《《陈夫人》日译台e5台湾小说 第二部》 |
 |
 |
|
 转寄 |
《陈夫人》第二部 亲子 第七章
作者 庄司总一着 赖永祥指导 林俊育台译 2016.12.18
郭万春kā工场设计图ê蓝图tī桌顶展开，热心teh做说明。
总是，清文对细节ê检讨无真致意，因为比前设计师所讲ê预定规模khah大hō͘ 伊感觉遗憾。郭万春讲事业若beh扩展，chit-ê面积无法度排三条生产线ê机械，m̄-koh, 清文ê意思是讲将来ê tāi-chì以后chiah讲，目前两条生产线就有够额。
「顶pái我有对lín讲过，起初是计画合资设厂，因为种种ê原因soah变成我个人独资，预算也变少。若ē-tàng照我所想ê来做，mā是bē-bái。规模细koh有特色ê公司是我设立公司ê原则。」
就án-ne, tú-chiah一直无讲话ê游德仁oá来赞声讲：「无lah, 先生ê计画绝对bē-tàng讲细，kan-taⁿ农场ê用地to有....」 游德仁讲到chia就有所顾虑停落来。伊顶年chiah高等农业学校毕业，无社会经验，算是小心看头看尾ê青年，五官四正，胸坎á厚，有cha-po͘人ê气派，一点á to无粗俗ê感觉，koh是用心打扮ê人。
预定负责工厂管理ê郭万春kah游德仁完全倒páiⁿ，伊无像游德仁án-ne头毛抹油。今后准讲双手bak-tio̍h机器油，干燥ê长头毛mā一定chhut-chāi它散乱。伊胸坎á薄板，无肉ê手kho͘，手掌背面ê青筋浮现，面色苍白。M̄-koh, 不管甚么时tú-tio̍h伊，伊lóng无衰微ê款，带一副近视度数真深ê目镜，tùi目镜后活lèng-lèng ê目chiu，不断映（iàⁿ）出tùi心底流露出来ê热情。
「先生讲无希望规模大，m̄-koh，我认为tio̍h ài tùi某种程度ê规模来开始chiah好。因为凤梨事业会thàn钱，大家lóng teh注目，渐渐teh兴旺起来。听讲最近日本国内ê大公司mā开始teh siàu想，若是chit种大资本ê公司入内，目前在地chiah-ê ná雨后春笋teh发展ê小公司，就无法度竞争来消失去，á是被大公司收买去。所以，准讲设立一间kah-ná珠玉hiah出色ê小公司，kám m̄是会去hō͘ 大涌吞灭？」
郭万春用非常liú掠ê日语讲话。台语已经成做kan-taⁿ日常用语teh用，小khóa科学ê论述á是微妙ê表达，现今ê少年人已经无法度用台语来讲。总是，语言kah衫裤仝款，bē-sái siuⁿ过朴素，mā bē-sái siuⁿ过华丽。若是han-bān讲话，会hō͘ 人怀疑头脑无内容；若是讲kah siuⁿ过好听，会hō͘ 人轻浮ê印象。若m̄是讲家己母语ê场合，hō͘ 人koh khah有chit种ê感觉。所以，清文对chit位青年ê日语hiah好真感心，m̄-koh mā有讨厌ê感觉。
「总讲一句，先生，这是大规模发展mā bē失败ê事业，我tī以前ê公司工作过，我真了解。无论如何，凤梨ê事业有利纯—实在是siuⁿ过有利纯。」
郭万春露出带有轻视kah讽刺ê奇怪冷笑，m̄-koh，新点to̍h ê薰烟随掩盖伊ê表情。「利纯」chit-ê词一开始到taⁿ已经提起几nā pái, 这是伊对以前工作ê公司á是一般榨取劳工ê资本家ê讽刺。因为清文知影chit-ê青年出身sàn-chhiah，soah感觉连家己mā hō͘伊列入去伊所指ê资本家内面。因此，若m̄是郭万春回复伊原本活泼明朗ê面色，koh补充下面ê话，清文一定会陷落心情无爽快。
