《《陈夫人》日译台e5台湾小说 第二部》 |
 |
 |
|
 转寄 |
《陈夫人》第二部 亲子 第六章
作者 庄司总一着 赖永祥指导 林俊育台译 2016.12.11
安子kah清子tī四月上旬tùi日本tńg来。
亲子三人平时过tio̍h安静ê生活，四十日久bó͘无tī厝里，hō͘ 清文感觉加真寂寞。母kiáⁿ平安koh元气饱足tńg来，其中有从来m̄-bat看过清子hiah-ni̍h欢喜kah碰碰跳ê款式，tī清文干燥ê所在吹起清新ê风。
「Chit-ê cha-bó͘-kiáⁿ讲是爱田庄，无想beh tńg来。学校已经慢人一个月，真伤脑筋。」安子无意无意án-ne讲。
「Ná会leh，安子学校成绩超前，小khóa歇困一下无啥要紧。清子，kám m̄是？」
几工无看，因为北国ê冷风，少女ê皮肤peⁿ kah ân-ân，面皮mā小khóa红霓。Chit-ê cha-bó͘-kiáⁿ tī老父ê眼内，kah-ná新鲜ê水果hiah映目。
「日本kám有影hiah趣味？有chhit-thô啥物？」
「Chhit-thô真chē项....，钓煎饼、纸牌、雪人、滑(chhū)雪。爸爸mā做伙去，m̄知gōa好leh。」
清子面容表情显出老父无看tio̍h日本ê田庄情景真可惜。
「我来kā爸爸考试，tī田庄ê老父án怎叫？」
「我知，老父叫做 “Ta-ta-chiá”，老母叫做 “Ga-ga-chiá”。」
「Án-ne，你kám知大家án怎讲我ê tāi-chì？....M̄知ho͘ⁿh，叫我是
「Mian-khoh/爱儿/めんこ」。」
清子天真天真án-ne讲，hō͘ 父母笑微微。
「这是hō͘ 爸爸ê记念品。」
清子tùi行李箱the̍h出两个乡土尪á，日本ê东北地方有kā婴á hē tī用稻草做ê篮á叫做 “i-ju-meh/いづめ”ê风俗，就是取chit-ê形ê尪á。
「无比这koh khah好ê记念品à，你chit-ê gín-á koh知我爱艺术品，有够巧to̍h tio̍h....真可爱ê尪á，这kám mā是叫做「爱儿/めんこ」？」
「Ngh, 叫做 “I-ju-meh/いづめ” lah，田庄ê家，阿婶ê婴á mā hē入去hit内面，讲是真温暖、真爽快。M̄-koh，我烦恼án-ne hē tī篮á内，身躯kám会伸长？我tiāⁿ-tiāⁿ kā尪á tùi “I-ju-meh/いづめ”抱出来。」
「总是，我mā hō͘ 妈妈hē入去hit内面，屎尿mā lóng流出来。」
「讨厌，你chit-ê人....」
安子án-ne讲，koh kā清文睨一下，伊随时无koh笑，目chiu移去看乡土尪á ê面，虽然无啥物无爽快，却有小khóa寂寞ê感觉。Tùi久久无做伙ê亲子欢喜ê气氛中，kan-taⁿⁿ伊露出in母kiáⁿ tùi tńg来ê欢喜，忽然受tio̍h安子án-ne teh嫌，总是感觉有劝解ê语气。
「若是用台湾ê摇篮kā我养大，我mā会像爸爸hiah-ni̍h koân大kám m̄是？」
「M̄-koh，iáu是日本ê气候khah好，你kám m̄是有khah肥起来？血气mā khah好....你tī hia有食真chē丝葱ho͘ⁿh。」
安子kah-ná刺目来避开清文无恶意koh温柔ê视线，行oá去壁龛来看挂图。....Hit-ê无够额ê蔬菜，bat成做in夫妇之间精神的结连ê原因ê日子。安子tú嫁来台湾ê陈家头无jōa久，hō͘ 产褥热bú kah神志不清，一直乱念「丝葱」ê时，清文不止á烦恼她有思乡病ê象徵。Hit当时，伊ê爱情非常强烈，koh受民族的ê偏见束缚，对in夫妇来讲，确实有意识tio̍h宿命ê安排。In mā了解久长经验ê训示，民族的ê偏见kah无一致ê困难，社会全体ê条件之下有宿命，tī小小个人ê夫妇范围内，m̄是hiah-ni̍h根本的ê内疚。
