《陈雷文选》

 | | | 转寄

飞星

作者 陈雷 2008.07.02

阮二姊一世人相信运命，人生万事早tō注定，据在你外gâu,hō͘你bē计较--得。听伊解说，概成相当有理，拢是亲身ê经验。

盖常听着伊讲hit粒飞星，一chōa光光，ùi东向西，一目nih niâ,决定伊一世人。有信ê人听kah kàiⁿ头thó͘大khùi,概成看着神明显示奇迹，会学伊念：「注定--ê-lah，--注定--ê-lah。」阮二姊夫，伊读物理学ê人铁齿，不管听外chē摆，拢讲是tú-chhiāng--ê｡

阮南部寒--人，暗时天清，市内有时也会看着飞星。Hit暗去chhōe朋友，tú-tú好o͘-to͘-bái骑来到十字路口，beh oat正旁入去公园路。对对这时，头壳顶一chōa光光，直直ùi东向西，飞对天顶尾poa̍h无--去。阮二姊人迷信，看着飞星bái兆，随tō临时换路，马上oat对倒旁--去。Ná知koh骑半节路，雄雄巷á口chông一只o͘-to͘-bái出--来，对对相chiⁿ，cheng一下人挂车倒siàng-hiàⁿ，siak一下m̄知人--去。

醒--来，倒tī台南病院，阮母--a坐tī眠床边流目屎。阮大姊khiā tī hia，kap一个少年家teh讲话。「早tō kā你吩咐，o͘-to͘-bái细字骑。讲m̄听，按呢乌白chông!」母--a看伊醒--来，摸伊ê手tê,冷ki-ki，又koh háu｡大姊kap hit个少年家óa来看。阮二姊一个面siak kah乌青kek血，肿歪歪若一tè面龟，目睭thí bē开，嘴也bē讲话。有听大姊讲：「Taⁿ有醒--来tō无要紧--a。」

隔转日少年--ê koh来，kōaⁿ一笼五jiáu ê美国苹果。Hit chām美国苹果tú-chiah开放进口，贵kah若仙桃，有是人病kah差不多beh去--a，才甘买来食。阮二姊想，taⁿ害--a，m̄知cheng一下外伤重？！阮母--a kā少年家讲：「医生有来，讲无要紧。小寡脑震动，píⁿ á骨折二枝。Chhun--ê无伤害。」少年--ê一直会失礼。阮二姊话bē讲，用手比，才知影这个仓pōng ê少年家姓林，tō是伊骑o͘-to͘-bái来相chông--ê｡

这个少年家尾--a tō是阮二姊夫。后--来tī台南工学院，tō是chit-má成功大学教册。伊kap阮二姊行二冬了结婚。有一回去鹅銮鼻chhit-thô,台湾尾Pa-suh海峡ê乌天，hit暗飞星落雨，一阵一阵，飞来飞去，bē输teh放烟火。