「世间人无论如何lóng是án-ne teh看chit-ê凤梨事业，án-ne, 先生ê产业合理化kah劳资协调ê理想主张，世间人无一定会了解。世间lóng是teh相抢食，难免会tú-tio̍h碰壁，m̄-koh，tùi社会ê推测来看，mā是有成功ê可能。」
陈清文是基督徒，koh是教会学校ê老师，伊beh创办事业，确实会hō͘ 人有「竹篙tàu菜刀」ê感觉。而且，伊ê小弟景文是seng-lí界ê高手，世间人会认为阿兄mā想beh显露seng-lí ê胆识。清文当teh想讲，tī事业具体进行chìn前，伊tio̍h忍受世间人ê误解。Chit时，郭万春chiah-ê话引起清文内心ê共鸣。伊ê神情无卑屈，想啥讲啥，颠倒hō͘清文感觉khah好。
「总讲一句，咱koh来重新思考，kah农场ê配合mā tio̍h充分考虑chiah ē-sái。Tio̍h lah, 游先生，土质ê情形án怎？」
因为郭万春siuⁿ过无经过大脑to̍h讲话，游德仁心肝phi̍h-pho̍k-chhái, m̄-koh无ài显露伊ê不安，目chiu一直看客厅hiah-ê铺排。清文一下án-ne问，伊就惊一tiô oa̍t头过来。
「锰ê含量jóa-chē？」
「Ah, 有3%，有khah chē ê款....」
清文用手指尾lián伊厚厚ê嘴须，并无显出无欢喜ê面chhiuⁿ。M̄-koh，游德仁kah-ná有小khóa惊惊，无koh加讲话。郭万春却tī清文iáu未问起就先讲： 「Hit块土地kah-ná无适合栽种凤梨，土壤含1%以上ê锰，凤梨便无法度吸收铁分，án-ne to̍h必须掖khah chē铁剂，自然肥料费用会增加。」
总是，清文iáu未要求详细说明chìn前，游德仁无想beh家己积极讲出来。伊对陈清文ê高贵风采kah高等教养时时有被压倒ê感觉，m̄-koh，游德仁心内重重ê压力是清文好额ê财力。马赛克ê地砖，烂心木kui块桌面ê桌á，hō͘ 人感觉冷ki-ki ê无火大理石暖炉，kah-ná用含蓄koh深刻皮肤呼吸ê陶器，一面壁挂印度壁毯织机图案ê华丽壁毯....。Chit-ê客厅ê高贵不时都hō͘ 游德仁感觉被压倒，只要tī chit-ê人ê下面做tāi-chì，会比tī其它公司á是农业试验所khah koân ê薪水。游德仁警戒家己，m̄-thang有粗鲁á是无教养ê态度，致使伤害chit-ê头家ê感情。Á郭万春chit-ê人，是土直neh？á是大胆neh？竟然hiah-ni̍h无感觉生份teh大胆讲话，游德仁惊一tiô，伊想chit-ê人若m̄是真出色，to̍h是戆大呆。
因此，不管土质á是田园经营ê问题，lóng是郭万春tùi边á teh插嘴，致使han-bān讲出家己主张ê游德仁soah无讲话ê余地。
「Chit-ê人无beh讲出家己ê想法，真伤脑筋。」
郭万春讲chit款批评ê话，游德仁小khóa懊恼讲：「咱两人合做一个koh除二就会tú好。」
伊án-ne khau洗ê应答颠倒致使郭万春讲：「He, 游先生，án-ne无法度除lah，因为两个kah-ná是实数kah虚数。」
「Tó一个是实数，tó一个是虚数？」清文虽然知影郭万春所讲ê意思，却thiau工笑笑á án-ne问讲。
「Ah, 是tó一个？....总讲一句，chit-má ê台湾青年是实数ê款，每一个看起来lóng是除会尽ê面chhiuⁿ，m̄-koh，实际上真困难除尽。」
「Chit-má ê少年人确实变à。」
「内心ê不安kah摇动真严重，虽然tùi in ê面看bē出。」
「不安kah忧郁是青年ê病。人生ê年岁中间，青年期是siōng无健康ê时期，虽然这kah-ná是逆向ê讲法....」
