行。牛kiáⁿ tòe后壁jiok，chông入来the̍h á内。这时龙叔--a ùi篱笆后探--出-来，问讲：「牛伯--a，你是kā牛母讲啥好话？」

古早罗汉内里门chia，山内龙眼、soāiⁿ á种真chē｡阮阿公少年ê时山内作sit种果子。阮阿妈讲：「少年ê时外缘投--leh，kan-na伊一个胡须，大家拢bat--伊。」

Hit chām当热--人，这日tī山内hō͘牛tak--着。「Thài会hō͘牛tak--着？」「Hioh--lah。阿福伯--a hit只老牛káng tak--着。」「老牛káng pháiⁿ性地？」「M̄是，牛káng拍着惊。」「拍着啥物惊？」「恁阿公，hit日过年，tī山内放炮á｡」「山内过年放炮á hō͘啥人听？」「M̄是beh hō͘人听。Tō是惊人听--着，才去山内放。」koh kā问，过来嘴soah thīⁿ--起-来，拢m̄ koh讲，kan-na应：「恁阿公、铁齿koh头壳tēng!」

走去问阿公：「你少年胡须足缘投？」伊笑笑--a应：「恁阿妈kā你讲--ê?」「阿公，你tī山内放炮，beh hō͘啥人听？」「恁阿妈kā你讲？」我摇头，「伊讲你铁齿koh头壳tēng｡」伊一枝粗手若铁杷，牵我树á脚坐。「来，阿公讲hō͘你听。」这时中昼日当khiā,伊hia̍h á汗直直sôe,瓜笠á the̍h tī手--里ia̍t｡「M̄是山内放炮，是去试炸弹。」「是按怎beh试炸弹？」「Beh去炸电塔。」「啥物电塔？」「Hit阵咱chia山内入去，有一枝军用ê无线电塔。」这chām新闻拢teh报，美国恐怖份子炸大楼。「你敢是美国恐怖份子？」伊起爱笑。「M̄是恐怖份子，阿公是反对蒋介石份子。」「蒋介石是啥人？」讲tō是阮学校内拜ê蒋总统。「蒋总统？你是按怎beh反对--伊？」「伊真pháiⁿ。」薰the̍h出来pok，koh讲：「实在真pháiⁿ，人世间ê魔鬼。」「总统作无好，thài无爱选举hō͘伊无tiâu?」阿公hàiⁿ头，若像beh笑koh笑bē出来，讲in hit时无选举。Che我想无，若是无选举，总统按怎来--ê?「伊按怎足pháiⁿ？」「Thâi真chē人，掠真chē人，kā台湾人准牛马驶。」「阿公，阮学校讲蒋总统上gâu｡」阿妈讲阿公铁齿koh头壳tēng,敢是这个关系？

「牛káng tak tī tó位？」伊裤脚le̍k--起-来，脚肚乌乌一大khî,脚肚肉siah一半，tō是按呢行路páiⁿ脚。「牛pháiⁿ性地？」「牛听着炮，hiahN着惊，起牛疯，来jiok阿公。」「Ah来--leh？」「Ah来阿公青狂走poa̍h倒，hō͘牛tak。」「Ah来--leh？」「Ah来阿公脚好了，去chhōe牛，kap伊参详。Kā伊讲，牛--a，我宝--a kap你仝款，hō͘人作牛款待，kǹg-phīⁿ拖leh行，你敢无看--着？据在人beh掠bêh thai。Taⁿ chit-má,我宝--a m̄愿作牛hō͘人欺负，beh来去pōng电塔，kā in教示。宝--a试炮pōng大声，牛--a，你m̄通惊。…你ài知影，宝--a kap你仝款，咱拢是牛，…」Chhōe牛讲几lōa摆，hē牛顾食草，m̄知听有--无？

「Ah来--leh？」Ah来阮阿公有一日ùi牛灶过，外口一只牛pa̍k tī牛khit，m-môa,…m-môa…，teh叫。He声真熟sāi,阮阿公kā看，taⁿ怪--a，tō是伊，阿福伯--a hit只老牛káng｡Ah thài会m̄知死来tī这款所在，等beh hō͘人thâi?Óa去问牛：「Chia啥物所在你敢知？Thài会来tī chia创啥？」牛伸舌来chhūiⁿ伊ê手，目睭teh讲：「我kap宝--a仝款，作牛kǹg-phīⁿ，hō͘人掠，hō͘人thâi｡」阮阿公惊一tiô,紧入去牛灶chhōe头家，问讲：「石--a，你外口hit只牛，敢m̄是阿福伯--a ê?」「Hioh--lah，内面chín无êng,小等tō轮着伊。」「Liâm-mi teh beh thâi?」「Ah无敢beh chhāi hia拜公妈？」阮阿公着急，kā参详：「石--a，che牛老--a，也无作啥物pháiⁿ，犯啥物罪，sán kho̍k-kho̍k无油无肉，thâi也无利，khah输来卖--我。」现金tu hō͘伊，牛牵转去山内放生食草。过--来kap牛上熟sāi,soah学会晓听牛话，mā会晓讲。

结局beh 40冬前--a，阮阿公无去炸电塔，教示蒋介石。因为伊进前试炸弹，取炮心作炸药，hit chām炮á买siuⁿ chē,卖炮--ê嫌疑，惊连累着，去密告。所以未曾去炸tō hō͘蒋介石ê jiàu-pê-á掠--去。判15冬，若牛á关10冬，蒋介石死ê时才「大赦」放--出-来。

「阿公，我敢会使骑牛á kiáⁿ？」「你beh骑牛，ài先去问--伊。」「Beh按怎问牛？」「先kap伊作朋友，kap人仝款。」「阿公，你教我讲牛话。」伊一枝粗手若铁杷kā我ê肩胛掠--leh，「m̄-mô͘,…」一声足大声，哈、哈、哈直直笑，笑kah khuh-khuh嗽，笑kah流目屎。