《《陈夫人》日译台e5台湾小说 第二部》 |
 |
 |
|
 转寄 |
《陈夫人》第二部 亲子 第八章
作者 庄司总一着 赖永祥指导 林俊育台译 2016.12.25
玉帘生一个cha-po͘ kiáⁿ。
因为隔十年无生，生产有khah困难，婴á有救起来，m̄-koh发育无好。虚弱ê性命连suh母奶ê积极性都无，一日到暗困kah ná死人，护士kā伊ngiau脚底，真无简单hō͘伊发出微微ê哭声，suh一两嘴奶，m̄-koh无一时á to̍h koh倦tah-tah困去。
因为婴á hiah-ni̍h-á虚弱，产后第三日，医生mā无赞成kā婴á抱出房间，玉帘mā无意愿，m̄-koh，ta-ke阿娇重视惯例，kan-taⁿ形式mā好，坚持kā婴á抱来大厅。
「阿母，危险，危险！若跋落土脚，beh án怎chiah好？」 缚脚行路hián来hián去ê阿妈想beh抱婴á，玉帘bē放心。她tī生产中面皮消瘦，面色苍白，kan-taⁿ ná龙眼核ê两蕊目chiu teh不安sih一下sih一下。
「你ná会讲pháiⁿ吉兆ê话，因为伊真kó͘-chui，hō͘我抱一下看māi。安子，你....」
阿娇kā玉帘ê婴á交hō͘安子，安子接过来抱，因为siuⁿ轻，抱tī手里无重量ê感觉，安子感觉有一点á可怜。总是，ta-ke kā婴á交hō͘ 她抱，安子非常欢喜。Ta-ke阿娇以前m̄-bat有过chit款tāi-chì, 可能因为年龄ê关系，尤其是家长阿山往生以后，她明显老落去，气势衰弱。她kah in翁阿山tùi起初to̍h感情无好，为tio̍h小khóa tāi-chì to̍h冤家kah彼此怨恨，kah-ná是为tio̍h冤家来结合ê一对男女。Taⁿ一旦减少一个对手，阿娇忽然siàu念in翁，心内涌起疼惜ê念头。既然án-ne, tī伊iáu tī-.teh ê时ná会无beh彼此和睦做伙，kám讲这to̍h是人生？In翁在生ê时，她真少提起阿山，伊一下死了后，阿娇常常讲伊án怎，讲伊án-ne, lóng是做善意ê解说kah o-ló。为伊chhiaⁿ-iāⁿ办理葬式，以后每tú-tio̍h春秋节期，去庙里烧香、poe̍h墓，她lóng诚心诚意teh做。Tī黄泉地下ê阿山看了mā会苦笑，kám m̄是？总是，她以前hit款chhiah-pê-pê ê性格，tòe年龄ê增加变khah柔和是事实，对清文kah安子mā比以前khah亲近。这是因为年纪大心变软ê关系，另外一点是时代ê演变—尤其是殖民地ê社会条件之下，认识剧烈变化ê时代形势，对潮流到底无法度抵抗有觉悟。
安子抱婴á，后壁续接阿娇、景文kah gín-á阿仁、美圆lóng行出产房。
「Chit-êcha-po͘ 婴á若是你ê to̍h好，你ná会无beh koh生？」
「M̄知什么原因....可能是因为我ê身体无好。」
Hō͘ ta-ke án-ne意外问起，安子kā她小khóa看一下。阿娇ê目chiu流露出慈爱ê目神，这hō͘ 安子感觉意外。她认为ta-ke无愿意m̄是亲生ê清文当做继承人，安子无生cha-po͘ kiáⁿ tú ha̍h ta-ke ê意思。清文夫妇无cha-po͘ kiáⁿ早to̍h成做chit-ê家族之间ê大问题，既然清文无cha-po͘ kiáⁿ，陈家直系继承人自然而然移hō͘ 次男景文。阿娇应该欢喜án-ne, chit-má忽然讲出chiah-ê hō͘ 人不安ê话，安子惊一tiô。
「无cha-po͘ kiáⁿ真伤脑筋，清文koh是新派ê人，无beh娶细姨，无办法只好去pun 一个kiáⁿ好lah。」
自tú-chiah一直无ài讲话ê景文，chit时反常讲：「我有四个kiáⁿ, m̄-koh无kah一个值得hō͘ 阿兄。」