二个人坐tī koân-koân ê海岸，阮二姊指he乌天讲：「你敢知？若m̄是che飞星，咱二个永远bē相遇熟sāi｡」二姊夫问：「是按怎讲？」才kā二冬前tī公园路口看着飞星ê代志讲hō͘伊听。二姊夫讲：「He飞星tō是chhōa你来chhōe--我。」二姊kā伊捻：「Bē见笑，是你来chông--我-ê｡」想想--leh，才问：「你hit暗o͘-to͘-bái青狂chông,是teh chông啥？」Tio̍h--lah，这项稀罕ê代志，伊拢犹m̄ bat kā人讲，人也m̄ bat kā问。这时，头hiàⁿ起来看天，星teh飞，gī-gī á笑，讲一个大秘密：「…我…着奖券，…」二姊kā chîn,叫是伊teh讲sńg--ê｡「真--ê?--ah你thài拢m̄ bat讲？！」「你m̄ bat问。」「Ah是着外chē?」「大奖--ê,…一万kho͘。」「ôa,莫怪你hit阵hiah大路，ta̍k日来病院拢kōaⁿ美国苹果。」二姊夫hàiⁿ头：「算bē合--lah。」「按怎算bē合？」「He一万kho͘，…kan-na苹果钱kap你入院ê费用tō无够。」二姊koh kā捻：「Bē见笑，啥人叫你假大路。」想想--leh koh问：「你敢bat koh再着--过？」「M̄-bat，一世人kan-na买hit一张，着hit摆。」二个人肩胛相the，伊笑，伊也笑，坐tī鹅銮鼻ê海岸，看大海顶面ê乌天，规片koân-koân-koân thàng去到无限，据在清凉ê海风吹，据在飞星光iàⁿ-iàⁿ，一粒一粒，一chōa一chōa,poa̍h无--去。「注定--ê-lah。....注定--ê-lah。」伊kā mo͘h--leh，二姊夫足细 声问--伊：「你敢知影？」「知影啥？」「Hit张奖券几号？」「…你敢犹会记得？」「定着mā会 记--得。」「几号？」「Kā你讲你mā m̄信。」「几号？」「A301207。」「301207，…？！…ah，…ah...」二姊夫tìm头，一字一字ná念：「民国30年12月初7，…」「ah .. ..ah.. ..he tō是…」「Tō是你ê生日！」「ah，…ah，…你thài拢m̄ bat讲？！」「你拢m̄ bat问。」伸手kā moa óa--来，讲：「Hit日，…我着这个大奖！」

二姊欢喜kah流目油：「注定--ê--lah，…注定--ê--lah。」m̄-kú阮二姊夫，概成che稀罕ê奇迹一sut á to无龟怪，明á chài日头会出--来，今á暗月娘beh hoa--去，自然te̍k来发生。伊读物理学ê人，一切照科学ê定律来说明，无信运命，无制造lo͘-ban-suh。「Tú-chhiāng--ê-lah。」伊认真kā伊解说：「Che叫作机遇率。发生ê机会是外chē,拢会算--得。我算hō͘你看，…第一，我kéng这张奖券，这组数字，tú-tú好是你ê生日ê机遇率外chē?…第二，这7个数字tú-tú好全部tú-chiàu,中hit个奖ê机会外chē?…koh再来，这张奖券又koh是你ê生日，又koh着一万kho͘大奖，二项代志同时发生ê机会外chē?…」 Ná念ná算，阮二姊直直hàiⁿ头，kā châm:「来，你beh算机会？我讲hō͘你算，看你外gâu算：我2月初6 hit日，hit暗hit个时阵，来到hit个路口，tú-tú好gia̍h头，看着hit粒飞星，ùi东向西，直直飞--去，hit个机会外chē?…咱地球几lōa亿万冬，tú-tú好hit个时阵，se̍h来到hit位，hit粒飞星，几lōa亿万冬，也tú-tú好hit分hit秒飞来到hit个所在，tī hit目nih，ùi东向西，直直飞，phoa̍h--落-去，hit个机会外chē?…这个，…你先算看māi｡」二姊夫hō͘伊问一下soah gōng-gōng,m̄知beh按怎算。Hit个机会实在比着奖券koh khah茫茫渺渺，差不多无可能来发生。M̄-kú伊m̄认输，giâ物理学ê大炮出来pōng:「你无读物理学m̄ bat，量子力学有一个基本定理，叫作无确定定理。Tī量子ê世界，无一项代志是百分一百完全确定。每一项代志ê发生拢是统计上ê一个机遇率niā-niā｡连早时日头出--来，暗时月娘hoa--去，mā是统计上ê机遇，m̄是百分一百。」