「是lah，食是有食，m̄-koh，无感觉特别ê好味。因为是家己出身ê家乡，当然会怀念，总是去到位一下看，并无hiah-ni̍h怀念。木棉ê被（phōe），会ki-ki-kū-kū出声，房间阴暗湿气重，koh再lóng无娱乐，总讲一句是无方便。变做都市人了后，hit款ê田庄无koh再是好tòa ê所在。」
这是安子ê实际经验，对in翁lóng无挂虑全盘讲出来，清文mā非常清楚。因此，讲起丝葱ê tāi-chì，半sńg笑teh讲，mā绝对m̄是讨厌ê khau洗。只要母kiáⁿ元气饱足、欢欢喜喜回台，确实是thang欢喜ê tāi-chì。总是，讲siuⁿ chē关系记念品ê话kah放肆ê感情，小khóa有受愚弄ê款式。真无简单tńg来到厝，轻松吐一下气（khùi），mā是ài有chit种ê感受。
「你kā沈南苹（译注：1682年－？，清朝ê画家，tī 长崎停留二年ê时间中，传入花鸟画ê写生kah技法，伊ê弟子熊代熊斐等人形成南苹派。）the̍h出来挂à....。」
安子终于注意tio̍h壁龛ê挂图，in收藏ê书画中间，清文siōng夸耀沈南苹ê鹌鹑图，特别看重。一下看去，tī紫坛ê台边有贵重ê吴须赤绘做装饰。清文用啥物心情teh等in两人tńg来，一直挂意tio̍h án怎来迎接，无必要koh讲。Kan-taⁿⁿ无闲家己ê tāi-chì，无挂意in翁ê心情，安子无意中感觉见笑。虽然是án-ne，清文完全无想beh来责备。
Chit-ê人tang时变kah hiah温柔ê好老父，安子ê胸坎á忽然cha̍t起来。 讲有关系事业ê人客来，清文就去会客室。然后，koh有玉帘生kiáⁿ ê消息，安子就行去hit所在。 留落来清子一个人，忽然轻松起来，闲闲无tāi-chì ê款，tī cha-se-khih/座敷客房边á ê藤椅坐落来。她the̍h出画图纸，tú想beh用画图笔画啥物ê时，女婢ê阿英来到她ê边á，kā她无tī-teh ê时发生ê tāi-chì—玉帘ê cha-bó͘-kiáⁿ 美圆hō͘空气枪phah-tio̍h，一蕊目chiu失明，阿阵逃亡ê内情，一一讲出来。几十日夫人kah小姐无tī厝ê中间，阿英一直渴望beh讲话。自从阿英kā清子洗尿chū-á，唱台湾gín-á歌hō͘ 她听ê时算起，阿英来chia做工已经十几年ā。Hit中间有两年离开chit-ê家，有下级官员ê台湾人讲亲chiâⁿ，去到位一看，hit-ê cha-po͘人已经有bó͘ à，她结局hō͘ 人关tī每个月用十圆租来ê lah-sap房间内。两年后koh tńg来清文kah安子ê所在到今á日，她相信无有比chia khah好ê所在，知影tio̍h óa靠人，义理坚定，有戆直ê精神。Tī chia小家庭ê生活，安子kah清子lóng kā她当做家族来对待。Chit种ê好待遇想讲会小khóa得意忘形，即使有chit种情形，ē-tàng十几年长期间hiah-ni̍h亲睦，其实lóng是靠谅情宽恕。
阿英所讲陈家ê传言，十二岁ê清子bē理解。她差不多lóng无关心女婢热心对她讲ê话，the̍h画图笔ê手一直teh振动。因为实际上，不管对手所讲ê有了解无了解，清子lóng teh想完全别项tāi-chì。
「无ài听lah，去走，去走！」
Gín-á终于发魔狂性ê脾气，ná会用台湾语án-ne讲。阿英phut一下面lóng膨起来，kah-ná是因为chit-ê cha-bó͘ gín-á有阿婶ê关系，就厚厚念行tùi灶脚去。