景文自我消遣án-ne讲，伊kā cha-bó͘-kiáⁿ美圆ê手牵teh。 美圆遭遇意外ê灾难，因为治疗无效soah一蕊目chiu失明，前几工chiah出院。她穿浅水色ê súi衫，有刺绣ê kó͘-chui红袜á，带金手环，虽然kā她打扮kah真súi, m̄-koh, 可怜ê模样iáu是无变。Tùi景文ê目chiu看起来，她ê白色眼带是伊心肝ê痛。 「M̄-koh, 你看án怎？阿嫂，chit-ê婴á kám饲会活？....看伊chit款ê面容。」景文看婴á ê面án-ne讲。 安子想beh回答ê时，ta-ke阿娇「不以为然」讲：「我生你ê时，你koh khah瘦。因为chiah八个月，未足月，kah-ná猴山á kiáⁿ, mā是大kah真好势。」 「Hit时，hit-ê猴山á kiáⁿ若死去，我chit-má m̄免活kah chiah辛苦。」景文koh án-ne自我消遣。
「你讲啥物话？景文！我kah你生活四十年，m̄-bat看过像你chit-má hiah-ni̍h凊心。Ah, ná会án-ne no͘h, 可怜ê孙女一蕊目chiu失明，你koh损失一大笔钱。所以，我kā你讲，m̄-thang poa̍h-kiáu。」
「He是股票，股票kah poa̍h-kiáu无仝。....无m̄-tio̍h, mā ē-sái讲是chit种poa̍h-kiáu。」
今年，景文ê股票亏损bē少。伊一向凡事谨慎ê人，做tāi-chì小心koh再小心，hiah-ni̍h谨慎ê伊，这是真少有ê失败，想起来有够见笑。总是，伊有自信，损失ê破孔随时ē-tàng弥补，ē-tàng得tio̍h koh khah chē，伊to̍h是有chit种斗志ê男子汉。Tú-chiah老母所形容伊ê「凊心」，m̄是金钱ê缘故。
Cha-bó͘-kiáⁿ ê失明hō͘ 伊真大ê冲击。
「医生，kám无医治ê方法？有啥物好办法？....ná会是我ê cha-bó͘-kiáⁿ....」
景文对医生哀求，m̄-koh, kám讲lóng无免去失明ê方法？坚持「贸然」采用消极ê治疗，会引起交感性眼炎，有可能双眼失明。所以，医生讲siōng好是kā受伤hit蕊the̍h掉。
Tú好tī眼球手术hit日，证券行ê人来病院，劝伊kā手中ê股票卖掉。景文持有相当投机性ê股票约有一千股，hit当时明明知影是teh投机。Hit工伊无心chiâⁿ讲钱ê tāi-chì, 无法度就kā证券行ê人赶出去。结果第二工一工损失chiâⁿ万。
总是，kah cha-bó͘-kiáⁿ失去一蕊目chiu比起来，he只不过是物件ê数字。为tio̍h cha-bó͘-kiáⁿ ê目chiu, 投入千金mā bē m̄甘。M̄-koh, 俭koh khiû ê景文尽管有chit款献出ê想法，灾难以上bē koh生灾难。
即使投入全部ê财产mā bē-tàng买tio̍h kah-ná玻璃珠ê一粒眼球，这是真清楚ê tāi-chì, 景文感觉非常不可思议。这是一种甚么经验leh？经验m̄是指tú-tio̍h ê tāi-chì, 是指tùi 所tú-tio̍h ê现实来思考tāi-chì。景文一pái tú-tio̍h ê灾难，实在是新奇ê大经验。
「祸不单行」，第二夫人ê龙mā破病倒tī眠床。她原本kah-ná牛hiah勇壮，对第一夫人玉帘ê刻薄对待lóng忍受tiâu-.teh, mā不管对她ê指点，恬恬á做khang-khoè，生四个gín-á了后soah忽然身体衰弱。她koh真无ài去看医生，kan-taⁿ tùi庙里求得药签，去开中药店ê后头厝kap药á，kā蝉壳、干柿叶kah动物ê骨等等煎（choaⁿ）来食，身体一直虚弱落去。因为她固执拒绝医生ê诊断，身体到底tó位有koh样，景文lóng无法度知影。
Iáu有koh khah hō͘景文烦恼ê是长男阿仁ê tāi-chì。阿仁自细汉to̍h因为小聪明惹过麻烦，景文掠准伊是一个聪明ê gín-á, 心内不止欢喜。M̄-koh, 入去学校了后，成绩是料想bē到ê bái。中学一年级勉强升级，到今年升三年级ê时soah落第，而且因为食薰被发见，受tio̍h停学ê处分。
「真伤脑筋，玉帘，chit-ê gín-á ê将来，你想án怎chiah好？」
阿仁受停学hit日，景文kah in bó͘ 参详。伊认为chit-ê世界除了金钱，无有koh khah贵重ê物，面临长男受tio̍h停学ê处分，iáu是bē-sái无操心。