「生理上有可能是án-ne，m̄-koh, 先生年轻ê时chūn kah chit-má ê情形无仝。Hit时是资本主义兴起ê时期，对未来有光明ê希望kah期待。Á chit-má neh....咱对现实ê问题一屑á办法都无，kan-taⁿ苦闷，无梦想，无ǹg望。」
郭万春消瘦ê面容iáu残留苍白ê微笑，m̄-koh，薄板ê额头浮出一条粗粗动肝火ê筋，显示出对现实非常不满ê款式。清文想beh压制伊ê激动，冷静对伊回应。
「Tio̍h koh khah苦闷chiah ē-sái。」
「Án-ne kám iáu无够额？Tio̍h koh khah....」
郭万春对清文所讲刻薄ê话真oh得理解，soah感觉起gāng。
「咱tio̍h会án怎koh khah苦闷？台湾青年起初学日语真辛苦，然后....」
「你ê日语kám m̄是真liú掠à？」
清文用小khóa khau洗ê话气讲，m̄-koh, 郭万春心内充满热情，无感觉受tio̍h小khóa khau洗。
「然后是升学ê困难，咱tio̍h经过比日本学生koh khah困难ê升学过程。Án-ne真无简单毕业了后，就业mā会tú-tio̍h真chē窒碍。Án-ne ná会bē患tio̍h不安ê病症？」
「所以，我讲lín ê病iáu轻，tio̍h koh khah重病chiah好，án-ne chiah会思考死亡ê问题。」
「Bē了解，我bē明白。」
郭万春ê目神小khóa严肃起来，伊ê视线tùi清文移到边á ê游德仁，讲：「你kám明白？」游德仁无法度回答，koh kā论点移到清文。清文kah-ná对郭万春所讲ê话听kah真明白，用洋洋得意m̄-koh无热心ê语气「ngh-ngh」回答。总是，因为chit位青年ê想法siuⁿ过偏差，hō͘ 伊soah无讲bē-sái得。
「用脚头u想mā知，物质ê充足kah社会条件ê安定是siōng根本ê问题，m̄-koh, 虽然是án-ne, 若认为物资ê尾溜有带精神，he是大错误。Kan-taⁿ靠社会ê物资条件beh来解决人间ê痛苦kah不安是无chhái工，我感觉lín siuⁿ过注重物质。若用杯á当做物件，心当做是注入其中ê水来做譬喻。杯á ê形状若歪斜无正，水ê形状mā会tòe-teh歪斜。因此，水m̄是tùi形状来成做水，是在tī水本来ê味，tio̍h新鲜，bē-sái浊浊（lô-ta̍k）。近来少年人ê烦恼，看起来kah-ná真深刻，其实非常单纯。苦恼是片面ê，真正烦恼、不安á是怀疑，m̄是lín所体会ê niā-niā。生来to̍h有ê苦恼是经过内在ê孕育产生ê，m̄-koh, lín中间有啥物？当然，台湾今á日面对ê是大过渡时期，传统kah-ná chhit-thô物á受破坏，lín因为án-ne起混乱来烦恼。M̄-koh, tùi我ê目chiu来看m̄是án-ne。咱无气力来预防传统kah历史ê崩盘，beh kā它毁坏来重建，却无够额ê健康koh明朗ê精神，kan-taⁿ tòa hia哭痛nga̍uh-nga̍uh念，kám m̄是？想beh做koh无办法做出来，chit种政治上受压制ê tāi-chì重复讲kui百遍mā无啥物结果，不如虚心来处理—当然m̄是嘴讲讲leh to̍h有效—tio̍h kā心当做一张白纸，试做看māi。Chit-má m̄是拒绝殖民地ê条件kah制压ê时chūn，咱tio̍h会记得koh khah充实家己。自到taⁿ咱lóng一直想beh得tio̍h物质，若是无够额，就知影用机巧ê方向去夺取。