清子热心继续画图，iáu未画好势就tàn掉，一直用新ê画图纸。Tùi五六岁to̍h开始爱画图，m̄-koh，到taⁿ iáu未画好势，是因为她tùi画图无真热心，总是m̄知teh想啥物别项tāi-chì。Kan-taⁿⁿ teh想明á载tio̍h去学校—he无趣味，为tio̍h beh扫除tiāⁿ-tiāⁿ进入头壳内ê hit-ê想法，想beh用画图笔来kā它擦消。学校若歇困一个月，m̄是神经大条ê gín-á mā会不安，会急kah坐立不安。M̄-koh，清子颠倒反，学校永远歇困是她siōng欢喜ê tāi-chì。会有ná亲像病人恢复期hit款ê爽快kah安然ê另外一个原因，她会记得无好ê秘密欢喜kah心情好ê胜利感。老母ê后头厝kah hiah-ê田庄ê人情风物，确实hō͘ 她新奇ê吸引力，m̄-koh，清子活跳跳tńg来，想讲永远免去学校，这mā是异想天开ê经验。....总是，明á载开学，老师kah朋友lóngkā她叫做「陈小姐」。Ná会án-ne leh？Ná会bē-tàng bē-sái叫我家己老母后头厝ê姓「五十岚」？Ná会m̄是叫做「佐藤」á是「斋藤」leh？连姓「陈」来讲，ná会有「清玉」，有「清莲」，m̄是「清瑛」leh？
Khiā tī建仁寺墙外ê苦楝á树，白头壳á来唱一节、两节to̍h koh飞走去。微微á风吹来，真迷人，有时chūn小khóa kā树叶á吹koân。庭院内其它ê树á，iáu是初夏ê黄色，受光线照来引起小khóa烧热ê气氛里，lān神lān神iáu teh困。 讲阴暗kah幽灵是thang惊ê，总是，清子是惊完全别款ê异样恐怖，为tio̍h无ài绞入去hit-ê寂静ê深渊，掠tiâu画图纸来画hit-ê叫做“I-ju-meh/いづめ” ê乡土尪á。虽然客房ê桌顶有排两sian mo͘-té-luh，清子lóng无teh看....
「清子小姐，你tńg来ā。」
阿明tùi庭院ê紫色门探头出来讲。
「我入去mā无要紧ho͘ⁿh，阿伯kah阿姆kám是lóng无tī-.leh？」
阿明tùi续接门边ê阳台peh起来。身材无koân，声音koh低，小心细腻，有提心吊胆ê款式。总是，伊一下出现，寂静ê镜框都会破kahli-li-lak-lak。少年人ê面chhiō-tio̍h户外ê日光to̍h热phut-phut，身躯看起来kah-ná有自由ê风。
清子peh开大蕊目chiu来看，因为阿明已经是一个高中生，穿一领新形ê秋天制服真大pān，kah-ná有浆过糊á黏kah真硬chiaⁿ。帽á mā因为日曝流汗koh乱sú用，变kah皱pih-pah，鞋á mā是án-ne，hō͘ 尘埃iàⁿ kah白siak-siak，行起路来，kiⁿ-kiⁿ-kóaiⁿ-kóaiⁿ，发出kah-ná活物ê叫声，koh笨chhiâng kah 踏bē-tio̍h土脚。He是tú-á初初开始，完全hō͘ 人感觉tio̍h新鲜ê气息。
「你kám有收tio̍h我ê phoe？」
「Ngh。」
「Ná会无kā我回phoe？」
清子tòa tī日本田庄ê时，阿明有写两三张phoe hō͘ 她。Kah-ná当然有会收tio̍h她ê回phoe ê权利，阿明用小khóa横霸ê口气讲。虽然有kóa责备ê意思，总是，chit-má tī伊细细ê灵魂充满新ê经验kah新ê感情，想beh chhìn-chhìn chhái-chhái kā它tháu放。
「你ná会tī日本tòa hiah久？会落第neh，清子小姐。」 阿明用khau洗koh威胁ê口气讲。
「你chit-ê讲大话ê中学生，你去落第好lah。」