Taⁿ这节翁某话尾á m̄知按怎结束。不过，原在阮二姊相信运命注定，二姊夫坚持机会tú-chhiāng｡每日大大细细ê世间事， 想着tō khioh来相chèⁿ。二人定定为着这个困难ê问题辩bē收soah。其实这二种讲法，拢bē tàng kā伊证明，也bē tàng kā伊否定。差不多kap讨论宗教、哲学仝款，beh thài chèⁿ会soah，有一个结论？而且人事以外ê宇宙亿亿万万、大大小小ê现象也是仝款。计算起--来，每一项产生ê机遇律hiah-ni̍h微小茫渺，差不多是零，理论上差不多无可能发生，m̄-kú一项一项拢确确实实来发生，变作现现在在ê事实。不过我有teh猜想，tú-chhāi机遇率这个原则，会使ùi另外一个角度来理解。亲像二只o͘-to͘-bái tī hit个地点，hit个时间相chông,发生ê机遇率虽然真小、真小，m̄-kú ùi另外一个方面来看，这二只o͘-to͘-bái tī别个地点、别个时间「无相chông｣，「无发生」ê次数已经真chē､真chē,差不多无限chē--a。所以虽然tī hit个地点、hit个时间相chông ê机会真小真小，mā是会来发生。用这个想法来看，宇宙大大小小万万事拢有可能发生，但是拢无百分之一百一定会来发生。

阮二姊用运命来解说，ta̍k项代志拢先安排好--a，一定照按呢发生，表示万事有一个「全能」ê因素teh决定。但是这个「全能」ê因素，按怎来决定「发生」kap「无发生」，咱mā是完全m̄知，敢m̄是？阮二姊夫讲是机遇率，一切自然发生，beh发生tō发生，无任何附带ê条件、因素。Che mā是等于「完全m̄知」，敢m̄是？结局，咱人「知」kap「m̄知」这二个神秘siâⁿ--人ê境界，概成tō是tī chia画一chōa乌白ê界限线，bē tàng超过。

阮二姊夫中年过了，性情渐渐改变，年岁lú有giâu疑心lú重，kap阮二姊tauh-tauh bē和冤家。尾--a，二个人作伙beh 30冬了后分开离婚。阮二姊人生坎坷，一世人失意ê事真chē,作人giám-ngē,m̄-bat听伊怨叹。伊ê大汉后生，ùi美国Harvard大学医学院毕业了，第二冬着恶性脑癌，六个月内过身，犹未有事业，犹bē娶。Ùi破病到过身，阮二姊m̄ bat sôe一滴目屎水。到尾--来，化疗siuⁿ艰苦，人chàn bē-tiâu,kā in母--a要求，mài koh治疗，阮二姊mā是答应。M̄是伊心bē痛，bē晓艰苦，猜想起--来，是伊相信命运，人生ê欢喜、痛苦拢khǹg入去「命运」ê铁kheh á内底，收--起-来，m̄免计算。所以外面看无。一直到出葬hit日，葬礼soah，棺材beh扛--出-去hit一目nih，内面压力siuⁿ大，作一下pòng破，雄雄ôa一声，大力放hō͘哀，哀kah无khùi无声，心肝pak内碎糊糊。

Koh无几冬，伊家己也着癌症。经过化疗，随koh再发thòaⁿ散，无一年tō过身。上尾，食道that--起-来，bē食bē lim，kā医生要求停止治疗。倒tī眠床，食mo͘-hui止痛，规日kan-na sip几嘴á水kap果汁。按呢前后足足倒38工，生命ê火若té-té ê腊条liâu-liâu-á to̍h,lú to̍h lú细pha。最后chhun皮kap骨，才拢总hoa--去，无声无说，灵魂离开痛苦ê身体，无滴一粒目屎。断khùi hit日，2月初5，kap 35冬前tōng o͘-to͘-bái hit日差一工，m̄-kú若是算台湾时间，tú-tú好仝hit一日。

人生万万事，或者运命注定，或者机会tú-chhiāng｡若认真追究，敢m̄是咱上盖m̄知，上盖bē tàng知、又koh上盖爱beh知ê问题？这个无限量ê未知kap m̄知，亲像hit个台湾尾鹅銮鼻暝时ê大海顶面，乌mà-mà ê koân天，神秘无限。雄雄有一粒飞星飞--过，一chōa直直，光光iàⁿ-iàⁿ，ùi东向西，真是光彩美丽。一时á niā-niā,难免会想起、数念，kap阮二姊ê一生仝款，不管注定抑是tú-chhiāng,bē输一粒飞星，上加mā是影--一-下。过去了后，lú khah hō͘人谦虚感受，思考hit个 tiām静gia̍h koân ê乌天，代表无限ê未知，永远bē tàng超过。