《陈雷文选》

 | | | 转寄

美丽世界

作者 陈雷 2008.10.19

伊phak tī土脚ná chhê,若一只近视ê四脚水鸡，面tu tī电视头前，tòe紫薇小姐ná唱「爱你爱到chia，咱已经无相欠，枉费一场青春梦，…牵你ê双手，m̄愿kā你放，m̄甘看你目kho͘红，…」 这日下晡，南都电台kha-la-o͘-khe比赛，chia ê歌伊拢会晓唱。Kap缘投--ê规日关tī房间内，叩应听唱歌，上盖欢喜。紫薇唱soah，节目主持人勇哥讲：「各位观众朋友，请大家kā伊批分。欢迎电话khà--来，先报你ê大名。」敏智早tō电话mo͘h tī pak肚边，khà入去讲：「我是铁人。」这个「铁人」tō是伊家己号ê叩应ê名。电台ê人拢bat--伊，知影「铁人」是“残障”，双脚bē行，双手也无啥好势，又koh目睭内障雾雾，看bē真清楚。见若伊叩应入--来，勇哥tō刁治工kā观众特别介绍。这个「铁人」虽然“残障”，人真勇敢，意志是铁拍--ê,mā真gâu唱歌。勇哥问：「多谢铁人。Tú-chiah这位紫薇小姐唱了有赞--无？」「真赞，真赞。」「Ah你beh kā注几分？」「100分！」这个紫薇小姐看--起-来无紫也无薇，hit个名m̄知按怎号--来-ê?上无beh 50--a，hâ一领phòng裙红phà-phà,bē输穿一枝大枝雨伞thí开开，khàm到脚头u。头毛电作一球，若鸟á作一个siū tī hia，头壳顶pa̍k一只chio-chió,欢喜敬礼：「多谢铁人，多谢大家。」敏智讲：「这条歌，我mā会晓唱。」勇哥讲：「按呢敢会使请铁人唱一摆，hō͘大家欣赏？…来，各位观众，请欣赏，铁人唱…初恋梦。」音乐tō tân,敏智kā电话tu tòa嘴边，ām-kún giú直直，大声tō唱：「爱你爱到chia，咱已经无相欠，…当初有chiù-chōa,bē tàng来照希望，…只有笑笑假轻松，若提起思念hit个人，青春ê恋梦化作一枝白头鬃。…」ná唱ná拚汗，有听着缘投--ê teh叫：「赞！赞！」雄雄头壳乌暗hîn,脚手bán ân,规身躯kiù筋kho̍k-kho̍k chùn,目睭仁吊koân,tō m̄知人--a。

M̄知昏去外久，hīⁿ空内人teh叫：「赞！赞！」还魂过--来，tō是缘投--ê khiā tī电视顶teh hoah。佳哉kā伊叫醒。裤底tâm chiuh-chiuh，才知影koh再羊hîn发作chhoah尿。顶礼拜mā一摆，无力thang爬sóa,phak tòa土脚等，外面渐渐落暗，车声lú吵，koh无外久，阿母市á菜卖soah tō会转--来。

听着有人开门，khàng去房间门口大声hiu：「阿母，裤tâm--a。」阿兰袋á khǹg--leh，入来房间看，侥幸--a，土脚tâm lok--lok，规房间ê尿味，这日天气hip，窗á koh无开，骂伊：「Ah你门关tiâu-tiâu是teh创啥？！kan-na热mā死！」缘投--ê tī电视顶叫：「赞！赞！」「赞！赞啥？…赞你ê死人！」阿兰kā hat，伊tō tiām--去。The̍h裤来换，thǹg-pak-theh，kā敏智kap缘投--ê吹电风。