低墙就peh过去，koân墙就se̍h过去，咱lóng实在知影好好á活落去ê方法，总是过一个会得过to̍h好ê生活，lóng m̄是彻底ê痛苦，因为无付出ê困难，无奉献ê痛苦。咱tio̍h tī物质tek kah精神tek lóng khiā tī「付出kah接受」（give and take）ê原则。想看到taⁿ咱有对日本付出啥物，kám是一千万石ê米á是十五亿万斤ê砂糖？—he只不过是台湾ê大自然kah土地ê产物，咱tio̍h加上koh khah丰富ê物件chiah好。台湾kah台湾人已经行到chit-ê地步。」
清文已经kah少年时代无仝，最近真少kā激烈ê精神表现出来，今á日却kā语言热情lóng拚拚出来。连郭万春mā无应半句话，对伊ê话ē-tàng一一反驳，m̄-koh全体来讲，陈清文高深ê人道精神，伊有被压倒ê感觉。
安子入来客厅。
郭万春kah游德仁经过绍介，就向陈夫人请安，ta̍k人lóng讲有tāi-chì就离开。
「来今á日显然讲了长篇大论ê话。」
安子看tio̍h清文phīⁿ-phēⁿ喘koh满面全汗，用巾á teh拭面，就án-ne对伊讲。
「对少年人说教，我已经有岁à。」
「我tú-chiah tú-tio̍h瑞文，听讲别人对郭万春ê批评无啥好。」
「He是，án怎讲leh？」
「听讲伊tī前ê公司煽动工人，所以hō͘ 人辞头路。」
郭万春有过chit-ê情形，清文起初to̍h知。M̄-koh, he是伊看出hit-ê公司ê经营结构kah制度中有矛盾kah弊病，伊chiah采用煽动ê手段来要求改善。Á伊对清文无仝ê创业精神有兴趣kah热心，beh来尽力效力。伊ê想法确实有khah偏向一pêng，只要清文家己ê做法四正，对雇用郭万春就免啥挂虑。
「Hō͘ 伊做看māi，若无好chiah kā伊辞头路。」
清文对安子án-ne讲，语气显出伊自信bē发生hit款tāi-chì。
「总是，伊倾向做tāi-chì大手笔，像讲这....」
清文指（kí）设计蓝图，向安子说明安置三条生产线机械ê工场设计。伊本来to̍h无想beh消极做事业，所以对郭万春ê积极态度并无感觉无适当。M̄-koh, 安子想讲若大规模开始soah龙头蛇尾来结束，不如脚踏实地来做。
「若是景文mā出资做伙来做to̍h另外一回事。」
「若伊来合资to̍h无仝，到时会有一只银牛连厝门都chiⁿ bē入来。」清文án-ne讽刺讲。
「景文家己mā有想beh参加投资，我最近有听tio̍h chit-ê风声。」
「啥物？奇怪ê人，伊bat极力阻挡我neh。」
景文tī筹备会改变心意，tńg去了后koh忠告，hit款劝解伊停止创业ê态度，清文想tio̍h hit暗ê情景就bē爽快，景文chit-ê cha-po͘人ê心理到底是án怎？真正hō͘ 人sa无寮á门，有够复杂。
「伊是án怎讲leh？」
「Oh, 我mā无啥清楚，m̄-koh....。伊想讲阿兄kā伊误解....，kah-ná心头gāi-gio̍h gāi-gio̍h。」
「伊kám会挂意chit项事？」
「M̄知án怎，伊今á日无元气，看起来小khóa衰弱，头lê-lê kah-ná teh想啥物tāi-chì....伊一向m̄是án-ne, 而且玉帘tú-tú生gín-á ā....」
安子mā感觉真奇怪，她继续koh讲：「玉帘生cha-po͘ gín-á neh。」
「Án-ne真好！听讲非常o͘h生ê款。」
「Ngh, 婴á真细汉，hō͘ 人真烦恼m̄知饲会大项bē。」
「玉帘mā iáu未到无ài生gín-á ê年岁，kám m̄是？」