「今á日我hông叫去学校，受tio̍h耻笑。—Lín kiáⁿ大概有带不良ê性质，学校ê人án-ne讲。Hō͘ 人án-ne讲，实在无伊法。二年级to̍h食薰，大概mā常常去看电影。我bē了解，像我chit种规规矩矩ê人会生出chit种pháiⁿ kiáⁿ。」
景文想beh小khóa kā她khau洗，所以án-ne讲，玉帘无回答。若是以前，她会随时反驳讲：「你讲什么意思？你kám讲伊sêng我？」Koh会连续piàⁿ出五六句骂话。总是，最近她真少对in翁开炮，mā全然无变khah亲密。Tùi tang时起变成án-ne？无听她lô-lí-lô-so, 景文颠倒感觉khah轻松。总是，景文最近发见她ê态度变kah ná亲像生hūn人。Hō͘ 她弃嫌，她有表示反感，景文iáu ē-tàng忍受。Taⁿ完全无kā伊看在眼内，景文就挡bē-tiâu。
「操行是操行，算术bē晓，到底是án怎？伊自细汉to̍h ài sńg钱，mā真gâu算钱，我料想伊将来一定是一个seng-lí人。M̄-koh, 伊去学校了后，算术lóng无及格。其它学科免讲，算术ê成绩无好....。Oeh, 玉帘，你ná会恬恬m̄出声？」
景文迫切注视in bó͘ ê面，玉帘却冷淡镇静。M̄是内心有啥物意识ê镇静，是lóng无反应kah-ná火灰ê冷淡。Tī做月内中间，面siuⁿ过苍白无气色，kui身躯lóng是臭ta瘦ê影迹，苍白ê瘦面无抹红粉，目眉毛lak kah稀疏，准讲koh画眉，mā无koh像以前thang形容做「蛾眉」。景文头一pái看tio̍h失色ê玉帘，为甚么？景文实在bē明白，kám会是因为去教会chiah变成án-ne？
「你变à, 信仰神真好，m̄-koh, 你hiah-ni̍h-á宗教味....」
「我ê āi-chì, 你kám m̄是lóng无teh要紧。」
「Ná会无要紧？无论如何，翁á-bó͘ 总是翁á-bó͘。」
「我ê身躯已经奉献hō͘ 神ā」
「无lah, 你kah-ná是讲你离开我chia tńg去外家厝，去嫁hō͘ 神ê款。」
「可能真正是án-ne。」
「听讲有圣神投胎ê tāi-chì....。Mài滚sńg笑lah, 你chit-má腹肚生出来ê kiáⁿ, 到底是啥人ê kiáⁿ？....玉帘，信神信佛lóng无要紧，m̄-koh, mā tio̍h思考咱大kiá阿仁ê tāi-chì。」
「阿仁ê tāi-chì我想tio̍h to̍h胸坎á起痛。总是，想无办法，只有向神祈祷。」
景文感觉实在无她法，以前为tio̍h chit-ê bó͘ ê爱打扮、浪费kah硬性操烦过，chit-má她变kah án-ne, 失真kah kah-ná teh眠梦。人kám讲会有hiah大ê改变？无可能会án-ne。横直这是cha-bó͘人ê肤浅，反覆无常，只不过是热心宗教ê一时tek现象....。景文án-ne想，m̄-koh伊感觉bē-tàng hiah-ni̍h简单来处理，ná会有chit种ê感觉leh？我ná会bē-tàng kā它放bē记得？景文bē明白。伊chit-ê bó͘因为无疼ê夫妇生活真苦恼，soah想bē开来吊tāu自杀，景文想bē到hit暗会发生chit款tāi-chì。
「玉帘，请听我讲，自结婚hit工起，我to̍h一直hō͘ 你看bē起，chit-má mā仝款。M̄-koh, 我有我ê看法。」
景文真难得有chit款ê认真讲话态度，ē-sái讲结婚以来m̄-bat有ê认真态度。认真是指精神上ê意函，以前m̄知痛苦之味ê硬性心灵，chit-má开始痛起来。
「无论我chit-ê人án怎，我m̄是土豆á是槟榔，m̄是kan-taⁿ咬钱á是食银票。我积聚钱是为tio̍h beh hō͘ 家己有力量，堂堂做一个人ê力量。Mā ē-sái讲是—我家己对chit点无明确ê做法—mā有可能是一种ê对抗意识á是报复心态。大兄学问koân, 人格高尚，风度phiau-phiat，我真欣羡，怨恨家己kā伊bē比得。所以，我做一koá阿兄做bē到ê tāi-chì，kah-ná马车ê马一直跑teh无停工作。别人对我ê观感án怎我无所谓，我一点á都无感觉家己ê做法无好，我无后悔。....我认为家己án-ne做无m̄-tio̍h, 若是án-ne做致使别人....像讲你，玉帘....。假使hō͘你无幸福，he to̍h实在真失礼！真伤脑筋。我近来有án-ne teh想。」