Koh来soah m̄叫m̄讲话。敏智想讲，是m̄是hō͘人骂，心情bái?唱歌hō͘伊听，soah颠倒害，起嗽兼làu屎，m̄食也m̄ lim。无几工tō khōng脚翘倒--落-去，一kho͘死giān-giān｡阿兰kā死鸟á the̍h出去tàn pùn-sò,房间内chhun敏智家己一个，想无伴，beh唱歌，khà电话去电台，kā勇哥讲：「我beh唱歌hō͘缘投--ê听。」勇哥问：「缘投--ê是啥人？」「我ê ka-lēng,伊昨hng死--去。伊上爱听歌。」「按呢真无彩。Che ka-lēng kap你外久--a？」「Beh十外冬--a。」「按呢真伤心。…Ah你beh唱tó一条歌？」「＜我beh想你＞。我家己写--ê｡」「Hai，各位观众朋友，铁人beh唱＜我beh想你＞，hō͘伊ê朋友缘投--ê｡」敏智唱：「…你是我ê影，我是你ê伴，…咱2人相陪，…你讲话，我唱歌…唱歌hō͘你听。…你是我ê形，我是你ê影，咱二人相tòe,…你会飞，我bē行，咱等候…等候hit一工，好天…好天出去外口行。…」

暗头á有人送鸟来，tō是观众朋友经过电视台送hō͘敏智--ê｡有giap一张kha-lo̍h,写讲：「铁人，我是张明光。这二只鸟hō͘你作伴。我ê阿母讲，chit-má ka-lēng拢chhōe无。」敏智khà电话去电台，kā张明光说多谢。一个查某人叩应入--来，讲伊是张明光ê老母，hit二只十姊妹是张明光饲--ê,in明光12岁，mā是坐轮椅。

这对十姊妹tī笼á内m̄叫也m̄食。敏智想，是m̄是teh想厝无伴？鸟笼á拍开放--出-来，唱歌hō͘ in听。He鸟m̄听歌，跳起leh窗á口tō飞--出-去。仝这时阵，概成雄雄房间内有一个物件也tòe鸟á飞--出-去，bē输大地动厝崩--去，规间房间tâi tī土脚底，暗眠摸目睭无看，hīⁿ-á无听。自来m̄-bat有过这种龟怪ê khi-mo͘-chih，全世界chhun伊一个人hit款ê生份孤单。

Phak tī土脚一晡久无tín动，才koh听着电视tân,tú好teh放保力达ê广告。Hit个百货公司ê小姐，长头毛，薄衫短裙，双手抱一罐保力达，嘴角菱角笑，讲话ùn着蜜，七月荔枝当sai-nai：「保力达，顾肝保脑上价值，老人gín-á第一好，查甫查某盖有力！…我爱保力达，你爱保力达，…大家来lim保力达！」这个保力达广告，伊上爱看，见若看着保力达小姐，bē输lim着二罐保力达，规个人tō拢有力。爬土脚去gia̍h电话，khà入去南都，kā勇哥讲：「今á日是特别日。」「啥物特别日？」「我ê查某朋友生日。」「恭喜！恭喜！…请铁人介绍一下，你ê女朋友。」「伊女中毕业。Chit-má tī新光三越食头路。」「Ah恁是按怎熟sāi --ê?」「百货公司遇着相bat --ê｡」「成实有缘tō会来相会。…恁熟sāi外久--a？」「Beh 2 冬--a，今á日伊生日，我beh送伊一个礼物。」「你beh送伊啥物礼物？」「我唱一条歌送--伊。」「多谢铁人。你beh唱tó一条歌？」「我唱＜爱来爱去＞。」「来，咱南都ê听众朋友，请欣赏铁人唱＜爱来爱去＞，送hō͘伊ê女朋友作生日。」

「Tu-lu,Tu-lu,Tu-lu,有人为着情，打扮súi-súi,想着心爱hit个人笑微微，…mā有人为着情得勇气，爱这个天使注该tō是你。…」目睭kheh--起-来，有一个查某gín-á khiā tī伊面前，té衫薄裙，身koân 165公分，体动56公斤…。Ná唱肩头ná轻松，心头lú欢喜，外口车声来来去去，这个无êng满足ê美丽世界，渐渐，渐渐落暗--来。