清文忽然想起玉帘hit暗吊tāu自杀ê tāi-chì án-ne讲，内心chhiak一下ǹg安子ê方向看。安子mā想起chit项事，若是玉帘无kā hit暗想beh隐瞒ê tāi-chì向清文讲，而且这有可能是景文今á日忧郁ê原因。Hit件事有去凿tio̍h景文做人心底ê痛，koh因为án-ne, 玉帘若是ē-tàng加减维持in夫妇中间ê感情....án-ne, 情势to̍h会khah好。
清文可能mā有án-ne teh想，加上忽然间两人ê视线交接，安子想讲in翁对hit暗ê事件mā有感触tī-.teh。总是，因为见笑tāi m̄-thang对人讲，tī叮咛玉帘chìn前，tī另外有机会对in翁讲chìn前mā tio̍h保密。
「M̄-koh, 晚年得tio̍h ê kiáⁿ khah可爱kám m̄是？」
「Ngh, 咱若是án-ne to̍h真好，kan-taⁿ一个独生女有khah孤单。」
「至少清子若是cha-po͘ to̍h khah好。」
「若是cha-po͘ , 会亲像tú-chiah hit-ê青年郭万春，虽然有喜乐，mā会成做烦恼ê因端。总是，因为咱无cha-po͘ kiáⁿ, 早慢tio̍h搬出chit-ê家。」
「Ngh, 咱来tī郊外起一间siap-tia̍p ê厝....我有teh考虑清子ê将来。」
「Ngh....」清文忽然感慨万千，双手交叉tī胸前，讲：「我想起咱结婚hit当时，hit时我想beh搬出chit-ê厝，你执意chit-ê家庭无beh搬离开，chit-má, 你颠倒....」
清文m̄是针对in bó͘ ê想法改变来不满，是因为时代ê变迁有所感慨chiah án-ne讲。M̄是安子ê心有改变，是in夫妇两人kah家族ê必然变化来引起ê。
「Hit时，咱sa无cháng是山á是海，想讲若离开陈家会变成流浪汉。Chit-má to̍h无仝款，你我结合kah真密切，kah陈家ê人mā是án-ne。....咱mā和睦做伙，无论去到tó位lóng bē迷失。....今后kan-taⁿ chhun清子ê tāi-chì需要咱操心。」
「Ngh, 清子ê tāi-chì....」清文ê面露出阴暗ê影。
「有一点á抛一大liàn koh tńg来到原所在ê感觉。」
「这mā是无办法。」安子沉重ê声讲。
清子出世带有台湾人kah日本人ê血统，tùi她ê成长kah环境来讲，讲她是台湾人khah正确。做人老母ê安子有观察tio̍h：清子早to̍h对chit种命运抱tio̍h反感ê意识形态，将来她tī两种血统ê中间会增加tó一种，是一个大问题。清子若嫁台湾人是siōng正统ê趋势，tāi-chì mā会khah简单。总是，安子teh想讲若亲像她本人kah清文ê情形，清子mā有可能发生无符合父母意思ê恋爱，所以bē-tàng无设想若她本人无愿意嫁hō͘台湾人ê情形。若是án-ne, 一直tòa tī陈家kho͘-á内，将来会成做种种不幸á是灾难ê因端。
清文比安子koh khah慎重思考chit方面ê问题，m̄-koh, 因为最近工作无闲soah bē记得chit项事。Chit-má忽然tú-tio̍h比凤梨事业koh khah微妙ê问题，伊ê心情变kah真奇妙ê沉重。
「不知不觉，她已经是女大当嫁ê时chūn。」
「她若是cha-po͘ gín-á, 咱to̍h ē-tàng减少chit-ê操心，m̄-koh....」
「分家伙ê tāi-chì, 我chiah koh kah老母参详一下。」
「无lah, 我并无急。我是看tio̍h玉帘ê婴á，chiah忽然想起将来ê tāi-chì。」