清子tu嘴激气（khùi）口讲，因为她ê嘴唇厚，激hit-ê面有够pháiⁿ看。
阿明koh khah感觉失望，面对每年结业式做班ê总代表ê清子，会讲出「落第」hit款话，只不过是khau洗koh威胁ê滚笑，m̄是本来ê意思，清子会了解chiah tio̍h。无论如何，为甚么tio̍h bú kah hiah-ni̍h郁卒ê气氛。....Tiāⁿ-tiāⁿ lóng chit款形。
Koh khah细汉ê时chūn，阿明看tio̍h陈家其他ê gín-á无beh亲近清子，lóng会kā她维护，kah她做朋友，清子mā会亲近阿明。Tī beh读小学ê时chūn，hit-ê可怜ê亲爱kah信赖，忽然消失去，变成奇妙ê冷淡。两人仝学校，讲是日本人ê学校，m̄-koh mā有收少数优秀ê台湾人儿童做伙读。阿明三年ê时，清子入学一年á。Kan-taⁿⁿ一年á ê时，阿明招细汉ê叔伯小妹，早起时做伙去学校。总是，二年以后，m̄知甚么原因，阿明去招她，lóng讲你先去，若无to̍h是家己一个恬恬á提早去学校。Tī学校内面相tú，mā激空气m̄讲话，尤其是tī其他朋友面前，lóng激做无相bat ê外人。这tī gín-á中间是免不了ê奇怪ê见笑kah顾虑，m̄-koh，清子ê无关心á是回避ê倾向，mā延长到家庭内。清子差不多lóng无去阿明tòa ê所在chhit-thô，阿明有时á去清子ê所在，á是学校ê朋友来访，á是去仝所在练写字，清子lóng无hō͘ 伊面子，kā伊赶tńg去。
阿明真无幸福。M̄-nā是tī陈家，其他家庭ê gín-á大部分有两三个老母。M̄-koh，阿明hit-ê第二个老母是番á，所以特别受人白目看待，hit-ê阿阵chit-má mā无tī-.teh ā。老父瑞文koh再是chhìn-chhìn-chhái-chhái koh 意志轻薄ê人，以及老母春鸾ê无教养kah戆直，深深刻tiâu tī chit-ê敏感ê少年人ê脑海里。无论如何，家己chit房ê生活水准低，比较大伯清文ê文化的ê生活，koh khah感觉家己chit房ê低劣。细汉ê时chūn，无teh关心chit-ê爱慕kah欣羡，tòe teh渐渐成长，就变成khah清楚ê观念。因此，发觉hō͘ 叔伯姊妹弃嫌ê时，阿明有单纯寂寞以上ê复杂屈辱感。
阿明hit年ê春天入中学，tī chit-ê小都市无koh khah koân ê学校，所以想讲阿明成做中学生是真伟大。真chē少年人因为án-ne，chit种koân-koân飞舞ê灵魂，tī第一学期应该bē降落来地上。Chit-má tī清子ê面前出现，是对屈辱ê报复，mā是beh ài iáu细汉ê表小妹来kā伊认同。
阿明靠tī阳台ê hōaⁿ手，目chiu金金看koh beh开始画图ê冷淡清子，小khóa怨恨就受气。
「清子小姐，kám无beh来去chhit-thô？」
「Ngh，无ài lah。」
阿明对chit种粗鲁koh冷淡ê回答，心头火to̍h，m̄-koh，一个面iáu笑微微。阿明人真斯文，至少对伊chit-ê叔伯小妹，无论受tio̍h甚么款ê屈辱kah受气，mā是价值转换，kā它当做无要紧，当然tiāⁿ-tiāⁿ温柔对待。有时甚至面受抹乌kah乌mà-mà，伊m̄-nā无受气，koh gia̍h起笔来，tī鼻孔下面画嘴须，hō͘ 大家笑哈哈。
总是，阿明今á日ê感情ná亲像风teh吹，bē堪得受tio̍h小小压制，若无深入虚假隐瞒ê隙孔，无法度了解真相。
「你teh画啥物？」阿明kah-ná云中飞车ê高压气势行oá来。