「夭寿--a，电视顶按呢乱乱chōaⁿ！…爱来爱去，爱你ê死鬼á ！…你ê查某朋友生日！…Taⁿ好--a，你是teh起khong-khám hioh？」Hit暗阿兰大声kā骂，因为厝边菜头嫂有看电视叩应，敏智唱歌kā查某朋友作生日，刁治故来问阿兰：「恁敏智无简单neh，tiâng时也交一个查某朋友？…莫怪--lah，少年家缘投á sàng｡」阿兰问：「Tó一个查某朋友？」「Ai-ioh，你m̄知？爱来爱去hit个。…今á日生日，恁敏智唱歌hō͘伊。」夭寿死gín-á,恁pē beh 60--a，也m̄-bat生日kā恁pē唱一条歌！Taⁿ这个死查某gín-á…」「阿兰--a，tiâng 时beh娶新妇？…咱厝边帖á tio̍h会记放--一-张。」正khau倒siah，阿兰pháiⁿ势面红，烦恼面青，受气面乌，转来骂敏智tú-siàu｡你这个死gín-á,电视顶kā恁pē乌吐白吐，画la-liân,成实bē见bē笑。你这扮，也bē照镜看māi,…连一只ka-choa̍h to免想，啥物查某朋友，爱来爱去作生日！。」Tiām-tiām据在老母骂，一大堆念soah，才应：「Che是秘密，你m̄知。」门tō关--起-来，bih tòa房间choān电视，又koh保力达teh广告，…老人gín-á第一好，查甫查某盖有力，…伊tòe leh唱，我爱保力达，你mā爱保力达。

Chit-má咱社会进步，有设一个「残障日」，来照顾破相(siùⁿ)ê人。所以南都这日专工派车来载敏智kap阿兰去电台。南都黄董事长亲身欢迎，kap in上电视，现场宣布，铁人当选今年度「南都最热心观众」。今á日「残障日」，南都beh送铁人一个特别ê礼物。请勇哥sak--出-来， 一台金siak-siak全新ê电动轮椅，四个lián-á圆圆，一个坐位爽爽。勇哥抱铁人坐轮椅，教伊用手驶。一手pan--leh，he轮椅tō lu来lu去，头前后壁，正旁倒旁，滑溜溜无声无说，bē输teh lu冰，拢m̄免人sak。阿兰欢喜kah nâ喉that--起-来，bē讲话。 过--来敏智家己驶轮椅出门，lu chia lu hia，驶紧驶慢，自由自在，m̄免人陪。阿兰tī轮椅后壁pa̍k一枝竹chhôe á lò-lò长二人koân,顶面结一个红色三角旗。沿路驶，he chhôe-á tō沿路hàiⁿ，旗á iāⁿ-iāⁿ- 飞。过大路，人kap车看着，拢会细字先让伊过。这日驶来到东宁路口，tō是咱东区闹热ê所在，车lìn-lòng 行，人ia̍p-ia̍p是。Tī hia teh想无，beh买一罐保力达，m̄知ài ùi tó一旁去？想beh问--人，看着一个少年查某gín-á,电头鬃，踏koân屐，薄衫té裙，khiā tī路口看来看去，概成teh等人。Koh龟怪--a，嘴ná念头ná tìm,见若车驶--过，伊tō kā ia̍t手。过路人ùi伊身躯旁过，目尾使--一-下，头壳gia̍h koân-koân,目睭掠直直，khi-khi kho̍k-kho̍k向前行，概成刁治beh hō͘人知，in拢无看着伊。Hit个查某gín-á,头壳kho̍k-kho̍k tìm,目睭se̍k-se̍k看，嘴--里cha̍uh-cha̍uh念，概成四kho͘围拢无人，kan-na伊一个，thǹg 光光 tī hia。