「一屑á都bē伤脑筋。」
「Oeh, 你ná会hiah-ni̍h无同心体贴？你想看māi leh, 我实在尽心尽力teh工作，累积ê钱差不多已经满足，想讲今后thang清闲过日子，你ē-tàng随意做你ài做ê tāi-chì, 买你ài买ê物件。」
「多谢，m̄-koh, 我已经m̄是以前ê我。人总是有一工会死，景文，你kám有想过死亡ê tāi-chì？」
「啥物，你ná会讲chit款奇怪ê话？」
「我有teh思考死亡ê tāi-chì, mā有经过一pái ê死亡。你kám知我已经m̄是以前ê我？」
玉帘忧愁ê微笑teh咬景文ê心坎。He m̄-nā是笑笑leh而已ê一时tek情绪「低潮」，看起来kah-ná有一种深沉ê心思kā心灵缠绊teh—就是看bē-tio̍hê神秘ê神。
产后做月内kan-taⁿ简单厝内ê人做形式上ê仪式。
大厅内只有三四个近亲ê cha-bó͘人来参加，景文无ài奢华闹热是顾虑tio̍h近来家己厝内连续发生不幸ê tāi-chì。可能是因为心理作用，伊感觉hiah-ê cha-bó͘亲chiâⁿ虽然讲是来恭喜，mā是来探访美圆ê不幸遭遇。事实上，目chiu带保护盖ê美圆ê可怜款比婴á ê出世koh khah引起注目，而且，chiah十六岁ê阿仁比老父koân一寸，四肢发达，却受tio̍h学校停学ê tāi-chì，大家已经lóng知。
「你免出去，tiàm内面to̍h好。」景文用强制ê口气kā伊hat。 「Siuⁿ过无讲道理lah, 我ê小弟出世，我去kah大家做伙祝贺chiah tio̍h ā。」阿仁án-ne反驳了后就tòe-teh入去大厅。
当做阿妈ê阿娇抱婴á teh拜神佛ê时，阿仁伸手beh the̍h桌顶ê红龟粿，景文tī众人面前pháiⁿ势出声，就恬恬á kā in kiáⁿ伸出ê手股poe̍h开。总是，阿仁靠势chit-ê场面，出力kā老父ê手sak开，大pān大pān the̍h三四块红龟粿lok入去lak袋á。景文心内火to̍h, 看hit-ê比家己khah koân大ê kiáⁿ, 知影家己ê手股力输伊，忽然有输人一把ê感觉。 拜神了后，婴á由cha-bó͘-kán抱入去产房。
「Án-ne, beh号甚么名？」阿妈chē落去椅á就问景文。
「号名oh, 阿母，你想有甚么适当ê名？」景文有气无力án-ne讲。莫怪伊连号名都无气力想，因为婴á发育不良，连哭声ê气力都无，连suh奶ê气力mā无。医生讲tio̍h过一礼拜chiah有法度保正婴á ê生死。因此真oh得想像，iáu有满月á是度chè等等ê庆祝。
「真正若是阿山iáu tī-.teh....」阿娇目chiu ǹg神主牌位三声无奈讲：「阿山一定会号一个好名。伊真有学问，无m̄-bat ê字，清文、景文、瑞文，每一个lóng是出色ê名。」
景文kah安子参详问讲：「阿嫂，你kám有啥物好主意？」
「Ah, 我bē-sái lah, 无学问。M̄-koh取你ê名ê景，kā伊号名景行kám好？」
「景行oh, 是bē-bái, m̄-koh, 台湾无号kah老父仝名ê习惯。」
「Án-ne, 景....仁ná会？」
「这是破例，已经往生ê阿公kā伊号ê名，大家lóng知阿公万事无beh受束缚。总是，世间事无啥改变，ta̍k项照一般来做khah好。像阿仁án-ne kan-taⁿ好名无khah-choa̍h, 出kah chit-ê pháiⁿ kiáⁿ。」 景文án-ne遗憾讲，in kiáⁿ the̍h-tio̍h红龟粿，m̄知tang时已经溜出去。
「阿仁chit-ê名kah-ná日本人teh讲ê名不副实ê猴死gín-á。....Á无chit-ê婴á kā伊号做乞食....陈乞食。」
景文微微á笑án-ne讲，阿妈无反对。台湾ê风俗，若是tú-tio̍h婴á身体虚弱看起来无容易养饲长大ê情况，为tio̍h避邪，为tio̍h gín-á ē-tàng平安长大，会thiau故意kā婴á号一个pháiⁿ听 ê名。乞食ê名iáu算bē-bái, 有ê号做畜生、猪屎、罗汉、阿呆等等。