「He是啥物？.....Ah, 是he o͘h。」阿明注意tio̍h桌顶ê乡土尪á，目chiu看hit sian尪á，用轻声ê气口讲。
「He kám是日本ê土产？真奇怪neh。」
阿明虽然m̄-bat看过mā m̄-bat听过“i-ju-meh/いづめ”，m̄-koh，清子所画ê尪á比实物koh khah奇怪。清子自细汉所画ê图，比一般gín-á ê幼稚画图有小khóa khah无仝。粗线条，立体感khah薄，hit种无要无紧ê幼稚画风，kah近代画ê抽象变形作风有类似ê所在。清文tiāⁿ-tiāⁿ ài讲清子ê画「有sêng Paul Gauguin（法国画家，1848 – 1903」，mā讲「毕卡索看tio̍h mā会kah意ê画」。因为清子ê画风是án-ne, tī学校ê画图班，受tio̍h担任老师ê观点无仝，致使所得ê分数mā无仝。 阿明mā承认清子ê其它学科成绩真优秀，总是，伊一直认为清子所画ê图真kē路。
「Hit-ê尪á叫做啥物？」
「我无behkā你讲。」
「到底叫做啥物....你无ài讲to̍h soah-soah去。....横直，一屑á to无beautiful（台语=súi）。」
「Biu/Beau....？」
「我mā无behkā你教。」
「Kám是英语？」
「Ah, 读初中就会读英语，chit-má起，我beh kā阿伯chia ê册读hō͘它了。」
Chit-ê少年人挺起胸坎，注神看清子，想beh加减膨风一下。
「Chit-ê英语是甚么意思？」
阿明看tio̍h清子起好奇心，心内得意kah起激动，表面上假做无啥tāi-chì，悠哉悠哉。
「是真súi ê话。Beautiful....beautiful, 花súi。Chit-ê清文阿伯ê厝kah花园，以及安子阿婶lóng真súi，全世界lóng真súi。」
「好ah, 好ah, lóng讲讲hiah-ê pháiⁿ话....」
清子tùi边á ê椅á khiā起来，怀恨在心kā伊睨，koh bih嘴。清子m̄知什么意思，总是感觉he m̄是pháiⁿ话。M̄-koh, 不管是好话á是pháiⁿ话，iáu是感觉家己hō͘ 阿明隐瞒，心内真bē爽快koh懊恼。
「A-ah, biu-ti-hul/beautiful是甚么？什么意思？」
清子kā阿明逼问，kā伊制服胸前ê钮á掠tiâu，新ê钮á金光闪闪。阿明忽 然感觉心肝the跳，她ná会án-ne掠tiâu我ê钮á？Ah, chit-ê钮á mā是beautiful。Chit-ê清子可爱ê手指来摸tio̍h钮á，是因为她对我ê认bat、尊敬、爱情。伊认为清子对伊ê讨厌是teh假仙，若是她真正讨厌伊，chit-ê世界就一屑á to无beautiful。阿明kā美ê醚suh入去身躯内，kui身躯soah 膨起来。就án-ne, 欢喜koh khah欢喜。伊iáu是假做无关心，继续维持hit种刻薄ê态度。
「我kā你讲好lah。」阿明表示behkā她讲ê款式，却koh含湖其词讲：
「Hit-ê尪á kah你所画ê图lóng无beautiful，你受气ê面mā变kah无beautiful à。」
Án-ne耻笑teh讲ê时，阿明hō͘ 清子giú一下向前。
「死鬼á, 我siōng讨厌阿明。」
伊若倾向清子giú ê顺势就好，却颠倒kā身躯phiaⁿ tó-páiⁿ去，钮á ê线soah断去，lak落去马赛克地砖顶面，发出可怜ê声。
「Ah, 钮á, 我ê钮á....」
阿明雄狂去jiok钮á, kā它拾起来。膨起来ê胸坎á忽然消落去，匀匀á疼痛起来，满目ê目屎含（kâm）teh。金属ê钮á lak tī土脚发出ê声，ná亲像伊teh哭。