Lu óa--去，有听着伊teh讲：「…日本--lah，…日本买tō有，…泰国m̄-bat去，…」敏智问伊：「小姐，借问--leh，…」查某gín-á讲：「少年--ê,来，…hō͘丽君kā你敬--一-杯，…」现现目睭大大蕾有teh看，目神chhāi-chhāi 无tī hia，概成无看着伊。敏智应：「我bē晓lim酒。」一只乌头á Bian-juh驶--过-来，停tī路口等红灯。伊tō kā ia̍t手：「A-li-ga-to͘h，…hái,…o͘-ne-gai si-ma-suh，…hái …」敏智问：「小姐，你teh chhōe啥人？」查某gín-á gī-gī笑：「少年--ê缘投á sàng,…你是beh kā我灌hō͘醉是--无？…丽君海量lim bē醉，…」用手去拭面，胭脂hôe kah hô͘-sà-sà｡敏智pháiⁿ势，轮椅倒退lu beh走。查某gín-á kā hoah：「…yo͘ like？…Ok？…yo͘ like？…」伸手beh kā giú｡

想拢无这个查某gín-á是啥人？伊ê名敢是丽君？为啥物khiā tī hia ia̍t手？隔转日，好奇koh驶轮椅去hia看。原在khiā tī路口，kô͘胭脂，薄衫té裙，嘴--里se̍h-se̍h念，无êng teh ia̍t 手。连续3、4工拢仝款。到尾--a，概成也小寡会认--得-a，路口看着敏智轮椅竹chhôe-á摇，红旗á hàiⁿ，也tō ia̍t手 ：「…少年--ê缘投á sàng,你是beh kā丽君灌hō͘醉是--无？… yo͘ like？…」原在，过路人拢无看--着也无听--着，青青cho̍h-cho̍h ùi hia过。

M̄-kú事实in有看--着，也有听--着。因为车祸了后，真chē人按呢解说，in拢真确实，是这个siáu查某先看着对面hit枝竹chhôe-á ló-ló长，红旗á tōng-tōng hàiⁿ，雄雄chông--过-去；in有看--着，mā有听--着，伊teh叫，he，少年ê缘投á sàng,…对对冲红灯，tú好车chông--过-来cheng--着。菜头嫂mā kap人chèⁿ，讲伊mā有看--着，m̄是车m̄-tio̍h,查某gín-á刁工--ê,刁治故chông去hō͘车tōng｡Chia ê问题，一人讲一款，taⁿ也无tàng去对chi̍h--a。报纸、电视报一大堆，南都mā有hip相--出-来。这个siáu查某，to也生作有súi｡有人讲，kan-na看相bē准。Té衫薄裙，头壳后khok一大堆血，tò͘着头鬃，流--过-来，kian tī pit chōa ê点á胶路面。

敏智kā旗á pak掉，关tī房间内，几lōa工无出--去，电视也无开。家己专心听丽君讲话，少年--ê缘投á sàng,… 你beh kā丽君灌hō͘醉是--无？…m̄知为啥物，伊beh khiā tī hia ia̍t手？总--是伊chit-má知影，hia ê过路人，目睭掠直直，概成拢无看--着，m̄-kú拢有看--着。大概kap伊仝款，无去想--着，有一工，雄雄beh冲红灯，hō͘车tōng｡

Hit个龟怪ê khi-mo͘-chih，亲像地动厝崩--去，kā伊ê ām-kún束ân-ân,tâi tī土脚底bē喘khùi,全世界chhun伊一人，无听--着也无看--着。电话gia̍h--起-来khà叩应，讲我是铁人，我beh唱歌。「今á日你beh唱tó一条歌？」「＜爱来爱去＞」「多谢铁人。Ah最近好--无？」「Mā是真无êng｡我ê查某朋友ta̍k日下班拢来陪--我，驶轮椅去公园散步，…阮chia这个公园chit-má花开足chē｡」伊hit个美丽世界，不时真chē公园拢teh开花，无限季节，随时想--着tō开。